Panagbasa ed Biblia​—Makagungguna tan Makapalikliket

“Nepeg mo . . . so manbasa ed satan dia ed agew tan labi.”​— JOSUE 1:8, NW.

1. Anto so arum a nagungguna ed kaslakan a panagbasa tan nagkalautla ed say panagbasa ed Biblia?

 SAY pambasa ed makabaliksan a materyal et sakey a makagunggunan gegemtan. Oniay insulat nen Montesquieu (Charles-Louis de Secondat), sakey a pilosopon Pranses nipaakar ed politika: “Parad siak, say panagaral so lawas sankatalonggaringan a polaing pian nadaeg so pakababanalan ed bilay. Pinaandi na sakey oras a panagbasa so amin a gonigon a sinmabi’d siak.” Diad sankalaknaban a paraan, tua iya ed panagbasa na Biblia. Oniay inkuan na apuyanan a salmista: “Say katunongan nen Jehova nagnap, tan panpataolien to so kamarerwa: say panamatua nen Jehova matua, gawaen to a makalakal so andi amta. Saray panontonan nen Jehova maptek ira, pagayagaen da so puso: say ganggan nen Jehova malinlinew, liwawaan to so saray mata.”​—Salmo 19:7, 8.

2. Akin a pinansiansia nen Jehova so Biblia ed inlabas na saray panaon, tan anto so iilaloan ton gawaen na saray totoo to’d satan?

² Bilang Autor na Biblia, pinansiansia itan nen Jehova a Dios ed inlabas na saray siglo anggaman ed pirmin isusumpa na saramay mamubusol ed satan, relihyoso man odino sekular. Lapud linawa to ya “amin a totoo nilaban ira komon, tan ondago ra ed pakapikabat ed katuaan,” sineguro to a niwala so Salita to ed amin a katooan. (1 Timoteo 2:4) Akalkula a ngalngali 80 porsiento ed populasyon na dalin so nasabi la panamegley na 100 a lenguahe. Say lugan na intiron Biblia so wala la natan ed 370 a lenguahe, tan saray kabiangan na Kasulatan so nabasa la ed masulok ya 1,860 a lenguahe tan dialekto. Labay nen Jehova a basaen na totoo to so Salita to. Bebendisionan toray lingkor to a mangiimano ed Salita to, on, saramay inagew-agew a manbabasa ed satan.​—Salmo 1:1, 2.

Kakaukolanen ed Saray Manangasikaso so Panagbasa ed Biblia

3, 4. Anto so kinaukolan nen Jehova ed saray arari na Israel, tan antoran rason no akin a nakaukolan iya ed biang na saray Kristianon mamatatken natan?

³ Diad impanukoy nen Jehova ed isabi na panaon sano say intiron nasyon na Israel so nawalaan na toon ari, oniay inkuan to: “Nagawa naani no sikato la so makayurong ed trono na panarian to mansulat naani na sakey a libro ya onkana ed sikato a katuplegan na panamatontonan a wala ed arap na saray saserdotes a Levitas: Tan wala a naynay ed sikato, et basbasaen to naani ed amin ya agew a pambilay to; pian naaral to so ontakot ed kinen Jehova a Dios to, pian agamilen to so amin a sasalitaen na saya a panamatontonan, tan saray uliran, pian gawaen tora; pian ag-onkinon so puso to ed saray agagi to, pian ag-onkasipa naani ed ganggan a mamakawanan odino mamakawigi.”​—Deuteronomio 17:18-20.

⁴ Imanoen pa iray rason no akin a kinaukolan nen Jehova ya inagew-agew a basaen na amin a manari ed Israel so libro na madibinon ganggan: (1) “pian naaral to so ontakot ed kinen Jehova a Dios to, pian agamilen to so amin a sasalitaen na saya a panamatontonan, tan saray uliran, pian gawaen tora”; (2) “pian ag-onkinon so puso to ed saray agagi to”; (3) “pian ag-onkasipa naani ed ganggan a mamakawanan odino mamakawigi.” Agta nakaukolan ed saray Kristianon manangasikaso natan so ontakot ed si Jehova, mangunor ed saray ganggan to, agmangitandoro ed sikaran dili diad limog na saray agagi ra, tan ag-onkasipa ed saray ganggan nen  Jehova? Say inagew-agew a panagbasa ed Biblia so makanakana ed sikara a singa met ed saray arari na Israel.

5. Anto so agano nin insulat na Mananguley ya Ulop ed saray membro na Branch Committee nipaakar ed panagbasa ed Biblia, tan akin a makagungguna ed amin a Kristianon mamatatken so panumbok ed sayan simbawa?

⁵ Saray Kristianon mamatatken natan so walaan na okupadon eskedyul, kanian sakey ya angat ed biang da so inagew-agew a pambasa ed Biblia. Alimbawa, saray membro na Mananguley ya Ulop na saray Tastasi nen Jehova tan saray membro na Branch Committee ed sankamundoan so okupadon maong a lalaki. Ingen ta nidanet ed agano nin sulat na Mananguley ya Ulop ed amin a Branch Committee a nakaukolan so inagew-agew a panagbasa ed Biblia tan maong ya ugali ed panagaral. Unong a nipabitar ed sulat, saya so mamaelet ed aro tayo’d si Jehova tan ed katuaan, tan saya “so ontulong ed sikatayo pian namantini tayo so pananisia, gayaga, tan anos tayo anggad maglorian anggaan.” Ontan met komon so pampelengan na amin a mamatatken ed loob na kongregasyon na Tastasi nen Jehova. Say inagew-agew a panagbasa ed Kasulatan so ontulong ed sikaran “onkiwas a sikakabat.” (Josue 1:7, 8, NW) Nagkalautla ed sikara, say panagbasa ed Biblia so “makagungguna ed panagbangat, panamaat, panametek, tan panangipasal ed inkatunong.”​—2 Timoteo 3:16, Revised Standard Version.

Nakaukolan ed Biang na Saray Kalangweran tan Matatken la

6. Akin a maksil ya imbasa nen Josue so amin a salita ed ganggan nen Jehova diad arap na atipon iran tribu na Israel tan saray sankaili?

⁶ Nensaman, anggapo ni so indibidual a kopya na Kasulatan a nausar na balang sakey, kanian say Biblia so ibabasa ed arap na atiptipon a totoo. Nen sikatoy pinambiktorya nen Jehova ed syudad na Ai, tinipon nen Josue iray tribu na Israel ed arap na Palandey Ebal tan Palandey Gerizim. Insan, oniay ibabaga’d sikatayo na salaysay: “Binasa to so amin a salsalita na ganggan, say bendision tan say ayew, unong na amin a wala a nisulat ed libro na ganggan. Anggapo so salita ed amin ya ingganggan nen Moises, ya ag-imbasa nen Josue ed arap na amin na Israel, tan saray bibii, tan saray ugugaw, tan saray sankaili a wala ed nanleleetan da.” (Josue 8:34, 35) Saray kalangweran tan matakken la, ombaley tan sankaili, so nakaukolan a mangiyukit ed satan, a singa panangibaga, diad kapusoan tan kanonotan da ed no anton kondukta so mangitarok na bendision nen Jehova tan no antoy mangitarok na agto panangabobon. Say regular a panagbasa ed Biblia so peteg a makatulong ed sikatayo nipaakar ed saya.

7, 8. (a) Siopa natan so singa “saray sankaili,” tan akin a nakaukolan dan basaen so Biblia ya inagew-agew? (b) Diad antoran dalan a natumbok na ‘saray angkekelag ni’ ed limog na totoo nen Jehova so ehemplo nen Jesus?

⁷ Natan, minilyon ed saray lingkor nen Jehova et singa ‘sankaili’ ed espiritual a pantalos. Dati et manbibilay ira unong ed saray estandarte na mundo, balet pinasimbalo da la so kabibilay da. (Efeso 4:22-24; Colosas 3:7, 8) Nakaukolan a naynay dan panonotan so inkasikara ed saray estandarte nen Jehova nipaakar ed maong tan mauges. (Amos 5:14, 15) Ontulong ed sikara so inagew-agew a panagbasa ed Salitay Dios pian nagawaan da itan.​—Hebreos 4:12; Santiago 1:25.

⁸ Dakel met iray ‘angkekelag ni’ ed limog na totoo nen Jehova a nibabangat ed saray estandarte nen Jehova panamegley na atateng da balet ta nakaukolan a nakombinse ed kaptekan na linawa to. (Roma 12:1, 2) Panon dan nagawaan itan? Diad Israel et abilin iray saserdote tan mamasiken: “Basam naani so saraya a kaptekan ed arap na amin ya Israel a dengdengelen da. Pantitipon mo naani totoo, saray lalaki tan bibii, tan saray angkelag tan say  sankailim a wala ed loob na saray pulongpintom, ta pian narengel da tan natumbok da tan ontakot ira ed Jehova a Dios yo, tan sumpalen da a gawaen so saray amin a salsalita na kaptekan: Tan pian saray anak da ya ag-akaamta, narengel da tan naaralan da so ontakot ed Jehova a Dios yo.” (Deuteronomio 31:11-13) Lapud sikatoy nambilay unong ed Ganggan, impanengneng nen Jesus, nen sikatoy nan-12 años, so pirmin interes pian natalosan toray ganggan nen Ama to. (Lucas 2:41-49) Saginonor, niyugali to la so ondengel tan mibiang diad panagbasa ed Kasulatan diad loob na sinagoga. (Lucas 4:16; Gawa 15:21) Napaseseg iray kalangweran natan a tumboken da so ehemplo nen Jesus diad inagew-agew a pambasa ed Salitay Dios tan diad maparanay ya iyatendi ed saray miting a ditan babasaen tan aaralen so Biblia.

Panagbasa ed Biblia​—Sakey a Bengatlan Uunaen

9. (a) Akin a nakaukolan itayon magmaliw a mapili ed babasaen tayo? (b) Anto so inkuan na editor ya angigapo ed sayan magasin nipaakar ed saray katulongan ed panagaral na Biblia?

⁹ Insulat nen makabat ya Arin Solomon: “Nasimbawaan ka, komon: Say panggawa ed dakerakel a libro anggapo so anggaan; et say dakel ya aral sikato so sakey a belat na laman.” (Eclesiastes 12:12) Nayarin ibaga ni na sakey ya aliwa lambengat a makapakesaw so pambasa ed dakel a libron nipapalapag natan, noagta diad tua et mapeligro ni ingen ed kanonotan. Kanian importanti so pagmaliw a mapili. Nilikud ni’d pambasa ed saray publikasyon tayo ed panagaral na Biblia, nakaukolan a basaen tayon mismo so Biblia. Oniay insulat na editor ya angigapo ed sayan magasin ed saray managbasa to: “Agbalot lilingwanan a say Biblia so Pananontonan tayo tan anggaman walaray katulongan ya inter na Dios, saratan et ‘katulongan’ lambengat tan aliwan kasalat na Biblia.” * Kanian, anggaman agtayo ibabaliwala iray publikasyon tayo a nibase’d Biblia, nakaukolan tayon basaen a mismo so Biblia.

10. Panon ya indanet na “matoor tan makabat ya aripen” so kaimportantian na panagbasa ed Biblia?

¹⁰ Lapud sinononot so “matoor tan makabat ya aripen” ed sayan pankaukolan, inyeskedyul da so panagbasa ed Biblia diad loob na dakel a taon bilang kabiangan ed programay Teokratikon  Eskuelaan Parad Panagministro ed kada kongregasyon. (Mateo 24:45) Kobrian na kaplesan a programa ed panagbasa na Biblia so intiron Biblia diad loob na ngalngali pitoy taon. Sayan eskedyul so makagungguna ed amin balet nagkalautla ed saramay balo ni ya agnin balot akabasa ed intiron Biblia. Saramay onatendi ed Watchtower Bible School of Gilead pian man-misyonaryo tan ed Ministerial Training School ontan met ed saray balon membro na pamilyay Bethel so kakaukolanen a manbasa ed intiron Biblia diad loob na sakey a taon. Antokaman so eskedyul a tutumboken yo, bilang indibidual odino pamilya, nakaukolan ya iyuna so panagbasa ed Biblia pian narapat itan.

Anto so Ipaparungtal na Ugali Yo ed Panagbasa?

11. Panon tan akin a nakaukolan itayon mantagano ed saray salita nen Jehova diad agew-agew?

¹¹ No nanairapan kayo ed panutumbok yo ed eskedyul yo’d panagaral na Biblia, nayarin matukoy so pangitepet yo’d inkasikayo: ‘Anto so nayarin epekto na panagbasak odino panagbantay ko na TV ed abilidad kon manbasa ed Salitay Dios?’ Nodnonoten so insulat nen Moises​—ya inulit nen Jesus​—“aliwa a say tinapay labat so napambilay na too noag say amin a salitan ombesngaw ed sangi’ Dios.” (Mateo 4:4; Deuteronomio 8:3) No panon a nakaukolan ed bilay tayo so agew-agew a pangan na tinapay odino say mipadpara’d satan pian nasustuni so pisikal a laman tayo, nakaukolan tayo met so inagew-agew ya igamor na saray kanonotan nen Jehova ta pian napansiansia tayo so espiritualidad tayo. Naamtaan tayo iray kanonotan na Dios ed kada agew diad pambasa ed Kasulatan.

12, 13. (a) Panon so impangiyilustra nen apostol Pedro ed pampilalek a nepeg a niwala’d sikatayo parad Salitay Dios? (b) Panon a midumaan so ilustrasyon nen Pedro ed samay ilustrasyon ya inusar nen Pablo nipaakar ed gatas?

¹² No papablien tayo so Biblia, “ya aliwan singa salita na totoo, balet unong ed katuaan, say salitay Dios,” napaapit itayo ed satan a singa ed kapangiyanak a manpipilalek ed gatas nen ina to. (1 Tesalonica 2:13) Oniay impangiyaliling nen apostol Pedro ed satan, unong ya insulat to: “Pampilalekan yo komon, a singa saray kapangiyanak ya ugugaw, so gatas a maespiritu ya andian na saol to a mamabaleg ed sikayo ed kilalaban: No asali yo la a say Katawan et mapalangkap.” (1 Pedro 2:2, 3) No petepeteg ya atawayan tayo la, diad personal ya eksperiensia, a “say Katawan et mapalangkap,” nabayuboan tayo so pampilalek ed panagbasa ed Biblia.

¹³ Nepeg ya imanoen a say inusar nen Pedro ed sayan bersikulo bilang panangiyaliling ed gatas so midumaan ed samay inusar nen apostol Pablo. Parad kapangiyanak ya ugaw, magenap la so gatas pian nasustuni so kaukolan ton sustansia. Ipapatnag na ilustrasyon nen Pedro a lugan na Salitay Dios so amin a nakaukolan tayo pian ‘ombaleg itayo ed kilalaban.’ Diad biek a dapag, inusar nen Pablo so pankaukolan ed gatas pian iyilustra so kulang a pakatatagano na arum a mankuan a matakken ira’d espiritual. Dia ed sulat to’d saray Hebreon Kristiano, oniay inkuan nen Pablo: “Anta nepeg yo la komon so managbangat, lapu ed inkabayag la na panaon yo ya anisia, nakaukolan yo a wala so manbangat lamet ed sikayo, no dinan so saray unonan aralen ed saray salitay Dios; tan nagmaliw kayon singa saray mankaukolan na gatas, ya agkomon say tagano na mabiskeg. Ta balang sakey a managamil na gatas anggapo so asalsali to ed salita na katunongan; ta sikato so sakey ya ugaw. Ingen say taganon anawet sikato so kien na saray ayadyarin totoo, salanti saraman so lapud panangagamil, saray pakalikna ra apasal ed panangibiig na maong tan mauges.” (Hebreos 5:12-14) Say mapetepet a panagbasa ed Biblia so makatulong a maong pian nabayuboan tayo so pakayari tayon manebek tan managyat ed pampilalek tayo ed saray espiritual a bengatla.

No Panon so Pambasa ed Biblia

14, 15. (a) Anton pribilihyo so iyoopresi ed sikatayo na Autor na Biblia? (b) Panon itayon nagunggunaan ed madibinon kakabatan? (Mangiter na saray alimbawa.)

¹⁴ Say makagunggunan tuloy a panagbasa ed Biblia et igapo ed pikakasi, ya aliwan basaen a tampol. Say pikakasi et nikadkaduman pribilihyo. Aliling na satan so pangusisa ed sakey a libron walaay aralem a tema diad ikerew ni na tulong ed autor na satan pian natalosan so basaen yo. Agaylan abig itan a bentaha! Satan a pribilihyo so iyoopresi ed sikayo na Autor na Biblia, si Jehova. Oniay insulat na sakey a membro na inmunan-siglon mananguley ya ulop ed saray agagi to: “No siopaman ed sikayo so makulang na kakabatan, pakerewen ed  Dios; a mangiter na mabunlok ed amin a too, tan agto balawen; tan niiter ed sikato. Bangbalet pakerewen ed pananikey a manduaruwa a singa sakey a dalusia, ya andi panduaruwa.” (Santiago 1:5, 6) Lawas itayon papasesegen na kaplesan a Mananguley ya Ulop ya agamilen so masimoon a panagbasa ed Biblia.

¹⁵ Say kakabatan et say praktikal a panangiyaplika ed pikakabat. Kanian antis yon ibukay so Biblia yo, onkerew ni na tulong ed si Jehova pian natebek yoray punto ed babasaen yo a nakaukolan ya iyaplika ed mismon bilay yo. Itunos yoray balon bengatla a naaralan yo ed apalabas lan akabatan yo. Itekep iratan ed “say alasir na makapabunigas iran salita” a naamtaan yo la. (2 Timoteo 1:13, NW) Morekdeken iray agawa ed bilay na saray lingkor nen Jehova nensaman, tan usisaen yoy inkasikayo no panon so ikiwas yo ed saray sirkumstansian inkidungetan da.​—Genesis 39:7-9; Daniel 3:3-6, 16-18; Gawa 4:18-20.

16. Antoray praktikal a nisuheri pian nagawaan tayon mas makagungguna tan makanakana so panagbasa tayo ed Biblia?

¹⁶ Aglambengat manbabasa pian nakobrian iray pahinan inyeskedyul a basaen. Ipanaon itan. Molimolien so babasaen yo. Sano walay punton naninteresan yo, nengnengen ed saray cross reference no wala iratan ed Biblia yo. No agni malinew so punto, isulat itan ta pian nagkalalon na-research ed saginonor. Legan yon babasaen, markaan iray teksto a labalabay yon tandaan odino kopyaen iratan. Nayari met ya aruman yo na personal iran nota tan cross reference ed gilig na pahina. Diad saray teksto a nayarin isipen yon nakaukolan ed saginonor diad panagpulong tan panagbangat, imanoen iray manunan salita tan nengnengen diad indesi na saray salita na Biblia ed beneg na Biblia yo. *

Panliketan so Panagbasa ed Biblia

17. Akin a nepeg tayon panliketan so panagbasa ed Biblia?

¹⁷ Sinaglawi na salmista so nipaakar ed maliket a too a “say gayaga to [et] wala ed ganggan nen Jehova; tan diad ganggan to mandalepdep ed agew tan labi.” (Salmo 1:2) Say inagew-agew a panagbasa tayo ed Biblia so agnepeg ya obligasyon lambengat noagta petepeteg a panliketan. Say sakey lan paraan pian napanliketan itan et say pagmaliw a sinononot ed kablian na saray bengatlan naaralan. Insulat nen makabat ya Arin Solomon: “Mapalar so too a makaromog na kakabatan . . . Saray dalan to sikara so dalan a makapaliket, tan amin iray basbas to sikara so deen. Sikato so sakey a kiew na bilay ed saray ompeket ed sikato: tan mapalar so balang sakey a mamemben ed sikato.” (Uliran 3:13, 17, 18) Peteg a makagungguna so sagpot a nakaukolan pian nagamoran so kakabatan, lapud ta saray dalan na satan et dalan a makapalikliket, deen, liket, tan diad kaunoran et bilay.

18. Anto so nakaukolan nilikud ed panagbasa ed Biblia, tan anto so konsideraen tayo ed ontumbok ya artikulo?

¹⁸ On, say panagbasa ed Biblia so makagungguna tan makapalikliket. Balet magenap la kasi itan? Saray membro na iglesia na Kakristianoan so manbabasa na Biblia ed loob la na saray siglo, “a siansia a manaaral et anggan kapigan agda nayarian so makarateng ed pikakabat ed tua.” (2 Timoteo 3:7) Pian makabkabaliksan so panagbasa ed Biblia, nepeg a gawaen tayo itan tekep na gagalan iyaplika so pikakabat a nagagamoran tayo diad personal a kabibilay tayo tan usaren itan diad panagpulong tan panagbangat tayo. (Mateo 24:14; 28:19, 20) Mankaukolan iya na sagpot tan maong a metodo ed panagaral, a magmaliw met a makapaliket tan makatumang, unong a nanengneng tayo ed ontumbok ya artikulo.

[Saray paimano ed leksab]

Saray Tepet a Repasoen

• Anton simbawa ed saray arari ed Israel so onaplika natan ed saray manangasikaso, tan akin?

• Siopa natan so singa “saray sankaili” tan ‘saray angkekelag ni,’ tan akin a nakaukolan dan inagew-agew a basaen so Biblia?

• Diad antoran praktikal a dalan a makakatulong ed sikatayo so “matoor tan makabat ya aripen” pian regular a basaen so Biblia?

• Panon tayon nagamoran so peteg a gungguna tan liket ed panagbasa tayo ed Biblia?

[Tepetepet Parad Panagaral]

[Litrato ed pahina 9]

Nagkalautlan nakaukolan ed biang na saray mamatatken so inagew-agew a panagbasa ed Biblia

[Litrato ed pahina 10]

Niyugali la nen Jesus so mibiang ed panagbasa na Kasulatan diad sinagoga