Panagrespeto ed Autoridad​—Akin a Naaandi?

“Onsabi panaon a say isusumpa ed niletneg ya autoridad, relihyon tan sekular, komunidad tan politika,bilang sankamundoan a nagagawa so nibilang a sankatalonggaringan ya ebento ed unor a dekada.”

DAKEL lan taon so linmabas nanlapula’d dekada na 1960, say dekada ya asalambit ed tagey et tinukoy na manag-awaran tan pilosopo a si Hannah Arendt. Natan et ompapalalo lawas so agpanagrespeto ed autoridad.

Alimbawa, onia so agano nin report na The Times ed London: “Arum ya atateng so mangipupulisay ed autoridad na maestro o maestra ed anak da tan no salien a disiplinaen so anak da et manreklamo ira.” Mabetbet, sano nadisiplina iray ananak da diad eskuelaan, onla iray atateng ed eskuelaan ya aglabat la mamagyaw noagta pantamian da iray maestro o maestra.

Onia so inaon ya imbaga na sakey a pinagkasangiyan na Association of Head Teachers diad Britanya: “Say ibabaga na publiko et ‘Walaray kanepegan ko,’ imbes a ‘Walaray responsabilidad ko.’” Likud ed isasaew dan ipurek ed ananak da so panagrespeto ed autoridad, arum ya atateng so agmangipepetek ed saray anak da​—tan agda met abuloyan so arum a manggawa ed satan. Saray anak a mangipipilit ed “kanepegan” da so naaabuloyan ya agmangikabilangan ed autoridad na atateng tan saray maestro o maestra, tan say resulta et nibaga la​—“sakey a balon henerasyon ya anggapoy panagrespeto ed autoridad tan walaan na daiset ya ideya nipaakar ed duga tan aliwa,” so insulat na kolumnista a si Mar­ga­rette Driscoll.

Impabitar na Time magasin ed artikulo na satan a “Lost Generation” so kawewetwet na dakel a Ruson tobonbalo diad impangaon ed imbaga na popular a managkansion na rap: “Panon a nawalaan na kompiyansa ed sosyedad so siopaman a nianak ed sayan mundo ya anggapoy ombayag tan anggapoy inkaparpareho?” Inmabobon so sosyologo a si Mikhail Topalov ed sayan sentimento: “Sarayan kalangweran et aliwan werek. Naiimano ra a papalikdoen na estado iray atateng da, naiimano ran naaandi so tipon tan saray trabaho ra. Kasin nailaloan tayo ira a manrespeto ed autoridad?”

Balet, lingo ya ikuan tayon napapatnagan labat ed malangwer nin henerasyon so agpanagmatalek ed autoridad. Saray totoo natan, antokamay edad da et anggapoy talek, kabusol da ni ingen, so dinanman a klase na autoridad. Kasin kabaliksan na saya ya anggapo lay autoridad a napanmatalkan? No naagamil ed dugan paraan, say autoridad, ya adeskribe bilang “say pakayari odino kanepegan a mangontrol, mangukom, odino mangisebel ed saray kiwas na arum,” so makatulong ed kamaongan. Satan so pakagunggunaan na saray indibidual tan ed komunidad. Say ontumbok ya artikulo so maningbat ed no panon ya ontan.