Asingger la​—So Mundon Anggapo lay Naekalan na Ilalo

SAY bilay so ompapalalon mankaukolan, tan dakel iray sengegan a mangekal na ilalo. Sano nadismaya, nayarin mairap tayon kontrolen so emosyon tayo. Agayla, anggan saray totoo a mangaaro ed bilay so nayarin magmaliw a desperado! Konsideraen so pigaran alimbawa.

Nensaman, lapud adismayan maong si propeta Moises et nikuan to ed Dios: “Kerewen ko ed sika a patey moak pa la ed limam, daput no nagamoran ko so panangasim ed arapan mo; tan agmo pa komon yabuloy a nanengneng ko so inkapangaskasian ko.” (Numeros 11:15) Onia so inkelyaw met nen propeta Elias sanen ibabatikan toray kabusol to: “Sarag la; natan, O Jehova, ekalen mo so bilay ko; ta agak magmaong nen saray ateng ko.” (1 Arari 19:4) Tan inkuan nen propeta Jonas: “O Jehova, kerewen ko ed sika ya ekalen mo komon so bilay ko, ta magmaong ed siak so ompatey nen say manbilay.” (Jonas 4:3) Balet agnambikkel si Moises, Elias, nisay si Jonas. Kabat da so ganggan na Dios ya: “Agka mamatey.” (Exodo 20:13) Lapud walaan ira na mabiskeg a pananisia ed Dios, amta ra ya aliwan amin a situasyon et andi-ilalo tan say bilay et regalo na Dios.

 Komusta balet iray problema ya aarapen tayo natan? Niarum ed gonigon ed emosyon odino pisikal iran problema, nayarin no maminsan et kaukolan tayon sungdoan so makapuy a panagtrato na saray membro na pamilya, kakaabay, odino katrabahoan. Sasaglawien na Biblia iray totoo a napno “na amin ya ag-inkatunong, karelmengan, agum, mabanday a linawa; napno ra na siblet, panagpatey, kolkol, kasaolan, karamsakan; managtalabutob, managpabanday, managgula ra ed Dios, mapangta, atatagey a linawa, malangas, managpalsa na kaugsan, matutulay ed saray ateng da. Andi pakatalos, ag-ira matoor ed sipan, andi aro ra a niyanakan, andi panangasi.” (Roma 1:28-31) Lapud apaliberan itayo ya inagew-agew na ontan a totoo et nayarin pagmaliwen ton singano makapabelat so bilay. Panon tayon natulongan iraman so mankaukolan na ligliwa tan pakainawaan?

Inkamabulos ya Ontalineng

Saray kairapan tan ot-ot so panlapuan na agpakabalansi na sakey a too ed kanonotan to. Inkuan na makabat a laki: “Say panpalalo gawaen to so makabat a too a maatiw.” (Eclesiastes 7:7) Kanian nepeg ya ag-ibaliwala so sakey a toon totongtongen toy nipaakar ed panagbikkel. Saray walan problema to, balanglan diad emosyon, pisikal, mental, odino espiritual, so nayarin mankaukolan na tampol ya imano. Siempre, nanduruma iray propesyonal a panagtambal tan terapi, tan nepeg a personal a mandesisyon nipaakar ed saray klase na terapi.​—Galacia 6:5.

Antokaman so rason ed liknaan a panbikkel, baleg so epekto no walay makatebek, mililikna, tan maanos a too a napangibagaan. Saray membro na pamilya tan kakaaro a mabulos ya ontalineng so makatulong. Niarum ed pililikna tan panangasi, saray makapabiskeg a kanonotan manlapud Salita na Dios so makatulong a maong ed saraman so nakalan lay ilalo.

Espiritual a Tulong Parad Nagogonigon

Nayarin nikelawan kayon makaamta ya agaylan makapaseseg so panagbasa ed Biblia. Anggaman aliwa itan a manual parad mental a bunigas, say Biblia so makatulong ed sikatayo a mamabli ed bilay. Inkuan nen Arin Solomon: “Amtak ya anggapo so bengatla a magmaong nipaakar ed sikara, nen say panliket, tan panggawa na maong ed leleg na pambilay da. Et ontan met a balang too mangan tan oninum, tan manliket a maong ed amin a kimey to, sikato so pamalangkap na Dios.” (Eclesiastes 3:12, 13) Likud ed makapenek a kimey a mangiiter na kabaliksan ed bilay, saray simplin bengatla​—a singa say preskon dagem, liwawa na agew, karosasan, kakiewan, tan saray billit​—et inter na Dios iran regalo a napanggayagaan tayo.

Say nagkalalo nin makapabiskeg et say panamaseguro na Biblia a si Jehova a Dios tan say Anak to, si Jesu-Kristo, so mangaasikaso ed sikatayo. (Juan 3:16; 1 Pedro 5:6, 7) Matukotukoy, inkuan na salmista: “Nagalang so Katawan, a sikato agew-agew ya ililibitan to itayo na awi’tayo, salanti Dios a sikatoy kilalaban tayo.” (Salmo 68:19) Anggaman nayarin liknaen tayon ag-itayo importanti tan agmakana, iimbitaan itayo na Dios a manpikasi ed sikato. Makaseguro itayo ya agnibaliwala so mapaabeba tan masimoon ya onkekerew na tulong ed sikato.

Agnailaloan na sakey so bilay ya anggapoy problema natan. (Job 14:1) Ingen, ipapanengneng na katuaan na Salitay Dios ed dakel a totoo a say panagbikkel et aliwan dugan paraan pian solbaren iray problema ra. Konsideraen pa labat no panon a tinulongan nen apostol Pablo so desperado lan bantay na prisoan, ‘sanen aliing ed ugip to, tan nen anengneng to ya alukasan so saray kaput na panangipangawan, binago’to so kampilan to, et ngalngali pinatey to so sikaton dili, ta inisip to a tinmaynan so saray pinangaw.’ Inkuan a tampol na bantay na prisoan a magmaong lay manbikkel nen say makapabaing tan nayarin nipaleen ya ipapatey ni ingen lapud insaew to. Kinmelyaw so apostol: “Agmo gawaen so bengatla a duksa ed laman mo, ta wadia kami ya amin!” Aliwa labat lan satan so imbaga nen Pablo. Diad tua, sikato tan si Silas so nanligliwa ed bantay na prisoan tan kinmiwas ed tepet to: “Kakatawan, anto so nakaukolan kon gawaen pian nilaban ak?” Inyebat da: “Manisia ka ed Katawan a Jesus, et nilaban ka, sika tan say abung mo.” Insan da tinongtong ed sikato so salita nen Jehova tan ed sankaabungan to, a say resulta et “tampol ya impabinyagan, sikato tan amin a kabaley to.” Saman a bantay na prisoan pati ed intiron sankaabungan to so aliketan a maong tan aromog da so balon kabaliksan na bilay.​—Gawa 16:27-35.

Natan, agaylan pakainawaan so pakaamta a say Dios so aliwan responsabli parad karelmengan! Ipapabidbir na Salita To so sakey a marelmeng ya espiritu, “a manngaran na Diablo tan si Satanas,”  bilang sakey a “mantila ed lapag na sankamundoan.” Balet ta nauupot la so panaon to. (Apocalipsis 12:9, 12) Magano lan mangangga so amin a kairapan ya intarok nen Satanas tan saray demonyo to ed saray manaayam ed dalin diad isalet na Dios. Diad ontan et say insipan na Dios a balon mundo na inkatunong so mangitarok na permanentin panganggaan na lapuan na inkaandi-ilalo tan panagbikkel.​—2 Pedro 3:13.

Tambayo Parad Saraman so Onkekerew na Tulong

Anggan natan, saraman so naeekalan na ilalo so makagamor na ligliwa manlapud Kasulatan. (Roma 15:4) Onia so inkanta na salmistan David: “Say sakey a puso a maralit tan mansisibkel, agmo la balbalawen, O Dios.” (Salmo 51:17) Tua, agtayo napaliisan iray pigaran subok tan nalikna iray epekto na ag-inkayadyari. Balet say pangala na suston pikakabat nipaakar ed mapangasi, maaro, tan makatunongan a mangatatawen ya Ama tayo et mamaseguro ed sikatayo a mabli itayo ed imaton to. Say Dios so nayarin magmaliw a manunan Kaaro tan Instruktor tayo. No bayuboan tayo so maapit a siglaotan ed si Jehova a Dios, agto itayon balot dismayaen. Onia so inkuan na Manamalsa tayo: “Siak si Jehova a Dios mo, ya angibangat ed sika na nipaakar ed nabang mo, a mangitonton ed sika ed dalan a laen mo komon.”​—Isaias 48:17.

Say panagmatalek ed Dios so akatulong la ed dakel a totoo. Pian iyilustra: Si Mara so linmetey la lapud binmayag a depresyon sanen inatey ed aksidenti so anak ton laki. * Sikatoy ataranta tan ginetma toy manbikkel. Balet, natan et sikatoy kinabuasan a masakbay ya ombabangon pian gawaen iray kimey to ed abung. Panggagayagaan to so idengel na musika tan itulong ed arum. Say ilalo “a wala naani kioli ed bilay na saray matunong tan agmatunong” so angekal ed epekto na ot-ot na impatey na pinabpabli ton anak a laki tan amabiskeg ed pananisia to ed Dios. (Gawa 24:15) Lapud agbalot pilalek nen Mara so magmaliw a singa anghel ed tawen, saray salita na Salmo 37:11 so anenyeg ed puso to: “Saray mauyamo tawiren da naani dalin: tan manliket ira a dili ed inkadaakan na kareenan.”

Sananey nin bii a taga-Brazil, si Sandra, et nampelengan ton maong so pagmaliw a naspot ya ina na taloran ananak to. Inaksobi to: “Okupado ak a maong a sanen biglan inatey si amak tan nalmoan ko met a walay kabit nen masiken ko, agko  anggan naisip so onkerew na tulong ed Dios.” Lapud nakalan na ilalo, ginetma nen Sandra so manbikkel. Anto so tinmulong ed sikato? Say panamabli to ed espiritual iran bengatla. “Kada labi sakbay ak ya onugip, manbasa ak na Biblia, tan ipapasen koy inkasiak ed situasyon na totoo a nababasak. Nambabasa ak met na saray magasin a Panag-Bantayan tan Awake!, tan nagkalalon labalabay ko iray istorya ed bilay lapud saratan so tinmulong ed siak a magmaliw a kontento ed kipapasen na bilay ko.” Lapud pakaamta a si Jehova so kaaro ton maong, naaralan toy magmaliw ya espisipiko ed saray pikakasi to.

Sakey ya Arapen ya Anggapo lay Naekalan na Ilalo

Agaylan makaligliwa so pakaamta a say paniirap na too et temporaryo labat! Diad silong na uley na Panarian na Dios, et manliket iray ugugaw tan saray wala la’d edad a biktima natan na krimen, ag-inkahustisya, odino panangidumaduma. Singa nipasakbay la diad mapropetikon salmo, say tinuro nen Jehova ya Ari, si Jesu-Kristo, et “iliktar to so naukolan no oney-ey, say makabos met, ya anggapo so mananulong ed sikato.” Sakey ni, “sikato ilagak to so makabos tan naukolan, tan ilaban to so kamarerwa na naukolan.” On, “sikato dondonen to so kamarerwa ra a yarawi ed panamalingo tan panamasoot; et mabli naani dala ra ed mata to.”​—Salmo 72:12-14.

Asingger lay panaon parad kasumpalan na saratan a mapropetikon salita. Kasin makapasagyat ed sika so kanonotan a napanggayagaan so andi-anggaan a bilay ed dalin diad silong na ontan iran kipapasen? No ontan, walaan ka na rason a manggayaga tan pablien so bilay bilang regalon nanlapud Dios. Tan no inabang mo irayan makaligliwan Makasulatan a sipan ed arum, nipagamor mo met so baleg a liket ed bilay na saraman so onkekerew na tulong ed sayan agmililikna tan agmaaron mundo.

[Paimano ed Leksab]

[Litrato ed pahina 6]

Dakel iray makapaliket a kipapasen natan

[Litrato ed pahina 7]

Kasin tatalaranan mo so sakey a mundon anggapo lay naekalan na ilalo?