Akin a Kaukolan Moy Manpikasi?
Akin a Kaukolan Moy Manpikasi?
“ONKEREW kayo et agkayo mangawat, lapu ed mauges so ikekerew yo . . . Singger kayo ed Dios, et sikato so onsingger naani ed sikayo.” (Santiago 4:3, 8) Saratan a balikas na babangatan nen Jesus a si Santiago so mamakiwas a tuloy ed sikatayo a mangikonsidera ed saray rason tayo ed pampikasi.
Say pikakasi et aliwa labat a paraan a pangibaga ed Dios no anto so nakaukolan tayo. Diad bantog a Sermon nen Jesus ed Palandey, inkuanto: “Si Ama yo amta to ray antokaman a kaukolan yo, ed arapen a mankerew kayo ed sikato.” Ingen, inkuan met nen Jesus: “Mankerew kayo, et naikdan kayo.” (Mateo 6:8; 7:7) Kanian talagan labay nen Jehova ya ibesngaw tayo ed sikato so liknaen tayon nakaukolan tayo. Balet wala ni nagkalalo ed pikakasi nen say satan.
Saray tuan kakaaro so agmitatalosan no wala labat so kaukolan da. Sikaray interesado ed sakey tan sakey, tan say pankakaaro ra so onelet sano manbabagaan iray liknaan da. Mipadpara, say pikakasi so walaan na babaleg a gagala nen say ikerew lambengat na saray nakakaukolan. Mangiter itan na pankanawnawan napaelet so siglaotan tayo ed si Jehova diad pangibalikas tayoy impapuson debosyon tayo ed sikato.
On, inikdan itayo na Dios na pribilihyon manpikasi ta pian napaapit itayo ed sikato. Nagawa lambengat itan no ibesngaw tayoray dilin liknaan tayo ed Dios imbes a manpikasin impatlep. Agaylan liket so pakapitongtong ed si Jehova diad pikakasi! Sakey ni, onia so ibabaga na Biblia: “Say pikakasi na maptek sikato so kalikliket to.”—Uliran 15:8.
Salmo 73:28, NW) Balet pian napaapit itayo ed Dios, aliwa labat lan pikakasi so gawaen tayo. Imanoen no panon a say onggendan a salaysay so mangipatnag ed saya:
“Nipaakar ed siak, say iyasingger ed Dios et maabig parad siak,” so inkanta nen salmistan Asaf. (“Inkuan ed sikato na sakey ed saray babangatan [nen Jesus], Katawan, ibangat mo kami a mikasi.” Onia so inyebat nen Jesus: “No mikasi kayo, kuan yo, Ama, nagalang komon so ngaran mo. Onsabi komon so panarian mo.” (Lucas 11:1, 2) Kasin makabaliksan so pakapanpikasi tayo ed onian paraan no agtayo ni amta so ngaran na Dios tan no panon a pasantosen itan? Tan kasin makapanpikasi tayo a mitunosan ed saratan a salita nen Jesus no agtayo ni atalosan no anto so Panarian na Dios? Natalosan tayo irayan pamaakaran no usisaen tayon maong so Biblia. Diad ontan say pikakabat a nagamoran so ontulong ed sikatayo pian napikabatan so Dios tan natalosan iray dalan to. Sakey ni, say pikabat ed si Jehova a Dios et pagmaliwen to itayon lalon debosyonado ed sikato. Diad ontan, saya so ontulong ed sikatayo a mabulos a mitongtong ed sikato diad pikakasi.
Say Pikakasi so Makasolbar ed Saray Problema
Say pamayubo ed maapit a siglaotan ed si Jehova so ontulong ed sikatayo a manolbar ed saray problema. Imanoen no panon a tua iya ed kada onggendan iran sirkumstansia. Iyiilustra na saraya a sarag na saramay manpipikasi so mamaelet ed siglaotan da ed si Jehova.
Diad Brazil sakey a manngaran na Maria so nampikasi ed Dios parad tulong. Say sakey a rason a labay toy manrebeldi ed aawaten iran estandarte ed kondukta et lapud pansimpisimpitan a nanenengneng to ed sosyedad. Tinaynan ni ingen nen Maria so masiken, ananak, tan abung to. Sikato met so ginmapon nan-druga. Balet sanen agto agamoran so liket, mabulbulos ton imbesngaw ed Dios iray liknaan to tan nampikasi parad tulong.
Ag-abayag, duaran Tastasi nen Jehova so dinmalaw tan angitilak ed si Maria na sakey ya isyu na Say Panag-Bantayan a lugan toy nipaakar ed kablian na pangawat ed panangigiya na Dios. Satan so anenyeg ed puso to, tan impaiyaralan na Biblia ed saray Tastasi ed saman a mismon agew. Diad kaunoran saya so angitonton ed inkipawil na datin kabibilay na mismon pamilya to. Diad pakakaaral nen Maria nipaakar ed si Jehova, labay ton ibalikas so panangaro to ed sikato. “Pinasimbalok so konduktak,” inkuan nen Maria. “Nen pilimero et aglabay na asawak tan pamilyak so panaaral koy Biblia. Balet diad pakakaimano ra ed panguuman ko, siak so pinaseseg da met la.” Saginonor, indedika nen Maria so bilay to ed Dumerengel na pikakasi ta pian makapanlingkor ed sikato.
Anggaman si José et walaan na magangganan asawa tan maaligwas a negosyo diad Bolivia, sikatoy aliwan maliket. Sikatoy tinaynan na akulaw to lapud panbibii to. Sikatoy alablabas a naninum tan liknaen ton anggapo lay kana to. Inkuan nen José: “Nampikasi ak a masimoon, a kekerewen ko no antoy nepeg kon gawaen pian napaliket so Dios. Ag-abayag et binmisita iray Tastasi nen Jehova ed kawalaan na negosyok tan inopresian da ak na libren panagaral ed Biblia, balet ta pinaalis ko ira. Amitlon agawa iya. Kada manpikasi ak parad tulong, onsabi ira. Diad kaunoran, denesidik ya ondengel ak ed sikara diad ontumbok. Abasak la so Biblia tan dakel iray tepet ko, balet ta lawas a wala iray ebat da tan kombinsido ak. Lapud pakakaaral ko nipaakar ed si Jehova et awalaan ak na balon gagala ed bilay, tan saray kakaarok a Tastasi so ontanlan makapaseseg ya alimbawa! Inkaindan koy kabit ko tan saray kainuman ko. Ag-abayag, pinawil koy asawak tan ananak ko. Siak so abautismoan nen kagapo ni labat na 1999.”
Diad Italya, maproblema so panamaley nen Tamara, kanian sikatoy nampikasi parad kakabatan. Abayuboan toy agresibon walna, lapud pinekpek tan pinataynan na pamilya to nen mantaon na 14. Inkuan nen Tamara: “Akaromog ak na Biblia insan ko binasa itan. Sakey a labi, abasak a say ‘pananap na kakabatan et singa pananap na niyamot iran kayamanan.’ Impikasik so pakawalaan na ontan a kakabatan. (Uliran 2:1-6, NW) Diad kaimbuasan, binmisita iray Tastasi nen Jehova. Impaiyaralan ak na Biblia ed sikara, balet ta amalabas ak ni na panaon pian niyaplika so naaralan ko. Diad kaunoran, denesidik a tumboken so Kristianon panagbilay tan abautismoan ak. Natan, kaibay masiken ko, tutulongan ko iray arum a nagunggunaan manlapud kakabatan na Dios.”
Si Beatriz so kabiangan na saray prominenti ed sosyedad diad Caracas, Venezuela. Balet, sikatoy diborsiada tan agonigon a maong. Walay aminsan et sikatoy nampikasin pigay oras lapud naeekalan lay ilalo. Diad kaimbuasan, tinmanol so doorbell. Mansyodot a tinmakiling tan atakiling toy duaran totoo ya aka-portpolyo. Nankuankuanan ya anggapo ed abung, balet sakbay a tinmaynan so sanasawa, angiseksek iray imbitasyon ed puerta. “Know Your Bible,” so nabasa ed satan. Kasin walay koneksion na imbisita ra ed impikasi nen Beatriz ed apalabas a labi? Pinapawil to ira. Ag-abayag et impaiyaralan na Biblia, tan sikatoy abautismoan ed saginonor. Maliket lan siansia si Beatriz tan ibabangat to’d arum natan no panon a naromog so liket.
Impikasi nen Carmen so pipupuligesgesan to lapud kairapan. Samploray ananak to tan buanges so masiken to, si Rafael. “Nanggunaetan koy makalmo na kuarta diad pipepesak ko,” inkuan nen Carmen. Balet linmoor so panag-inum nen Rafael. “Anggad nen impaiyaralan kami na Biblia ed saray Tastasi nen Jehova insan anguman si masiken ko. Naaralan mi so nipaakar ed sipan a Panarian—a magano lan ekalen nen Jehova so mundo a napno na kairapan tan panaglames. Diad kaunoran et naebatan iray pikakasik ed Dios!” Say impakaaral nipaakar ed saray dalan nen Jehova so tinmulong ed si Rafael a nitunday panag-inum, tan insulong toy “balon personalidad.” (Efeso 4:24, NW) Aparakep dan sankapamilyaan so estandarte na kabibilay da. Inkuan nen Rafael: “Anggaman aliwa kamin mayaman, tan agmi kayarian so panaayaman mi, walaan kami na saray nakakaukolan ed bilay, kanian maliket kami.”
Sano Naebatan Lan Amin Iray Pikakasi
Kasin epektibo ed sarayan totoo so pikakasi? Petepeteg! Tan kasin naimano yo a kaslakan et naebatan iray pikakasi ra sanen walay sakey ed Kristianon kongregasyon a tinmulong ed sikara pian napaapit ed si Jehova a Dios diad impanaral ed Biblia?—Gawa 9:11.
Kanian walaan itayo sirin na maabig iran rason a manpikasi. Magano lan naebatan so pangipipikasi ed isabi na Panarian na Dios tan ed linawa to a nagawa diad dalin. (Mateo 6:10) No alinisan la ed satan na Dios so globo tayo manlapud saramay onsusumpa ed sikato, “say dalin so napano naani na pikakabat ed Jehova.” (Isaias 11:9) Diad ontan, panggayagaan na amin na saramay mangaaro ed si Jehova so “kawayangan na gloria na saray anak na Dios”—tan seguradon naebatan iray pikakasi ra.—Roma 8:18-21.
[Litrato ed pahina 7]
Kasin antam no akin a kaukolan itayon manpikasi?