Dinmayo Ira ed Saray Isla na Pasipiko​—Pian Mankimey!

 MAUNGOL tan mas maliket nen say gendat so alagaran na saray pasahero diad saray international airport diad Brisbane tan Sydney, Australia. Sakey a grupo na 46 a totoo so imbaki ed Samoa a mansasnit ed petang pian mibana ed 39 ya arum ni a nanlalapud New Zealand, Hawaii, tan Estados Unidos. Saray bagahe ra so nikadkaduman tuloy​—saray reminta, a singa saray martilyo, lagari, tan barina​—aliwan gendagendat iran awit na sakey a biahero ed marakdakep ya isla na Pasipiko. Balet, say misyon da so nikadkaduma.

Diad indayo ra panamegley na dilin gastos da, sikaray mantrabahon duay simba bilang boluntaryo ed panagpaalagey a programa ya aasikasoen na Regional Engineering Office diad sangan opisina na Tastasi nen Jehova diad Australia. Say programa, a gagastosan diad panamegley na boluntaryo iran kontribusyon, et laktipen toy panagpaalagey ed saray Kingdom Hall, Assembly Hall, ayaman na saray misionaryo, tan sanga odino opisina na panagpatalos parad maples ya ibubulaslas na saray kongregasyon na Tastasi nen Jehova diad saray isla na Pasipiko. Kabaten tayo pa so pigara ed saray komikimey, a kaiba ed ulop na saray managpaalagey na Kingdom Hall ed mismon bansa ra.

Si Max, a say kimey to et manag-atep, so nanlapud Cowra diad New South Wales, Australia. Sikatoy walaan na asawa tan limaran ilalak. Si Arnold so nanlapud Hawaii. Sikato tan say akulaw to so walaan na duaran anak a lalaki, tan sikatoy sakey met a payunir, odino sigpot-panaon a ministro. Singa si Max, si Arnold so manlilingkor bilang sakey a matatken diad kongregasyon ed lugar da. Mapatnag, sarayan lalaki​—tan sikaray mipara ed kaslakan a kabiangan na proyekto​—et agnamboluntaryo lapu labat ta walaan ira na libren panaon. Imbes, sikara tan saray pamilya ra so makakaimano ed pankaukolan, tan labay dan gawaen so anggaay nayarian da pian ontulong.

Saray Komikimey a Nanlalapud Nanduruman Bansa so Mamapano ed Importantin Pankaukolan

Say sakey a pasen a no iner et nakakaukolan iray dunong tan serbisyo ra et diad Tuvalu, sakey a nasyon ed Pasipiko a walaan na manga 10,500 a totoo a manaayam ed niarawin grupo na siameran coral atoll ya asingger ed equator tan mamaamianen-sagur na Samoa. Saray isla, odino atoll, a balang sakey so walaan na dagup a kaawang a ngalngali 2.5 kuadrado kilometro. Nen 1994, say 61 a Tastasi diman so walad inkaganatan a pankaukolan parad sakey a balon Kingdom Hall tan sakey a babaleg ya opisina parad panagpatalos.

 Diad sayan parti na ampetang a Pasipiko, saray bilding so nepeg a nadesinyo tan nipaalagey a makatalindeg ed mabetbet a maksil iran bagyo tan alimbusabos. Balet pigpigara so naalan de-kalidad a materyales na bilding diad saray isla. Say solusyon? Amin a kagawaan​—manlapud atep tan saray patukok anggad saray muebles tan kurtina, inidoro tan saray panagbositsitan na shower, pati iray turnilyo tan pasak ni ingen​—so impatulor panamegley na saray container manlapud Australia.

Sakbay a sinmabi iray materyales, sakey a melag a grupo ya akauna la so angiparaan ed lugar a pangipaalageyan tan angiletneg ira na pundasyon. Insan sinmabi iray internasyonal a komikimey pian mangipaalagey, manpinta, tan mangompleto ed saray bilding.

Amin na sayan kimey diad Tuvalu, so amasanok ed sakey a klero diman ya angiyanunsio ed radyo a saray Tastasi so mangipapaalagey na “Tori na Babel”! Balet, anto ta’y katuaan? “Sanen ipapaalagey na totoo so Makasulatan a Tori na Babel et nalmoan ya agla ira makapantatalosan lapud winetwet na Dios so lenguahe ra, kaukolan dan ikaindan la so proyekto ra tan taynanan so tori ya ag-asumpal,” so inkuan na sakey a boluntaryo a komikimey a si Graeme. (Genesis 11:1-9) “Duman tuloy sano mankikimey parad si Jehova a Dios. Anggaman ed panduruma na lenguahe tan kultura, saray proyekto so lawas a nisusumpal.” Tan ontan so agawa ed sayan proyekto​—diad loob na duaran simba labat. On, 163 a totoo, pati say akulaw na primo ministro, so inmatendi ed seremonya na dedikasyon.

Si Doug, say superbaysor na proyekto, diad pangisasalaysay to’d naeksperiensia to, kuanto: “Makapalikliket so pankimey a kaiba iray boluntaryo manlapud arum a bansa. Walaan kami na nanduruman paraan ed panaggawa’d saray bengatla, nanduruman terminolohiya, nanduruma ni ingen a sistema ed panagsukat, ingen anggapo ed sarayan bengatla so sengegan na saray problema.” Diad impakasali la ed pigara ed saratan a proyekto, inyarum to: “Saya so nipurek ed kanonotan ko a diad tulong nen Jehova et saray totoo to so makapangipaalagey na sakey a bilding ed inerman a pasen ed sayan dalin, anggan panon la kasulinek odino kairap so lugar a pangipaalageyan. Tua, walaan kami na dakel a marunong a lalaki, balet say espiritu nen Jehova so manggagawa ed satan a posibli.”

Say espiritu na Dios so mamapakiwas met ed saray pamilya a Tasi diad saray isla pian mangitarya na tagano tan saray pampundoan, a panagsakripisyon maong ed biang na arum. Tan papablien itan a maong na saraman so makakaawat na ontan ya inkamaparawes. Si Ken, nanlapud Melbourne, Australia, so nankimey ed mipadparan proyekto diad French Polynesia. Inkuan to: “Linma kami bilang lingkor, balet singa arari so impantrato ra ed sikami.” Inerman a posibli, saray lokal a Tastasi so ontutulong met ed panagpaalagey a kimey. Diad Solomon Islands, nankikiwal na semento iray bibii. Sanlasus a lalaki tan bibii so tinmatdang ed naleleteb na uran a kapalandeyan tan angileksab ira na masulok a 40 tonilada na tabla. Tinmulong met iray kalangweran. Nanonotan na sakey a komikimey a taga-New Zealand:  “Nanonotan ko ni so sakey a kalangweran ya agin laki a taga-isla a makasakbat na duara anggad taloran bag na semento a maminpinsan. Tan sikatoy sanagew a nansuklar na graba pataktak man odino uran.”

Lapud impibiang na saray Tastasi diman ed kimey, angiter itan na sananey a gungguna. Onia so inreport na sangan opisina na Watch Tower Society ed Samoa: “Saray taga-isla ya agagin lalaki so akaaral na saray dunong a nausar da ed panagpaalagey na saray Kingdom Hall tan ed saray panag-apiger tan panagpaalagey lamet kayari na bagyo. Nayarin ontulong met itan ed sikara ed pananap day pambilay diad sakey a komunidad a no iner et dakel so nairapan ed satan.”

Angiter na Maabig ya Impantasi so Panagpaalagey a Programa

Si Colin so linma ed Honiara tan anengneng to so kipapaalagey na Assembly Hall diad Solomon Islands. Diad pandinayew to et onia so insulat to ed sangan opisina na Watch Tower Society: “Mankakasakey ira tan anggapoy maniingalan, saksakey met ira a pamilya.” Ag-abayag kayari na saman, sanen sikatoy akapawil ed lugar da diad Aruligo, 40 kilometro ed kaarawi, sikato tan say pamilya to so angipaalagey na dilin Kingdom Hall da. Insan sikatoy nansulat lamet ed opisina: “Akaparaan la so Kingdom Hall mi, pati say podyum, kasin nayari lay manaral dia?” Tampol a niyareglo iya, tan masulok ya 60 a totoo so maparanay ya onaatendi.

Anengneng na sakey a European Union adviser so proyekto ed Tuvalu. “Anganko et saksakey so komento na makakanengneng ed sikayo,” so inkuanto ed sakey a komikimey, “balet parad siak et milagro iya!” Sakey a bii a mantratrabaho diad telephone exchange so tinmepet ed sananey a bisitan boluntaryo: “Akin et malikeliket kayon amin? Anta alay petang dia!” Agni iran balot akanengneng na ikukurang na Inkakristiano ed ontan a praktikal tan dilin-panagsakripisyo a paraan.

Saray Sakripisyon Anggapoy Pagbabawian

“Say mantanem na daakan, manani met na daakan,” so ibabaga na Biblia diad 2 Corinto 9:6. Saray komikimey, saray pamilya ra, tan saray kongregasyon da so mantutultuloy ed mabunlok a pantatanem da diad panutulong da’d kapara ran Tastasi diad Pasipiko. “Say kongregasyon ko so anginagnag na masulok a kakatlo ed pilitik ed eroplano,” kuan nen Ross, sakey a matatken ed Kincumber, asingger ed Sydney, “tan say bayaw ko, ya akila met, so anginagnag na kaaruman a $500.” Sananey nin komikimey so angipasahe ed nanlakoan toy kotse to. Wala met so angilako na lote. Kaukolan nen Kevin so kaaruman a $900, kanian denesidi ton ilako so 16 a manduay taon laran malapati to. Diad panamegley na sakey a kabat, sikatoy akaromog na managsaliw ya angiyopresi na eksakton $900 parad saratan!

“Kasin nabawi so piliti tan ed asaew iran sueldo, a say dagup to et ngalngali $6,000?” Atepetan si Danny tan Cheryl. “On! Anggano dobli ni na satan, et nabawbawi itan,” so inyebat da. Si Alan, a nanlapud Nelson, New Zealand, inkuanto met: “No akin et nanggastosan koy linma ed Tuvalu, anta nayarian ko komoy onla ed Europa tan wala ni natilak a kuartak. Balet kasin agamoran ko iray bendision, odino awalaan ak kasi na dakerakel a kakaaro a nandurumay eksperiensia ra ed bilay, odino agawaan ko so sakey a bengatla parad arum imbes a parad siak? Andi! Sakey ni, antokaman so niiter ko ed saray agagin taga-isla, nagkalalo ni so niiter da ed siak.”

Say sananey nin tumbok pian ontalona ed programa et say suporta na pamilya. Anggaman arum a kaasawaan a bibii et makasarag a mila ed saray kaasawaan da tan ontulong ni ingen ed pasen a pangipaalageyan, arum so walaan na maneeskuelan ananak ya asikasoen odino negosyo na pamilya a bantayan. “Say inkamabulos nen akulaw ko a mangasikaso ed ananak tan ed kimey ed abung legan ya anggapo ak,” so inkuan nen Clay, “so babaleg a panagsakripisyo nen say pansasakripisyok.” On, amin a kaasawaan a lalaki a makasarag a mangawit ed kaasawaan da so maab-abuloy ed satan!

Nanlapud inkasumpal na proyekto ed Tuvalu, saray boluntaryo a komikimey so angipaalagey na saray Kingdom Hall, Assembly Hall, ayaman na misionaryo, tan saray opisina parad panagpatalos diad Fiji, Tonga, Papua New Guinea, New Caledonia, tan ed arum nin pasen. Dakel nin proyekto, pati pigara ed saray lugar ed Abalaten-bukig ya Asia, so siansia nin iplaplano. Kasin wala so magenap iran komikimey?

Mapatnag ya aliwan problema itan. “Balang sakey dia ya akibiang la ed internasyonal a panagpaalagey iran proyekto so mikakasin nodnonoten ira sano wala lamet so akaplano,” so insulat na sangan opisina diad Hawaii. “Kasempet da ed lugar da, itiponan da lamet itan.” Panon ya ag-ontalona so programa no iyarum mo so mayaman a bendision nen Jehova ed andi-siblet a dedikasyon a singa ontan?

[Litrato ed pahina 9]

Materyales parad proyekto

[Saray litrato ed pahina 9]

Saray komikimey diad pasen a pangipapaalageyan

[Saray litrato ed pahina 10]

Diad pakakasumpal na saray proyekto, manggayaga itayo ed agawaan na espiritu na Dios