Ikerew na Tulong
Ikerew na Tulong
“Lingwanan ak la na Dios!” so inkelyaw na sakey a bii a taga-Brazil. Kayari na biglan impatey na masiken to, liknaen ton anggapo lay kabaliksan na bilay to. Asalim ta lay nanligliwa na sakey a toon pirmin nagogonigon odino nayarin onkekerew na tulong?
Arum so naekalan na ilalo kanian nanbikkel lara—kaslakan ed sikara et kalangweran. Unong ed peryodiko a Folha de S. Paulo, ipapanengneng na sakey ya impanaral ed Brazil a say “panagbikkel ed limog na saray kalangweran et inmatagey na 26 a porsiento.” Singa bilang, nonoten pay kipapasen nen Walter, * sakey a kalangweran a laki diad São Paulo. Sikatoy ulila la, andian na ayaman, andian na maligen a kipapasen, andian na kakaaro a napanmatalekan to. Pian ontunda lay paniirap to, tinmaboy si Walter ed sakey a taytay.
Si Edna so sakey a mansusulon ina a duara lay anak to sanen akabat toy sananey a laki. Kalabas labat na sakey bulan, sikara lan duay manaamong ed abung na ina na laki, ya alanor ed espiritismo tan alkoholismo. Nananak ni na sakey si Edna, ginapoan toy alablabas a panag-inum, tan a-depress a maong a ginetma to lay manbikkel. Diad kaunoran, inala ed pudir to so ananak to.
Komusta met iray maedad lan totoo? Dati et masayaksak tan maistorya si Maria. Balet, diay iyaakulaw to, sikatoy lay mapaga nipaakar ed trabaho to bilang sakey a nurse lapud natatakot ompan sikatoy nalingo. Saya so nanresulta ed inka-depress to. Kayari na impanali ton paabigen so inkasikato, sikatoy nampatambal, tan ompatnag a walay inabigan na impanpatambal to. Balet sanen naandi so trabaho to diad edad ton 57, sikatoy a-depress lamet a linmoor tan anggapo lay amta ton solusyon. Ninonot nen Maria so manbikkel.
“Ngalngalin 10 porsiento na totoo a nade-depress so nanggetman manbikkel,” kuan nen Propesor José Alberto Del Porto na São Paulo University. “Agnapanisiaan a mas dakel a totoo so ompapatey lapud panagbikkel nen say papateyen na totoo, balet ta ontan so makapaermen a katuaan,” inreport na U. S. surgeon general, a si Dr. David Satcher.
No maminsan say getman pambikkel et kabaliksan toy ikerew na tulong. Tan seguradon labay na saray membro na pamilya tan kakaaro a gawaen so dugan bengatla parad sakey a nakalan lay ilalo. Siempre, agmakatulong so pangibaga na singa: “Agka la manaaburido,” “Dakel a totoo so mas grabe ni nen say kipapasen mo” odino, “No maminsan et amin tayo so managmak na makapuy.” Imbes, akin ya agmagmaliw a peteg a kaaro tan maong ya ondengel? On, panggunaetan a tulongan so nakalan lay ilalo pian namoria ton makana so manbilay.
Onia so insulat na Pranses ya autor a si Voltaire: “Say too ya, onsigboy paka-depress to, et labay to lay manbikkel, balet ta pirawat to lanlamang so manbilay kalabas na sakey simba.” Bueno, panon sirin a naamtaan na totoon nakalan lay ilalo a makana so manbilay?
[Paimano ed Leksab]
^ par. 3 Sinalatan iray arum a kangaranan.
[Litrato ed pahina 3]
Ondarakel iray kalangweran tan wala la’d edad a manbibikkel
[Litrato ed pahina 4]
Panon yon natulongan so sakey a nakalan lay ilalo?