Makapagayaga so Inkamabunlok ed Panangiter

BILANG sakey a maaron Kristianon manangasikaso, si apostol Pablo so peteg ya angiyansakit tan tinmulong ed saray kapananisiaan to. (2 Corinto 11:28) Kanian, sanen sikatoy angorganisa na pankolektay kuarta ed kapegleyan na dekaday 50 nen inmunan siglo na Komon a Panaon tayo parad saray mairap-bilay a Kristiano ed Judea, inanamot to itan a kipapasen pian mangibangat na makanan leksion nipaakar ed inkamabunlok. Indanet nen Pablo a say maliket a panangiter so papablien a tuloy nen Jehova: “Balang sakey gawaen to komon so ginetma to ed puso to; aliwa a dia ed kaermenan odino dia ed pasootan; ta say Dios aroen to so sililiket a mangiter.”​—2 Corinto 9:7.

Mairap-Bilay, Ingen ta Mabunlok

Agtanto seselengen ed sosyedad iray maslak a Kristiano nen inmunan-siglo. Naimano nen Pablo a diad limog da et “anggapo so dakel a makapanyari.” Sikara so “saray bengatla a makapuy na mundo,” “saray bengatla ya andi kana ed mundo.” (1 Corinto 1:26-28) Alimbawa, saray Kristianon nanayam ed Macedonia so walad “aralem ya inkaduka” tan “dakel a pakanengnengan na ermen.” Anggaman ontan et sarayan pobrin mananisian taga-Macedonia so kinmerew a nawalaay pribilihyon mangiter na kuarta diad “pinabang ed saray panlingkor ed sasanto”; tan say inter da, unong ed naimatonan a mismo nen Pablo so “onlabas ni ed saray pakayari ra”!​—2 Corinto 8:1-4.

Siansia, say ontan a mabunlok a panangiter so agnasukat unong ed inter a kantidad. Imbes, say importanti et say motibo, inkamabulos a manginabang, tan kipapasen na puso. Impanengneng nen Pablo ed saray Kristiano ed Corinto a namparan say kanonotan tan puso so nasasaglawi ed panangiter na kontribusyon. Inkuanto: “Amtak so kasiglatan na kalakal yo, a sikato so idadayew ko ed saray taga-Macedonia, . . . tan say paga yo sinagya’to so dakel ed sikara.” ‘Ginetma ra ed puso ra’ so mabunlok a pangiter.​—2 Corinto 9:2, 7.

‘Pinalabay Ira na Espiritu Ra’

Nayarin sankanonot nen apostol Pablo so sakey ya alimbawan nipaakar ed mabunlok a panangiter, samay agawa ed kalawakan masulok lan 15 siglo ed apalabas sakbay ni na panaon to. Nibulos ed saman iray 12 tribu na Israel manlapud inkaaripen diad Ehipto. Sikara so wala la ed saman ed salian na Palandey Sinai, tan ingganggan ira nen Jehova a mangipaalagey na tabernakulo parad panagdayew tan kargaan itan na saray kagawaan parad panagdayew. Dakel so nakakaukolan na saya, tan naimbitaan iray totoo a mangiter.

Antoy reaksion na saraman ya Israelita? “Sikara linma ra, balang sakey a dinagdag na puso to, tan balang sakey a pinalabay na espiritu to, et inyakar da ya iyapay ed kinen Jehova, ya onkana ed kimey na tolda na duypo, tan onkana ed amin a panaglingkor diman.” (Exodo 35:21) Kasin dakel so inter na totoo? Dakerakel! Say onggendan so nireport ed kinen Moises: “Say yaakar na totoo dia [so] masulok na dakel nen say masarag ya onkana ed kimey ya imbilin nen Jehova a gawaen.”​—Exodo 36:5.

Komusta so pinansyal a kipapasen na saray Israelita ed saman a panaon? Agni abayag et sikaray pakaskasin ariripen, ‘apairap ed panagsakbat’ tan walaan na ‘ampait a bilay,’ bilay a ‘maermen.’ (Exodo 1:11, 14; 3:7; 5:10-18) Sirin, maseguron aliwa iran maaligwas ed materyal. On, tinaynan na saray Israelita so dalin ya akaaripenan da ya intarok da iray ayayep tan pulok da. (Exodo 12:32) Balet ta agtanton makantidad iraman, lapud agnambayag kayari inyalis da ed Ehipto et nanreklamo ira ya anggapoy nakan dan karne odino tinapay.​—Exodo 16:3.

Iner sirin so angalaan na saray Israelita na ankablin bengatla ya innagnag da ed kipaalagey na  tabernakulo? Manlapud saray datin amo ra, saray Ehipsio. Oniay kuan na Biblia: “Saray anak na Israel . . . akikerewan da so saray Ehipsios na kagkagawaan a pilak, tan kagawaan a balitok, tan kawekawes. . . . Inyawat [na saray Ehipsio] ed sikara so kinekerew da.” Sarayan mabunlok ya inkiwas na saray Ehipsio so panamendision a nanlapud si Jehova, agnanlapud si Faraon. Kuan na impuyan na Dios a rekord: “Si Jehova tinulongan to so saray totoo ed arapan na saray Ehipsios, ed ontanla ya inyawat da ed sikara so kinekerew da.”​—Exodo 12:35, 36.

Isipen pa sirin no antoy liknaan na saray Israelita. Dakel a kailalakan so nanirap lapud pirmin panangaripen tan kakulangan na saray pankaukolan ed bilay. Natan et bulos la ra tan walaan la na dakel a materyal a kayarian. Anto kasi so liknaan da ed panginabang da ed saratan a kaykayarian? Nayarin liknaen dan nankimeyan da iratan tan walay kanepegan dan mangiyatol ed saratan. Balet, sanen sikaray atawag a mankontribusyon ed pinansyal parad puron panagdayew, sikaray angiter​—diad paraan ya agmasuyat tan agmaigot! Agda alingwanan a si Jehova so nanggawan posibli pian nakayarian da iraman a materyal a bengatla. Lapud satan et daakan so inter dan kayarian dan pilak tan balitok ontan met ed ayayep. Sikaray “mabulos [ed] puso.” Sikaray ‘dinagdag na puso ra.’ ‘Sikaray pinalabay na espiritu ra.’ Talagan ‘sakey a bagat na mabulbulos a linawa ed kinen Jehova.’​—Exodo 25:1-9; 35:4-9, 20-29; 36:3-7.

Inkamabunlok a Mangiter

Say kabaleg na kontribusyon so aliwan pakapatnagan ed inkamabunlok na angiter. Aminsan et inimatonan nen Jesu-Kristo iray totoon mangipepelag na kuarta ed saray kaban na kayamanan na templo. Dakdakel a sinsilyo so impepelag na saray mayaman, balet ta nandinayewan nen Jesus so impakaimano to ed dukan balo a bii ya angipelag na duaran angkelag a sinsilyon melmelag so kantidad to. Inkuanto: “Sayan duka a balon bii [et] angipelag na dakdakel nen sikara ya amin. . . . Ingen sikato dia ed kakulangan to impelag to so amin a pantagano a wala ed sikato.”​—Lucas 21:1-4; Marcos 12:41-44.

Saray imbaga nen Pablo ed saray taga-Corinto so mitunosan ed sayan kaisipan nen Jesus. No nipaakar ed pankontribusyon pian tulongan iray mankakaukolan a kapananisiaan, oniay naimatonan nen Pablo: “No wadtan so kasiglatay linawa, naawat so unong na wala ed sakey a too, aliwa ya unong na anggapo ed sikato.” (2 Corinto 8:12) On, say panagkontribusyon et aliwan kompetensiaan odino komparaan. Say sakey a too so mangiiter unong ed nayarian to, tan panliketan nen Jehova so inkamabunlok to.

Anggaman anggapon talaga so makapanpayaman ed si Jehova, a makankayarian ed amin a bengatla, say pankontribusyon so pribilihyo a nipanengneng na saray managdayew so panangaro ra ed sikato. (1 Awaran 29:14-17) Saray kontribusyon so aliwan pampasirayew, odino parad sinisiblet  iran motibo, noagta atekepan itan na suston awawey tan pian iyalibansa so tuan panagdayew, a mangitatarok na gayaga tan diad ontan et panamendision na Dios. (Mateo 6:1-4) Inkuan nen Jesus: “Lalo a mapalar so mangiter nen say mangawat.” (Gawa 20:35) Sikatayo met so makapanggayaga diad pangiter tayo ed biskeg tayo diad serbisyo nen Jehova tan diad pangibiig ed materyal a kaykayarian tayo pian suportaay tuan panagdayew tan tulongan iramay peteg a mankaukolan.​—1 Corinto 16:1, 2.

Inkamabunlok a Mangiter Natan

Natan et panliliketan na Tastasi nen Jehova so pakaimano ed sankamundoan ya aligwas na panangipulong ed “saya ya ebanghelyo na panarian.” (Mateo 24:14) Diad apalabas a dekada na koma-20 siglo, masulok a 3,000,000 a totoo so abautismoan bilang simbolo na dedikasyon da ed si Jehova a Dios, tan manga 30,000 a balon kongregasyon so aporma. On, kakatlo ed saray kongregasyon na Tastasi nen Jehova a wala natan so aporma legan na apalabas a samploy taon! Maslak ed sayan indaak so resulta na impasyan kimey na saray masimoon a Kristianon lalaki tan bibii ya angiter ed panaon tan biskeg da ta pian nabisita tan inabang ed kapara ran totoo iray gagala nen Jehova. Arum ed say indaak et lapud impasyan kimey na saray misionaryo, a tinaynan daray ayaman da pian onla ed ararawin bansa ta pian ontulong ditan ed panangipulong na Panarian. Lapud say indaak et nansumpal ed kaoorganisa na balo iran sirkito, kaukolan met so panuro na saray balon manangasikaso na sirkito. Niarum ni, dakel nin Biblia so nakakaukolan ya usaren diad panagpulong tan personal a panagaral. Walay lalon pankaukolan parad dakel nin niimprintan literatura. Tan diad dakel a bansa et kaukolan a saray bilding ed sanga so napaawang odino nasalatan na babaleg iran paalagey. Amin na sarayan kaaruman a pankaukolan so agawaan lapud boluntaryo iran kontribusyon na totoo nen Jehova.

Pankaukolan na Saray Kingdom Hall

Say mapatnag a kakkaukolan et say Kingdom Hall lapud idarakel na bilang na Tastasi nen Jehova. Impatnag na surbi ed kagapo na sayan taon 2000 so pankaukolan parad masulok a 11,000 a Kingdom Hall diad saray mairap a nasyon, a limitado ra ed pinansyal. Isipen pay Angola. Anggaman walay guerra sibil ed satan a bansa, dinmaak na ngalngali 10 porsiento so bilang na saray manangipalapag ed Panarian. Balet ta karaklan ed 675 a kongregasyon na sayan maawang a bansa ed Aprika so mantitipon ed pataktak. Wala lambengat so 22 Kingdom Hall, tan 12 lambengat ed saraya so naatepan.

Ontan met so situasyon ed Democratic Republic of Congo. Anggaman wala laray 300 a kongregasyon ed kabiseran syudad a Kinshasa, samplora lambengat so Kingdom Hall. Diad intiron bansa et walay maganat a pankaukolan a tuloy parad masulok a 1,500 a Kingdom Hall. Lapud mapmaples ya ibubulaslas ed saray bansa diad Mamabukig a Europa, inreport na Russia tan Ukraine a namparan nakaukolan da so nilasus a Kingdom Hall. Say maples ya imbulaslas diad Latin Amerika so napatnagan diad Brazil, a walay masulok a kapalduan milyon a Tastasi ditan tan baleg so pankaukolan parad dakdakel a Kingdom Hall.

Pian nakapet iray pankaukolan diad saratan a bansa, ipapakurang na Tastasi nen Jehova so apapeles a programa ed panangipaalagey na saray Kingdom Hall. Sayan programa so nasasapotan lapud mabunlok iran kontribusyon na sankamundoan ya impanaagi, ta pian anggan saray pobpobrin kongregasyon et nawalaan na marakep a pasen a pandayewan.

Singa ed panaon na kadaanan ya Israel, baleg so nagawaan lapud masimoon iran Kristiano a ‘mangigagalang ed si Jehova tekep na saray kayarian da.’ (Uliran 3:9, 10) Kaliktan na Mananguley ya Ulop ya anamoten iyan pankanawnawa pian ibalikas so pisalsalamat da ed balang sakey a say kapusoan da so anagdag ed sikaran mibiang ed sayan boluntaryon panangiter. Tan matalek itayo ya itultuloy na espiritu nen Jehova a sagyaten so kapusoan na totoo to a manuporta ed saray pankaukolan na onlalaknab a kimey na panangipulong ed Panarian.

Legan a tuloytuloy ni so ilalaknab ed sankamundoan, komon ta mantultuloy tayon anamoten iray pankanawnawa pian ipanengneng so sayaksak tan inkamabulos ed pangiter tayoy biskeg tayo, panaon, tan saray kayarian tayo. Tan naeksperiensia tayo komon so tuan gayagan itarok na ontan ya espiritu na panangiter.

[Kahon ed pahina 29]

“MAKABAT YON USAREN!”

“Mantaon ak lay samplora. Ipawit ko iyan kuarta ed sikayo ta pian makasaliw kayo na papel odino antokaman pian makapanggawa kayo na saray libro.”​—Cindy.

“Labay kon ipawit iyan kuarta ed sikayo ta pian makapanggawa kayo na dakel nin libro parad sikami. Tinipon ko iyan kuarta diad impanulong ko ed si tatay ko. Kanian makabat yon usaren!”​—Pam, mantaon na pitora.

“Panermenan koy agawan alimbusabos. Mailalo ak a maligen kayo. Sayan [$2, U.S.] so nakekeraan a kuarta ed alkansiak.”​—Allison, mantaon na apatira.

“Siak si Rudy, tan mantaon ak na 11. Say agik a si Ralph so mantaon na anemira. Tan say agik a si Judith so mantaon na duara tan kapaldua. Abayag kami lan mantitipon manlapud balon mi ed loob la na taloran bulan pian natulongan iray agagi tayo ed [natatabek na bakal a lugar]. Akatipon kami na 20 dolyares a labay min ipawit ed sikayo natan.”

“Nakakasian koray agagi [ya adalan na alimbusabos]. Akalmo ak na 17 dolyares ed intulong ko ed si tatay ko. Akauley kayo la ed pangigastosan ed sayan ipawit kon kuarta.”​—Maclean, mantaon na walora.

 [Kahon ed pahina 31]

Saray Paraan a Pinili na Arum Pian Mangiter na

KONTRIBUSYON PARAD SANKAMUNDOAN A KIMEY

Dakel so mangigagana, odino mangigegeter, na kantidad ya ipelag da ed saray “contribution box” ya atatakan na “Contributions for the Society’s Worldwide Work​—Matthew 24:14.” Kada bulan et ipapawit na saray kongregasyon irayan kantidad balanglan diad sankamundoan a hedkuarter ed Brooklyn, New York, odino diad lokal a sangan opisina.

Saray boluntaryon donasyon a kuarta so nayarin direktamentin nipawit ed Treasurer’s Office, Watch Tower Bible and Tract Society of the Philippines, P.O. Box 2044, 1060 Manila, odino diad opisina na Sosyedad a manlilingkor ed bansa yo. Saray alahas odino arum niran ankablin bengatla so nayari met ya idonasyon. Sakey ya antikey a sulat a mangibabagan satan a direktan langkap so nepeg a nitekep ed sarayan kontribusyon.

UKSOYAN NA KONDISYONAL A DONASYON

Nayarin niiter so kuarta ed Watch Tower Society ed silong na espisyal a reglamento a ditan, no bilang ta say angidonar et walaay personal a pankaukolan to, say donasyon so ipawil ed sikato. Parad nagkalalon impormasyon, ipangasin mitalosan ed say Treasurer’s Office diad address a nipaimano ed tagey.

NIPLANON PANANULONG

Bilang kaaruman ed direkta iran langkap a kuarta tan kondisyonal iran donasyon na kuarta, wala niray arum a paraan na panangiter pian benepisyoan so serbisyo nipaakar ed Panarian ed sankamundoan. Laktipen na saraya so:

Seguro: Say Watch Tower Society so nayarin ingaran bilang benepisyari na sakey a life insurance policy odino ed retirement/pension plan.

Deposito ed Bangko: Saray deposito ed bangko, sertipiko na deposito, odino indibidual a deposito ed panretiro so nayarin imatalek parad odino ibayar ed oras na ipatey ed Watch Tower Society, unong ed saray kakaukolanen na lokal a bangko.

Saray Stock tan Bond: Saray stock tan bond so nayarin idonasyon ed Watch Tower Society bilang direktan langkap.

Lote tan Abung: Say nayarin ilakon lote tan abung so nayarin idonasyon ed Watch Tower Society diad panamegley na direktan langkap odino diad pangireserba ed satan bilang panayaman na angidonar, a makapantultuloy a manayam ditan legay bilay to. Nepeg a mitalosan nin unona ed Sosyedad sakbay ya iyalis ed ngaran na Sosyedad so antokaman a lote tan abung.

Testamento tan Inmatalek: Saray kayamanan odino kuarta so nayarin ipatawir ed Watch Tower Society diad panamegley na sakey a testamento ya inuksoy unong ed legal a paraan, odino say Sosyedad so ingaran bilang benepisyari na sakey a paknaan na pangimatalek. Say sakey a nimatalek a pakabenepisyoan na sakey a relihyoson organisasyon so nayarin mangitarya na pigaran bentaha ed panag-buis.

A singa isusuheri na terminon “niplanon pananulong,” sarayan nengneng na donasyon so kaslakan a mankakaukolan na pigaran panagplano ed biang na mangidonar. Pian tulongan iray indibidual a manpipilalek a benepisyoan so Sosyedad ed panamegley na pigaran nengneng na niplanon pananulong, say Sosyedad so angiparaan na brosyur diad Ingles tan Español ya atituloan na Charitable Planning to Benefit Kingdom Service Worldwide. Say brosyur so nisulat bilang ebat ed dakel a tepet a naaawat na Sosyedad nipaakar ed saray langkap, testamento, tan imatalek. Lugan to met iray kaaruman a mausar ya impormasyon nipaakar ed lote, pinansyal, tan pangiplano ed buis. Tan denisinyo itan pian ontulong ed saray indibidual ed Estados Unidos a manplaplanon manggawa na espisyal a regalo ed Sosyedad natan odino mangiter na kanepegan diad ipatey pian pilien so sankaabigan tan sanka-epektiboan a paraan diad panangikonsidera ed pamilya ra tan personal iran sirkumstansia ra. Nayarin makala ed sayan brosyur diad pangerew na sakey a kopya a direkta manlapud Charitable Planning Office.

Kayari impamasa ed brosyur tan impangonsulta ed Charitable Planning Office, dakel la so akatulong ed Sosyedad tan ontan met, naromog so sankatagyan a balor ed saray benepisyo’d buis ed panggawa’d satan. Say Charitable Planning Office so kaukolan a pasantabian tan nawalaan na kopya na antokaman a mitukoyan a dokumento nipaakar ed dinanman ed sarayan uksoyan. No sikay interesado ed dinanman ed sarayan niplanon pananulong iran uksoyan, sikay kaukolan a mitalosan ed Charitable Planning Office, balanglan diad pansulat odino diad pantelepono, diad address a nilista ed leksab odino diad opisina na Sosyedad a manlilingkor ed bansa yo.

CHARITABLE PLANNING OFFICE

Watch Tower Bible and Tract Society of Pennsylvania

100 Watchtower Drive, Patterson, New York 12563-9204

Telephone: (845) 306-0707