Magnayon a Liket​—Diad Tawen Odino Diad Dalin?

KASIN say liket mo so mandependi a manuna ed no iner so panaayaman mo? Maslak a totoo so mabulos a mamidbir a say liket so mandependi a nagkalalo ed saray sengegan a singa say maong a bunigas, gagala ed bilay, tan maabig a siglaotan ed arum. Onia so impangikuan na proverbio na Biblia: “Magmaong so pangugtoan ya agagayep, a kawalaan na aro, nen say pinataba a baka tan kawalaan na gula.”​—Uliran 15:17.

Balet, makapaermen ta say dalin ya ayaman tayo so walaan na andukey lan awaran na gulaan, karawalan, tan arum niran nengneng na karelmengan. Balet komusta met diad tawen, odino say espiritun ayaman, a no iner et iilaloan na dakel a totoo a laen kayari ipatey da? Kasin lawas itan a pasen na nagnap a kareenan tan kaligenan, ya anggapoy antokaman a pakagirogiroan, unong ya ipapasen na dakel? Ibabangat na Biblia a say Dios so manaayam ed tawen kaiba iray minilyon ya espiritun pinalsa ya atawag iran anghel. (Mateo 18:10; Apocalipsis 5:11) Saraya so adeskribe bilang espiritun “anak na Dios.” (Job 38:4, 7) Singa saray totoo, saray anghel so walaan met na kawayangan a mandesisyon; aliwa iran robot. Kanian, bilang resulta et nayarian da met a pilien so manggawa na duga odino aliwa. Kasin pilien na saray anghel so manggawa na aliwa? Nayarin nabigla iray arum a makaamta a nilibon taon lay apalabas, dakerakel ya anghel so, diad tua, et nankasalanan sumpad Dios​—nanrebeldi ira ed sikato!​—Judas 6.

Saray Rebeldi ed Tawen

Agawa so kasalanan ed espiritun ayaman lapud impanrebeldi na sakey ya anghel, ya atawag a Satanas (Sumusumpa) tan Diablo (Managpauges). Sayan datin matulok ya anghel so amilin manggawa na mauges ed dilin panlabayan to. Kayari na saman et sikatoy nagmaliw a mauges ya impluensia ed arum nin espiritun pinalsa, kanian diad panaon nen Noe, antis na Delap, dakel ed sikara so akinonong ed si Satanas a nanrebeldi ed Dios.​—Genesis 6:2, NW, paimano ed leksab; 2 Pedro 2:4.

Sarayan nankasalanan ya anghel so agtampol pinagit ed tawen. Imbes, naabuloyan niran makaonla​—mapatnag a walaray pigaran panameget​—ed loob na nilibon taon. * Balet, sanen anampot so pangiyaabuloy na Dios ed sarayan managgaway mauges, sikaray “nibantak” manlapud tawen, a naderal ed kaunoran. Sakey a bosis ed tawen so angikuan: “Kanian manliket kayo, O katawenan, tan sikayon manaayam ed sikara.” (Apocalipsis 12:7-12) Mapatnag, saray matoor ya anghel so nanggayagan maong ta apagit a siansia ed tawen iramay mauges a managgaway gulo!

Diad pangonsidera ed sarayan detalyi ya agni amta ed inkalapagan, ompatnag ya anggapo so tuan kareenan bektaman ya ibaliwala na intelihenti iran pinalsa iray ganggan tan prinsipyo na Dios. (Isaias 57:20, 21; Jeremias 14:19, 20) Diad biek a dapag, sano tuloken na amin so ganggan na Dios, ontalona so kareenan tan inkaligen. (Salmo 119:165; Isaias 48:17, 18) Kanian no amin a totoo et  mangaro tan ontulok ed Dios tan manaaroan ira, agta say dalin so magmaliw a peteg a masayaksak, maliket ya ayaman? Say Biblia so oneebat na on!

Balet komusta met iraman so sinisiblet ya agmanguman ed mauges iran dalan da? Kasin magnayon dan girogiroen so kareenan na saraman so peteg a malabay a manggawa ed linawa na Dios? Andi, kinmiwas so Dios sumpad marelmeng iran anghel ed tawen, tan sikato met so onkiwas sumpad saray marelmeng a totoo diad dalin.

Sakey a Dalin ya Alinisan

“Say tawen sikato so tronok, et say dalin sikato so gagatinan na saray salik,” inkuan na Dios. (Isaias 66:1) Bilang sankasantosan, seguradon ag-abuloyan na Dios a mantultuloy a dutakan na mauges so “gagatinan” to. (Isaias 6:1-3; Apocalipsis 4:8) No panon a pinagit to ed tawen iray marelmeng ya espiritu, pagiten to met ed dalin iray amin a marelmeng a totoo, a singa ipanengneng na ontumbok iran teksto na Biblia:

“Saray managgawa na mauges napater ira; balet saray manalagar ed Jehova tawiren da so dalin.”​—Salmo 37:9.

“Say maptek manayam naani dia ed dalin, tan say ayadyari mansiansia naani ed sikato. Balet say marelmeng napegpeg a manlapu ed dalin, tan saray liputan nabagot ira ed sikato.”​—Uliran 2:21, 22.

“No nayari ya ontan a sikato so sakey a matunong ed Dios so pamales na kaermenan ed saray mameermen ed sikayo. Tan dia ed sikayo ya apaermen mipainawa kayo ed sikami, sano ompayawar so Katawan tayo a Jesus a manlapu ed tawen ya iba to so saray angheles na pakayari to, a dia ed mandarlang ya apoy. Iter to so panamales ed saray agmikabat ed Dios, tan dia ed saray ag-ontulok ed ebanghelyo na Katawan tayon Jesus; a sikara so mantepel na dusa a salanti andi anggaan a kabalang da a manlapu ed lupa na Katawan tan dia ed lupa na gloria na pakapanyari to.”​—2 Tesalonica 1:6-9.

“Say mundo [na marelmeng a katooan] mangangga, tan saray penel to: sabalet so mangunor ed linawa na Dios onsiansia lawas.”​—1 Juan 2:17.

Kasin Mansiansian Mareen so Dalin?

Anggaman malinew ya ipapanengneng na Kasulatan a say pangiyaabuloy na Dios ed saray marelmeng et walaan na getar, panon tayon makaseguro a say mauges, sano naekal la, et agla niwala lamet? Kayari na Delap ed panaon nen Noe, ag-abayag et satan so malaklaknab lamet a linmesa kanian kaukolan a deralen na Dios so marelmeng iran getma na katooan diad impanwetwet to ed lenguahe ra.​—Genesis 11:1-8.

Say manunan rason pian mankompiyansa tayon say mauges so agla onlesa lamet et say dalin so agla uleyan na saray totoo a singa agawa kayarin tuloy na Delap. Imbes, satan so uleyan na Panarian na Dios. Sayan Panarian a manuley manlapud tawen so alenleneg a gobierno ed dalin. (Daniel 2:44; 7:13, 14) Tampol ya onkiwas itan sumpa ed siopaman a manalin mangigapo lamet ed kaugsan. (Isaias 65:20) Diad tua, naderal ed kaunoran so mismon manangigapo na karelmengan​—si Satanas a Diablo​—pati saray demonyo, saray marelmeng ya anghel a tinmumbok ed sikato.​—Roma 16:20.

Niarum ni, agla pampagaan na katooan so tagano, kawesen, ayaman, tan pantrabahoan​—a saratan so kulang natan kanian napipilitan iray pigara a manggawa na krimen. On, say intiron dalin so magmaliw a mabungan paraiso tekep na inkadaakan parad amin.​—Isaias 65:21-23; Lucas 23:43.

Nagkalalon importanti, ibangat na Panarian ed saray sakop to so mareen a kabibilay legan met a naaagwat ira ed atooan ya inkayadyari. (Juan 17:3; Roma 8:21) Kayari na satan, agla mipuligesgesan so katooan ed saray kakapuyan tan makasalanan a tendensia, a pagmaliwen ton naspot so katutulok ed Dios a posibli tan makapalikliket, a singa ed kaso na ayadyarin too a si Jesus. (Isaias 11:3) Diad  tua, nansiansian matoor si Jesus ed Dios anggan diad arap na abalbaleg a tukso tan panamairap​—saray bengatla a sigpot lan agniwala ed bilay diad Paraiso.​—Hebreos 7:26.

No Akin a Walaray Onla ed Tawen

Anggaman ontan, dakel a managbasa na Biblia so makaamta ed saray salita nen Jesus: “Dia ed abung nen Amak walaray amayamay a panayaman. . . . Et onla ak tan mangiparaan ak na pasen yo onkana’d sikayo.” (Juan 14:2, 3) Agta misumlangan iya ed ideya nipaakar ed ilalon andi-anggaan a bilay ed paraison dalin?

Sarayan bangat so agmansumlangan. Diad tua, satan so mantutunosan. Unona, ibabaga na Biblia a wala labat so limitadon bilang na saray matoor a Kristiano​—salanti, 144,000 ed sikara​—so ombilay bilang espiritun pinalsa pian manayam ed tawen. Akin a sikaray naikdan na onian alay abig a tumang? Lapud tugyopen da so grupo ya anengneng nen Juan ed sakey a pasingawey a “binmilay ira tan akipan-ari ed Kristo ed sanlibon taon.” (Apocalipsis 14:1, 3; 20:4-6) No ikompara ed binilyon ed dalin, say 144,000 et talagan “melag a pulok.” (Lucas 12:32) Sakey ni, lapud impakasagmak da la ed saray problema a kaslakan ed katooan, singa ed si Jesus et nayarian day “mangasi ed saray kakapuyan tayo” legan dan aasikasoen so panamasimbalo ed katooan tan ed dalin.​—Hebreos 4:15.

Dalin​—Magnayon ya Ayaman na Katooan

Diad impangitarya na dondon bagat nen Jesu-Kristo, ginmapon tinipon na Dios so 144,000 ngalngali 2,000 lay apalabas, tan napatnagan a kompleto la iyan grupo. (Gawa 2:1-4; Galacia 4:4-7) Balet, say bagat nen Jesus et aliwan parad saray kasalanan na 144,000 labat, “noag met kasalanan na lapag a mundo.” (1 Juan 2:2) Kanian, amin a mangagamil na pananisia ed si Jesus so nawalaan na ilalon magnayon a bilay. (Juan 3:16) Saraman so naugip ed lubok balet ta walad memorya na Dios so napaoli, aliwan ed tawen, noagta diad bilay ed alinisan a dalin. (Eclesiastes 9:5; Juan 11:11-13, 25; Gawa 24:15) Anto so manaalagar ed sikara ditan?

Oneebat so Apocalipsis 21:1-4, a kuanto: “Nia, so tabernakulo na Dios wala ed saray totoo . . . Tan punasen to so amin a lua ed kamataan da; tan anggapo la naani ipatey; tan anggapo la naani onnangis o dageyem, o ot-ot: ta saray una a bengatla sikara so linmabas la.” Isipen pa​—saray totoo so nibulos manlapud patey, et say ot-ot tan dageyem so naandi la ed ando lan ando! Say orihinal a gagala nen Jehova ed dalin tan ed katooan so mamantok a siansia ed maglorian kasumpalan na satan.​—Genesis 1:27, 28.

Say Pampilian Tayo​—Bilay Odino Patey

Si Adan tan Eva so agnaikdan a balot na pampilian ya onla ed tawen. Say pampilian da et no ontulok ira ed Dios, manbilay ira ya ando lan ando ed paraison dalin odino no onsunggay ira ed sikato, ompatey ira. Makapaermen, pinili ra so ontunganga kanian sikaray pinmawil ed “dabok” na dalin. (Genesis 2:16, 17; 3:2-5, 19) Agbalot ginagala na Dios parad lapag a pamilya na too ya ompatey tan onlan manayam ed tawen diad panamegley na lubok. Pinalsa na Dios so nilaksan anghel pian manbilay ed tawen; sarayan espiritun pinalsa et aliwan totoo ya inaatey tan apaoli ed bilay diad tawen.​—Salmo 104:1, 4; Daniel 7:10.

Antoy nepeg tayon gawaen pian naawat tayo so bendision a manbilay ya ando lan ando ed Paraiso diad dalin? Say unonan kundang et say panaral ed Salita na Dios, say Masanton Biblia. Inkuan nen Jesus ed pikakasi to: “Saya sikato so andi-angaan a bilay, a naamtaan da ka a saksakey a tuan Dios, tan saman so imbakim, salanti Jesu-Kristo.”​—Juan 17:3.

Say pangagamil ed satan a pikakabat et sananey a kundang parad andi-anggaan a liket diad Paraiso. (Santiago 1:22-24) Saraman so manbilay a mitunosan ed Salita na Dios et nawalaan na ilalon makanengneng a mismo ed kasumpalan na saray makapalikliket a propesiya a singa samay nikurit diad Isaias 11:9, a kuanto: “Ag-ira [katooan] naani mamaunong odino mamagbag dia ed amin a masanto a palandey ko; ta say dalin napano naani ed pikakabat ed Jehova, singa say danum sakbongan da so dayat.”

[Paimano ed Leksab]

 [Saray litrato ed pahina 7]

“Say matunong tawiren to so dalin tan manayam diman lawas.”​—Salmo 37:29