Ipanengneng so Panag-alagar!
Ipanengneng so Panag-alagar!
“Alagden ko naani so Dios na kilalaban ko: say Dios ko talinengen to ak naani.”—MIQUEAS 7:7.
1, 2. (a) Panon a naapektaan na makapuy ya awawey iray Israelita diad kalawakan? (b) Anto so nagawa ed sakey a Kristiano no agto bayuboan so suston awawey?
DAKEL a bengatla ed bilay so nayarin moriaen a positibo odino negatibo, mandependi ed awawey tayo. Sanen walad kalawakan iray Israelita, sikara so mamilagron atagano na manna. Inimano ra komon so naklangan a kaliberliber da tan akisalamatan dan maong komon si Jehova ya angitarya na tagano ra. Pakapatnagan komon itan na positibon awawey. Imbes, pinirawat da so dakerakel a tagano diad Ehipto tan inreklamo ran makapasawa lay manna. Agaylan negatibon awawey!—Numeros 11:4-6.
2 Nayarin ompatnag met a masayaksak odino maermen iray bengatla makasengeg ed awawey na sakey a Kristiano natan. No aliwan susto so awawey na sakey a Kristiano, mainomay a naandi so gayaga to, tan seryoso itan lapud, unong ya inkuan nen Nehemias: “Say liket nen Jehova sikato so biskeg [tayo].” (Nehemias 8:10) Say positibo tan magayagan awawey so ontulong pian mansiansia itayon mabiskeg tan niyalibansa tayo so kareenan tan pankakasakey ed kongregasyon.—Roma 15:13; Filipos 1:25.
3. Panon ya akatulong ed si Jeremias so suston awawey anggaman ed magulon panaon?
3 Anggaman sikatoy nambilay ed mairap iran panaon, impatnag nen Jeremias so positibon awawey. Anggan sanen apamintuan to iray sinagem ed inkagba na Jerusalem nen 607 K.K.P., nanengneng to ni so positibon aspekto na bengabengatla. Aglingwanan nen Jehova so Israel, tan say nasyon so mansiansia. Oniay insulat nen Jeremias ed libro na Tagleey: “Sikato so abig na linawa nen Jehova ya ag-itayo naupot, ta say panangasi to ag-onkulang. Sikara so balo a kinabuasan; baleg so katooran mo.” (Tagleey 3:22, 23) Diad intiron awaran, nanggunaetan na saray lingkor na Dios a mantinien so positibo tan magayagan awawey, anggaman ed sankairapan iran kipapasen.—2 Corinto 7:4; 1 Tesalonica 1:6; Santiago 1:2.
4. Anton awawey so impansiansia nen Jesus, tan panon itan ya akatulong ed sikato?
4 Anemlasus a taon kayari nen Jeremias, akapansungdo met si Jesus lapud positibon awawey to. Nabasa tayo: “Lapud gayaga a niiyan ed arap [nen Jesus] sinungdoan to so krus [“panamairapan a kiew,” NW], ya imbantak to so baing, et imyurong ed kawanan na trono na Dios.” (Hebreos 12:2) Antokaman ya isusumpa odino panamasegsegang so arapen nen Jesus—anggan say ot-ot ed panamairapan a kiew—pinansiansia to’d kanonotan to so “gayaga a niiyan ed arap to.” Satan a gayaga et say pribilihyo a pangiyalangon ed inkasoberano nen Jehova tan pamasantos ed ngaran to ontan met ed say ilalo ed kitarok na daakan iran bendision ed matulok a katooan diad arapen.
Agamilen so Panag-alagar
5. Anton kaslakan a kipapasen a makatulong ed sikatayo so panag-alagar pian pansiansiaen so suston panmoria ed saray pamaakaran?
5 No bayuboan tayo so awawey na kanonotan a singa si Jesus, agtayo nabalang so gayaga tayo ed si Jehova anggano saray bengatla et aglawas nagawa unong ed paraan tan panaon ya iilaloan tayo. Inkuan nen propeta Miqueas: “No nipaakar ed siak, onnengneng ak naani ed Jehova; alagden ko naani so Dios na kilalaban ko: say Dios ko talinengen to ak naani.” (Miqueas 7:7; Tagleey 3:21) Nipanengneng tayo met so panag-alagar. Panon? Diad dakel a paraan. Sakey lan bengatla et nayarin isipen tayo a lingo so ginawa na sakey ya agin walaay pakauley tan nakaukolan ya ipetek itan a tampol. Ontulong ed sikatayo so panag-alagar pian nodnonoten iya, ‘Kasin sikatoy talagan alingo, odino siak so nalilingo? No sikatoy alingo, agkasi aabuloyan ni nen Jehova iray bengatlan nagawa lapud natetebek To ya onaligwas ni itan a too tan agla nakaukolan so pirmin panametek?’
6. Panon a makatulong so panag-alagar ed sakey a mibabarangkaan ed personal a problema?
6 Nayarin nakaukolan so panag-alagar no nagogonigon itayo ed personal a problema odino mibabarangkaan itayo ed kaleteyan. Ipasen pa a kinmerew tayoy tulong ed si Jehova, balet ta wala nin siansia so problema. Anto sirin ey? Nakaukolan ya itultuloy tayon gawaen so antokaman a nayarian tayo pian resolbien so problema insan manmatalek ed saray salita nen Jesus: “Kerew kayo, et naikdan kayo; mananap kayo, et makaromog kayo; ompatok kayo, et nalukasan ed sikayo.” (Lucas 11:9) Mantultuloy a manpikasi, tan manalagar ed si Jehova. Diad matukoy a panaon tan diad dilin paraan to, ebatan nen Jehova iray pikakasi yo.—1 Tesalonica 5:17.
7. Diad anton paraan a makatulong ed panmoria tayo so panag-alagar nipaakar ed progresibon ililinew na pakatalos ed Biblia?
7 Legan a nasusumpal iray propesiya na Biblia, onlilinew so pakatalos tayo’d Kasulatan. No maminsan balet, nayarin isipen tayo ya atrasado so sakey a panamalinew. No agni itan sinmabi ed panaon a labay tayon nalinewan itan, mabulos tayo kasin manalagar? Nodnonoten, sineguro nen Jehova a kalkalnan niparungtal so ‘sagradon sekreto a nipaakar ed Kristo’ tan diad loob na manga 4,000 taon. (Efeso 3:3-6) Sirin, wala kasi so antokaman a rason pian magmaliw itayon agmakankaanos? Panduduaruwaan tayo kasi so “matoor tan makabat ya aripen” ya aturon mangitarya na ‘tagano ed dugan panaon’ parad totoo nen Jehova? (Mateo 24:45) Akin ya ikibot tayo’d inkasikatayo so maridios a gayaga lapu labat ta agnagnap so pakatalos ed amin a bengatla? Nodnonoten, si Jehova so mandedesidi no kapigan tan no panon so pangiparungtal to’d ‘saray maamot a bengatla.’—Amos 3:7.
8. Panon ya apaneknekan a makagungguna ed karaklan so inkaanos nen Jehova?
8 Nayarin nadismaya so arum lapud iisipen da a kayari na dakel a taon na matoor a panseserbi ra, nayarin agda la naalagar a nanengneng so “baleg tan makapataktakot ya agew nen Jehova.” (Joel 2:30, 31) Balet ta napaseseg ira no nengnengen da so positibon aspekto. Insimbawa nen Pedro: “Ibilang yo a sikatoy kilalaban so sungdo na Katawan.” (2 Pedro 3:15) Lapud inkaanos nen Jehova, minilyon ed dinmagsa niran maptek-impanpuso so akaamta na katuaan. Agta alay abig itan? Niarum ni, diad lalon panaanos ni nen Jehova, mas dakel ni so panaon tayo pian “isumpal [tayo] so dili a kilalaban [tayo] ed takot tan giwgiw.”—Filipos 2:12; 2 Pedro 3:11, 12.
9. No limitado lay nagawaan tayo ed serbisyo’d si Jehova, panon a makatulong so panag-alagar pian nasungdoan tayo so sakey a situasyon?
9 Ontulong met ed sikatayo so panag-alagar pian agnadismaya sano naaamper so serbisyo tayo ed Panarian lapud isusumpa, sakit, itatakken, odino arum nin problema. Iilaloan itayo nen Jehova a sikatoy sigpot-puso tayon lingkoran. (Roma 12:1) Balet, say Anak na Dios, ya “ilagak to so makabos tan naukolan,” so agmankakaukolan na mas ni nen say makatunongan a nagawaan tayo; ontan met ed si Jehova. (Salmo 72:13) Kanian, napapaseseg itayo a gawaen tayo so nayarian tayo, a maanos a manalagar anggad manguman iray kipapasen—balanglan diad sayan sistema na bengabengatla odino ed onsabi. Nodnonoten: “Say Dios aliwan agmatunong pian nalingwanan to so gawa yo tan say aro ya impanengneng yo ed ngaran to, ed impanulong yo ed saray sasanto ed saray pankaukolan da, tan ed panutulong yo ni natan ed sikara.”—Hebreos 6:10.
10. Anton agmaridios a walna so napaliisan na sakey a manaalagar? Ipaliwawa.
10 Ontulong met ed sikatayo so panag-alagar pian napaliisan so inkamapalakbat. Agmakalkaalagar so arum a nagmaliw ya apostata. Nayarin inisip da a wala so pankaukolan na saray pananguman, balanglan diad pakatalos ed Biblia odino ed saray pamaakaran ed organisasyon. Ingen ta, agda binidbir a say espiritu nen Jehova so mamapakiwas ed matoor tan makabat ya aripen pian manggawa na saray pananguman unong ed manepeg a panaon To, aliwan no naisip tayo lambengat a nakaukolan itan. Tan antokaman iran pananguman so nepeg a mitunosan ed linawa nen Jehova, aliwan unong ed personal iran ideya tayo. Inabuloyan na saray apostata so mapalakbat ya awawey a mangimpluensia ed panag-isip da, ya inkagapolan da. Balet no inagamil da so awawey na kanonotan nen Kristo, apansiansia ra komon so gayaga ra tan nansiansia ira ed limog na totoo nen Jehova.—Filipos 2:5-8.
11. Panon tayon nausar a makagungguna so panaon diad panaalagar tayo, a tutumboken iray alimbawa na siopa?
11 Siempre, say pamasiansia tayo ed panag-alagar tayo et agmankabaliksan a magmaliw itayo lan mangiras odino akameneng. Walaray bengatlan gawaen tayo. Alimbawa, nakaukolan ya okupado itayo ed personal a panagaral na Biblia, a nipanengneng tayo ed ontan a paraan so miparan interes ed espiritual iran bengatla ya impatnag na matoor iran propeta tan anggan saray anghel. Nipaakar ed satan ya interes, inkuan nen Pedro: “Nipaakar ed sayan kilalaban, saray propeta ya angipropeta na nisesengeg ed pamalangkap ya onsabi ed sikayo, inusisa tan inanap da a maseseg . . . saraya a bengatla so kaliktan na saray angheles a nanengneng.” (1 Pedro 1:10-12) Aliwa lambengat a personal a panagaral so nakaukolan noagta ontan met ed regular ya iyaatendi ed miting tan pikakasi. (Santiago 4:8) Saramay mangipapatnag a sinononot ira ed espiritual a pankaukolan da diad regular a pangaawat day espiritual a tagano tan pililimog da’d kapara ran Kristiano so mangipapanengneng ya aagamilen da so awawey na kanonotan nen Kristo.—Mateo 5:3.
Nawalaan na Realistikon Panmoria
12. (a) Anton kawayangan so nanggunaetan nen Adan tan Eva? (b) Anto so resultay intumbok na katooan ed kurso nen Adan tan Eva?
12 Sanen pinalsa na Dios so pilimeron sankaparis a too, ginetma to a sikato lambengat so manepeg a mangiletneg ed saray estandarte na maong tan mauges. (Genesis 2:16, 17) Kinaliktan nen Adan tan Eva so kawayangan manlapud panangigiya na Dios, tan nanresulta iya ed mundon naiimatonan tayo natan. Inkuan nen Pablo: “Kanian unong a say kasalanan linmoob ed mundo lapu ed sakey a too, tan say patey lapu ed kasalanan; et say patey ed satan linma ed amin a too, ta amin nankasalanan.” (Roma 5:12) Say anem a libon taon na awaray too nanlapula’d panaon nen Adan so angipatnag ed katuaan na saray salita nen Jeremias: “O Jehova, amtak a say dalan na too anggapo ed sikato lanlamang; aliwa a wala ed too a manakar a mangitonton ed saray kurang to.” (Jeremias 10:23) Aliwan pakadismayaan so pamidbir a tua iray salita nen Jeremias. Realistiko itan. Sasalaysayen na satan so amin a linmabas iran siglo sanen ‘walaan na pakayari so too ed sananey pian kaugsan to’ lapud nanuley so totoo a biig ed Dios.—Eclesiastes 8:9.
13. Anto so realistikon panmoria na saray Tastasi nen Jehova ed nagawaan na saray totoo?
13 Lapud kipapasen na katooan, amoria na saray Tastasi nen Jehova a limitado so nagamoran ed kaplesan a sistema na bengabengatla. Ontulong ed sikatayo so positibon awawey pian napansiansia tayo so gayaga tayo, balet ta aliwan satan so solusyon ed amin. Diad kagapo na dekaday 1950, impalapag na sakey ya Amerikanon klerigo so sankasaliwan a libro a tinawag na The Power of Positive Thinking. Isusuheri na libro a dakel ed saray babeng so natalonaan no arapen iratan tekep na positibon awawey. Seguradon makapadinayew so positibon panag-isip. Balet ipapanengneng na eksperiensia a limitaan na pikakabat, dunong, materyal a kayarian, tan dakel niran sengegan so nagawaan tayo bilang sinansakey. Tan diad sankamundoan, ag-ontalona iray totoo a manolbar ed saray problema—anggan panon kapositibo so panag-isip da!
14. Kasin saray Tastasi nen Jehova et walaan na negatibon awawey? Ipaliwawa.
14 Lapud realistikon panmoria ra ed saratan a bengatla, naaakusa iray Tastasi nen Jehova no maminsan a walaan iray negatibon awawey. Imbes, magunaet dan ibabaga ed totoo so nipaakar ed alenleneg a Sakey a permanentin makapanpaaligwas ed bilay na katooan. Aaligen da so awawey na kanonotan nen Kristo ed ontan a paraan. (Roma 15:2) Tan sikara so okupado ya ontutulong ed totoo a nawalaay maong a relasyon ed Dios. Amta ra a diad saginonor et mansumpal iya ed pankaabigan a tuloy.—Mateo 28:19, 20; 1 Timoteo 4:16.
15. Panon a papaaligwasen na kimey na saray Tastasi nen Jehova iray totoo?
15 Ag-ibabaliwala na saray Tastasi nen Jehova iray problema ed sosyedad—nagkalalo la ed makatilol tan agmakasulatan iran agamil—a walad kaliberliber da. Sakbay a magmaliw a Tasi nen Jehova so sakey ya interesado, sikato ni so manguman, a mabetbet a nakaukolan a manalona ed makaadik iran bisyo a kainglit na Dios. (1 Corinto 6:9-11) Atulongan sirin na saray Tastasi nen Jehova iray onkikiwas pian natalonaan da so panagbuanges, panagdruga, imoralidad, tan makaingganyon panagsugal. Saratan a nampasimbalo lan totoo so akaaral a manlegpet ed saray pamilya ra diad responsabli tan matuan paraan. (1 Timoteo 5:8) Sano natutulongan iray totoo tan pamilya ed onian paraan, ondaiset so problema ed komunidad—daiset laray adik ed druga, daiset laray kaso na karawalan ed loob na pamilya, tan arum nira. Diad pagmaliw a matulok ed ley iran mibabaley tan diad panutulong da’d arum a manguman ed kabibilay da, napapalemew na saray Tastasi nen Jehova so belat na responsabilidad na saray ahensian mangaasikaso ed saray problema ed sosyedad.
16. Akin ya agmibibiang iray Tastasi nen Jehova ed saray sekular a pakurang nipaakar ed panagreporma?
16 Kasin napasimbalo na saray Tastasi nen Jehova so moral a kipapasen na mundo? Bueno, diad apalabas a dekada, say bilang na aktibon Tastasi so dinmakel a manlapud kulang a 3,800,000 anggad nagmaliw a ngalngali 6,000,000. Satan so indaak na ngalngali 2,200,000, a dakel ed saratan so angitalirak ed agmatunong iran agamil da sanen nagmaliw la ran Kristiano. Apaaligwas so dakel a bilay! Balet, sayan bilang so dagdaiset no ikompara ed indaak na sankamundoan a populasyon legan na satan a panaon—875,000,000! Panggagayagaan na saray Tastasi nen Jehova so pakakatulong ed saray totoon onkikiwas, anggaman namomoria dan daiset lambengat manlapud katooan so ontonton ed dalan ya ompugta’d bilay. (Mateo 7:13, 14) Legan a tatalaranan na saray Tastasi nen Jehova so maabig a pananguman ed sankamundoan a say Dios lambengat so makagawa, ag-ira mibibiang ed saray sekular a pakurang nipaakar ed panagreporma, a mabetbet ya onggapo ed maabig iran getma balet ta mansumpal ed pakadismaya tan karawalan ni ingen.—2 Pedro 3:13.
17. Anto so ginawa nen Jesus pian natulongan iramay walad kaliberliber to, balet anto so agto ginawa?
17 Diad pankukurang da ed ontan a paraan, ipapatnag na saray Tastasi nen Jehova so mipadparan kompiyansa ed si Jehova unong ya impanengneng nen Jesus sanen sikatoy wadiad dalin. Nen inmunan siglo, si Jesus so nanggawa na milagro na panagpaabig. (Lucas 6:17-19) Pinaoli to ni ingen iray inaatey. (Lucas 7:11-15; 8:49-56) Balet agto inekal so problema a nipaakar ed saray sakit nisay dinaeg to la so kabusol ya ipapatey. Amta ton aliwa nin saman so panaon ya inggeter na Dios. Lapud walaan na matalonggaring iran abilidad na ayadyarin too, dakel komon so agawaan nen Jesus pian nasolbar iray graben problema ed politika tan ed sosyedad. Ompatnag a sikatoy labay a panuleyen na arum ed saray kapanaonan to tan onkiwas ed ontan a paraan, ingen ta impulisay itan nen Jesus. Nabasa tayo: “Sanen anengneng na saray totoo so tanda a ginawa to, inkuan da, Diad katuaan sikato ya so propeta ya onla dia ed mundo. Si Jesus sirin nen atebek to a ngalngali ra onla tan sikato so alaen da a pilit, pian sikato so gawaen da ya ari, sinmian lamet ed palandey ed kabukbukoran.”—Juan 6:14, 15.
18. (a) Panon ya impatnag a naynay nen Jesus so panag-alagar? (b) Panon ya anguman so kimey nen Jesus nanlapula’d 1914?
18 Ag-inmabuloy si Jesus a mibiang ed politika odino ed itutulong lambengat ed saray mairap-bilay lapud amta to ya agni asabi so panaon na pangawat toy maarin pakayari tan panggawa to’d saray kimey a pamaabig ed amin diad nanduruman pasen. Anggan sanen sikatoy tinmokotok tan nagmaliw lan imortal ya espiritu ed katawenan, sikato so mabulos a nanalagar ed aturon panaon nen Jehova sakbay ya onkiwas. (Salmo 110:1; Gawa 2:34, 35) Balet, manlapu la’d inkitrono to bilang Ari na Panarian na Dios nen 1914, sikato so “pinmaway ya analtalo, tan pian manalo.” (Apocalipsis 6:2; 12:10) Agaylay liket tayo a manpasakop ed inkaari to, bangta say arum a mankuan a Kristiano so nansiansia nin ignoranti ed saray bangat na Biblia nipaakar ed Panarian!
Panag-alagar—Pakadismayaan Odino Pakapanggayagaan?
19. Kapigan a say panag-alagar et ‘pabeblayen to so puso,’ tan kapigan a magmaliw itan a lapuan na gayaga?
19 Amta nen Solomon a makapadismaya so panalagar. Insulat to: “Say ilalo a nitantan pabeblayen to so puso.” (Uliran 13:12) Maseguron ombeblay so puso ed pakadismaya no say iilaloan na sakey a too et anggapoy basiyan. Balet, say panalagar ed saray makapaliket ya ebento—a singa say bansal, pananak, odino pakapinengnengan lamet ed saray inad-aro tayo—so mamawala’d sikatayo na gayagan atekepay ilalo sakbay ni na agew a kagawa na satan. Ompalalo so gayaga no makabat tayon uusaren so panaon na panaalagar tayo, a manpaparaan itayo ed onsabin ebento.
20. (a) Antoran makapakelkelaw ya ebento so matalek tayon tatalaranan? (b) Panon itayon makapanggayaga legan tayon aalagaren so pakasumpal na saray gagala nen Jehova?
20 Sano nagnap so kompiyansa tayo a nasumpal iray iilaloan tayo—anggano agtayo amta no kapigan iratan nasumpal—say panaon a panalagar et agto ‘pabeblayen so puso.’ Kabat na saray matoor a managdayew ed Dios a maganggano la so Milenyon Uley nen Kristo. Matalek ira a nanengneng da so panampot lay ipapatey tan sakit. Lapud magunaet a pantatalaran, maliket iran manalagar ed panaon sano abrasaen iray binilyon ya inaatey, pati saray inaatey ya inad-aro’d bilay. (Apocalipsis 20:1-3, 6; 21:3, 4) Diad sarayan panaon a napepeligro lay kaliberliber, pitamitam day seguradon ilalo ed pakanengneng da ed kiletneg la na Paraiso ed dalin. (Isaias 35:1, 2, 7) Agaylan makabat, sirin, so pangusar ed panaon na panalagar diad makatunongan a paraan, a ‘lawas padaaken so kimey ed Katawan’! (1 Corinto 15:58) Mantultuloy a gamoran so espiritual a tagano. Mas paapiten tayo so siglaotan ed si Jehova. Anapen so arum a diad kapusoan da et labay dan panlingkoran si Jehova. Pasesegen iray kapanisiaan. Sigpot ya anamoten so antokaman a panaon ya iyaabuloy nen Jehova. Insan, say panalagar ed si Jehova so agbalot pansengegay ‘ibeblay na puso’ yo. Imbes, panliketan yo itan!
Kasin Nipaliwawa Yo?
• Panon so impangipatnag nen Jesus ed panag-alagar?
• Diad antoran situasyon a nakaukolan a manalagar iray Kristiano?
• Akin a saray Tastasi nen Jehova et makapan-aalagar ed si Jehova?
• Panon a panlapuan na gayaga so panag-alagar ed si Jehova?
[Tepetepet Parad Panagaral]
[Saray litrato ed pahina 12]
Nansungdo si Jesus lapud gayagan niiyan ed arapan to
[Litrato ed pahina 13]
Anggan kayari na dakel a taon na serbisyo, napansiansia tayo so gayaga tayo
[Saray litrato ed pahina 15]
Inmaligwas so kabibilay na minilyon lapud impagmaliw dan Tastasi nen Jehova