Pinagmaliw Ko Ta lan Personal a Mananulong Ko so Masanton Espiritu?

SARAY teologo, nilikud ed karaklan a totoo, so walaan na nanduruman ideya nipaakar ed pakabidbiran ed masanton espiritu na Dios. Balet, say ontan a panduaruwa so agnakakaukolan. Lapud malinew lan nisasalaysay na Biblia no antoy masanton espiritu. Imbes a sakey itan a persona, a singa ibabaga na arum, satan imay mabiskeg ya aktibon puersa na Dios ya uusaren to’d pakasumpal na linawa to.​—Salmo 104:30; Gawa 2:33; 4:31; 2 Pedro 1:21.

Lapud nisiglaot a tuloy so masanton espiritu ed kasumpalan na saray gagala na Dios, kaukolan tayo sirin ya itunos so kabibilay tayo ed satan. Kaukolan tayon pagmaliwen itan a personal a mananulong tayo.

Akin a Nakaukolan so Mananulong?

Lapud asingger lay itaynan to manlapud dalin, pinaseguroan nen Jesus iray babangatan to: “Mikasi ak ed Ama, et ikdan to kayo na sananey a managligliwa [“mananulong,” NW], pian manayam ed sikayo lawas.” Tan inulit to lamet: “Anggaman ontan say katuaan so ibagak ed sikayo, makana ed sikayo ya ontaynan ak. Ta no agak ontaynan, say managligliwa [“mananulong,” NW] ag-onla dia ed sikayo; ingen no onla ak, sikatoy ibakik ed sikayo.”​—Juan 14:16, 17; 16:7.

Inikdan nen Jesus iray babangatan to na importantin kimey sanen binilin toran: “Onla kayo sirin, tan manggawa kayo na saray babangatan ed amin a nasyones, a binyagan yo ra ed ngaray Ama, tan say Anak, tan say espiritu santo. Ya ibangat yo ran mangunor na amin a bengabengatla ya ingganggan ko ed sikayo.” (Mateo 28:19, 20) Aliwan mainomay iyan kimey, ta gawaen iya ed arap na isusumpa.​—Mateo 10:22, 23.

Nilikud ed isusumpan manlalapud paway na kongregasyon, wadtan met so irangan ed loob na kongregasyon. Oniay insulat nen Pablo ed saray Kristiano diad Roma nen ngalngali 56 K.P.: “Pikasik ed sikayo, agagi, ya imanoen yo so saray makasengeg na kasiansian tan sengeg na katiroran sumpa ed bangat ya inaral yo: tan arawian yo ra.” (Roma 16:17, 18) Onloor iyan kipapasen sano ompatey laray apostol ed saman. Ta impasakbay nen Pablo: “Amtak a kayari itaynan ko, onloob naani ed pegley yo so saray masiban lobo, ya agda perdonaen so kasimpukokan. Et dia ed sikayo met lanlamang wala ra so onalagey naani a totoon mansalita na saray bengatlan mabanday, pian tangguyoren da so saray binangatan ya ontumbok ed sikara.”​—Gawa 20:29, 30.

Kinaukolan so tulong na Dios ta pian natalonaan irayan babeng. Ginawa to itan diad panamegley nen Jesus. Kayari na kioli to, diad agew na Pentecostes 33 K.P., manga 120 ed saray patumbok to so “napno ya amin na espiritu santo.”​—Gawa 1:15; 2:4.

Lapud satan et amoria na saray babangatan a say nikalbon masanton espiritu so tulong ya insipan nen Jesus. Anggapoy duaruwa a lalon atalosan da la natan so pakabidbiran ya inter nen Jesus: “Say managligliwa [“mananulong,” NW], salanti say espiritu santo, a sikato so ibaki dia na Ama ed ngaran ko, ibanga’to ed sikayo so amin a bengabengatla, tan ipanono’to ed sikayo so amin ya imbagak ed sikayo.” (Juan 14:26) Tinawag to met itan a ‘say managligliwa [“mananulong,” NW], say espiritu na katuaan.’​—Juan 15:26.

Panon a Magmaliw a Mananulong so Espiritu?

Say espiritu so onkana a mananulong ed pigaran dalan. Unona, insipan nen Jesus a satan so mangipanonot ed saray babangatan to ed bengabengatlan imbaga to’d sikara. Lapud saya et nagkalalo ni so labay ton ibaga nen say basta mangipanonot ed sikara ed saray salita. Sikaray tulongan na  masanton espiritu pian natalosan day aragdalem a kabaliksan tan kaimportantian na imbangat to. (Juan 16:12-14) Diad antikey et say espiritu so mangiwanwan ed saray babangatan to pian lalon natalosan day katuaan. Diad saginonor et oniay insulat nen apostol Pablo: “Say Dios impuyan tora ed sikami ed panamegley na espiritu: ta say espiritu kusimaten to so ami bengatla, pati saray kaaralman na bengatla na Dios.” (1 Corinto 2:10) Pian nipasa na saray alanaan a patumbok nen Jesus ed arum so suston pikakabat, kaukolan a pirmin niletneg so mismon pakatalos da.

Komadua, imbangat nen Jesus iray babangatan to a manpikasi tan gawaen da itan a naynay. No bilang ta no maminsan et agda segurado no antoy ipikasi ra, nayarin onsalet so espiritu odino ontulong ed sikara. “Ontan met lanlamang, say espiritu tulongan to met so kakapuyan tayo: ta agtayo amta no panon so pampikasi tayo unong na nepeg tayo; noag say dili ya espiritu gawaen to so panangiyesel a nipaakar ed sikatayo ed agnibalikas a pan-ingel.”​—Roma 8:26.

Komatlo, say espiritu so ontulong ed saray babangatan nen Jesus a mangidepensa’d katuaan diad publiko. Pinasakbayan to ra: “Isaklang da kayo naani ed saray konsilyo, tan leweten da kayo naani ed saray sinagogas da. On, tan niakar kayo naani ed arap na saray makauley tan arari nisengeg ed siak, pian pamintuan ed sikara tan ed saray Gentiles. Ingen sano idungo da kayo, agkayo mapaga no panon ono antoy salitaen yo; ta niiter naani ed sikayo so salitaen yo ed satan ya oras. Ta aliwan sikayo so mansalita, noag say espiritu nen Ama yo so mansalita ed sikayo.”​—Mateo 10:17-20.

Ontulong met so masanton espiritu a mangibiig ed Kristianon kongregasyon tan mamakiwas ed saray membro to a manggawa na makabat iran personal a desisyon. Singbaten tayo pa irayan duaran aspekto na sayan tema a mas detalyado tan imanoen no antoy kabaliksan to parad sikatayo natan.

Pian Onkanan Pakabidbiran a Tanda

Diad loob na saray siglo et nanlingkor iray Judio ed silong na Mosaikon Ganggan bilang pinilin totoo na Dios. Lapud impulisay day Jesus bilang Mesias, impasakbay ton agmanbayag et sikaray nipulisay met: “Agyo ta ni abasa ed saray sulsulat, Say bato ya imbantak na saray manangipaalagey na abung, Sikato lanlamang so agawa ya ulo na suyok; saya nanlapu ed Katawan, et sikato so makapakelaw ed saray mata tayo? Kanian kuan ko ed sikayo, Say panariay Dios naekal naani ed sikayo, tan niiter naani ed sakey a nasyon a mamapaway na saray bungabunga to.” (Mateo 21:42, 43) Sanen niletneg so Kristianon kongregasyon nen Pentecostes 33 K.P., saray patumbok nen Kristo so nagmaliw a “nasyon a mamapaway na saray bungabunga to.” Nanlapula’d saman, sayan kongregasyon so paralanan ed pitatalosan na Dios. Pian naamtaan na totoo so impangipaarapan ed sayan madibinon pabor, inter na Dios so pihon pakabidbiran a tanda.

Diad Pentecostes, lapud tulong na masanton espiritu et akapansalita iray babangatan na saray lenguahen agda nin balot naaralan, diad ontan et saramay wadman so nikelawan kanian intepet da: “Panon sirin a sikara so narengel tayo a mansalita so sakey tan sakey ed salita a nianakan tayo a dili?” (Gawa 2:7, 8) Say abilidad a mansalita na agnin balot amtan lenguahe, tekep ni na “dakel a makapakelaw tan saray tanda [a] ginawa na saray apostoles,” so angitonton ed talon lasus a libon totoo a mamidbir a talagan onkukurang so espiritu na Dios.​—Gawa 2:41, 43.

Ontan met, diad kipapatnag na “say bunga na espiritu”​—salanti, aro, liket, deen, kasungdoan, kauyamoan, kaabigan, sisia, tayadno, dangka​—saray babangatan nen Kristo so abidbiran bilang lingkor na Dios. (Galacia 5:22, 23) Diad tua et say aro so sankatalonggaringan a pakabidbiran ed tuan Kristianon kongregasyon. Impasakbay nen Jesus: “Lapu ed saya amin a too nabidbiran da a sikayoray babangatan ko, no wala so aro yo ed sakey tan sakey.”​—Juan 13:34, 35.

Saray membro na inmunan Kristianon kongregasyon so impaiwanwan ed masanton espiritu na Dios tan inanamot day pananulong na satan. Anggaman amoria na saray Kristiano natan ya agni papaolien na Dios iray inaatey natan tan agla manggagawa na saray milagro a singa agawa ed inmunan siglo, aabuloyan dan saray bunga na masanton espiritu na Dios so mangipabidbir ed sikara bilang tuan babangatan nen Jesu-Kristo.​—1 Corinto 13:8.

Mananulong ed Personal a Panagdesisyon

Say Biblia so produkto na masanton espiritu. Kanian, no patangguyor itayo ed Biblia, singano  ibabangat itayo na masanton espiritu. (2 Timoteo 3:16, 17) Makatulong itan ed panggawa tayo na makabat iran desisyon. Balet kasin patutulongan itayo ed satan?

Komustay pinili tayon anapan odino trabaho? Ipamoria na masanton espiritu ed sikatayo so sakey a prospektibon trabaho unong ed panmoria nen Jehova. Say trabaho tayo so nepeg a mitunosan ed saray prinsipyo na Biblia, tan no nayari et nepeg ya ontulong ed panggegemtan tayo na saray teokratikon kalat. Say sueldo odino inkatalonggaring tan posisyon lapud trabaho so talagan ag-importanti. Say mas importanti et no kasin satan so makalegpet ed saray nakakaukolan tayo ed bilay tan mangiter ed sikatayo na malaglaem a panaon tan pankanawnawan nasumpal iray obligasyon tayo bilang Kristiano.

Say pilalek a panggayagaay bilay so normal tan manepeg labat. (Eclesiastes 2:24; 11:9) Kanian say sakey ya asimbang a Kristiano et nayarin gegemtanen toy panligliwaan a pakarepreskoan tan panliketan. Balet nepeg ton pilien so panligliwaan a pakapatnagan na saray bunga na espiritu, ya aliwan saramay pakapatnagan na “saray gawa na laman.” Isasalaysay nen Pablo: “Saray gawa na laman, a sikara ‘ya: pikakalugoran, karutakan, kaalakan na laman. Pididios ed saray talintao, panag-anito, pambubusolan, pankokolkol, imon, sanok, pansesepakan, inkaapag-apag, saray pamipikewet ed pananisia. Saray sibletan, pampapateyan, panagbuanges panduroypo, tan saray miulibay ed saraya.” Nepeg met a paliisay pagmaliw a “maagum ed maapan dayew, a masanok so sakey tan sakey, a mansisibletan so sakey tan sakey.”​—Galacia 5:16-26.

Mipadpara itan ed panagpili na saray kakaaro. Makabat no pilien ira unong ed espiritualidad da, aliwan unong ed no antoy itsura odino ed kaykayarian da. Mabitar a si David so kaaro na Dios, ta sikatoy deneskribe na Dios bilang “laki a maunor ed puso [to].” (Gawa 13:22) Lapud agnenengnengen na Dios so palaway ya itsura, pinili to si David bilang ari na Israel, unong ed prinsipyon: “Si Jehova onnengneng ya aliwa a singa say too ya onnengneng; ta say too onnengneng ed mapaway a nengneng, balet si Jehova onnengneng ed puso.”​—1 Samuel 16:7.

Nilibon pankakaaro so abuyak lapud saratan so nibase’d palaway ya itsura odino unong ed kaykayarian. Say pikakaaron nibase’d agseguradon kaykayamanan so manganggan tampol. (Uliran 14:20) Say apuyanan na espiritun Salitay Dios so manisimbawa ed sikatayo a no nipaakar ed panagpili na kakaaro et nepeg tayon pilien iramay makatulong ed sikatayo ed panaglingkor ed si Jehova. Ibabaga na satan ed sikatayo ya iyapasakey so pangiter imbes say pangawat lapud mas magayaga so pangiter. (Gawa 20:35) Say panaon tan panamabli so sankablian iran bengatlan niiter tayo ed kakaaro tayo.

Parad Kristianon manaanap na asawa, wadtan so simbawa na Biblia ya impuyan na espiritu. Diad sakey a dalan et oniay kuanto: ‘Onnengneng ka ed labas na say lupa tan indengan. Nengneng moray sali.’ Salisali? On, diad onian pantalos: Kasin nauusar iratan diad panumpal ed kimey nen Jehova a panangipulong na maong a balita, tan sirin et nikuan a malimgas diad imaton to? Kasin asulongan iratan na mensahe na katuaan tan maong a balita na kareenan? Nabasa tayo: “Agayla so kalimgasan ed tapew na saray palandey so saray sali na mangiyakar na saray maong a balita, a mangiyabawag na deen, a mangiyakar na saray maong a balita na kaabigan, a mangiyabawag na kilalaban, a kuanto ed Sion, Say Dios mo man-ari!”​—Isaias 52:7; Efeso 6:15.

Lapud manbibilay tayo la ed ‘maatap a panaon a mairap a pidenengan,’ kaukolan tayo so tulong ed panumpal na linaway Dios. (2 Timoteo 3:1) Say mananulong, salanti say masanton espiritu na Dios, so mabiskeg ya anuporta ed kimey na saray Kristiano nen inmunan siglo, pati la ed impagmaliw na satan bilang personal a mananulong da. Say makulin panagaral ed Salitay Dios, a produktoy masanton espiritu, so manunan dalan a napagmaliw tayo met a personal a mananulong tayo so masanton espiritu. Kasin ginawa tayo la itan?

 [Interon-pahina a litrato ed pahina 23]