‘Say Kakabatan so Wala ed Saray Mapaabeba’
‘Say Kakabatan so Wala ed Saray Mapaabeba’
“Anto ta so kaukolan nen Jehova ed sika, noag say . . . manakar a mauy-uyamo [“mapaabeba,” NW] ed Dios mo?”—MIQUEAS 6:8.
1, 2. Anto so kapaabebaan, tan panon itan a midumaan ed inkamapalakbat?
AGLABAY ya ipaimano na sakey a prominentin apostol so inkasikato. Say makpel ya Israelitan ukom so anawag ed inkasikato bilang kauno-unoran ed abung nen ama to. Say sankatalonggaringan a toon nambilay ed kapiganman so angaksobi a limitado so autoridad to. Sarayan lalaki so angipatnag na kapaabebaan.
2 Say kapaabebaan so kasunian na inkamapalakbat. Say toon mapaabeba et walaan na seryoson panangipasen ed saray abilidad tan kakanaan to, tan aliwan mapangta odino mapasirayew. Imbes a magmaliw a makinon, malastog, odino ambisyoso, say mapaabeban too so sikakabat lawas ed saray limitasyon to. Kanian, rerespetoen tan ipapanengneng toy manepeg a konsiderasyon ed saray liknaan tan panmoria na arum.
3. Diad anton paraan a say kakabatan so ‘wala ed saray mapaabeba’?
3 Lapud maabig a rason, oniay inkuan na Biblia: “Saray mapaabeba wala so kakabatan.” (Uliran 11:2) Say mapaabeban too et makabat lapud tutumboken to so kurang ya aabobonan na Dios, tan papaliisan to so mapalakbat ya awawey a mangitonton ed kababaingan. (Uliran 8:13; 1 Pedro 5:5) Say kakabatan ed pagmaliw a mapaabeba so pinekderan na kabibilay na pigaran lingkor na Dios. Konsideraen tayo so taloran ehemplo ya asaglawi ed unaan a parapo.
Pablo—Sakey a “Sakop” tan ‘Mayurdomo’
4. Anton nikabiig iran pribilihyo so nanggayagaan nen Pablo?
4 Si Pablo so prominentin too ed limog na saray akaunan Kristiano, tan natalosan ya ontan. Diad kurang na ministeryo to, nilibon kilometro so binaroy to ed dayat tan dalin, tan niletneg to so dakel a kongregasyon. Niarum ni, si Pablo so pinalaboan nen Jehova na saray pasingawey tan langkap a mansalita na nanduruman lenguahe. (1 Corinto 14:18; 2 Corinto 12:1-5) Pinuyanan to met si Pablo a mangisulat ed 14 a sulat a kabiangan la natan na Kristianon Griegon Kasulatan. Mapatnag a nibaga tayon apalumbasan na saray sagpot nen Pablo so arum ya apostoles.—1 Corinto 15:10.
5. Panon ya impanengneng nen Pablo a sikato so walaay mapaabeban panmoria ed inkasikaton dili?
5 Lapud manunaan si Pablo ed Kristianon kimey, nayarin iilaloan na arum ya ikinon to so panederleng ed sikato, ya ipapangta to ni ingen so autoridad to. Balet, aliwan ontan lapud ta si Pablo et mapaabeba. Tinawag to so inkasikato bilang “kamelagan ed saray apostoles,” insan inyarum to: “Agak manepeg ya ingaran na apostol, ta inusil-usilan ko so iglesia na Dios.” (1 Corinto 15:9) Lapud sikatoy datin managpasegsegang ed saray Kristiano, agbalot alingwanan nen Pablo a diad panamegley lambengat na agkanepegan a panangasi so impakawalaan toy siglaotan ed Dios, nilikud ni ed panggagayagaan ton nikabiig iran pribilihyo na serbisyo. (Juan 6:44; Efeso 2:8) Kanian, ag-inisip nen Pablo a saray nikadkaduman agawaan to ed ministeryo so nagmaliwan to lan atagtagey nen say arum.—1 Corinto 9:16.
6. Panon ya impanengneng nen Pablo so kapaabebaan dia ed impideneng to’d saray taga-Corinto?
6 Nagkalautlan pinmatnag so kapaabebaan nen Pablo diad impideneng to’d saray taga-Corinto. Mapatnag ya arum ed sikara so asagyat ed saramay impasen dan prominentin manangasikaso, kalaktip lay Apolos, Cefas, tan si Pablo mismo. (1 Corinto 1:11-15) Balet ta agnampasirayew si Pablo ed saray taga-Corinto nisay inanamot to so pandinayew da’d sikato. Sanen binisita tora, agto impresenta so inkasikaton walaay “kaatageyan na pananalita, odino dia ed kakabatan.” Imbes, oniay impanukoy nen Pablo ed inkasikaton dili tan ed kakaiba to: “Ibilang kami komon na sakey a too a singa saray ministros [“sakop,” NW] nen Kristo, tan manangasikaso [“mayurdomo,” NW] na misteryos na Dios.” *—1 Corinto 2:1-5; 4:1.
7. Panon ya impatnag nen Pablo so kapaabebaan anggan sano manisimbawa?
7 Impatnag ni ingen nen Pablo so kapaabebaan sanen kaukolan to so mangiter na mapuersan simbawa tan panangidirehi. Sikato so akikasi ed saray kapara ton Kristiano diad panamegley na “saray panangasi Dios,” tan “lapud aro” imbes a say belat na autoridad to bilang apostol. (Roma 12:1, 2; Filemon 8, 9) Akin ya onia so ginawa nen Pablo? Lapud ta impasen toy inkasikato bilang ‘kakimeyan’ na saray agagi to, aliwan ‘katawan na pananisia ra.’ (2 Corinto 1:24) Andi-duaruwan say kapaabebaan nen Pablo so akatulong pian sikatoy lalon napabli na saray inmunan-siglon Kristianon kongregasyon.—Gawa 20:36-38.
Mapaabeban Panmoria ed Saray Pribilihyo Tayo
8, 9. (a) Akin a nepeg tayoy nawalaan na mapaabeban panmoria ed inkasikatayon dili? (b) Panon a nipatnag na saramay walaay responsabilidad so kapaabebaan?
8 Impatnag nen Pablo so maabig ya ehemplo ed saray Kristiano natan. Antokaman so responsabilidad a nimatalek ed sikatayo, kaukolan ya anggapo’d sikatayo so manisip ya atagtagey tayo nen say arum. “No say sakey a too manis-isip a wala so daiset a kakanaan to, anta andi gapon mogmo,” so insulat nen Pablo, “say inkasikaton dili tilaan to.” (Galacia 6:3) Akin? Lapud “amin nankasalanan, tan makulang ira ed gloria na Dios.” (Roma 3:23; 5:12) On, agtayon balot komon lilingwanan ya amin tayo et akatawir na kasalanan tan patey manlapud si Adan. Saray nikaduman pribilihyo so agmangitandoro ed sikatayo manlapud abebbeban makasalanan a kipapasen tayo. (Eclesiastes 9:2) A singa met ed biang nen Pablo, dia lambengat ed agmakanepegan a panangasi so pakapisiglaotan na totoo ed Dios, nilikud ni ed panserbi ed sikato tekep na sakey a klase na pribilihyo.—Roma 3:12, 24.
9 No nodnonoten iya, say toon mapaabeba so agmangipangta ed saray pribilihyo to nisay mangilastog ed saray agawaan to. (1 Corinto 4:7) Sano manisimbawa odino mangididirehi, gawaen to itan bilang sakey a kakimeyan—aliwan bilang katawan. Maseguron makapuy no manpasirayew so sakey a matalonggaring ed pigaran kimey odino anamoten to so pandinayew na saray kapananisiaan. (Uliran 25:27; Mateo 6:2-4) Say alenleneg a pandinayew a makanepegan ed amin et manlapud arum—tan kaukolan ya ag-itan inilaloan. No onsabi itan, agtayo nepeg ya abuloyan itan a pansengegan lay atagey a pangipasen tayo’d inkasikatayo.—Uliran 27:2; Roma 12:3.
10. Ipaliwawa pa no panon a saramay ompapatnag ya agnaiimano et nayarin petepeteg a “mayaman ed pananisia.”
10 Sano nimatalek ed sikatayo so sakey a responsabilidad, ontulong ed sikatayo so kapaabebaan pian napaliisan so agmanepeg a pangitandoro tayo’d inkasikatayo, ya ipasirayew ya onaaligwas so kongregasyon lapu ed saray sagpot tan abilidad tayo. Alimbawa, nayarin nikabiig so inkalangkapan tayo ed panagbangat. (Efeso 4:11, 12) Balet, no mapaabeba itayo, nepeg tayon bidbiren ya arum ed saray sankaabigan a naaralan tayo diad miting ed kongregasyon et agnipapaliwawa ed plataporma. Alimbawa, agkayo kasi napapaseseg sano nanengneng yoy sakey a mansusulon ateng a naynay a miaral ed Kingdom Hall a sankatabin toray ananak to? Odino say nagogonigon ya agi a matoor a mimiaral anggaman ed tuloytuloy a kidudunget to ed saray liknaan na ag-inkamakana? Odino say tobonbalo a tuloytuloy ya onaaligwas ed espiritual anggaman ed saray mauges ya impluensia ed eskuelaan tan inerman a pasen? (Salmo 84:10) Sarayan indibidual so nayarin agnaiimanon maong. Saray subok ed katooran da so maslak ya agnaiimano na arum. Ingen ta nayarin sikara so “mayaman ed pananisia” a singa saramay prominentin tuloy. (Santiago 2:5) Tutal, diad kasampotan et say panmatoor so pakagamoray pabor nen Jehova.—Mateo 10:22; 1 Corinto 4:2.
Gideon—“Say Kamelmelagan” ed Abung nen Ama To
11. Diad anton paraan ya impanengneng nen Gideon so kapaabebaan sanen sikatoy mitotongtong ed anghel na Dios?
11 Si Gideon, a mabiskeg a balolaki a kabiangay tribu nen Manases, so nambilay legan na magulon panaon ed awaran na Israel. Diad loob na pitoran taon, nanirap so totoo na Dios ed panaglames na saray Midianita. Balet, sinmabi so panaon na pangiliktar nen Jehova ed totoo to. Kanian, pinmayawar so sakey ya anghel ed si Gideon tan inkuanto: “Si Jehova wala ed sika, sika makapanyari a laki a mabayani.” Si Gideon et mapaabeba, kanian agto panliketan a maong so gloria na sayan ag-inilaloan a pandinayew. Imbes, sikato so marespeton angikuan ed anghel: “O Katawan ko, no si Jehova wala ed sikami, akin sirin et amin iraya agawa ed sikami?” Nilinew na anghel iray pamaakaran tan inkuan to’d si Gideon: “Ilaban mo so Israel ed lima na saray Midianitas.” Panoy inkiwas nen Gideon? Imbes a magunaet ton anamoten so nipapabtang ed sikato pian sikatoy magmaliw a palbayani ed bansa ra, oniay inyebat nen Gideon: “O Katawan, anto so pangilaban ko ed Israel? Nia, say pamilyak sikato so karukaan dia ed Manases, tan siak so kauunoran [“kamelmelagan,” NW] dia ed abung nen amak.” Agaylan kapaabebaan!—Uko-ukom 6:11-15.
12. Panon ya impanengneng nen Gideon so inkamakabat dia ed impanumpal to’d asainmin to?
12 Sakbay ton ibaki si Gideon ed bakal, sikato so sinubok nen Jehova. Panon? Niganggan ed si Gideon ya igeba to so altar nen ama ton parad si Baal tan itumba to so sagradon lusek ya akaalagey ed diking na satan. Sayan nipabtang so mankaukolay inkakpel, balet ta impatnag met nen Gideon so kapaabebaan tan inkamakabat diad paraan na impanumpal to’d satan. Imbes a gawaen to itan ed pakanengneng na publiko, ginawa itan nen Gideon ed labi ya anggapoy maseguron makanengneng ed sikato. Niarum ni, maalwar a ginawa nen Gideon so asainmin to. Intagar to so samploran lingkor to—pian nayarin walay manbantay leleg a sikatoy tutulongan na arum a mangigeba ed altar tan say sagradon lusek. * Antokaman so agawa, asumpal nen Gideon so nipabtang ed sikato lapud panamendision nen Jehova, tan sinmabi panaon et sikato lay inusar na Dios a mangibulos ed Israel manlapud saray Midianita.—Uko-ukom 6:25-27.
Ipatnag so Kapaabebaan tan Inkamakabat
13, 14. (a) Panon tayon nipatnag so kapaabebaan sano nipagamor ed sikatayo so sakey a pribilihyo na serbisyo? (b) Panon ya impanengneng nen Brother A. H. Macmillan so maabig ya ehemplo diad impangipatnag toy kapaabebaan?
13 Dakel ni so naaralan tayo ed kapaabebaan nen Gideon. Alimbawa, panon itayon onkiwas sano nipagamor ed sikatayo so sakey a pribilihyo na serbisyo? Kasin iisipen tayon unona so inkabantog odino impluensia a nagamoran ed satan? Odino kasin mapaabeba tan masimoon tayon nodnonoten no kasin nasumpal tayo iray kakaukolanen na satan ya asainmin? Si Brother A. H. Macmillan, ya asumpal lay mangaraldalin a kurso to nen 1966, so angipatnag na maabig ya alimbawa nipaakar ed saya. Si C. T. Russell, say pilimeron presidenti na Watch Tower Society, so angitepet ya aminsan ed si Brother Macmillan no anto so nibaga to’d onsalat a mangasikaso ed kimey no sikatoy naandi la. Diad impantongtong da, ag-inrekomendan tampol nen Brother Macmillan so inkasikato, anggaman sarasarag ton gawaen itan. Bilang resulta, pinaseseg nen Brother Russell si Brother Macmillan pian nodnonoten to no awaten to so asainmin. “Abigla ak,” so walan insulat nen Brother Macmillan kayari na pigaran taon. “Ninodnonot ko itan a maong, tan abayag ak a nampikasi lapud satan sakbay kon ibaga’d sikato a maliket ya onsuporta ed sikato diad anggaay nayarian ko.”
14 Kayarin tuloy na satan, inatey si Brother Russell, tan nagmaliw a bakanti so puestoy presidenti na Watch Tower Society. Lapud si Brother Macmillan so inkargado ed unor ya impanbiahe nen Brother Russell ed panagpulong to, oniay kuan na sakey ya agi ed sikato: “Mac, balbaleg so pankanawnawam a mangawat ed satan. Sika so nikabkabiig a manangilaman nen Brother Russell sanen sikatoy naandi la, tan inkuan to a nepeg min gawaen so amin ya ibagam. Bueno, sikatoy inmalis tan agla ompawil. Ompatnag a sika so mangituloy ed satan.” Inmebat si Brother Macmillan: “Brother, aliwan ontan so nepeg a panmoria’d sayan pamaakaran. Kimey iya na Katawan tan say alenleneg a posisyon a nagamoran mo ed organisasyon na Katawan et no anto so nanengneng na Katawan a manepeg a panginan to ed sika: tan segurado ak ya aliwan siak so para ed satan a kimey.” Insan walay inrekomenda nen Brother Macmillan parad satan a posisyon. Singa si Gideon, sikato so walaay mapaabeban panmoria ed inkasikato—sakey a panmorian nepeg tayon aligen.
15. Anto so pigaran praktikal a paraan a pakausaran tayoy pakatebek sano pupulongan so arum?
15 Nepeg a magmaliw tayo met a mapaabeba diad paraan na panusumpal tayo ed nipabtang ed sikatayo. Makabat si Gideon, tan agto nambanikelan a paingongoten iray onsusumpa’d sikato. Ontan met, diad panagpulong tayo, nepeg a magmaliw itayon mapaabeba tan makabat diad pitotongtong tayo ed arum. Tua, mibibiang itayo ed espiritual a pibabakal pian balintuagen iray “bengatlan mabiskeg a niletneg” tan “saray panagkatunongan.” (2 Corinto 10:4, 5, NW) Balet agtayo memelmelagen so arum odino manggawa na antokaman a pakaopendian da ed mensahe tayo. Imbes, nepeg tayon respetoen iray panmoria ra, idanet so nayarin pakapipaknaan tayo’d sikara, insan iyapasakey iray positibon aspekto na mensahe tayo.—Gawa 22:1-3; 1 Corinto 9:22; Apocalipsis 21:4.
Jesus—Say Sankatalonggaringan ya Ehemplo na Kapaabebaan
16. Panon ya impatnag nen Jesus a sikato so walaay mapaabeban panmoria ed inkasikaton dili?
16 Say sankaabigan ya ehemplo na kapaabebaan et si Jesu-Kristo. * Anggaman ed maapit a pisisiglaotan to’d Ama to, mabulos a binidbir nen Jesus a walaray bengatlan agla nasasakopan na pakauley to. (Juan 1:14) Singa bilang, sanen inkerew na ina nen Santiago tan Juan ya onyurong komon so duaran ilalak to ed dikingan nen Jesus diad Panarian, oniay inkuan nen Jesus: “Say yurong yo ed nikawanan a limak tan dia ed nikawigi a limak, agko kien so panangiter.” (Mateo 20:20-23) Diad sananey ya inkagawa, mabulos ya inaksobi nen Jesus: “Anggapo so nagawaan ko ed inkasiak; . . . agko anapen so linawak a dili, noag say linawa na saman so angibaki dia ed siak.”—Juan 5:30; 14:28; Filipos 2:5, 6.
17. Panon ya impanengneng nen Jesus so kapaabebaan diad impideneng to ed arum?
17 Diad amin a paraan et si Jesus so matalonggaring nen saray ag-ayadyarin totoo, tan sikato so walaay agnaparaan ya autoridad a nanlapud si Ama to, si Jehova. Anggaman kuan, si Jesus so mapaabeba ed pidedeneng to’d saray patumbok to. Agto ra binuntonan na makapasagyat a panangiparungtal ed pikakabat. Impatnag to so pililikna tan panangabagey tan inkonsidera toray pankaukolan na totoo. (Mateo 15:32; 26:40, 41; Marcos 6:31) Kanian anggano ayadyari si Jesus, sikatoy aliwan perpeksionista. Agton balot kinmerew na agnayarian na saray babangatan to, tan agto ran balot pinabelatan. (Juan 16:12) Agpankelawan sirin no akin a dakel so nainawaan!—Mateo 11:29.
Aligen so Ehemplo nen Jesus Nipaakar ed Kapaabebaan
18, 19. Panon tayon naalig so kapaabebaan nen Jesus diad (a) paraan na panmoria tayo’d inkasikatayon dili, tan (b) paraan na panagtrato tayo ed arum?
18 No say sankatalonggaringan a too a nambilay ed kapiganman et angipatnag na kapaabebaan, di mas lalo la ed biang tayo sirin. Mabetbet ya ag-aksobien na saray ag-ayadyarin totoo ya andian ira na absoluton pakauley. Balet, bilang pangalig ed si Jesus et panggugunaetan na saray Kristiano so magmaliw a mapaabeba. Aliwa iran mapaatagey diad panangipabtang day responsabilidad ed saramay kualipikadon mangawat ed satan; nisay matangas ira tan agmangawat na panangidirehi na saramay autorisadon mangipabtang ed satan. Diad pangipatnag na makooperan awawey, aabuloyan dan nagawa iray amin a bengatla ed kongregasyon dia “ed kasimpitan tan mauksoy.”—1 Corinto 14:40.
19 Pakiwasen itayo met na kapaabebaan a magmaliw a makatunongan ed saray iilaloan tayo ed arum tan magmaliw a makonsidera ed saray pankaukolan da. (Filipos 4:5) Nayarin walaan itayo na saray abilidad tan kinaabig ya anggapo ed arum. Ingen no mapaabeba itayo, agtayo lawas ilaloan so arum a manggaway bengatla unong ed paraan a kaliktan tayo. Lapud kabisado tayo iray mismon limitasyon na kada too, tekep na kapaabebaan a palabasen tayoray kakulangan na arum. Insulat nen Pedro: “Lalo la a tuloy, agkomon naumas so aro yo ed sakey tan sakey; ta say aro dakel so sakoban ton kasalanan.”—1 Pedro 4:8.
20. Anto so gawaen tayo pian natalonaan so antokaman a tendensian magmaliw a mapaatagey?
20 Unong a naaralan tayo la, say kakabatan so petepeteg a walad saray mapaabeba. Balet, anto no naromog yon walaan kayo na tendensian magmaliw a mapaatagey odino mapalakbat? Agkayo nadidismaya. Imbes, tumboken so ehemplo nen David, a nampikasi: “Manlapud saray mapalakbat a kiwas et pokpokan mo so aripen mo; agmo aabuloyan a saratan so mandomina ed siak.” (Salmo 19:13, NW) No aligen tayo so pananisia na saray lalakin singa si Pablo, Gideon, tan—manuna’d amin—si Jesu-Kristo, naeksperiensia tayon mismo so katuaan na saray salitan: “Saray mapaabeba wala so kakabatan.”—Uliran 11:2.
[Saray paimano ed leksab]
^ par. 6 Say Griegon salita a nipatalos a “sakop” so nayarin ontukoy ed manbebegsay ya aripen a wala’d abebbeban parti na baleg a bapor ya akaalasiran na saray taga-sagwan. Midumaan, saray “mayurdomo” so nayarin angimatalekan na kaaruman niran responsabilidad, a nayarin mangaasikaso ed sakey a kayarian. Anggaman kuan, diad imaton na karaklan a kakatawan, say mayurdomo so manseserbi a mipara ed say aripen a mansasagwan.
^ par. 12 Say impagmaliw nen Gideon a makabat tan maalwar so agnepeg ya ipasen ya inkapayakot. Diad pidumaan, say inkakpel to so pinekderan na Hebreos 11:32-38, a nilaktip si Gideon ed saramay ‘akala na biskeg’ tan “nagmaliw iran makapanyari ed bakal.”
^ par. 16 Lapud say laktipen met na kapaabebaan et say pikabat na sakey ed saray limitasyon to, agmanepeg a tawagen si Jehova a walaan na kapaabebaan. Balet sikato so mauyamo.—Salmo 18:35.
Kasin Nanonotan Yo?
• Anto so kapaabebaan?
• Panon tayon aligen so kapaabebaan nen Pablo?
• Anto so naaralan tayo ed ehemplo nen Gideon nipaakar ed kapaabebaan?
• Panon ya impanengneng nen Jesus so matalonggaring ya ehemplo na kapaabebaan?
[Tepetepet Parad Panagaral]
[Litrato ed pahina 15]
Lapud kapaabebaan nen Pablo, sikatoy pinabpabli na kapara ton Kristianos
[Litrato ed pahina 17]
Inusar nen Gideon so inkamakabat diad impanumpal to’d linawa na Dios
[Litrato ed pahina 18]
Impanengneng nen Jesus, ya Anak na Dios, so kapaabebaan diad amin a ginawa to