Tepetepet Manlapud Saray Managbasa

Lugan na Isaias kapitulo 53 so bantog a Mesianikon propesiya. Oniay kuan na bersikulo 10 unong ed New World Translation: “Aliketan a mismo si Jehova ed impamairap ed sikato; sikatoy pinabeblay to.” Antoy labay ya ibaga na saya?

Mainomay a natalosan no akin ya onlesay tepet nipaakar ed Isaias 53:10. Ag-isipen na saray tuan Kristiano a say maabagey tan matamoy a Dios et manliket ed pamairap odino pamasakit ed siopaman. Mangiiter so Biblia ed sikatayo na basiyan ed panmatalek ya agmaliket so Dios ed pamairap ed saray anggapoy kasalanan. (Deuteronomio 32:4; Jeremias 7:30, 31) Diad loob na saray siglo et nayarin inyabuloy nen Jehova so panirap makasengeg ed saray rason a mitunosan ed kakabatan tan aro to. Balet seguradon aliwan sikato so sengegay impanirap na inad-aron Anak ton si Jesus. Anto sirin so peteg a kabaliksan na sayan teksto?

Bueno, natalosan tayo so kabaliksan na satan no konsideraen tayon intiraminti so bersikulo, a tandaan tayon amiduan nausar so salitan ‘liket.’ Oniay nabasa ed Isaias 53:10 unong ed New World Translation: “Aliketan a mismo si Jehova ed impamairap ed sikato; sikatoy pinabeblay to. No iganam so kamarerwa to a bilang apay lapud impakasumlang, nanengneng toray ilalak to, parukeyen toray agew to, tan diad lima to et ontalona so panliketan nen Jehova.”

Ipapanengneng na intiramintin mensahe na Biblia a “say panliketan nen Jehova,” ya abitla ed sampot na bersikulo, so nisentro ed kasumpalan na gagala to diad panamegley na Panarian. Say panggawa nen Jehova ed saya so mangiyalangon ed inkasoberano to tan mangibulos ed matulok a totoo manlapud atawir a kasalanan​—saray kasalanan tayo. (1 Awaran 29:11; Salmo 83:18; Gawa 4:24; Hebreos 2:14, 15; 1 Juan 3:8) Say tombok na amin na saya et kaukolan a say Anak na Dios et magmaliw a too tan mangiyapay na dondon bagat. Singa kabat tayo la, diad pakagawa na satan et talagan manirap si Jesus. Ibabaga ed sikatayo na Biblia a ‘naaralan toy katutulok manlapud saray bengatlan nanirapan to.’ Lapud satan et agunggunaan si Jesus ed impanirap to.​—Hebreos 5:7-9.

Amta la ed saman nen Jesus a say matalonggaring a kurson alaen to et managlawi ed pirmin irap. Malinlinew itan ed saray salita to ed Juan 12:23, 24, a pakabasaan tayon: “Say oras sinmabi la, a say Anak na too nitandoro. Tua, tua, kuan ko ed sikayo, No say bukel na trigo agnipelag ed dalin tan ag-ompatey, sikato so mansiansia ed inkasikato a bukor, balet no ompatey, manbungay dakel.” On, amta nen Jesus a kaukolan ton pansiansiaey integridad to anggano sagmaken toy ipapatey. Intuloy na salaysay: “Natan say kamarerwak agonigon; et anto so inkuan ko? Ama, ilaban moak ed sayan oras. Balet nisengeg ed saya sinmabi ak ed sayan oras. Ama, pagloriaen moy ngaran mo. Kanian sinmabi sakey a bosis a nanlapu ed tawen, a kuanto, Sikato pinagloriak, tan sikatoy pagloriaen ko lamet.”​—Juan 12:27, 28; Mateo 26:38, 39.

Unong ed sayan konteksto et natalosan tayoy Isaias 53:10. Kabkabat nen Jehova a saglawien ed nasagmak na anak to so kapairap diad sakey a pantalos. Ingen lapud sinononot si Jehova ed magloria tan malaknab a pankaabigan na satan, sikatoy aliketan ed kaukolan a sagmaken nen Jesus. Diad ontan a pantalos et ‘aliketan [si Jehova] ed impamairap,’ odino impanmekmek ed, say Mesias. Tan aliketan met si Jesus ed nagawaan to tan talagan agawaan to. Tua, unong a sinampotan na Isaias 53:10, ‘diad lima to ontalona so panliketan nen Jehova.’