Ipatnag so Awawey na Kanonotan nen Kristo

“Say Dios na anos tan ligliwa iyabuloy to komon ed sakey tan sakey ed sikayo so apasakey a kalakal [“awawey na kanonotan,” NW] unong ed Kristo Jesus.”​—ROMA 15:5.

1. Panon a naapektaan so bilay na sakey ed awawey na sananey?

 BALEG so nagawaan na awawey ed bilay. Say buntog odino mapeleng ya awawey, positibo odino negatibon awawey, masugnar odino makooperan awawey, mareklamo odino misalsalamat ya awawey, so makaimpluensian maong ed no panon so pangasikaso na sakey a too ed saray situasyon tan no panon so pideneng na totoo ed sikato. No say sakey et walaan na maabig ya awawey, sikatoy magmaliw a maliket anggano diad mair-irap iran situasyon. Parad toon walaay mauges ya awawey, ompatnag ya anggapo lay maabig a bengatla, anggano maabig ni ingen so bilay, a momoriaen itan a walaay gagala.

2. Panon a naaralan na sakey a too iray awawey?

² Saray awawey​—maong man itan odino mauges​—so naaralan. Diad tua et kaukolan a naaralan iratan. Oniay inkuan na Collier’s Encyclopedia nipaakar ed kapkapangiyanak ya ugaw: “Saray awawey a niwala’d sikato diad saginonor et nepeg ton nagamoran odino naaralan, a singa met ed panaral toy sakey a lenguahe odino antokaman nin dunong.” Panon tayon naaralan iray awawey? Anggaman dakel iray bengatlan pansengegan, makaimpluensian maong iray walad kaliberliber tan kalimog. Oniay naimano na encyclopedia ya asalambit ed gapo: “Naaralan tayo odino nipasepsep ed sikatayo, a singano osmosis (proseso na panagsepsep), iray awawey na saramay maapit a kalimog tayo.” Nilibon taon lay apalabas, mipadpara so inkuan na Biblia: “Miulop ka ed saray makabat a totoo, et sika naani makabat; balet say kaiba na saray maatiw manlikna na segsegang.”​—Uliran 13:20; 1 Corinto 15:33.

Sakey a Pangaligan ed Suston Awawey

3. Siopa so napanuliranan no nipaakar ed awawey to, tan panon so pangalig tayo’d sikato?

³ Diad ami-amin, si Jesu-Kristo so angipanengneng na sankaabigan a pangaligan no nipaakar ed awawey. Inkuanto: “Inikdan takayo na sakey a pangaligan, pian sikayo gawaen yo met so singa ginawak ed sikayo.” (Juan 13:15) Ta pian magmaliw a singa si Jesus, nepeg tayon aralen ya unona so nipaakar ed sikato. * Aralen tayo so bilay nen Jesus tekep na getman gawaen so inrekomenda nen apostol Pedro: “Saya so inkatawag yo: ta si Kristo nairapan met lapu ed sikayo, dia ed impangitilak to na panuliranan, pian tumboken yo so baka’to.” (1 Pedro 2:21) Say kalat tayo et pian naalig tayon maong si Jesus no nayadyari. Laktipen na satan so pamayubo ed impatnag ton awawey na kanonotan.

4, 5. Anton aspekto na awawey na kanonotan nen Jesus so nipabitar ed Roma 15:1-3, tan panon so pangalig na saray Kristiano ed sikato?

⁴ Anto so lalanoren na pakawalaay awawey na kanonotan nen Kristo Jesus? Ontulong ed sikatayo so kapitulo 15 na sulat nen Pablo ed saray taga-Roma pian naebatan itan a tepet. Diad unona iran bersikulo na sayan kapitulo, tinukoy nen Pablo so matalonggaring a kualidad nen Jesus sanen  inkuanto: “Kanian, sikatayo a mabiskeg nepeg tayo a sungdoan so kaleteyan na makapuy, tan aleg a paliketan tayo so inkasikatayo a dili. Balang sakey ed sikatayo paliketen to komon so kapara ton too ed kaabigan to ed kipaalagey. Ta si Kristo met agto pinaliket so inkasikaton dili; noag ingen unong na nisulat: Saray pamabpabanday na mamabanday ed sika, naplag ira ed siak.”​—Roma 15:1-3.

⁵ Diad pangaalig ed awawey nen Jesus, apaseseg iray Kristiano a magmaliw ya akaparaan ya ontulong ed saray pankaukolan na arum tekep na inkamapaabeba imbes a pampilalekan a paliketen lambengat so inkasikaran dili. On, say ontan a mapaabeba tan mabulos ya itulong ed arum so sakey a walewaleng na saramay “mabiskeg.” Oniay inkuan a mismo nen Jesus, a mabibiskeg ed espiritual nen say siopaman a too a nambilay ed kapiganman: “Singa say Anak na too ya agdia linma a panlingkoran, noag say manlingkor, tan iter toy bilay to a panondon ed amayamay.” (Mateo 20:28) Bilang Kristianos, labay tayo met a pampelengan so ontulong ed arum, pati ed ‘saramay makapuy.’

6. Diad anton dalan a naalig tayo so reaksion nen Jesus ed isusumpa tan panamabanday?

⁶ Say sananey nin maabig a walna ya impatnag nen Jesus et say padron na kanonotan tan kiwas a lawas positibo. Agton balot inabuloyan so negatibon awawey na arum a mangimpluensia ed maabig ya awawey to nipaakar ed panagserbi’d Dios; ontan met komon ed sikatayo. Sanen apabpabanday tan apasegsegang si Jesus lapud matoor a pandadayew to’d Dios, sikato so maanos a nansungdo ya agnanreklamo. Amta ton say isusumpa na agmananisia tan werek a mundo so ilaloan a nagawa ed saramay manggunaet a mamaliket ed kapara ran too diad “kaabigan to ed kipaalagey to.”

7. Panon ya impatnag nen Jesus so inkaanos, tan akin ya aligen tayo itan?

⁷ Impatnag nen Jesus so suston awawey ed arum a dalan. Agton balot impatnag ed si Jehova so pakakaalipanes noagta sikatoy maanos a nanalagar ed pakasumpal na saray gagala To.  (Salmo 110:1; Mateo 24:36; Gawa 2:32-36; Hebreos 10:12, 13) Niarum ni, ag-inmingongot si Jesus ed saray patumbok to. Inkuanto’d sikara: “Manaral kayo’d siak”; lapud sikatoy “mauyamo,” say bilin to so makapabiskeg tan makaparepresko. Tan lapud sikatoy ‘mapaabeba ed puso,’ sikatoy agbalot nagmaliw a matangsit odino mapalakbat. (Mateo 11:29) Sikatayo so papasesegen nen Pablo ya aligen irayan aspekto na awawey nen Jesus sanen inkuanto: “Yatol yo so sayan kalakal ed sikayo, a wala met nensaman ed Kristo Jesus; a bangta sikatoy wala ed ereng na Dios, agto imbilang a say inkaparpara to ed Dios sakey a bengatlan bebembenan to nensaman. Noag ingen nilukpos to so inkasikato, ya inala to so ereng na sakey ya aripen, ya agawan kaulibay na saray totoo.”​—Filipos 2:5-7.

8, 9. (a) Akin a nepeg tayon pankimeyan so pamayubo ed agsinisiblet ya awawey? (b) Akin ya agtayo nepeg a nadismaya sano agtayo nagnap a natumbok so pangaligan ya intilak nen Jesus, tan panon a si Pablo et maong ya ehemplo ed sayan pamaakaran?

⁸ Mainomay so pangibaga a labay tayon panserbian so arum tan labay tayon unaen iray pankaukolan da, ya aliwan sikatayo. Balet say matuan panusisa tayo ed mismon awawey na kanonotan tayo so nayarin mangiparungtal ya agnagnap a nikiling so kapusoan tayo ed ontan a paraan. Akin ya andi? Unona, lapud akatawir tayo na sinisiblet iran walna ed di Adan tan Eva; mikadua, lapud manbibilay itayo ed mundon mangitatandoro na kasibletan. (Efeso 4:17, 18) Pian nabayuboan so agsinisiblet ya awawey, bayuboan so sakey a padron na kanonotan ya onkontra ed atawir ya ag-ayadyarin kipapasen tayo. Mankaukolan iya na determinasyon tan sagpot.

⁹ Say mapatnag ya ag-inkayadyari tayo, a misunian a tuloy ed ayadyarin pangaligan ya intilak nen Jesus ed sikatayo, so panapanaon a pansengegan na pakadismaya tayo. Nayarin panduaruwaan tayo ni ingen no kasin posibli so pakawalaan tayoy miparan awawey na kanonotan nen Jesus. Balet imanoen iray makapaseseg a salita nen Pablo: “Amtak a dia ed siak, salanti, dia ed laman ko, anggapo so manayam a bengatlan maong: ta wala ed siak so panlabay, bangbalet say panggawa na kaabigan andi. Ta agko gawaen so kaabigan a labay ko komon: sabalet so mauges ya agko labay, sikato ya so gawaen ko. Ta unong na too ed dalem, ko manliket ak ed ganggan na Dios: Bangbalet wala so nanengneng ko a sananey a ganggan ed saray kabiangan ko, a mibakal ya onsumpa ed ganggan na isip ko, tan arakep to ak ed ganggan na kasalanan a wala ed saray kabiangan ko.” (Roma 7:18, 19, 22, 23) Tua, si Pablo so aminpigan inamper na ag-inkayadyari to ed panusumpal to’d panlabayan na Dios unong a kinaliktan to, balet say awawey to​—say panagnonot tan liknaan to nipaakar ed si Jehova tan ed ganggan To​—so napanuliranan. Nagawaan tayo met itan.

Ipetek Iray Makapuy ya Awawey Tayo

10. Anton awawey na kanonotan so impaseseg nen Pablo a bayuboan na saray taga-Filipos?

¹⁰ Nayari kasin walaray pigara a nakaukolan dan ipetek so makapuy ya awawey da? On. Saya so mapatnag a tua ed pigaran Kristiano nen inmunan siglo. Dia ed sulat to’d saray taga-Filipos, oniay sinaglawi nen Pablo nipaakar ed pakawalaan na dugan awawey. Insulat to: “Aliwan say akagamor ak la [say mangatatawen a bilay panamegley na asasakbay a kikioli] odino agawa ak la ya ayadyari: noag say ontundas ak ingen, ompan lamang no nakapet ko so akakapetan nen Kristo Jesus ed siak. Agagik ira, agko ibilang so inkasiak a dili a sikato so akapet ko la: noag sakey so gawaen ko, lingwanan so saray bengatlan abenegan, tan dampoten ko so saray bengatla a wala ed unaan, ontundas ak a mamaarap ed kalat a nipaakar ed pakalak na tumang na atagey a panatawag na Dios dia ed Kristo Jesus. Ontan tayo sirin, ganagana tayon ayadyari, seetan so onia a panag-isip.”​—Filipos 3:12-15.

11, 12. Diad antoran dalan ya ipaparungtal nen Jehova ed sikatayo so suston awawey na kanonotan?

¹¹ Ipapanengneng na saray salita nen Pablo a siopaman, a nagmaliw lan Kristiano, a manisip ya agla kaukolan so onaligwas et walaan na makapuy ya awawey. Agto inalig so awawey na kanonotan nen Kristo. (Hebreos 4:11; 2 Pedro 1:10; 3:14) Anggapo la kasi so ilalo na ontan a too? Andi met. Makatulong so Dios ed sikatayo pian manguman ed awawey tayo no talagan labay tayo. Intuloy ya inkuan nen Pablo: ‘No onia so panag-isip yo, et no dia ed bengatla manisip kayo na sananey, saya lanlamang so ipuyan na Dios ed sikayo.’​—Filipos 3:15.

¹² Balet, no kaliktan tayo ya iparungtal nen Jehova ed sikatayo so dugan awawey, nepeg tayon  gawaen so biang tayo. Say masimoon a panagaral ed Salitay Dios diad tulong na saray Kristianon publikasyon ya intarya na “matoor tan makabat ya aripen” so makatulong ed saramay “dia ed bengatla [et] manisip” a mamayubo ed suston awawey. (Mateo 24:45) Saray Kristianon mamatatken, a tinuro na masanton espiritu a ‘mamastol ed iglesia na Dios,’ so maliket ya ontulong. (Gawa 20:28) Agaylay pisalsalamat tayo ta ikokonsidera nen Jehova so agtayo inkayadyari tan simamaaro to itayon tutulongan! Awaten tayo komon itan.

Pakaaral Manlapud Arum

13. Anto so naaralan tayo nipaakar ed suston awawey a naromog ed salaysay na Biblia a Job?

¹³ Diad Roma kapitulo 15, impabitar nen Pablo a say pandalepdep ed maawaran iran alimbawa so ontulong ed sikatayo pian nauman tayoy awawey tayo. Insulat to: “Saray bengatla a nisulsulat nensaman, nisulat ira ya onkana ed kibanga ’tayo, ta pian lapu ed anos tan lapu ed panamaligliwa na saray Sulsulat, wala so ilalo tayo.” (Roma 15:4) Arum ed saray matoor a lingkor nen Jehova nensaman so kinaukolan a mangipetek ed pigaran aspekto na awawey da. Alimbawa, diad intiraminti et si Job so walaan na maabig ya awawey. Agton balot intetel so kaugsan ed si Jehova, tan agton balot inabuloyan so kairapan a manenyeg ed panagmatalek to’d Dios. (Job 1:8, 21, 22) Ingen, sikatoy nikiling a mangikatunongan ed inkasikato. Si Jehova so angiwanwan ed si Elihu ya ontulong ed si Job pian nipetek iyan inklinasyon to. Imbes a liknaen ton nainsulto, mapaabeban inawat nen Job so pankaukolan a manguman ed awawey to tan mabulos ton nanpursigian itan.​—Job 42:1-6.

14. Panon tayon naalig si Job no nasimbawa itayo nipaakar ed awawey tayo?

¹⁴ Onkiwas tayo kasin singa si Job no walay kaparan Kristiano a mapangasin mangibaga’d sikatayo a napapatnagan la’d sikatayo so makapuy ya awawey? Singa si Job, komon ta agtayon balot ‘ipaarap so maatiw ed Dios.’ (Job 1:22) No maniirap itayo ed agmakatunongan a paraan, agtayon balot komon manrereklamo odino itetel ed si Jehova iray paniirap tayo. Komon ta paliisan tayo so pangikatunongan ed inkasikatayon dili, a nodnonoten tayo ya antokaman iray pribilihyo tayo’d serbisyo ed si Jehova, siansia nin ‘anggapoy kakanaan itayon ariripen.’​—Lucas 17:10.

15. (a) Anton makapuy ya awawey so impatnag na pigara ed saray patumbok nen Jesus? (b) Panon ya impatnag nen Pedro so maabig ya awawey?

¹⁵ Kaleganay inmunan siglo, arum ed saray tinmalineng ed si Jesus so angipatnag na makapuy ya awawey. Diad aminsan ya inkagawa, walay imbaga nen Jesus a mairap dan talosan. Bilang ebat, “amayamay ed saray babangatan to, nen nadngel da ya inkuan da, Saya masuliwet a salita; siopa so  makayarin ondengel ed sikato?” Saramay angibaga’d satan so mapatnag a walaan na makapuy ya awawey. Tan lapud makapuy ya awawey da, agla ra dinmengel ed si Jesus. Oniay kuan na rekord: “Nisengeg ed saya amayamay ed saray babangatan ton sinmener ira, tan agla ra akila ed sikato.” Amin da la kasi et walaan na makapuy ya awawey? Andi. Intuloy na rekord: “Kanian inkuan nen Jesus ed saray labindua, Laba’yo met so ontaynan. Si Simon Pedro inmebat ed sikato, Siopa so laen mi?” Bilang resulta, inebatan nen Pedro so mismon tepet to: “Wala ed sika so saray salita na maando a bilay.” (Juan 6:60, 66-68) Agaylan abig ya awawey! Sano nipaarap itayo ed saray eksplinasyon odino panamalinew ed pakatalos tayo’d Kasulatan a mairap tayon awaten ed pilimero, agta maabig so pangipatnag ed awawey ya impanengneng nen Pedro? Agaylan makulangkulang so itundan panserbi ed si Jehova odino mansalita a sumlang ed “say alasir na makapabunigas iran salita” lapu lambengat ed pigaran bengatlan mairap tayon natalosan ed gapo!​—2 Timoteo 1:13, NW.

16. Anton makapakigtot ya awawey so impatnag na saray Judion relihyoson pangulo ed panaon nen Jesus?

¹⁶ Agnipatnag na saray Judion relihyoson pangulo nen inmunan siglo so awawey na kanonotan nen Jesus. Say mapekder a determinasyon da ya ag-ontalineng ed si Jesus so nipatnag sanen pinaoli to si Lazaro a manlapud saray inaatey. Parad siopaman a walaay dugan awawey, satan a milagro so positibon mamaneknek a si Jesus so peteg ya imbaki na Dios. Balet, oniay nabasa tayo: “Saray manuna a saserdotes ed satan tan saray Fariseos tinipon da so sakey a singbatan, et inkuanda, Anto so gawaen tayo, ta sayan too manggawa na amayamay a tanda? No sikato so paulyan tayo labat ya ontan, amin day totoo manisia naani ed sikato, et saray taga Roma onsabi ra et ekalen da so pasen tayo ta say nasyon tayo.” Say solusyon da? “Nanlapu ed saman ya agew nansisingbat ira pian yanda si Jesus ed ipapatey.” Nilikud ed gagaem dan pateyen si Jesus, implano ran pateyen so mabilay ya ebidensia a resulta na ginawa ton milagro. “Saray manuna a saserdotes nansisingbat ira pian napapatey da met si Lazaro.” (Juan 11:47, 48, 53; 12:9-11) Agaylan makapagulgula itan no ontan met so ipatnag tayon awawey tan magmaliw itayon maingongot odino maalipanes ed saray bengatla a nepeg a panliketan tayo komon! On, mapeligron tuloy itan!

Aligen so Positibon Awawey nen Kristo

17. (a) Diad antoran sirkumstansia ya impatnag nen Daniel so makpel ya awawey? (b) Panon ya impatnag nen Jesus so inkakpel?

¹⁷ Pansiasiansiaen na saray lingkor nen Jehova so positibon awawey. Sanen nankokomplot iray kakabusol nen Daniel a mangipasa na sakey a ley a mangisesebel ed pampikasi ed siopaman a dios odino too nilikud ed ari diad loob na 30 ya agew, amta nen Daniel a saya so pibabali la ed pisisiglaotan to’d si Jehova a Dios. Kasin sikatoy ontundan manpikasi ed loob na 30 ya agew? Andi, sikato so makpel a nantultuloy a nampikasi ed si Jehova a mamitlo ed kada agew, unong a gagawaen to la. (Daniel 6:6-17) Si Jesus so agmet apatalaw na kakabusol to. Aminsan ya agew na Sabaton et nabet to so sakey a too ya akaweng so lima to. Amta nen Jesus a say dakel a Judio a wadman so naingongotan sano walay tambalen to ed Sabaton. Diretsaan ton impaibalikas ed sikara no antoy opinyon da ed satan. Sanen ag-ira akaebat, intuloy itan nen Jesus tan pinaabig to so too. (Marcos 3:1-6) Si Jesus so agbalot pinmayakot ed panusumpal toy niganggan ed sikato lapud impasen to itan a manepeg a gawaen.

18. Akin a walaray onsusumpa ed sikatayo, balet panon so nepeg ya ikiwas tayo ed negatibon awawey da?

¹⁸ Bibidbiren na saray Tastasi nen Jehova natan ya agmet ira nepeg ya ontalaw ed nayarin negatibon reaksion na saray sumusumpa. Ta no andi et agda nipatnag so awawey na kanonotan nen Kristo.  Dakel so onsusumpa ed saray Tastasi nen Jehova, lapud mangamanga so arum ed saray katuaan tan say arum et ombubusol ed saray Tastasi odino ed mensahe ra. Balet agtayon balot komon aabuloyan so agmakaaron awawey da a mangapekta ed positibon awawey tayo. Agtayon balot komon aabuloyan ya idikta na arum ed sikatayo so pandayew tayo.

19. Panon tayon nipatnag so awawey na kanonotan a singa si Jesu-Kristo?

¹⁹ Lawas impatnag nen Jesus so positibon awawey na kanonotan ed saray patumbok to tan ed saray uksoyan na Dios, anggaman mairap itan a gawaen. (Mateo 23:2, 3) Nepeg tayon aligen so alimbawa to. Tua, ag-ayadyari iray agagi tayo, pati sikatayo. Iner ni kasi so pakaromogan tayoy magmaong a kaiba tan peteg a matoor iran kakaaro noagta diad limog na sankamundoan ya impanaagi? Agni inter nen Jehova ed sikatayo so nagnap a pakatalos ed insulat a Salita to, balet anton relihyoson grupo so lalon makatalos ed satan? Lawas tayo komon a pansiansiaen so dugan awawey na kanonotan, say awawey na kanonotan a walad si Jesu-Kristo. Kabiangan ni ed arum a bengatla, laktipen na saya so pangamta ed no panon so panalagar ed si Jehova, unong a singbaten tayo ed ontumbok ya artikulo.

[Paimano ed leksab]

Kasin Nipaliwawa Yo?

• Panon ya apektaen na awawey tayo so kabibilay tayo?

• Deskribien so awawey na kanonotan nen Jesu-Kristo.

• Anto so naaralan tayo manlapud awawey nen Job?

• Anto so dugan awawey no nipaarap itayo ed isusumpa?

[Tepetepet Parad Panagaral]

[Saray litrato ed pahina 7]

Pampepelengan na sakey a Kristianon walaay dugan awawey so ontulong ed arum

[Litrato ed pahina 9]

Say masimoon a panagaral ed Salitay Dios so ontulong ed sikatayo pian naalig so awawey na kanonotan nen Kristo