Kasin Epektibo so Pikakasi?
Kasin Epektibo so Pikakasi?
WALAY panaon a ngalngalin liknaen na amin a nakaukolan so manpikasi. Diad tua, saray totoo na amin lawarin sistema na relihyoson sisiaen so masimoon a mandadasal. Singa bilang, nilibon danay ed sanagew a nayarin ulit-uliten na sakey a Buddhista so dasal a “Manisia ak ed Amida Buddha.”
Nisengeg ed saray problema a mantutultuloy ed sankadalinan, makatunongan so pangitepet na: Anto so iilaloan na totoo a nagamoran diad pampikasi? Kasin epektibon amin irayan pikakasi?
Akin a Manpipikasi Iray Totoo?
Dakel a taga-Bukig so mandadasal ed inmuunan atateng da tan ed dirios na Shinto odino Tao. Gagawaen da itan diad panilalon makasapat ira ed saray eksamin diad eskuelaan, makaani na dakel, odino niyarawi ed saray sakit. Diad panamegley na saray sagpot da, iilaloan na saray Buddhista a makagamor na pakaliwawaan. Saray Hindu so masimoon a mandadasal ed saray paborito ran dirios tan diosa parad pikakabat, kayamanan, tan proteksion.
Walaray Katoliko a maniilalon nagunggunaan so katooan diad pangideboto ra’d bilay da bilang monghe odino madre diad saray abakoran a monasteryo odino kombento, ya andi-tundan mandadasal. Minilyon a Katoliko so mikakasi’d si Maria panamegley na impatlep iran dasal, a nayarin diad tulong na saray rosaryo. Diad saray bansa ed Bukig, dakel a totoo so manguusar na saray prayer wheel (a singa nanengneng ed kaabay a litrato). Ulit-uliten na saray Protestanti so Pikakasi na
Katawan, anggaman nayarin ibebesngaw da met iray liknaan da ed Dios ed dilin paraan da. Dakel a Judio so manbiabiahe na ararawi pian manpikasi diad Mamasagur a Bakor ed Jerusalem, diad paniilalo ed kipawil na templo tan say balon panaon na inkaaligwas tan kareenan.Anggaman minilyon so manbubunek a manpikasi, say sosyedad na too so onloloor a sasaloten na saray problema ed kairapan, adiksion, abuyak iran pamilya, krimen, tan guerra. Kasin amin na sarayan totoo et agmanpipikasi ed dugan dalan? Lapud satan, talaga kasin walay onderengel ed saray pikakasi?
Wala Tay Onderengel ed Saray Pikakasi?
Aliwan epektibo iray pikakasi no ag-iratan naderengel. Sano manpikasi so sakey a too, mapatnag a sisiaen ton walay onderengel diad agnanengneng ya espiritun ayaman. Balet, saray pikakasi so agnipapasabi panamegley na sound waves (tanol). Sisiaen na dakel a totoo a walay sakey a makabasa ni ingen ed saray kanonotan na manpipikasi. Siopa kasi itan?
Misteryoson tuloy ed saray managsukimat no panon ya onggapo iray kanonotan diad binilyon a neurons a tugyopen na cerebral cortex na utek tayo. Anggaman ontan, makatunongan a samay Sakey a nandesinyo ed utek so makabasa ed saratan a kanonotan. Satan a sakey et anggapoy arum noagta say Manamalsa tayo, si Jehova a Dios. (Salmo 83:18; Apocalipsis 4:11) Saray pikakasi so nepeg a nipaarap ed sikato. Balet kasin tatalinengen nen Jehova so amin na saratan a pikakasi?
Kasin Naderengel so Amin a Pikakasi?
Si Arin David na kadaanan ya Israel so mapikasi. Bilang pinuyanan na Dios a salmista, inkanta to: “O sika a dengelen mo so pikakasi, amin a laman ondago ed sika.” (Salmo 65:2) Sarag nen Jehova a talosan iray pikakasi a nibabalikas ed dinanman a nilibon lenguahe a sasalitaen na katooan. Say bengatlan agnasarag na kanonotay too a kargaen so ontan a dakerakel ya impormasyon et agto kabaliksan ya agnayarian na Dios a talinengen so amin a manpikasi ed sikato diad naabobonan a paraan.
Ingen, si Jesu-Kristo—a mapikasi met—so angiparungtal ya aliwan amin a pikakasi so mamaliket ed Dios. Imanoen so inkuan nen Jesus nipaakar ed popular nensaman ya agamil a pangulit-ulit ed impatlep iran pikakasi. Unong ed Jerusalem Bible na Katoliko, inkuanto: “Diad saray pikakasi yo et agmangibabalikas na andi kabaliksan a singa gagawaen na saray pagano, lapud iisipen dan narengel ira diad pangusar na dakel a salita.” (Mateo 6:7) Agtayo nailaloan ya ondengel si Jehova ed saray pikakasi ya agmangibebesngaw na tua iran liknaan tayo.
Onia so ibabaga na proverbio na Biblia bilang pangipatnag no akin a walaray pikakasin agmamaliket ed Dios: “Say mangiyarawi ed layag to manlapu ed pandengel ed tunong, anggan say pikakasi to sikato so makapadimla.” (Uliran 28:9) Inkuan ni na sananey a proverbio: “Si Jehova arawi a manlapu ed marelmeng; balet dengelen to so pikakasi na maptek.” (Uliran 15:29) Walay aminsan sanen saray pangulo na kadaanan a Juda so anakbat ed belat na kasalanan, inkuan nen Jehova: “Sano unaten yo so saray lima yo, yamot ko so saray matak a manlapu ed sikayo; on, sano manggawa kayo na dakel a pikakasi, agak ondengel: saray lima yo napno ra na dala.”—Isaias 1:1, 15.
Wala ni sinalambit nen apostol Pedro a pagmaliwen ton saray pikakasi et ag-abobonan na Dios. Insulat nen Pedro: “Sikayo lalaki ya asawa, miamong kayo ed asawa yo unong na igaganggan na kakabatan; igalang yo so bii, alwaran yo a singa mayumis a baso, tan unong a tomatawir met ira na grasya na bilay: pian saray pikakasi yo agnasebelan.” (1 Pedro 3:7) Nayarin agnadengel iray pikakasi na laki a mangibabaliwala ed satan a simbawa!
Malinew a walaray pigaran kakaukolanen a nepeg a nakapet pian nadengel iray pikakasi. Balet, dakel so manpipikasi ya agda tanto pampapagaan so panggawa ed saray kakaukolanen na Dios ed sikatayo. Satan so rason no akin ya agnanresulta ed magmaong a mundo so pirmin inkasimoon ed pikakasi.
Anto sirin so kakaukolanen na Dios pian nadengel iray pikakasi tayo? Say ebat so mandependi ed mismon rason tayo no akin a manpipikasi itayo. Diad tua, no labay tayon amtaen no kasin epektibo iray pikakasi, nepeg tayon talosan so gagala na saratan. Akin a ginawa nen Jehova a posibli parad sikatayo so pitongtong ed sikato?
[Picture Credit Line ed pahina 3]
G.P.O., Jerusalem