No Panon Kan Napaapit ed Dios

“Singger [“onapit,” NW] kayo ed Dios, et sikato so onsingger naani ed sikayo,” so ibabaga na Santiago 4:8. Inter nen Jehova a Dios so Anak to nisengeg ed sikatayo, bilang panangipanengneng toy pankaliktan to a nawalaan na maapit a siglaotan iray totoo ed sikato.

BILANG ebat ed satan a maaron kiwas to, onia so insulat nen apostol Juan: “Aroen tayo [so Dios] ta sikato so angaro ed sikatayo ya inmuna.” (1 Juan 4:19) Balet pian napaapit itayon mismo ed Dios, walaray kundang a nepeg tayon gawaen. Mipadpara iratan ed apatiran paraan na iyaapit tayo ed kaparan totoo, a singa nidatak ed akaunan artikulo. Usisaen tayo sirin iraya.

Imanoen Iray Alay Abig a Kualidad na Dios

Say Dios so walaan na dakel ya alay abig iran kualidad, arum ed sankatalonggaringan et say aro, kakabatan, inkahustisya, tan pakapanyari to. Say kakabatan tan pakapanyari to so napatnagan a maong ed arawrawin uniberso tan ed mundon kawalaan tayo, manlapud angkakabaleg a galaksi anggad angkekelag ya atomo. Insulat na salmista: “Saray tawen ipaliwawa ra so gloria na Dios; tan say sansinakoban iparungtal to so gawa na saray lima to.”​—Salmo 19:1; Roma 1:20.

Ipapatnag met na palsa so aro na Dios. Alimbawa, say inkagawa tayo so mangipapanengneng a kaliktan na Dios a panggayagaan tayoy bilay. Inikdan to itayo na abilidad a makanengneng na saray kolor, pakataway tan pakaangob, pangapresia ed musika, panelek, panggayaga ed karakpan, inikdan to itayo met na dakel niran abilidad tan walna ya angkelag lambengat a kabiangan na bilay. On, talagan mabunlok, mapangasi, tan maaro so Dios​—saratan so kualidad a seguradon ontutulong ed pagmaliw ton “maliket a Dios.”​—1 Timoteo 1:11, NW; Gawa 20:35.

Panliliketan nen Jehova a say pangikakana to ed inkasoberano to tan say pananuporta na intelihenti iran pinalsa to ed satan et manunan nibabase ed aro. (1 Juan 4:8) Tua, si Jehova so Sankatalbaan a Soberano, balet tratratoen toray totoo, nagkalalo la’d saray matoor a lingkor to, a singa ed panagtrato na maaron ama ed ananak to. (Mateo 5:45) Agto ikikibot so pankaabigan da. (Roma 8:38, 39) Singa asalambit la, inter to ni ingen so bilay na bogbogtong ya Anak to nisengeg ed sikatayo. On, lapud panangaro na Dios et niwala itayo tan walaan itayo na ilalon magnayon a bilay.​—Juan 3:16.

Inikdan itayo nen Jesus na aralem a pakatalos ed personalidad na Dios lapud nagnap ton inalig si Ama to. (Juan 14:9-11) Sikatoy sigpot ya agmasiblet, makonsidera, tan manonot. Diad sakey ya inkagawa, niyakar ed si Jesus so sakey a laki a telek tan walay deperensia na panagsalita to. Naisip yo a say laki et nayarin nababaingan ed arap na dakel a totoo. Makapainteres, intagar nen Jesus iyan laki ed pribadon lugar tan pinaabig to diman. (Marcos 7:32-35) Kasin aapresiaen yoray totoo a makonsidera ed saray liknaan yo tan manrerespeto ed dignidad yo? No ontan, seguradon napaapit kayo ed si Jehova tan ed si Jesus diad nagkalalon panaral yo nipaakar ed sikara.

Isipen Iray Kualidad na Dios

Nayarin nawalaan so sakey na alay abig iran kualidad, balet kaukolan tayon isipen so nipaakar ed satan a too pian napaapit itayo ed sikato. Onaplika met itan ed si Jehova. Say pandalepdep ed saray kualidad to et komaduan importantin kundang ed iyapit ed sikato. Si Arin David, a talagan angaro ed si Jehova tan “karoyroyo na puso [nen Jehova],” kuanto: “Nanodnonotan ko so saray inmuna ya agew; manumameng ak ed amin a gawagawam; mantaltaliwa ak ed gawa na limalimam.”​—Gawa 13:22, NW; Salmo 143:5.

 Sano obserbaan yo iray pankelkelawan a palsa odino basaen so Salita na Dios, say Biblia, kasin dadalepdepen yoy nanenengneng tan nababasa yo, a singa si David? Isipen pa so sakey ya anak ya akaawat na sulat manlapud inad-aro ton maong ya ama. Panoy panmoria to ed satan a sulat? Talagan agto labat parlasan iray lugan na satan tan isukib to lan tampol ed drawer. Imbes, aralen to itan, a talosan tan amtaen so kada detalyi. Ontan met, say Salita na Dios so nepeg a mabli ed sikatayo, a singa ed salmista ya angikantay: “Agayla so panangarok ed ganggan mo! Sikato so dalepdep ko ed amin ya agew.”​—Salmo 119:97.

Mantinien so Maabig a Komunikasyon

Say maabig a komunikasyon et importantin maong ed dinanman a relasyon. Sasaglawien na satan so pansalita tan idengel​—tan aliwa labat lan say nonot noagta ontan met ed puso. Mitotongtong itayo ed Manamalsa diad panamegley na pikakasi, a satan so manangidayew a pitotongtong ed Dios. Panliketan nen Jehova so pikakasi na saramay mangaaro tan manlilingkor ed sikato tan mamibidbir ed si Jesu-Kristo bilang say manunan manangilaman To.​—Salmo 65:2; Juan 14:6, 14.

Nensaman, akitongtong so Dios ed totoo diad nanduruman paraan, laktip laray pasingawey, kugkugip, tan diad panamegley na saray anghel. Balet, natan et sikatoy mitotongtong diad panamegley na nisulat a Salita to, say Masanton Biblia. (2 Timoteo 3:16) Say nisulat a Salita so walaan na dakel a bentaha. Nayari itan a tuplegan anggan anton oras. Singa sakey a sulat, napanggayagaan itan a paulit-ulit. Tan agnapikewet itan a singa ed insalitan panangipasabi. Kanian ipasen so Biblia bilang baleg a koleksion na saray sulat a nanlapud inad-aro tayon mangatatawen ya Ama, tan diad panamegley na sarayan sulat et sikatoy abuloyan a mitongtong ed sikayo ya inagew-agew.​—Mateo 4:4.

Singa bilang, idadatak na Biblia so panmoria nen Jehova nipaakar ed duga tan aliwa. Ipapaliwawa na satan so gagala to parad katooan tan ed dalin. Tan ipaparungtal na satan so pidedeneng to ed nanduruman totoo tan nasyon, manlapud saray matoor a managdayew to anggad saray pirmin kakabusol to. Lapud saray impideneng to ed totoo a nikurit ed onian paraan, nikadkaduman detalyadon nipapanengneng nen Jehova so personalidad to. Ipaparungtal toy aro, gayaga, kaermenan, inkadismaya, sanok, panangasi, kapagaan to​—on, say laknab na saray kanonotan tan liknaan to, tan saray manunan rason ed saraya​—diad paraan a mainomay a natalosan na totoo.​—Salmo 78:3-7.

Kayari yon abasa so kabiangan na Salita na Dios, panon kayon nagunggunaan ed panagbasa yo? Tan, nagkalautla, panon kayon lalon napaapit ed Dios? Unona, isipen so nipaakar ed abasa tan naaralan yo la nipaakar ed Dios bilang sakey a persona, ya ipapuso yo iray punto. Insan diad pampikasi et ibesngaw yo ed si Jehova iray walad nonot tan akindalem iran liknaan yo nipaakar ed abasa yo tan no panon yon panggunaetan so pakagunggunaan ed satan. Ontan so komunikasyon. Siempre, no wala met niray arum a bengatla’d kanonotan yo, saraya so nayarin ilaktip met ed pikakasi yo.

Gawaen Iray Bengatla Kaibay Dios

Tinukoy na Biblia iray pigaran matoor a lalaki nensaman a nanakar a kaiba na Dios odino diad imaton to. (Genesis 6:9; 1 Arari 8:25) Antoy kabaliksan na satan? Manuna et lapud nambilay ira ed kada agew a singa kaiba ran mismo so Dios. Tua, sikaray makasalanan. Ingen pinabli da iray ganggan tan prinsipyo na Dios, tan sikaray nambilay a mitunosan ed gagala na Dios. Inmapit si Jehova ed saratan a totoo, tan inyansakit to ira, a singa nipanengneng diad Salmo 32:8: “Bilinen taka tan ibangat taka ed dalan a nepeg mo a laen: simbawaen taka a sinenengneng so matak ed sika.”

 Nayarian yo met a magmaliw a maapit a kaaro si Jehova​—a miakar ed sikayo, mangiyansakit ed sikayo, tan singa ama a manbilin ed sikayo. Si Jehova so deneskribe nen propeta Isaias bilang ‘say Mangibabangat ed sika nipaakar ed nabang mo, a mangitonton ed sika ed dalan a laen mo komon.’ (Isaias 48:17) Legan tayon naeeksperiensia irayan gungguna, nalikna tayoy kiwawala nen Jehova “diad nikawanan [tayo],” a singa panangibaga, unong ya alikna met nen David.​—Salmo 16:8.

Say Ngaran na Dios​—Sentro na Saray Kualidad To

Dakel a relihyon tan ondarakel a bilang na saray patalos na Biblia so agmanguusar tan agmangipapakabat ed personal a ngaran na Dios. (Salmo 83:18) Ingen, diad orihinal a Hebreon teksto, satan a ngaran​—Jehova​—so pinmatnag ed ngalngalin 7,000 a danay! (Agmitukoyan, ta diad impangekal ed ngaran na Dios, maslak a managpatalos na Biblia so ag-angekal ed kangaranan na dakel a palson dirios ya asalambit ed orihinal a teksto, a singa  say Baal, Bel, Merodach, tan anggan si Satanas!)

Walaray totoon liknaen dan say impangekal ed ngaran na Dios et ag-importantin bengatla. Balet isipen pa: Kasin mas mairap odino mas mainomay a bayuboan so maapit, nikabisadon relasyon ed sakey a bugkalot a too? Saray titulo a singa say Dios tan Katawan (ya inusar met ed impanukoy ed palson dirios) so nayarin mangipaimano ed pakapanyari, autoridad, odino posisyon nen Jehova, balet say personal a ngaran to labat so mangipabidbir ed sikato diad malinew a paraan. (Exodo 3:15; 1 Corinto 8:5, 6) Say personal a ngaran na tuan Dios so mangidadanet ed saray kualidad tan awawey to. Duga so impangikuan na teologon si Walter Lowrie: “Say toon agto kabat so Dios ed ngaran et sikatoy talagan agto kabat bilang sakey a persona.”

Konsideraen pa so alimbawa nen Maria, sakey a masimoon a Katoliko a manaayam diad Australia. Sanen pilpilimeron akapitongtong iray Tastasi nen Jehova ed sikato, inabuloyan nen Maria iray Tastasi ya ipanengneng da ed sikato so ngaran na Dios diad Biblia. Panon so inkiwas to? “Sanen pilimeron anengneng ko so ngaran na Dios diad Biblia, akanangis ak. Apakiwas ak a maong ed impakaamta a nakabatan tan nausar ko manaya so personal a ngaran na Dios.” Intuloy nen Maria so impanaral toy Biblia, tan legay bilay to et saman to labat akabatan si Jehova bilang sakey a persona a nayarian ton iletneg so magnayon a siglaotan ed sikato.

On, nayarian tayoy ‘onapit ed Dios,’ anggaman sikatoy agtayo nanengneng. “Nanengneng” tayo so alay abig a personalidad to diad kanonotan tan kapusoan tayo, tan diad ontan et ombulaslas so panangaro tayo ed sikato. Satan ya aro so “ayadyarin bedber ed pankakasakey.”​—Colosas 3:14, NW.

[Kahon/Litrato ed pahina 6]

Onkikiwas si Jehova ed Aro Yo’d Sikato

SAY siglaotan et nantupag. Legan itayon onaapit ed Dios, sikato met so onkiwas ya onapit ed sikatayo. Konsideraen pay liknaan to ed di matatken lan Simeon tan Ana, a sikaran dua so espisyal ya abitla ed Biblia. Ibabaga ed sikatayo nen Lucas a managsulat na Ebanghelyo a si Simeon et “matunong tan mapangako,” a manatalaran ed Mesias. Naobserbaan nen Jehova irayan maabig a kualidad ed si Simeon tan impanengneng toy aro to ed sayan inad-aron masiken diad impangiparungtal to’d sikato ya “agto nanengneng so ipapatey no agto ni nanengneng so Kristo.” Tinoor nen Jehova so sipan to tan inwanwan toy Simeon ed ugaw a Jesus, ya inawit na atateng To diad templo ed Jerusalem. Aliketan tan maapresian maong, sinayakop nen Simeon so ugaw tan nampikasi: “Natan pasipot mo, Katawan, so aripen mo, a mareereen, unong ed salitam; Ta anengneng na saray matak so panangilaban mo.”​—Lucas 2:25-35.

“Ed saman [a mismon] oras,” impanengneng met nen Jehova so panangaro to ed 84 años a si Ana diad impangidirehi to met ed sikato ed si Jesus. Ibabaga ed sikatayo na Biblia a sayan pinabpablin balo so lawas a walad templo a “manlilingkor” ed si Jehova. Tekep na pirmin apresasyon, sikato, singa met si Simeon, so akisalamat ed si Jehova lapud nikadkaduman panangasi to, tan kayari na saman et tinongtong nen Ana so nipaakar ed ugaw “ed saray amin a manaalagar na karondon na Jerusalem.”​—Lucas 2:36-38.

On, naobserbaan nen Jehova so aralem a panangaro tan takot di Simeon tan Ana ed sikato ontan met ed kapagaan da nipaakar ed kasumpalan na gagala to. Agta saratan a salaysay na Biblia so mamaapit ed sikatayo ed si Jehova?

Singa si Ama to, atebek met nen Jesus so peteg ya akindalem na too. Legan a manbabangat diad templo, naobserbaan to so “dukan balo” ya angidonasyon na “duaran marabilis” labat. Parad arum a makakaobserba say langkap na saman a balo et anggapoy balor balet aliwan ontan so impangipasen nen Jesus. Indayew to iyan bii lapud inter ton amin so walad sikato. (Lucas 21:1-4) Kanian, makaseguro itayo ya apresiaen itayo nen Jehova tan si Jesus no iter tayoy sankaabigan tayo, balanglan baleg odino melag so langkap tayo.

Bangta manliket so Dios ed saraman so mangaaro ed sikato, sikatoy nasasakitan sano onsuawi iray totoo ed sikato tan tumboken da so gawan mauges. Ibabaga ed sikatayo na Genesis 6:6 a si Jehova ‘sinminagel so puso to’ lapu ed inkauges na katooan sakbay na Delap ed panaon nen Noe. Diad saginonor, saray matungangan Israelita so aminpigapigan ‘anukso ed Dios, tan pinasanok da so Santo na Israel,’ so ibabaga na Salmo 78:41. On, say Dios et aliwan mabinbinta ya “Amalsa ed Amin,” ya andiay liknaan. Talagan sikatoy sakey a persona, a saray liknaan to et aliwan ag-asimbang odino makulang lapud ag-inkayadyari, a singa sikatayo.

[Saray litrato ed pahina 7]

Say panmolimoli ed palsa nen Jehova et sakey a paraan pian onapit itayo ed sikato