Sikami Iray Klasen Walaan na Pananisia

Panangipulong ed Panarian diad Altiplano ed Peru

DIAD baetan na mamabukig tan mamasagur iran nasasakopan na saray Palandey Andes​—a nanketegan na Bolivia tan Peru​—so kawalaan na Altiplano. Say ngaran na satan et kabaliksan toy “atagey a patar,” odino “niatagey a palatas.” Maslak ed satan so nasasakopan na Bolivia.

Say Altiplano so walaan na 100 kilometro a kaawang tan masulok a 1,000 a kilometro ed karukey, tan say kabkaabigan a katagey na satan et manga 3,700 a metro manlapud dantal na dayat. Diad pan-eroplano a manlapud kabiseran syudad na Peru a walad gilig na dayat, salanti Lima, nadalanan moy nasasakbongan na niebe ya El Misti, sakey a bolkan a nasasabi toy lurem diad katagey ton 5,822 a metro. Diad katagey a masulok a 6,000 metro et say nanarawian ya asakbongay niebe iran toktok na Nevado Ampato tan Nevado Coropuna. Kabekta et biglan nabantag moy maawang a niatagey a palatas​—mamaabalaten ya Altiplano na Peru. Say kabisera na Peruvian Altiplano et say Puno, a walad amianen-sagur a sampot na Linok Titicaca, say sankaawangan a linok ed mundo a nayarin layagen. Lapud say rehyon et masulok a 3 kilometro ed katagey, kaukolan nin onadapta iray bisita lapud nairapan iran onlinawa. Saray manaayam ed Linok a Titicaca et say Quechua tan Aymara iran Indian. Akasulong na magket ya ambalanga, berdi, odino asul iran kawes, a nanengneng ira a mankikimey diad chacras, odino angkelag iran uma ra. Anggaman Español so manunan lenguahe ed Peru, say lenguahen Quechua tan Aymara so uusaren met diad Altiplano.

Panangidaulo ed Panagpulong

Dakel ed mapaabeba, makulin totoo a mansasalita na Quechua tan Aymara so agano nin akaamta na suston pikakabat ed katuaan na Biblia. Manuna et lapud mayaman a panamendision nen Jehova ed maseseg a sagpot na saray sigpot panaon a manangiyabawag na Panarian a manlilingkor bilang espisyal payunir.

Singa bilang, saray espisyal payunir a di José tan Silvia so niasain ed baley na Putina, manga 50 kilometro manlapud Linok Titicaca. Diad loob na duay bulan, 16 so iyaaralan nen Silvia na Biblia, tan si José et 14. Diad loob labat na anem bulan, say bilang na saray manangipalapag na kongregasyon et dinmaak manlapud 23 ya anggad 41. Ontan met, dinmakel iray onaatendi ed miting manlapud 48 anggad pantok a 132.

“Sanen igapo iray miting ed kongregasyon diad sarayan niarawin komunidad,” kuan nen José, “naimano min praktikal ya igapo ed Publikon Paliwawa tan say Panagaral na Libro ed Kongregasyon. Saya so amainomay ed iyatendi na saray balo nin interesado diad saray miting.”

Duaran sanagin bibii​—say sakey et payunir​—so pilimeron angitarok ed maong a balita diad niyarawin komunidad na Muñani, manga 20 kilometro manlapud Putina. Diman et inyaralan da na Biblia so sakey a bulag a laki a manngaran na Lucio. * Inimbitaan toy agi ton Miguel, sakey a lego a Katolikon misionaryo tan lider ed komunidad a manaayam ed asingger a lugar. Sanen sakey a kaaro so tinmepet ed si Miguel no akin a sikatoy sinimban oonla ed Muñani, inkuanto a lapud labay ton naamtaan so nipaakar ed si Jehova tan say Salita to. Insan to intepet: “Akin ya agtayo la’d dia aralen so Biblia?” Lapud interes ya impanengneng na totoo ed komunidad di Miguel, ag-abayag et inyareglo na Tastasi so pakagawa na saray miting diman.

Inggapo nen Miguel ya inabang so nanaaralan to ed arum. Balet komusta met so posisyon to bilang lego a Katolikon misionaryo tan deputadon gobernador? Diad sakey a miting ed hall na komunidad, inyabawag toy iyekal to bilang sakey a Katolikon misionaryo. Kasin walay sananey a naturo? Inkuan na sakey a wadman ya ondedengel: “Akin a nakaukolan tayo ni sananey a misionaryo no aaralen tayo lay katuaan?” Siempre, tutukoyen na saya iray bengatla ya imbangat  na saray Tastasi nen Jehova. Inkuan ni na sananey a too: “Agkami onabobon a bukor mo labat so onekal. Akin ya agtayo onekal ya amin?” Diad ontan et amin a wadman so nankakasakey ya angikelyaw: “Onekal itayon amin!”

Tampol kayari na saman et nantongtongan da ed miting na komunidad iray talintao tan krus. Inkerew na sakey a laki ed amin a presenti a basaen so Deuteronomio 7:25, a kuanto: “Saray pinanday a kinondirios da poolan yo ra naani na apoy: agmo aaguman so pilak odino balitok a niokop ed sikara, nisay alaen mo so onla ed sika aglapiga a napatitan kad’tan; ta sikato so sakey a kadimdimla nen Jehova a Dios mo.”

Insan kinerew na laki ya itagey day kalimaan na saramay pabor a poolan ya amin so talintao. Tampol ya intagey na amin so kalimaan da. (Gawa 19:19, 20) Natan et walay 23 ed 25 a pamilya ed komunidad so manaaral na Salitay Dios. Duara so manlilingkor bilang ag-abautismoan a manangipalapag, tan limaran sanasawa so manplaplanon mangi-legal la ed panamaley da pian nawalaan na malinis a talindeg ed imaton nen Jehova.​—Tito 3:1; Hebreos 13:4.

Panagbangat Diad Panamegley na Saray Nirekord ed Cassette

Lapud dakel so aliwan de-aral diad Altiplano, baleg a tulong iray video na Watch Tower tan saray nirekord ed cassette diad lokal iran lenguahe​—anggan diad panangiyaral na Biblia. Diad tulong na audio cassette, sakey ya espisyal payunir a manngaran na Dora so mangikokondukta na saray panangiyaral diad brosyur ya Anto so Kakaukolanen na Dios ed Sikatayo? Diad kada pangipatogtog ed sakey a parapo, tepetan toy iyaaralan to na Biblia unong ed nadngel to.

Sakey ya istasyon na radyo diman so regular a mangiyaanunsio ed saray kabiangan na brosyur a Kakaukolanen diad lenguahen Quechua. Ontan met so gagawaen ed saray kabiangan na magasin ya Awake! diad Español. Kanian, bibidbiren na dakel a totoo so mensahe na Panarian tan labay dan dakel ni so naaralan da sano ondalaw iray Tastasi nen Jehova ed ayaman da.

Say Altiplano so agnaiimano na mundo ed inkalapagan balet ta iimanoen itan na Dios. Lapud panangaro nen Jehova ed katooan, dakel a totoon manaayam diad Andean Altiplano so magmamaliw a kabiangan na baleg a karaklan a mangiglogloria ed abalbaleg ya abung to parad tuan panagdayew.​—Aggeo 2:7.

[Paimano ed Leksab]