Onaabeba la so Moralidad

“AGGENDAT a nagagawa itan a bengatla,” inkomento nen Helmut Schmidt, datin chancellor na Alemanya. Nanermenan toy agano niran kaso na graben ag-inkamatua na opisyales na gobierno a nagmaliw a paulon balita. “Naaandi laray estandarte ed moral lapud agum,” inkuan to. Dakel so mipakna ed sikato. Nibabaliwala iray moralidad a nilamut ed Salitay Dios, say Biblia, ya abayag lan malaknab a papanisiaan bilang giya ed no anto so duga tan aliwa. Saya so nagagawa anggan diad saray bansa a walay Inkakristiano.

Kasin Matukoy so Moralidad ed Biblia?

Say moralidad a nibase ed saray bangat na Biblia et mangilaktip ed inkamatua tan integridad. Balet ta kasmak lay panagsaol, panagkurakot, tan panagpalikdo. Inreport na The Times diad London a pigaran detective “et ibabagan napapasuksokan na anggad £100,000 ed kada pangilako lamet ed saray druga ya akompiska la odino deralen iray ebidensia sumpad saray sindikato.” Ibabagan kaslakan lan aagamilen itan a panagpalikdo ed insurance diad Austria. Tan diad Alemanya, say sientipikon komunidad so atalagnaw sanen agano nin nalmoan na saray managsukimat so  “sakey ed makapabaing iran kaso na panagpalikdo diad siensia na Alemanya.” Sakey a propesor, a “balitado ed limog na saray Aleman a geneticist,” so inakusaan a walaan na malaknab ya impamalsipika odino gawa-gawa labat a rekord.

Saray nibase ed Biblia a moralidad so mangilaktip met ed inkamatoor ed panamaley, a mankabaliksay permanentin relasyon. Balet ondarakel so bilang na saray sanasawa a mandidiborsio. Onia so inreport na peryodiko na Katoliko a Christ in der Gegenwart (Say Kontemporaryon Kristiano) ya “anggan diad ‘konserbatibon’ Switzerland, ondarakel a sanasawa so mansisian.” Diad Netherlands, 33 a porsiento na amin a panamaley so mandidiborsio. Sakey a bii ya akaimano ed panguuman na sosyedad diad Alemanya ed apalabas a pigaran taon so angisulat ed pampapagaan to: “Say panamaley natan so ipapasen lan kadaanan tan aliwa lan uso. Saray totoo so agla mangaasawa na kapareha ed bilay.”

Diad biek a dapag, minilyon so mangikokonsidera ed saray moral ya estandarte a nibangat ed Biblia bilang napanmatalkan tan matukoy ed bilay diad modernon mundo. Sakey a sanasawa a manaayam diad ketegan na Switzerland tan Alemanya so akadiskobre a say panaral a pambilay unong ed saray moralidad na Biblia so sengegay impagmaliw dan mas maliket. Parad sikara, “wala labat so saksakey a pananontonan parad amin ya aspekto na bilay. Satan a pananontonan et say Biblia.”

Anto so padesir yo? Kasin say Biblia so onkana bilang importantin pananontonan? Kasin say nibase ed Biblia a moralidad et praktikal natan?