Sioparay Ministro na Dios Natan?

“Say impagmaliw min nagnap a kualipikado so manlalapud Dios, a sikaton peteg so nagnap ya angikualipika ed sikami pian magmaliw a ministros na balon sipanan.”​—2 CORINTO 3:5, 6, NW.

1, 2. Anton responsabilidad so akibiangan na inmunan-siglo iran Kristiano, balet panon ya anguman iray bengatla?

 NEN inmunan siglo na Komon a Panaon tayo, akibiang so amin a Kristiano ed sakey ya importantin responsabilidad​—say obligasyon ya ipulong so maong a balita. Alanaan iran amin tan ministros ira na balon sipanan. Arum so walaay responsabilidad, a singa say panagbangat ed loob na kongregasyon. (1 Corinto 12:27-29; Efeso 4:11) Saray atateng so walaay ambelat iran obligasyon ed loob na pamilya. (Colosas 3:18-21) Balet akibiang iran amin ed manuna tan makanan kimey na panagpulong. Diad orihinal a Griego na Kristianon Kasulatan, sayan responsabilidad et di·a·ko·niʹa​—sakey a serbisyo, odino ministeryo.​—Colosas 4:17.

² Diad inlabas na panaon, anguman lay bengabengatla. Walay grupon atibukel a tinawag a klerigo, a sikara lambengat so walaay pribilihyon mankaral. (Gawa 20:30) Say klerigo so melag a grupo na saramay mankuan a Kristianos. Say baleg a bilang so tinawag a kabanyakan a totoo (laity). Anggaman nibabangat ed saray kabanyakan a totoo a walaray obligasyon da, laktipen lay pankontribusyon pian nasuportaan iray klero, maslak ed sikara so nagmaliw lambengat a dumerengel no nipaakar ed panagkalar.

3, 4. (a) Panon so pagmaliw a ministro na saray indibidual ed Kakristianoan? (b) Siopa so ipapasen a sakey a ministro ed Kakristianoan, tan akin a midumaan itan ed limog na saray Tastasi nen Jehova?

³ Ibabaga na klerigo a sikara so ministro  (nanlapud minister, Latin a patalos na di·aʹko·nos, “lingkor”). * Pian magmaliw a ministro, mangraduar nira ed saray kolehyo odino seminaryo insan ira magmaliw ya ordinado. Oniay inkuan na The International Standard Bible Encyclopedia: “Say kaslakan a tutukoyen na ‘panordina’ tan ‘ordinasyon’ et say nikabiig a posisyon na saray ministro odino papari panamegley na saray indatak na iglesia a ritual, a nidadanet so autoridad ed pangiyabawag na Salita odino pangagamil ed saray sakramento, odino satan a dua.” Siopay man-ordina ed saray ministro? Inkuan na The New Encyclopædia Britannica: “Diad saray iglesia a mangaagamil ni ed maawaran ya inka-obispo, say ministron man-ordina et naynay a say obispo. Diad saray iglesian Presbiteryano, say man-ordina et saray ministro na presbitero.”

⁴ Kanian, diad saray iglesia na Kakristianoan, pirmin apegetan so pribilihyo ed pagmaliw a ministro. Balet, aliwan ontan ed limog na saray Tastasi nen Jehova. Akin ya andi? Lapud aliwan ontan so paraan ed Kristianon kongregasyon nen inmunan-siglo.

Siopan Talaga Iray Ministro na Dios?

5. Unong ed Biblia, sioparay kaiba ed saramay manlilingkor bilang ministro?

⁵ Unong ed Biblia, amin a mandadayew ed si Jehova​—mangatatawen tan mangaraldalin​—et ministros. Saray anghel so nanlingkor ed si Jesus. (Mateo 4:11; 26:53; Lucas 22:43) Saray anghel so “manlingkor a pinabangan na saray manawir naani na kilalaban.” (Hebreos 1:14; Mateo 18:10) Si Jesus so sakey a ministro. Inkuanto: “Say Anak na too ya agdia linma a panlingkoran, noag say manlingkor, tan iter toy bilay to a panondon ed amayamay.” (Mateo 20:28; Roma 15:8) Kanian, lapud saray patumbok nen Jesus et nepeg ya “ontumbok a maapit ed saray bakat to,” agpankelawan a sikara met so nepeg a magmaliw a miministro.​—1 Pedro 2:21, NW.

6. Panon ya impatnag nen Jesus a saray babangatan to so nepeg a magmaliw a miministro?

⁶ Sakbay na intokotok to ed tawen, inkuan nen Jesus ed saray babangatan to: “Onla kayo . . . manggawa kayo na saray babangatan ed amin a nasyones, a binyagan yo ra ed ngaray Ama, tan say Anak, tan say espiritu santo. Ya ibangat yo ran mangunor na amin a bengabengatla ya ingganggan ko ed sikayo.” (Mateo 28:19, 20) Saray babangatan nen Jesus so nepeg a magmaliw a managgaway-babangatan​—miministro. Aralen na saray balon babangatan so pangunor ed amin a bengatlan ingganggan nen Jesus, pati say ganggan ya onla tan manggaway babangatan. Laki man odino bii, matakken la odino ugaw ni, say tuan babangatan nen Jesu-Kristo so kaukolan a magmaliw a ministro.​—Joel 2:28, 29.

7, 8. (a) Antoran teksto so mangipanengneng ya amin a tuan Kristiano et miministro? (b) Antoran tepet so linmesa nipaakar ed pakaordina?

⁷ Mitunosan ed saya, nen agew na Pentecostes 33 K.P., amin a wadman a babangatan nen Jesus, lalaki tan bibii, so akibiang ed panangiwakawak ed “saray makapakelaw a gawa na Dios.” (Gawa 2:1-11) Niarum ni, insulat nen apostol Pablo: “Say too sisiaen to ed puso to so katunongan; tan say sangi so manggawa na panangipatua na onkana ed kilalaban.” (Roma 10:10) Impasabi nen Pablo irayan salita, aliwan ed daiset a kleron klase, noagta “ed amin a wala ed Roma, ya inaro na Dios.” (Roma 1:1, 7) Mipadpara, amin a ‘sasanto a wala ed Efeso, tan saray mananisia ed Kristo Jesus’ so kaukolan a ‘sapinan da so saray salisali ra na panangiparaan ed ebanghelyo na kareenan.’ (Efeso 1:1; 6:15) Tan amin na saramay akadngel ed satan a sulat ed saray Hebreo so kaukolan a ‘mansiansian malet tan  agnagiing ed panangiparungtal na ilalo ra.’​—Hebreos 10:23.

⁸ Kapigan balet so pagmaliw a ministro na sakey a too? Diad arum a salita, kapigan so pakaordinaan to? Tan siopa so man-ordina ed sikato?

Pakaordina Bilang Ministro​—Kapigan?

9. Kapigan so inka-ordinaan nen Jesus, tan siopa so nan-ordina ed sikato?

⁹ Nipaakar ed no kapigan tan no siopa so man-ordina ed sakey a too, konsideraen so alimbawa nen Jesu-Kristo. Anggapo so sertipiko na inka-ordinaan to odino titulo manlapud sakey a seminaryo pian napruebaan a sikatoy sakey a ministro, tan sikato so ag-inordinaan na siopaman a too. Akin a nibaga tayo sirin a sikato ed saman so sakey a ministro? Lapud ta asumpal ed sikato iray apuyanan a salita nen Isaias: “Say espiritu na Katawan wala ed siak, ta nilanaan toak a mangipulong na saray maong a balita.” (Lucas 4:17-19; Isaias 61:1) Pekderan na saratan a salita a si Jesus so nibakin mangiyabawag ed maong a balita. Siopay nan-ordina ed sikato? Lapud sikatoy alanaan na espiritu nen Jehova parad satan a kimey, si Jesus so mabitar ya inordinaan nen Jehova a Dios. Kapigan iya agawa? Nikalbo ed si Jesus so espiritu nen Jehova sanen sikatoy abautismoan. (Lucas 3:21, 22) Kanian, sikatoy na-ordinaan nen sikatoy abautismoan.

10. Siopa so ‘nagnap a mangikualipika’ ed sakey a Kristianon ministro?

¹⁰ Komusta balet iramay inmunan-siglon papatumbok nen Jesus? Say kipapasen da bilang ministros so nanlapu met ed si Jehova. Inkuan nen Pablo: “Say impagmaliw min nagnap a kualipikado so manlalapud Dios, a sikaton peteg so nagnap ya angikualipika ed sikami pian magmaliw a ministros na balon sipanan.” (2 Corinto 3:5, 6, NW) Panon a makakualipika ed si Jehova iray mandadayew ed sikato pian magmaliw iran ministro? Konsideraen pa so alimbawa nen Timoteo, a tinawag nen Pablo a “ministroy Dios ed ebanghelyo nen Kristo.”​—1 Tesalonica 3:2.

11, 12. Panon ya inmaligwas si Timoteo ed impagmaliw ton ministro?

¹¹ Saray onggendan a salita a nibagan mismo ed si Timoteo so ontulong ed sikatayo pian natalosan tayo no panoy impagmaliw ton ministro: “Balet sika mansiansia ka ed saray bengatla ya inaral mo tan sinisiam, ya antam no siopa so nanaralan mo ed sikara. Tan nanlapu ed inkaugaw mo akabatan mo so saray masanto a Sulsulat, a makayari a manggawa ed sika a makabat ed kilalaban lapu ed panamegley na pananisia a wala ed Kristo Jesus.” (2 Timoteo 3:14, 15) Say pundasyon na pananisia nen Timoteo, ya amakiwas ed sikato ed mapublikon panangiyabawag, et say pikakabat ed Kasulatan. Kasin magenap la so personal  a panagbasa? Andi. Nakaukolan ni nen Timoteo so tulong pian nagamoran to so suston pikakabat tan espiritual a pakatalos ed babasaen to. (Colosas 1:9) Kanian si Timoteo so ‘anisia.’ Lapud kabat to la so Kasulatan “nanlapu ed inkaugaw” to, maseguron say inmunan angibangat ed sikato et say ina tan bai to, lapud ompatnag ya agmananisia so ama to.​—2 Timoteo 1:5.

¹² Balet, wala ni so nalalanor ed impagmaliw nen Timoteo a ministro. Sakey lan bengatla et say pananisia to so apabiskeg ed impilimog to’d saray Kristiano ed kabangibang iran kongregasyon. Panon tayon naseguro itan? Lapud ta nen inmunan akabat nen Pablo si Timoteo, say balolaki so “walaan maong a dengel na inkasikato a manlapu ed saray agagi a wala ed Listra tan Iconio.” (Gawa 16:2) Niarum ni, diad saraman ya agew et walaray agagin sinmulat ed saray kongregasyon ta pian pabiskegen ira. Tan sikara so binisita na saray manangasikaso pian pasesegen ira. Saratan a probisyon so akatulong ed saray Kristianon singa si Timoteo pian onaligwas ed espiritual.​—Gawa 15:22-32; 1 Pedro 1:1.

13. Kapigan so inka-ordinaan nen Timoteo bilang ministro, tan akin a nibaga yon ag-angangga’d ditan so inyaligwas to’d espiritual?

¹³ Nisengeg ed ganggan nen Jesus a nikurit ed Mateo 28:19, 20, makaseguro itayo a sinmabi panaon et apakiwas si Timoteo a mangalig ed si Jesus tan pabautismoan lapud pananisia to. (Mateo 3:15-17; Hebreos 10:5-9) Angisimbolo itan ed intiron-kamarerwan dedikasyon nen Timoteo ed Dios. Si Timoteo so nagmaliw a ministro sanen sikatoy abautismoan. Manlapu la’d saman, say bilay, biskeg, tan amin a bengatlan walad sikato so kien la na Dios. Satan so manunan kabiangan na panagdayew to, “say sagradon serbisyo” to. Anggaman ontan, agnansiansia si Timoteo ed impagmaliw to labat a ministro. Sikatoy nantultuloy ya inmaligwas ed espiritual, a nagmaliw a matakken a Kristianon ministro. Ontan so agawa lapud maapit ya impilimog nen Timoteo ed saray matakken lan Kristiano a singa si Pablo, personal a panagaral to, tan maseseg a panagpulong to.​—1 Timoteo 4:14; 2 Timoteo 2:2; Hebreos 6:1.

14. Natan, panon ya onaligwas so say sakey a “tinandaan ed bilay ya andi-anggaan” pian magmaliw a ministro?

¹⁴ Natan, ontan met so pakaordinaan parad Kristianon ministeryo. Say sakey a “tinandaan ed bilay ya andi anggaan” so tutulongan diad panamegley na panagaral ed Biblia pian makaaral nipaakar ed Dios tan ed saray gagala to. (Gawa 13:48) Naaralan na indibidual so pangiyaplika ed saray prinsipyo na Biblia diad kabibilay to ontan met ed makabaliksan a panagpikasi ed Dios. (Salmo 1:1-3; Uliran 2:1-9; 1 Tesalonica 5:17, 18) Sikatoy milimog ed arum a mananisia tan anamoten toray probisyon tan uksoyan na “matoor tan makabat ya aripen.” (Mateo 24:45-47; Uliran 13:20; Hebreos 10:23-25) Diad ontan a paraan, sikatoy onaligwas ed silong na niyuksoy a paraan na panagbangat.

15. Anto so nagawa sano nabautismoan so sakey a too? (Nengnengen met so paimano’d-leksab.)

¹⁵ Diad saginonor, no abayuboan la na sakey ya iyaaralan na Biblia so aro to ed si Jehova a Dios tan awalaan lay mabiskeg a pananisia ed dondon bagat, kaliktan to lan sigpot ya idedika so inkasikato ed mangatatawen ya Ama to. (Juan 14:1) Idedika toy inkasikato diad pampikasi ton bukor insan pabautismoan bilang mapublikon simbolo na satan a ginawa to’d pribadon paraan. Say bautismo ed  sikato so seremonya na pakaordinaan to lapud ta diad satan a paraan so pakabidbiran to bilang sigpot a dedikadon lingkor, sakey a di·aʹko·nos, na Dios. Sikatoy nepeg a mansiansian biig ed mundo. (Juan 17:16; Santiago 4:4) Impresenta to la so inkasikaton dili bilang “mabilay a bagat, masantos, makapaliket ed Dios” ya anggapoy panduaruwa odino kondisyon. (Roma 12:1) * Sikato lay ministro na Dios, ya aaligen toy Kristo.

Anto so Kristianon Ministeryo?

16. Anto so pigara ed saray responsabilidad nen Timoteo bilang ministro?

¹⁶ Anto so laktipen na ministeryo nen Timoteo? Sikato so walaay nikabkabiig iran obligasyon bilang kaiba nen Pablo a managbaroy. Tan sanen sikatoy nagmaliw lan matatken, si Timoteo so nankimey a maong ed panagbangat tan panamabiskeg ed saray kaparan Kristiano. Balet say manunan kabiangan na ministeryo to, a singa met ed kipapasen nen Jesus tan Pablo, et say panangipulong ed maong a balita tan panaggaway babangatan. (Mateo 4:23; 1 Corinto 3:5) Oniay inkuan nen Pablo ed si Timoteo: “Ingen sika manpaga ka ed saray ami-amin a bengatla, mantepel ka ed saray irirap, gawam so gawa na ebanghelista, sumpal mo so ministeryom.”​—2 Timoteo 4:5.

17, 18. (a) Diad anton ministeryo so pibibiangan na saray Kristiano? (b) Panon kaimportanti so panagpulong a kimey ed sakey a Kristianon ministro?

¹⁷ Mipadpara itan ed saray Kristianon ministro natan. Mibibiang ira ed mapublikon ministeryo, say panag-ebanghelyon kimey, ya ipapakabat da’d arum so kilalaban a nibase ed bagat nen Jesus tan ibabangat daray mauyamo ya ontawag ed ngaran nen Jehova. (Gawa 2:21; 4:10-12; Roma 10:13) Papaneknekan da’d Biblia a say Panarian so alenleneg ya ilalo na maniirap a katooan tan ipapabitar da ya anggan natan et magmaong iray bengabengatla no manbilay itayo unong ed maridios iran prinsipyo. (Salmo 15:1-5; Marcos 13:10) Balet say ipupulong na sakey a Kristianon ministro et aliwan say ebanghelyon misiglaotan ed saray problema’d sosyedad (social gospel). Imbes, say ibabangat to et nipaakar ed ‘say kasantosan [“maridios a debosyon,” NW] a wala ed satan so sipan na sayan bilay a peles, tan ed say onsabi.’​—1 Timoteo 4:8.

¹⁸ Tua, maslak a miministro et walaay kaaruman niran paraan pian makapanlingkor, a mandurumaan so balang Kristiano. Dakel so walaan na saray obligasyon ed pamilya. (Efeso 5:21–6:4) Saray matatken tan ministeryal a lingkor so walaan na saray obligasyon ed kongregasyon. (1 Timoteo 3:1, 12, 13; Tito 1:5; Hebreos 13:7) Dakel a Kristiano so ontutulong ed pangipaalagey na saray Kingdom Hall. Arum so walaan na alay abig a pribilihyo ed pankimey bilang boluntaryo ed ayaman a Bethel na Watch Tower Society. Balet, amin a Kristianon ministro so mibibiang ed panangipulong ed maong a balita. Anggapo so nipuera. Say pibibiang ed sayan kimey so mangipabidbir ed sakey a too diad publiko a sikatoy tuan Kristianon ministro.

Say Awawey na Kristianon Ministro

19, 20. Anton awawey so nepeg a bayuboan na saray Kristianon ministro?

¹⁹ Iilaloan na maslak ed saray ministro na Kakristianoan a makaawat iray nikabkabiig a galang, tan sikaray patatawag a “reverend” tan “father.” Balet, kabat na sakey a Kristiano a si Jehova lambengat so makanepegan a galangen. (1 Timoteo 2:9, 10) Agkakaukolanen na Kristianon ministro so ontan iran atagtagey a respeto odino patatawag ed nikabkabiig iran titulo. (Mateo 23:8-12) Amta ton say manunan kabaliksan na di·a·ko·niʹa et “serbisyo.” Say verb ya insiglaot ed satan so nauusar no maminsan ed Biblia pian saglawien so personal a serbisyo, a singa say pagmaliw a serbidor. (Lucas 4:39; 17:8; Juan 2:5) Anggaman mas atagtagey so inkausar na satan unong ed Kristianon ministeryo, say di·aʹko·nos et siansia nin sakey a managlingkor.

²⁰ Anggapo sirin so rason na sakey a Kristianon ministro a magmaliw a pa-importanti. Saray tuan Kristianon ministro​—anggan saramay walaay nikabiig a responsabilidad ed loob na kongregasyon​—so mapaabeban ariripen. Inkuan nen Jesus: “Siopaman a labay toy magmaliw a baleg ed sikayo sikato naani managlingkor yo. Tan siopaman a labay toy unaan ed sikayo sikato naani aripen yo.” (Mateo 20:26, 27) Pian nipatnag nen Jesus ed saray babangatan to so suston awawey a nepeg dan bayuboan, inurasan toy salisali ra, a ginawa to so kimey na sankaabebaan ya aripen. (Juan 13:1-15) Agaylan mapaabeban serbisyo! Kanian, saray Kristianon ministro so mapaabeban manlingkor ed si Jehova a Dios tan ed si  Jesu-Kristo. (2 Corinto 6:4; 11:23) Ipatnag da so kaabebaan na nonot diad panlingkor ed balang sakey. Tan sano ipulong da so maong a balita, mabulbulos dan lingkoran iray agmananisian kaparan totoo.​—Roma 1:14, 15; Efeso 3:1-7.

Mansungdo ed Ministeryo

21. Panon ya atumangan si Pablo ed impansungdo to ed ministeryo?

²¹ Parad si Pablo, say pagmaliw a ministro et mankaukolan na panagsungdo. Inkuanto’d saray taga-Colosas a pirmi so impansungdo to pian nipulong toy maong a balita ed sikara. (Colosas 1:24, 25) Anggaman ontan, dakel so angawat na maong a balita tan nagmaliw a ministros lapud impansungdo to. Sikara so nailalak bilang ananak na Dios tan agagi nen Jesu-Kristo, diad ilalon magmaliw ya espiritun pinalsa a kaiba to’d tawen. Agaylan maglorian tumang lapud panagsungdo!

22, 23. (a) Akin a nakaukolan a mansungdo iray Kristianon ministro natan? (b) Anton alay abig a bunga so nagamoran diad pansungdo na sakey a Kristiano?

²² Nakaukolan so panagsungdo ed biang na saramay peteg a ministros na Dios. Dakel so inagew-agew a mipupuligesgesan ed sakit odino ot-ot na itatakken. Mansasagpot iray atateng​—a dakel ed sikara et naandiay kapareha​—pian napabaleg day ananak da. Makpel a reresistian na ananak so mauges iran impluensia a walad kaliberliber da. Aarapen na dakel a Kristiano so pirmin pibabarangkaan ed kairapay-bilay. Tan dakel so manasagmak na panamasegsegang odino nidudunget ed irap lapud “maatap a panaon a mairap a pidenengan”! (2 Timoteo 3:1, NW) On, nibaga met na ngalngali anemiran milyon a ministro nen Jehova natan so imbaga nen apostol Pablo: “Dia ed balang bengatla imamatalek mi inkasikamin dili, a singa ministros na Dios, dia ed dakel ya anos.” (2 Corinto 6:4) Ag-onsusuko iray Kristianon ministro. Sikara so peteg a nakomendaan ed pansusungdo ra.

²³ Niarum ni, a singa ed kipapasen nen Pablo, say panagsungdo so mangitarok na alay abig a resulta. Diad pansungdo et napansiansia tayo so maapit a siglaotan tayo ed si Jehova tan napaliket tayoy puso to. (Uliran 27:11) Ombiskeg so mismon pananisia tayo tan makapanggawa itayoy babangatan, a napibilang met ed Kristianon impanaagi. (1 Timoteo 4:16) Tutulongan nen Jehova iray ministro to tan bebendisionan to so ministeryo ra legan na sarayan kaunoran ya agew. Bilang resulta, atipon lay nakdaan na 144,000, tan say minilyon ni so matalek a maniilalo ed panggayaga ra’d andi-anggaan a bilay diad paraison dalin. (Lucas 23:43; Apocalipsis 14:1) Petepeteg, say Kristianon ministeryo et sakey a balikas na panangasi nen Jehova. (2 Corinto 4:1) Komon ta satan so pabpablien tayon amin tan misalsalamat itayo lapud say bunga na satan so mansiansia ed ando lan ando.​—1 Juan 2:17.

[Saray paimano ed leksab]

Kasin Nipaliwawa Yo?

• Anton responsabilidad so akibiangan na saray inmunan-siglon Kristiano?

• Kapigan tan siopa so man-ordina ed sakey a Kristianon ministro?

• Anton awawey so nepeg a bayuboan na sakey a Kristianon ministro?

• Akin a nepeg a mansungdo so sakey a Kristianon ministro diad saray kairapan?

[Tepetepet Parad Panagaral]

[Saray litrato ed pahina 16, 17]

Nibangat ed si Timoteo so Salitay Dios manlapu la’d inkaugaw to. Sikato so naordinaan a ministro sanen sikatoy abautismoan

[Litrato ed pahina 18]

Isisimbolo na bautismo so dedikasyon ed Dios tan pakabidbiran lay inka-ordina na sakey bilang ministro

[Litrato ed pahina 20]

Saray Kristianon ministro so mabulos a manlingkor