Report na Saray Manangiyabawag na Panarian

Mabli ed si Jehova Iramay Mangaaro ed Sikato

SAY Lebanon so bantog lapud natural resources na satan nanlapula’d panaon na Biblia. (Salmo 72:16; Isaias 60:13) Say nagkalalo lan papablien ditan et say abalbaleg iran kiew a sedro, ya aanap-anapen bilang materyales na bilding lapud inkadakep, kabalingit, tan inkapaot na saratan. Nen inmunan siglo, walay bengatlan lalon mabli diad Lebanon. Ibabaga na Ebanghelyo nen Marcos a walay nanlapud Tiro tan Sidon, diad kadaanan a teritorya na Lebanon, “baleg ya ulop na katooan, lapud nadnadngelan da so saray angkakabaleg a bengatla a ginawa [nen Jesus], dinmago ra ed sikato.”​—Marcos 3:8.

Ontan met natan, mantutultuloy a mamapawala na bunga so Lebanon a mablin tuloy ed imaton nen Jehova. Say onggendan iran eksperiensia so mangipabitar ed saya.

• Sakey a kalangweran a Tasi a manngaran na Wissam so akerew a mangiter na 30-minuton talumpati ed klase to diad eskuelaan. Denesidi nen Wissam a maabig itan a pankanawnawa a pakapampulong. Kanian inusar toy libron Life​—How Did It Get Here? By Evolution or by Creation? tan angiparaan na sakey a paliwawa a nipaakar ed impamalsa. Balet, diad impakaimano ed materyal, inkuan na maestro nen Wissam a lapud importantin tema iman et nayarian nen Wissam a gawaen a 45 minutos so paliwawa to.

Sanen ginmapo lan manpaliwawa si Wissam, sikatoy pinatunda na maestro to tan angipabaki ed prinsipal. Ag-abayag et sinmabi so prinsipal, tan ginmapo lamet si Wissam. Legan a sikatoy onderengel ed saray tepet a pinalesa nen Wissam ed introduksion na paliwawa to, nainteresan so prinsipal tan inkuanto ya amin ya estudyante so kaukolan a nawalaan na kopya na saman a paliwawa.

Kabebekta, sananey lamet a maestro, ya ondadalan, so akaimano ed inkaliket ed loob na pan­klaklasean tan nantepet no antoy nagagawa. Sanen naamtaan to, tinepet to no anto so papaneknekan nen Wissam, say impamalsa odino ebolusyon. Say “impamalsa,” so inyebat da. Sanen naamtaan ton si Wissam et sakey ed Tastasi nen Jehova , inkuan na maestro ed klase: “Naimano yo ed paliwawa to a say siensia et susuportaan toy impamalsa, aliwan ebolusyon.”

Asukayan a sayan maestro et walaan manaya na sakey a kopya na libron Creation tan uusaren to itan ed panag-lektyur to diad unibersidad! Sakbay ya inmalis, intepet to no kasin nayarian toy ompawil ed ontumbok ya agew a kaiba iray estudyante to ta pian makapanpaliwawa si Wissam ed arap na klase to. Nanresulta iman ed sananey lamet a maabig ya impantasi nipaakar ed si Jehova.

• Napgaan ed danum na katuaan so 32-años a si Nina. Sakey ya agew et sikatoy inikdan na kapinsan to na sakey a Biblia tan impila to ed Pentecostal Church. Panliketan nen Nina so pambabasa toy Biblia tan naaralan to ed pambabasa to a saray Kristiano so nepeg a manpulong, kanian ginapoan ton intongtong ed saray kabkabat to. Amin ya akatongtong to et intepet da ed sikato: “Sakey ka ed Tastasi nen Jehova?” Satan so pankelawan to.

Anem taon ed saginonor, dinmalaw iray Tastasi nen Jehova ed ayaman nen Nina tan imbaga ra ed sikato so nipaakar ed Panarian na Dios. Diad pilimero et sinali ton anapan na lingo iray bangat da. Balet ta nalmoan ton amin ya ebat da et makatunongan tan nibase ed Biblia.

Akombinse si Nina ya aromog toy katuaan lapud saray naaralan to​—say ngaran na Dios, a Jehova; saray bendision na Panarian; tan arum ni. Indedika toy bilay to ed Dios tan abautismoan. Diad loob la na pitoy taon, manlilingkor si Nina bilang sigpot-panaon ya ebanghelisador. Talagan bebendisionan nen Jehova iramay peteg a mangaaro ed sikato.​—1 Corinto 2:9.