Asingger Lay “Panaon na Panangipawil”!

Ag-abayag sakbay a tinmokotok si Jesus ed tawen, pigara ed matoor a babangatan to so tinmepet ed sikato: “Katawan, [kasin] ipawil mo so panarian ed Israel ed sayan panaon?” Isusuheri na ebat nen Jesus a walay panaon ya onlabas ni sakbay ya onsabi so Panarian. Legan na satan a panaon, saray papatumbok to so walaan na baleg a kimey a gawaen. Sikaray magmaliw a tastasi nen Jesus “ed Jerusalem, tan ed amin a Judea tan Samaria, tan angga ed kasampotan na dalin.”​—Gawa 1:6-8.

AGNAGAWAAN itan ya asainmin ed loob na pigaran agew, simba, odino bulan labat. Balet, tampol a ginmapo iray babangatan to a nampulong. Balet ta siansian interesado ira nipaakar ed panangipawil. Diad arap na baleg a karaklan a nantitipon diad Jerusalem, sinalita itan nen apostol Pedro, a kuanto: “Magbabawi kayo . . . tan manpataoli kayo, pian napunas so saray kasalanan yo: pian onsabi so saray panaon na painawa a manlapu ed arap na Katawan: Tan ibaki to so Kristo a tinandaan nipaakar ed sikayo, salanti Jesus: A sikato so kaukolan ya awaten na tawen angga ed saray panaon a kipawil na ami’ ganagana a sinalita na Dios ed sangi na saray masantos a propeta a nambilay nanlapud gapo.”​—Gawa 3:19-21.

Sarayan ‘panaon na panangipawil’ so pangiparaan ed “panaon na painawa” manlapud si Jehova. Say nipasakbay a panangipawil so onsabi ed duaran kagawa. Unona, niwala so makarepreskon espiritual a panangipawil, a nagagawa la natan. Komadua, saya so tumbokan na kiletneg na literal a paraiso diad dalin.

Ginmapo la so Panaon na Panangipawil

Singa impabitar nen apostol Pedro ed satan a baleg a karaklan diad Jerusalem, say tawen ‘so angawat ed si Jesus.’ Onia so kipapasen anggad nen 1914, sanen inawat nen Jesus so maarin pakayari to tan ginmapon nanuley bilang tinuro na Dios ya Ari. Diad satan a panaon, impasakbay nen Pedro, ya “ibaki” nen Jehova so Anak to diad pantalos ya abuloyan Toy Jesus a manumpal ed betang to bilang manunan instrumento ed saray gagala na Dios. Dedeskribien na Biblia so ebento diad simbolikon panangibaga: “[Say mangatatawen ya organisasyon na Dios so] nananak na sakey ya anak a laki, [Panarian na Dios a walad pakayari nen Jesu-Kristo a] manuley ed amin a nasyones a mansetro na balatyang: tan say anak to asamsam angga ed Dios, tan dia ed trono to.”​—Apocalipsis 12:5.

Balet saray nasyon so agmanpasakop ed pananguley nen Kristo. On, aatakien da iray matoor a mangaraldalin ya uuleyan to, a kabat natan bilang Tastasi nen Jehova. Singa saray akauna ed sikara ya apostol, saray Tastasi so agmasuyat a manumpal ed “kimey a panagtasi ed si Jesus.” (Apocalipsis 12:17, NW) Say isusumpa ed kimey a gagawaen na sarayan masimoon a Kristiano so onloloor diad nanduruman bansa. Nen 1918, saray responsablin membro na saray staff na hedkuarter na Watch Tower Society diad Brooklyn, New York, so inyarap ed korte lapud palson panamakasalanan tan agmakatunongan a  senentensiaan na mabayag a pakapriso. Diad saman a panaon et singano ontunda la so modernon-agew a panagpulong a kimey “angga ed kasampotan na dalin.”​—Apocalipsis 11:7-10.

Balet, nen 1919, saray nipriso a membro na saray staff na hedkuarter so nibulos tan naabsuelto manlapud amin a palso iran panamakasalanan. Inggapo da lamet a tampol so espiritual a panangipawil a kimey. Nanlapula’d saman, panggagayagaan la na totoo nen Jehova so malaklaknab ya espiritual ya ibubulaslas.

Ginawa so malaknab a kampanya pian bangatan so totoo ed amin a nasyon pian mangunor ed saray bengatlan ingganggan nen Kristo ed saray patumbok to a gawaen. (Mateo 28:20) Agaylan makapaliket so pakanengneng ed pigara a datin angipatnag na inaayep iran walna tan anguman ed panmoria ra! Nilakseb da la so daan a personalidad, a mamapawala na saray walna a singa say “sanok,” “maabuson panagsalita,” tan “mabanday a panagsalita,” tan insulong da so balon personalidad, “a diad panamegley na suston pikakabat et apasimbalo unong ed indengan na [Dios] ya amalsa ed satan.” Diad espiritual a pantalos, saray salita nen propeta Isaias so nasusumpal anggan natan: “Say lobo [say too a datin angipanengneng na singa-lobo iran walna] miayam naani ed kordero [too a pakapatnagay inkaulimek], tan say leopardo miakdol naani ed kanding; et say kilaw na baka tan kilaw na leon tan say pinataba mantitipon ira.”​—Colosas 3:8-10, NW; Isaias 11:6, 9.

Magano la so Malaknab a Panangipawil!

Niarum ni ed panangipawil a nanresulta ed espiritual a paraiso natan, say panaon so maples a manasingger sano say planeta tayo so magmaliw lan literal a paraiso. Say melag a kabiangan na dalin nensaman et sakey a paraiso sanen impasen nen Jehova so inmunan atateng tayo, si Adan tan Eva, diad hardin na Eden. (Genesis 1:29-31) Satan no akin a nibaga tayon say Paraiso et nipapawil la. Balet, sakbay a nagawa itan, nepeg a naekal ed dalin so agmangigagalang ed Dios a palson relihyon. Saray mapolitikan elemento na sayan mundo so manggawa ed saya. (Apocalipsis 17:15-18) Insan, saray mapolitika tan komersyal iran elemento, pati saray managsuporta ra, so naderal. Diad kaunoran, say unor iran kalaban na Dios​—si Satanas a Diablo tan saray demonyo to​—so nikalinsurong ed loob na sanlibon taon​—sanlegan na panangipawil a proyekto. Legan na satan a panaon, “say kalawakan tan say amagan dalin magayaga ra naani; et say kabueran a lawak manliket naani, tan manbolaklak a singa bolaklak.” (Isaias 35:1) Say intiron dalin so agla nagirogiro ed satan. (Isaias 14:7) Anggan say minilyon ya inaatey la so nabilay lamet diad dalin. Amin so makaeksperiensia ed panangipawil iran gungguna na dondon bagat. (Apocalipsis 20:12-15; 22:1, 2) Anggapo lay bulag, emel, odino piley a totoo ed dalin. “Say manayam agto naani ikuan, Mabeblay ak.” (Isaias 33:24) Kayarin tuloy na panampot na Sanlibon Taon ya Uley nen Kristo, say Diablo tan saray demonyo to so nibulos ed maganon panaon tan nanengneng da no panon a say gagala na Dios ed dalin so asumpal la ed satan a panaon. Diad kaunoran, sikaray naderal ed ando lan ando.​—Apocalipsis 20:1-3.

Sano say dalin so makasabi la ed sampot na sanlibon taon na panangipawil, “amin a bengatla a wala so panlinlinawa to” so mangigalang ed si Jehova, tan gawaen da itan ed ando lan ando. (Salmo 150:6) Kasin magmaliw kan sakey ed sikara? Nayari.