Panliliketan na Saray Kristiano so Panaglingkor

“Lalo a mapalar so mangiter nen say mangawat.”​—GAWA 20:35.

1. Anton makapuy ya awawey so kasmak natan, tan akin a makaapekto itan?

 KALEGANAN na unor laran dekada na 1900, naynay a narengel so salitan “me-ism” (pagmaliw a manunaan). Say kabaliksan na “me-ism” et “siak ni” tan mangipapabitar itan na sinisiblet tan maagum ya awawey ya anggapo lay pibabali ed arum. Makaseguro itayon kasmak ni so awawey a “me-ism” ed taon 2000. Aminpiga yo lan nadngel so tepet ya, “Anto so nagunggunak ed satan?” Agmakapaliket so ontan a sinisiblet ya awawey. Misunian itan ed prinsipyon indatak nen Jesus: “Lalo a mapalar so mangiter nen say mangawat.”​—Gawa 20:35.

2. Panon a napatnagan a say panangiter et mangitarok na liket?

² Petepeteg kasin mas panliketan so pangiter nen say pangawat? On. Isipen pa so nipaakar ed si Jehova a Dios. Walad sikato so “subol na bilay.” (Salmo 36:9) Itatarya ton amin so nakaukolan tayo pian magmaliw itayon maliket tan makanakana. On, sikato so Lapuan na “amin a maong a palangkap tan amin ya ayadyarin palangkap.” (Santiago 1:17) Si Jehova, “say maliket a Dios,” so lawas mangiiter. (1 Timoteo 1:11, NW) Inaro to iray totoon pinalsa to, kanian dakerakel so inter to’d sikara. (Juan 3:16) Isipen pa met so nipaakar ed sankatooan. No sakey kayon ateng, amta yo no panon karakel so isakripisyo yo tan iter yo pian napabaleg so sakey ya ugaw. Tan diad loob na dakel a taon et ag-amta na ugaw so pansasakripisyo yo. Baliwala lambengat iratan ed sikato. Balet ta makakaliket kayon makanengneng ed ibabaleg na anak yo bilang resulta na andi-siblet a pangiiter yo. Akin? Lapud sikatoy inaro yo.

3. Akin a makapaliket so panlingkor ed si Jehova tan ed saray kapanisiaan tayo?

³ Mipadpara, say tuan panagdayew so pakabidbiran na panangiter a nibase’d aro. Lapud inaro tayo si Jehova tan saray kapananisiaan tayo, makapaliket so panlingkor ed sikara, ya iter tayoy inkasikatayo ed biang da. (Mateo 22:37-39) Agtanton manliket so siopaman a mandadayew a walaay masiblet iran motibo. Balet saramay mabulbulos a manlilingkor, a mas papagaan day niiter da nen say iilaloan dan awaten, so peteg a makaromog na liket. Sayan katuaan so natebek diad pangikonsidera ed no panon a nausar ed Kasulatan so pigaran salita ed Biblia a misiglaotan ed panagdayew tayo. Singbaten tayo so talora ed sarayan salita ed sayan artikulo tan ed ontumbok.

Say Serbisyo nen Jesus ed Totoo

4. Anto so nengneng na “serbisyo ed totoo” diad Kakristianoan?

⁴ Diad orihinal a Griego, say sakey ya importantin salita a misiglaotan ed panagdayew et say lei·tour·giʹa, a nipatalos a “serbisyo ed totoo” diad New World Translation. Diad Kakristianoan say  lei·tour·giʹa so angibasiyan ed salitan “liturgy.” * Balet, say pormal iran ritual na Kakristianoan so aliwan talagan makagunggunan serbisyo ed totoo.

5, 6. (a) Anton serbisyo ed totoo so ginawa ed Israel, tekep na antoran gungguna? (b) Anton mas matalonggaring a serbisyo ed totoo so sinmalat ed datin gagawaen ed Israel, tan akin?

⁵ Inusar nen apostol Pablo so salitan Griego a misiglaotan ed lei·tour·giʹa pian tukoyen iray saserdote na Israel. Inkuanto: “Balang saserdote tua a walan manlingkor [sakey a porma na lei·tour·giʹa] ya inagew-agew tan isaklang to a maminpigapiga so saray dilin nampapara a bagat.” (Hebreos 10:11) Angisaklang iray Levitan saserdote na makanakanan serbisyo ed totoo diad Israel. Imbangat da so Ganggan na Dios tan angiyapay iray bagat ya anakbong ed saray kasalanan na totoo. (2 Awaran 15:3; Malaquias 2:7) Sanen tinumbok na saray saserdote tan say totoo so Ganggan nen Jehova, say nasyon so magaygayaga.​—Deuteronomio 16:15.

⁶ Say panangisaklang na serbisyo ed totoo diad silong na Ganggan so peteg a pribilihyo parad saray Israelitan saserdote, balet ta nagmaliw ya anggapo lay kakanaan na serbisyo ra sanen nipulisay so Israel lapud katutunganga. (Mateo 21:43) Inyuksoy nen Jehova so mas matalonggaring​—say serbisyo nen Jesus ed totoo, bilang say baleg ya Atagey a Saserdote. Nipaakar ed sikato, oniay nabasa tayo: “Sikato, bangta mansiansia ed andi-anggaan, wala so inkasaserdote to ya agnipatawir. Kanian nayarian to met ya ilaban angga ed kasumpalan so saray onasingger ed Dios dia ed panamegley to, ta manbilay lawas a mangyesel ed sikara.”​—Hebreos 7:24, 25.

7. Akin a say serbisyo nen Jesus ed totoo et mangitatarok na agnaparaan iran gungguna?

⁷ Mantultuloy si Jesus bilang magnayon a saserdote, ya andian na saray kasalat. Kanian, sikato lambengat so sigpot a makapangisalba ed totoo. Agnaparaan so panseserbi to ed totoo, aliwan diad loob na templon ginawa na too, noagta dia ed antitipikon templo, say baleg ya uksoyan nen Jehova parad panagdayew a kinmurang la nen 29 K.P. Si Jesus so manseserbi natan diad Sankasantosan na satan a templo, diad tawen. Sikato so “managlingkor ed totoo [lei·tour·gosʹ] diad masanton pasen tan ed tuan templo, ya inletneg nen Jehova, tan aliwan too.” (Hebreos 8:2, NW; 9:11, 12) Anggaman atagey so betang nen Jesus, sikato nin siansia so “managlingkor ed totoo.” Uusaren toy atagey a pakauley to pian mangiter, aliwan pian mangawat. Tan satan so angiter ed sikato na gayaga. Kabiangan itan ed “gayaga a niyan ed arap to” tan satan so amabiskeg ed sikato pian mansungdo ed intiron impanbilay to diad dalin.​—Hebreos 12:2.

8. Panon so impanserbi nen Jesus ed totoo bilang kasalat ed Ganggan a sipanan?

⁸ Wala ni so sananey ya aspekto na serbisyo nen Jesus ed totoo. Oniay insulat nen Pablo: “[Si Jesus] so akagamor na sakey a pankatangbayan a lapu ed sikato met so manamegley ed sakey a sipan a magmaong ya abangon ed tapew na saray magmaong a sipasipan.” (Hebreos 8:6) Si Moises so manamegley ed sipanan a pinagka-basian na pisisiglaotan na Israel ed si Jehova. (Exodo 19:4, 5) Si Jesus so manamegley ed balon sipanan, a nagmaliw a posibli so inkianak na balon nasyon, say “Israel na Dios,” a tugyopen na saray alanaan na espiritun Kristiano a nanlapud dakel a nasyon. (Galacia 6:16; Hebreos 8:8, 13; Apocalipsis 5:9, 10) Agaylan abig a serbisyo ed totoo itan! Makapaliket so pakapikabat tayo ed si Jesus, sakey a managserbi ed totoo a diad panamegley to et nayarian tayoy mangisaklang na panagdayew a makapaliket ed si Jehova!​—Juan 14:6.

Mangisasaklang Met Iray Kristiano na Serbisyo ed Totoo

9, 10. Anto so pigaran nengneng na serbisyo ed totoo a ginawa na saray Kristiano?

⁹ Anggapo lay toon mas ontalonggaring ni ed serbisyon ginawa nen Jesus ed totoo. Anggaman ontan, sano awaten la na saray alanaan a Kristiano so mangatatawen a tumang da, ompuesto ira ed dikingan nen Jesus tan mibiang ira ed panagserbi to’d totoo bilang mangatatawen ya arari tan saserdote. (Apocalipsis 20:6; 22:1-5) Ingen, saray Kristiano ed dalin so manseserbi met ed totoo, tan panggagayagaan dan gawaen itan. Alimbawa, sanen walay kakisiray tagano diad Palestina, intarok nen apostol Pablo iray donasyon na agagi ed Europa pian ontulong ed paniirap na saray Judion Kristiano ed Judea. Serbisyo itan ed totoo. (Roma 15:27; 2 Corinto 9:12) Natan et panliliketan na saray Kristiano so mangisaklang na ontan met a serbisyo, ya ontutulong a tampol ed saray agagi ran maniirap, naapektoan na natural a desyang, tan arum niran kalamidad.​—Uliran 14:21.

¹⁰  Tinukoy nen Pablo so sananey nin serbisyo ed totoo sanen insulat to: “No nisaklang ak ed tapew na bagat tan panlingkor ed pananisia yo, manliket ak, tan miliket ak ed sikayon amin.” (Filipos 2:17) Say impansagpot nen Pablo nisesengeg ed saray taga-Filipos et sakey a serbisyo ed totoo ya insaklang tekep na aro tan kuli. Ontan met a serbisyo ed totoo so isasaklang natan, nagkalalo la’ saray alanaan a Kristiano, a manlilingkor bilang “matoor tan makabat ya aripen,” a mangitataryay espiritual a tagano ed dugan panaon. (Mateo 24:45-47) Niarum ni, bilang sakey a grupo, saraya so “masantos ya inkasaserdote,” a niganggan a “mangisaklang na saray maespiritun bagat, makapaliket ed Dios lapu ed Jesu-Kristo” tan “mangibelyaw na karlangan na saman so angekal ed [sikara] ed kabilungetan, ta tinawag to [ra] ed makapakelaw a silew to.” (1 Pedro 2:5, 9) Singa si Pablo, panliliketan da iratan a pribilihyo ya ‘isasaklang da ni ingen so inkasikaran dili’ diad panusumpal da’d saray responsabilidad da. Tan akiulop ed sikara so kaiba ran “arum a karnero” tan susuportaan da ra ed pangipapaamta ra’d totoo na nipaakar ed si Jehova tan ed saray gagala to. * (Juan 10:16; Mateo 24:14) Agaylan abig tan makapalikliket itan a serbisyo ed totoo!​—Salmo 107:21, 22.

Isaklang so Sagradon Serbisyo

11. Panon so impangipatnag nen propetesan Ana na maabig ya ehemplo parad amin a Kristiano?

¹¹ Say sananey nin Griegon salita a misiglaotan ed panagdayew tayo et say la·treiʹa, a nipatalos a “sagradon serbisyo” diad New World Translation. Say sagradon serbisyo so misiglaotan ed saray gawa na panagdayew. Alimbawa, say 84 años a balo tan propetesan si Ana so adeskribe ya “agbalot onliliwat ed templo, a mangisasaklang na sagradon serbisyo [sakey a Griegon salita a misiglaotan ed la·treiʹa] ed labi tan agew tekep na saray panag-ayunal tan pikakasi.” (Lucas 2:36, 37, NW) Si Ana so lawas nandayew ed si Jehova. Sikato so maabig ya ehemplo ed sikatayon amin​—kalangweran tan matakken, lalaki tan bibii. No panon a masimoon a nampikasi si Ana ed si Jehova tan regular a nandayew diad templo, say sagradon serbisyo tayo so mangilaktip ed pikakasi tan iyaatendi ed miting.​—Roma 12:12; Hebreos 10:24, 25.

12. Anto so manunan kabiangan na sagradon serbisyo tayo, tan panon a nibagan serbisyo met iya ed totoo?

¹² Sinalambit nen apostol Pablo so manunan kabiangan na sagradon serbisyo tayo sanen insulat to: “Say Dios, a pangisasaklangan koy sagradon serbisyo tekep na espirituk a misiglaotan ed maong a balita nipaakar ed Anak to, so tasik ed no panon ya andi-tunda so impanalambit ko ed sikayon naynay diad saray pikakasik.” (Roma 1:9, NW) On, say panangipulong ed maong a balita so aliwa lambengat a mapublikon serbisyo ed saramay ondengel ed satan noagta sakey a gawa met na panagdayew ed si Jehova a Dios. Balanglan ondengel odino andi so naromog tayo, say panagpulong et sagradon serbisyo ya isasaklang ed si Jehova. Manggayaga tayon maong no panggugunaetan tayon ibaga ed arum so nipaakar ed saray maabig a kualidad tan makagungguna iran gagala na maaron mangatatawen ya Ama tayo.​—Salmo 71:23.

Iner so Pangisaklangan Tayo na Sagradon Serbisyo?

13. Anto so ilalo na saramay mangisaklang na sagradon serbisyo ed akindalem a saban na espiritual a templo nen Jehova, tan sioparay mililiket ed sikara?

¹³ Diad saray alanaan a Kristiano, oniay insulat nen Pablo: “Kanian, awaten tayo so sakey a panarian ya agnayari a tenyegen, wala komon so grasya tayo a sikato so panlingkoran tayo ed Dios na makapaliket ed sikato a tukoyan na galang tan takot.” (Hebreos 12:28) Diad matalek a panaalagar na  saray alanaan ed pakatawir da’d Panarian, ag-ira nagiing ed pananisia ra legan dan dadayewen so Sankatageyan. Dia lambengat ed satan a nisaklang day sagradon serbisyo ed sikato diad loob na Masanton silir tan diad akindalem a saban na espiritual a templo nen Jehova, tan iilaloan da tekep na magunaet a panaalagar so panserbi ra a kaibay Jesus diad Sankasantosan, diad tawen a mismo. Mililiket met ed sikara iray kakaiba ra, say arum a karnero, diad alay abig ya ilalo ra.​—Hebreos 6:19, 20; 10:19-22.

14. Panon a nagunggunaan so baleg ya ulop ed serbisyo nen Jesus ed totoo?

¹⁴ Komusta balet iramay arum a karnero? Unong ed anengneng la nen apostol Juan, ompatnag so sakey a baleg ya ulop na saratan ed sarayan kaunoran ya agew, tan “inurasan da so kawekawes da, tan sikara so pinaputi ra ed dala na Kordero.” (Apocalipsis 7:14) Kabaliksan na saya a, singa met ed saray alanaan a kaiba ran mandadayew, aagamilen da so pananisia ed serbisyo nen Jesus ed totoo, say impangiyapay toy ayadyarin bilay to parad katooan. Nagunggunaan met so arum a karnero ed serbisyo nen Jesus ed totoo, salanti, ‘kawaloen da so sipan [nen Jehova].’ (Isaias 56:6) Andi, aliwa iran kabiangan na balon sipanan, balet ta bebembenan da itan panamegley na panguunor da’d saray ganggan a misiglaotan ed satan tan mitutulongan ira ed saray uksoyan a ginawa panamegley na satan. Mililimog ira ed Israel na Dios, a mantatagano met ira ed parehon espiritual a lamisaan tan mankikimey kaiba iray membro na satan, a mapublikon mangidadayew ed Dios tan mangisasaklang na espiritual iran bagat a makapaliket ed sikato.​—Hebreos 13:15.

15. Iner so pangisasaklangan na baleg ya ulop ed sagradon serbisyo ra, tan panon a makaapekta’d sikara iyan bendision?

¹⁵ Kanian anengneng so baleg ya ulop a walad “arap na trono, tan ed arap na Kordero, a nankawes ira na kawekawes ya amputi.” Niarum ni, “wala ra ed arap na trono na Dios; tan sikato so panlingkoran da ed agew tan labi ed templo to: tan say wala a manyurong ed trono ibuskag to so tabernakulo to ed sikara.” (Apocalipsis 7:9, 15) Diad Israel, saray proselita so nandayew ed akinpaway a saban  na templo nen Solomon. Ontan met, say baleg ya ulop so mandadayew ed si Jehova diad akinpaway a saban na espiritual a templo to. Panliliketan da so panlilingkor ditan. (Salmo 122:1) Angga ed pakaawat la na sankaunoran ed saray kaiba ran alanaan ed mangatatawen a tawir to, mantultuloy iran mangisaklang na sagradon serbisyo ed si Jehova bilang totoo to.​—Apocalipsis 21:3.

Say Sagradon Serbisyo ya Agnaabobonan

16. Antoray nipasakbay nipaakar ed sagradon serbisyo?

¹⁶ Diad panaon na kadaanan ya Israel, say sagradon serbisyo so kaukolan a nisaklang unong ed saray ganggan nen Jehova. (Exodo 30:9; Levitico 10:1, 2) Mipadpara natan, walaray kakaukolanen a sumpalen pian abobonan nen Jehova so sagradon serbisyo tayo. Satan so rason no akin ya oniay insulat nen Pablo ed saray taga-Colosas: “Sikami . . . andi tunda min mankerew tan manggawa na pikakasi a nipaakar ed sikayo, pian napano kayo komon na kakabatan na linawa to ed amin a karunongan a maespiritu tan pakatalos, mankurang kayo a makana ed Katawan ya onarap ed amin a makapaliket, mamabunga ed ganaganan maabig a gawa, tan ombaleg ed kakabatan na Dios.” (Colosas 1:9, 10) Aliwan sikatayo so makauley a mandetermina no anto so suston paraan na pandayew ed Dios. Importanti so suston pikakabat ed Kasulatan, espiritual a pakatalos, tan maridios a kakabatan. No anggapo iratan, nayarin makadesyang iray pansumpalan.

17. (a) Panon ya apikewet so sagradon serbisyo ed panaon nen Moises? (b) Panon a nayarin nisuawi natan so sagradon serbisyo?

¹⁷ Nodnonoten iray Israelita ed agew nen Moises. Oniay nabasa tayo: “Say Dios binmeneg et pinaulyan to ra a manlingkor ed ehersito na tawen.” (Gawa 7:42) Naimatonan na saratan ya Israelita so makapanyari iran ginawa nen Jehova ed biang da. Ingen, dinmapag ira ed arum a dirios sanen inisip dan pankaabigan da itan. Ag-ira nanmatoor, tan say katooran so nakaukolan ta pian makapaliket ed Dios so sagradon serbisyo tayo. (Salmo 18:25) Tua, daiset natan so ombebeneg ed si Jehova pian mandayew ed saray bitewen odino balitok iran baka, balet walaray arum a nengneng na idolatriya. Amasakbay si Jesus sumpad panagserbi ed “Kayamanan,” tan tinawag nen Pablo so inkaagum bilang idolatriya. (Mateo 6:24; Colosas 3:5) Itatandoro nen Satanas so inkasikato bilang sakey a dios. (2 Corinto 4:4) Say ontan iran klase na idolatriya so kasmak tan sakey a patit. Alimbawa, isipen pa so sakey a mankuan ya ontutumbok ed si Jesus balet ta say peteg a kalat to’d bilay et say manpayaman odino say peteg a panmamatalekan to et say inkasikato tan saray mismon ideya to. Siopa so talagan panlilingkoran to? Wala ta’y pidumaan to ni ed saray Judio ed panaon nen Isaias a nansamba ed ngaran nen Jehova balet ta say manepeg a galang lapud saray makapakelkelaw a ginawa to so impaarap da’d marumsis iran talintao?​—Isaias 48:1, 5.

18. Panon so lingon impangagamil na sagradon serbisyo nensaman tan natan?

¹⁸  Oniay impasakbay met nen Jesus: “Say oras ondateng a siopaman a mamatey ed sikayo isipen to a mangisaklang na panlingkor ed Dios.” (Juan 16:2) Si Saul, a nagmaliw ya apostol Pablo, so maseguron nanisip a sikatoy manseserbi ed Dios sanen sikatoy ‘akinonong ed impamatey ed si Esteban’ tan ‘maningas ni na pangigagaem tan panagpatey ed saray babangatan na Katawan.’ (Gawa 8:1; 9:1) Natan, ibabaga met na arum a mangigagaulo ed etnikon panaglinis tan panagpalanit a mandadayew ira ed Dios. Dakel a totoo so mankuan a mandadayew ira ed Dios, balet ta say panagdayew da so peteg a nipaarap ed dirios na nasyonalismo, tribalismo, kayamanan, dili, odino arum nin dirios.

19. Panon tayon moriaen so sagradon serbisyo tayo? (b) Anton klase na sagradon serbisyo so pakagamoran tayoy gayaga?

¹⁹ Inkuan nen Jesus: “Sika igalang mo naani so Dios a Katawan [“Jehova,” NW] mo, tan sikato labat so panlingkoran mo.” (Mateo 4:10) Ontan so imbaga to’d si Satanas, balet agaylan makanakana so italineng tayon amin ed saratan a salita! Say panangisaklang na sagradon serbisyo ed Soberanon Katawan na uniberso et sakey a nitandoro tan alay abig a pribilihyo. Tan anto so nibaga tayo diad pananumpal ed serbisyo’d totoo a misiglaotan ed panagdayew tayo? Say panggawa ed saya nisesengeg ed kapara tayon totoo et magayagan kimey a mangitarok na baleg a liket. (Salmo 41:1, 2; 59:16) Anggaman kuan, say ontan a serbisyo so mangitarok na peteg a liket no isaklang itan a sigpot-puso tan ed dugan paraan. Sioparan talaga so mandadayew ed Dios ed suston paraan? Anton sagradon serbisyo so abobonan nen Jehova. Saratan a tepet so naebatan tayo no konsideraen tayo so komatlon salita ed Biblia a misiglaotan ed panagdayew tayo. Naebatan tayo itan ed ontumbok ya artikulo.

[Saray paimano ed leksab]

Panon Yon Ebatan?

• Anton matalonggaring a serbisyo ed totoo so ginawa nen Jesus?

• Anton serbisyo ed totoo so gagawaen na saray Kristiano?

• Anto so Kristianon sagradon serbisyo, tan iner so pangisasaklangan ed satan?

• Anto so nepeg tayon gamoran pian makapaliket ed Dios so sagradon serbisyo tayo?

[Tepetepet Parad Panagaral]

[Litrato ed pahina 10]

Manggayagan maong iray kaatengan lapud panangiter

[Saray litrato ed pahina 12, 13]

Mangisasaklang iray Kristiano na serbisyo ed totoo sano tutulongan da so arum tan sano iyaabawag da so maong a balita

[Litrato ed pahina 14]

Nakaukolan tayo so suston pikakabat tan pakatalos pian naseguro tayo ya abobonan na Dios so sagradon serbisyo tayo