Kasin Napaapit Ka ed Agnanengneng a Dios?
Kasin Napaapit Ka ed Agnanengneng a Dios?
‘Panon kon nabayuboan so maapit a siglaotan ed sakey ya agko nanengneng?’ so nayarin itepet mo. Nayarin ompatnag a makatunongan itan a tepet. Balet konsideraen:
PANON kaimportanti so pakanengneng pian nabayuboan so maaro tan magnayon a siglaotan? Agta saray agnanengneng a sengegan et importanti met, no bilang ta aliwan mas importanti? On! Lapud satan et walaray totoon abayuboan da so maapit a siglaotan ed arum diad panamegley na regular a pansusulatan—a saray sulat da so talagan pakapatnagan na saray labalabay, aglabay, kalat, prinsipyo, pampaelek, tan arum niran walna ed personalidad odino paninteresan.
Ipapatnag met na saray bulag a totoo a say pakanengneng et ag-importanti ed pamayubo’d maapit a siglaotan ed sananey a too. Konsideraen so alimbawa di Edward tan Gwen, sanasawan bulag. * Akabat nen Edward si Gwen diad eskuelaan na saray bulag, a kapara ton estudyante a wala la’d edad. Pandinayewan nen Edward iray kualidad nen Gwen, nagkalalo la ed inkamatua to ed panagsalita tan kondukta, tan say alay abig ya awawey to ed trabaho. Ontan met, agustoan nen Gwen si Edward lapud, unong ed inkuanto “sikatoy angipatnag na amin a kualidad a nibangat ed siak ya importanti.” Akapan-inaroan ira, tan taloy taon ed saginonor et sikaray nankasal.
“Sano saniba kayo la,” inkuan nen Edward, “anggapoy pidumaan na pagmaliw a bulag ed pamayubo na relasyon ed sananey a too. Nayarin agyo nanengneng so sakey tan sakey, balet aliwan bulag iray liknaan.” Natan, 57 a taon lay apalabas, malmalet ni aroan da. Insalaysay da a say sekreto ed alay abig a relasyon da et saglawien toy apatiran bengatla: (1) pangimano ed saray kualidad na sananey a too, (2) pannonot tan pakasagyat ed saratan a kualidad, (3) panmantini ed maabig a komunikasyon, tan (4) paniban panggawa ed saray bengatla.
Sarayan apatiran punto so importanti ed dinanman a maabig a relasyon, balanglan diad sankakaaro, sanaasawa odino, nagkalalo lan importanti ed say siglaotan na totoo tan Dios. Diad ontumbok ya artikulo, imanoen tayo no panon a say panangiyaplika ed sarayan punto so makatulong ed sikatayo pian nabayuboan so maapit a siglaotan ed Dios, anggaman sikatoy agtayo nanengneng. *
[Saray paimano ed leksab]
^ par. 4 Sinalatan iray ngaran.
^ par. 6 Aliwan singa say siglaotan ed baetan na totoo, say siglaotan ed Dios so nibase ed pananisia’d kiwawala to. (Hebreos 11:6) Parad detalyadon impaningbat nipaakar ed pangipaalagey na mabiskeg a pananisia ed Dios, ipangasin nengnengen so Is There a Creator Who Cares About You?, impalapag na Watchtower Bible and Tract Society of New York, Inc.