Kasin Aaroen Yon Maong Iray Panonot nen Jehova?
Kasin Aaroen Yon Maong Iray Panonot nen Jehova?
“Say kamarerwak inunor to so saray panamintuan mo: tan aroen kora a mapalalo.”—SALMO 119:167.
1. Iner so nagkalalo lan pakaromogan tayo na aminpigan impanukoy ed saray panonot nen Jehova?
LABAY nen Jehova a manliket iray totoo to. Siempre, nepeg itayon mankurang ed ganggan na Dios tan unoren iray pananontonan to pian napanggayagaan tayo so tuan liket. Lapud satan, inter toray panonot to’d sikatayo. Aminpiga irayan asalambit ed Kasulatan, nagkalalo la diad Salmo 119, a nayarin tinugyop nen malangwer nin Prinsipe Ezekias na Juda. Onggapo iyan alay dakep a kanta ed oniaran salita: “Mapalar so saray ayadyari ed dalan da, sikara a manaakar ira ed loob na ganggan nen Jehova. Mapalar so saray mangunor na panamintuan [“panonot,” NW] to ra, tan saray mananap ed sikato a tinekepan na simoon a puso.”—Salmo 119:1, 2.
2. Panon a misiglaotan ed liket iray panonot nen Jehova?
2 ‘Manakar itayo ed ganggan nen Jehova’ diad panamegley na pangalay suston pikakabat ed Salita to tan diad pangiyaplika’d satan ed kabibilay tayo. Balet lapud agtayo ayadyari, nakaukolan tayo iray panonot. Say Hebreon salita a nipatalos a “panonot” so mangipatnag ya ipapanonot na Dios so ley ed sikatayo, saray pananontonan, reglamento, ganggan, tan totontonen to. (Mateo 10:18-20) Mansiansia itayon maliket no mantultuloy tayon unoren iratan a panonot, lapud ta ontulong iratan ed sikatayo a makapaliis ed espiritual iran pakakulasbongan a manresulta ed desyang tan ermen.
Mansiansia ed Saray Panonot nen Jehova
3. Unong ed Salmo 119:60, 61, anton kompiyansa so niwala’d sikatayo?
3 Pinabpabli na salmista iray panonot na Dios, kanian oniay inkanta to: “Nangganat ak, tan agak nantantan, a mangunor ed saray ganggan mo. Saray lubilubir na saray mabagelbagel binalorbalor da ak; bangbalet agko nilingwanan so ganggan mo.” (Salmo 119:60, 61) Ontulong ed sikatayo iray panonot nen Jehova pian nasungdoan so panamasegsegang lapud matalek itayo ya amperen na mangatatawen ya Ama tayo so pamepeget ed sikatayo na kakabusol. Diad dugan panaon, ibulos to itayo ed ontan iran babeng ta pian nagawaan tayo so panangipulong ed Panarian.—Marcos 13:10.
4. Panon tayon onkiwas ed saray panonot na Dios?
4 No maminsan, ipetek itayo na saray panonot nen Jehova. Komon ta lawas tayon pablien so ontan a panametek, a singa ed ginawa met na salmista. Sikato so masimoon ya angikuan ed Dios: “Saray panamintuan [“panonot,” NW] mo sikara so kalikliket ko . . . aroen ko so panamintuan mo.” (Salmo 119:24, 119) Mas dakel ni so panonot na Dios ed sikatayo nen say salmista. Ipanonot ed sikatayo na nilasus ya inaon ed Hebreon Kasulatan a naromog ed Griegon Kasulatan iray bilin nen Jehova ed totoo to a walad silong na Ganggan ontan met ed saray gagala to nipaakar ed Kristianon kongregasyon. No naimano na Dios a matukoy so pangipanonot ed sikatayo nipaakar ed saray bengatlan misiglaotan ed saray ganggan to, malikeliket itayon paiwanwan. Tan diad ‘ipeket ed saray panonot nen Jehova,’ napaliisan tayo iray makasalanan a pakasagyatan a mamaermen ed Manamalsa tayo tan ed pakaandiay liket tayo.—Salmo 119:31.
5. Panon tayon naaro a maong iray panonot nen Jehova?
5 Kaunongan so pangaro tayo ed saray panonot nen Jehova? “Say kamarerwak inunor to so saray panamintuan mo: tan aroen kora a mapalalo,” so inkanta na salmista. (Salmo 119:167) Naaro tayon maong iray panonot nen Jehova no moriaen tan awaten tayo iratan bilang simbawa na sakey ya Ama a petepeteg a mangiyaansakit ed sikatayo. (1 Pedro 5:6, 7) Nakaukolan tayo iray panonot to, tan ombulaslas so panangaro tayo’d saratan no naiimano tayo so pakagunggunaan ed saratan.
No Akin a Nakaukolan Tayo Iray Panonot na Dios
6. Anto so sakey a rason no akin a nakaukolan tayo iray panonot nen Jehova, tan anto so ontulong ed sikatayo pian nanonotan tayo iratan?
6 Say sakey a rason no akin a nakaukolan tayo iray panonot nen Jehova et lapud mililingwan itayo. Inkuan na The World Book Encyclopedia: “Diad inkalapagan, ondarakel ya impormasyon so nalilingwanan la na totoo diad ilalabas na panaon. . . . Nayarin asalim la ya agmo nanonotan so sakey a ngaran odino sakey ya impormasyon a wala la’d nguro na dilam. . . . Say ontan ya agpakanonot, a mabetbet a nagawa, so tatawagen a retrieval failure. Inkompara itan na saray sientista ed panasalin pananap na abalang a bengatla diad loob na abuybuyandak a kuarto. . . . Say maong a paraan pian seguradon nanonotan so sakey ya impormasyon et aralen ni itan sakbay mo lan nalingwanan.” Say maseet a panagaral tan pangulit-ulit so ontulong ed sikatayo pian natandaan iray panonot na Dios tan ontumbok ed satan parad pankaabigan tayo.
7. Akin a mas nakaukolan natan iray panonot na Dios?
7 Mas nakaukolan tayo natan iray panonot nen Jehova lapud malaklaknab lan amantok so karelmengan diad awaran na too. No manimano itayo ed saray panonot na Dios, nagamoran tayo so aralem a pakatalos a nakaukolan pian napaliisan so pakasagyat ed marelmeng iran dalan na mundo. “Wala ed siak so dakdakel a pakatalos nen saray amin a managbangat ko,” so kuan na salmista, “ta saray panamintuan mo sikara so dalepdep ko. Makatalos ak na dakdakel nen saray totoo a daan, nisengeg ed unoren ko so bilibilin mo. Pinugeran ko so salisalik ya onarawi ak ed saray mauges a dalan, pian naunor ko so salitam.” (Salmo 119:99-101) No unoren tayo iray panonot na Dios, niyagel itayo ed “saray mauges a dalan” tan ag-itayo magmaliw a singa ed saray karaklan a totoo, ya “abilungetan so kalakal da, a niarawi ra ed bilay na Dios.”—Efeso 4:17-19.
8. Panon itayon magmaong a nakinlongan pian natalonaan tayoray subok ed pananisia?
8 Nakaukolan met iray panonot na Dios lapud ta mamabiskeg iratan ed sikatayo a mansungdo ed dakel iran subok ed sikatayo diad sayan “panaon na anggaan.” (Daniel 12:4, NW) No anggapo iratan a panonot et magmaliw itayon ‘mililingwan a dumerengel.’ (Santiago 1:25) Balet say maseet a panagaral ed Kasulatan diad personal a paraan tan diad kongregasyon tekep na saray publikasyon a manlalapud “matoor tan makabat ya aripen” so ontulong ed sikatayo pian natalonaan iray subok ed pananisia. (Mateo 24:45-47) Saratan ya espiritual a probisyon so ontulong ed sikatayo pian natebek so nepeg tayon gawaen a mamaliket ed si Jehova sano nidudunget itayo ed makapasubok iran kipapasen.
Say Makanan Betang na Saray Miting Tayo
9. Sioparay ‘langkap a totoo,’ tan panon iratan a makatulong ed saray kapananisiaan?
9 Diad sakey a paraan et nagamoran tayo diad saray Kristianon miting iray nakaukolan tayon panonot na Dios, a ditan nitatarya so bilin panamegley na saray aturon agagi. Insulat nen apostol Pablo a sanen si Jesus so ‘sinmegep ed tagey, inawit to a dinakep so inkadakep, tan angiter na langkap a totoo.’ Inyarum ni nen Pablo: “Saray arum inyan [ira nen Jesus] ya apostoles; tan saray arum, propetas; tan saray arum, manangipulong na maabig a pakabat; tan saray arum, pastor tan manangibangat, ya onkana a pakayadyarian na saray sasantos, a nipaakar ed gawa na panaglingkor, angga ed kipaalagey na laman nen Kristo.” (Efeso 4:8, 11, 12) Agaylay pisasalamat tayo ta ipapaimano ed sikatayo na sarayan ‘langkap a totoo’—saray aturon mamatatken—iray panonot nen Jehova sano mantitipon itayon mandayew!
10. Anto so manunan punto na Hebreos 10:24, 25?
10 Lapud pisasalamat ed saray probisyon na Dios, napakiwas itayon magmaliw a presenti ed limaran miting ed kongregasyon kada simba. Indanet nen Pablo a nakaukolan so maparanay a pantitipon. Insulat to: “Manpapagalangan itayo ed sakey tan sakey pian manaayatan itayo ed aro tan dia ed saray maabig a gawa; ya agtayo paulyan so saray panmumuyong tayo, singa ugali na saray arum, noag ingen mansisimbawaan itayo; tan nagkalalo la, lapud nanengneng yo a manasingger so agew.”—Hebreos 10:24, 25.
11. Panon itayon nagunggunaan ed sinimban miting tayo?
11 Kasin papablien yo iray nagungguna tayo ed saray miting tayo? Say sinimban Panagaral na Panag-Bantayan so mamabiskeg ed pananisia tayo, ontulong ed sikatayon ontulok ed saray panonot nen Jehova, tan mamaputel ed sikatayo sumpa ed “espiritu na mundo.” (1 Corinto 2:12; Gawa 15:31) Diad Publikon Paliwawa, ipaparungtal na saray espiker so bilin a manlalapud Salitay Dios, kalaktip laray panonot nen Jehova tan say alay abig iran ‘salita nen Jesus a maando a bilay.’ (Juan 6:68; 7:46; Mateo 5:1–7:29) Nipapasal so dunong tayo ed panagbangat diad Teokratikon Eskuelaan Parad Panagministro. Say Service Meeting so makanakanan tulong ed sikatayo pian napaaligwas tayoy pangipresenta tayo ed maong a balita diad kabkaabungan, diad panagpawil, diad panangiyaral na Biblia, tan diad arum niran aspekto na ministeryo tayo. Say memelag a grupo diad Panagaral na Libro ed Kongregasyon so mangiter ed sikatayo na malalaknab a pankanawnawa pian nibalikas iray bengatlan mabetbet a manasaglawi ed saray panonot na Dios.
12, 13. Panon ya impatnag na totoo na Dios ed sakey a bansa ed Asia so apresasyon da ed saray Kristianon miting?
12 Say maparanay a kiwala tayo ed saray miting ed kongregasyon so mangipanonot ed sikatayo nipaakar ed saray ganggan na Dios tan ontulong ed sikatayo a mansiansian mabiskeg ed espiritual anggaman ed pambabakal, kairapan ed bilay, tan arum niran subok ed pananisia tayo. Say kaimportantian na saray miting so pirmin alikna na 70 a Kristiano ed sakey a bansa ed Asia a pinatakyas ed kaabungan da tan apaskar a manayam ed utel na katakelan. Lapud determinado ira a mantitipon a maparanay, pinmawil ira ed baley da a tinatek lay bakal, binagbag daray akeraan nin kabiangan na Kingdom Hall, tan impaalagey da lamet ed takel.
13 Kayari na impansungdo ra ed dakel a taon na pambabakal diad sananey nin parti na satan a bansa, siansia nin maseseg a manlilingkor iray totoo nen Jehova. Atepetan so sakey ed saray mamatatken ed satan a lugar: “Anto so akatulong na baleg pian mansiansian mankakaiba iray agagi?” Say ebat to? “Diad loob na 19 a taon, anggapon balot so aliwatan min miting. No maminsan et agmakakar iray agagi ed pantitiponan lapud panagbomba odino arum niran kairapan, balet agka min balot angansela na anggan sakey a miting.” Seguradon papablien na sarayan pinablin agagi so kaimportantian na ‘agpamaulyan ed pantitipon da.’
14. Anto so naaralan tayo ed niyugali nen akulaw lan Ana?
14 Say 84-años a balo ya Ana so “agbalot nasasaew ed templo.” Bilang resulta, sikatoy wadman sanen nitarok so kapkapangiyanak nin Jesus. (Lucas 2:36-38, NW) Kasin determinado kayon ag-onsaew ed saray miting? Kasin gagawaen yoy anggaay nayarian yo pian presenti kayo ed kada sesyon na saray asamblea tan kombension tayo? Saray bilin a makagungguna ed espiritual a naaawat tayo ed sarayan pandaragup so mangiter ed sikatayo na malinew ya ebidensia a tatalimaen na mangatatawen ya Ama tayo so totoo to. (Isaias 40:11) Say ontan iran pankanawnawa so pakagamoran na gayaga, tan say kiwawala tayo so mangipatnag na apresasyon tayo ed saray panonot nen Jehova.—Nehemias 8:5-8, 12.
Nibiig Lapud Saray Panonot nen Jehova
15, 16. Panon a naapektaan so kondukta tayo no unoren tayo iray panonot nen Jehova?
15 Say pangunor ed saray panonot na Dios so ontulong ed sikatayo pian nibiig itayo manlapud sayan marelmeng a mundo. Singa bilang, say itulok ed saray panonot na Dios so mangamper ed sikatayo ed pangagamil na seksual ya imoralidad. (Deuteronomio 5:18; Uliran 6:29-35; Hebreos 13:4) Say pakatukso a mantila, pagmaliw ya agmatua, odino say pantakew so matalonan nadaeg diad pangunor ed saray panonot na Dios. (Exodo 20:15, 16; Levitico 19:11; Uliran 30:7-9; Efeso 4:25, 28; Hebreos 13:18) Say pangunor ed saray panonot nen Jehova so mangamper ed sikatayo manlapud pangibales, panem-em, odino pamauges ed arum.—Levitico 19:16, 18; Salmo 15:1, 3.
16 Diad panulok ed saray panonot na Dios, mansiansia itayon apasantos, odino nibiig, parad panaglingkor ed sikato. Tan agaylan importanti so pagmaliw a biig ed mundo! Sanen nampikasi si Jesus ed si Jehova diad unor lan labi na bilay to diad dalin, oniay inkerew to nisesengeg ed saray patumbok to: “Inter ko ed sikara so salitam; et say mundo ginula tora, lapud ag-ira taga mundo, salanti unong ya agak taga mundo. Agko pikasi ya ekalen mora ed mundo, noag ingen ilaban mo ra ed mauges. Ag-ira taga mundo, salanti unong ya ag ak taga mundo. Pasantos mo ra ed katuaan; say salitam sikato so katuaan.” (Juan 17:14-17) Komon ta mantultuloy tayon pablien so Salitay Dios, a mangibiig ed sikatayo parad sagradon panaglingkor ed sikato.
17. Anto so nagawa sano ibaliwala tayoray panonot nen Jehova, kanian anto so nepeg tayon gawaen?
17 Bilang lingkor nen Jehova, labay tayon mansiansian naabobonan so panaglingkor tayo ed sikato. Balet no ibaliwala tayoray panonot na Dios, nadaeg itayo na espirituy mundo, a niyaalibansan maong ed saray panagsalita, babasaen, panligliwaan, tan kondukta a kasmak ed satan. Tan maseguron agtayo labay so magmaliw a maaro’d kuarta, mapasirayew, mapangta, anggapoy pisasalamat, agmatoor, mapasang, anawet-tenten, napnoy kinon, maaro’d likeliket nen say maaro’d Dios—diad panalambit lambengat ed pigara’d saray ugalin ipapatnag na saramay inmarawi ed Dios. (2 Timoteo 3:1-5) Lapud manbibilay itayo la ed pansamposampot na kaunoran iran agew na sayan marelmeng a sistema na bengabengatla, mantultuloy tayo komon ya ipikasi so tulong na Dios ta pian makapantultuloy tayon mangunor ed saray panonot nen Jehova tan sirin et ‘makapanimano itayo unong ed salita to.’—Salmo 119:9.
18. Say pangunor ed saray panonot na Dios so mamakiwas ed sikatayo a manggawa na antoran positibon kundang?
18 Saray panonot nen Jehova so aglambengat mamasakbay ed sikatayo no antoray bengatlan agtayo nepeg a gawaen. Say pangunor ed saray panonot to so mamakiwas ed sikatayon positibo, a dagdagen to itayon masimoon a manmatalek ed si Jehova tan sikatoy aroen tayo diad intiron puso, kamarerwa, kanonotan, tan biskeg tayo. (Deuteronomio 6:5; Salmo 4:5; Uliran 3:5, 6; Mateo 22:37; Marcos 12:30) Pakiwasen itayo met na saray panonot na Dios pian aroen iray kaparan totoo. (Levitico 19:18; Mateo 22:39) Nagkalalo lan nipanengneng tayo so aro ed Dios tan ed kaparan totoo no gawaen tayo so linawa na Dios tan inabang tayo ed arum so manangiter-bilay a “pikakabat ed Dios.”— Uliran 2:1-5.
Say Pangunor ed Saray Panonot nen Jehova so Mankabaliksay Bilay!
19. Panon tayon nipanengneng ed arum a praktikal tan makagungguna so itulok ed saray panonot nen Jehova?
19 No unoren tayo iray panonot nen Jehova tan tulongan tayo so arum a manggawa’d satan, nilaban tayoy inkasikatayo tan saramay ondengel ed sikatayo. (1 Timoteo 4:16) Panon tayon nipanengneng ed arum a say italineng ed saray panonot nen Jehova so petepeteg a praktikal tan makagungguna? Diad pangiyaplika ed saray prinsipyo na Biblia ed mismon kabibilay tayo. Napaneknekan na saramay “tinandaan ed bilay ya andi-anggaan” a say kurso a nidatak ed Salitay Dios so petepeteg a sankaabigan a gegemtanen. (Gawa 13:48) Napaneknekan da met a ‘say Dios et walad sikatayo’ tan napakiwas iran miulop ed sikatayo diad pandayew ed Soberanon Katawan a Jehova.—1 Corinto 14:24, 25.
20, 21. Saray panonot na Dios tan say espiritu to so ontulong ed sikatayo a manggawa na anto?
20 Diad pantultuloy a panaral ed Kasulatan, pangiyaplika ed nanaaralan tayo, tan sigpot a panganamot ed saray espiritual a probisyon nen Jehova, lalon naaro tayo iray panonot to. No talinengen irayan panonot, ontulong iratan ed sikatayo a mangisulong na “balon personalidad ya apalsa unong ed linawa na Dios diad inkatunong tan katooran.” (Efeso 4:20-24, NW) Saray panonot nen Jehova tan say masanton espiritu to so ontulong ed sikatayo pian nipatnag tayo so aro, gayaga, deen, panagtepel, kamaongan, kaabigan, pananisia, kaumildian, dangka—kualidades a midumaan a tuloy ed saray walna na mundo a mandukdukol ed pakayari nen Satanas! (Galacia 5:22, 23; 1 Juan 5:19) Kanian, naliliketan itayo sano napanonotan itayo ed saray kakaukolanen nen Jehova diad personal a panagaral tayoy Biblia, panamegley na saray mamatatken, tan diad saray miting, asamblea, tan kombension tayo.
21 Lapud uunoren tayoray panonot nen Jehova, makapanliket itayo anggan maniirap itayo nisesengeg ed inkatunong. (Lucas 6:22, 23) Manilalo tayo ed Dios a mangiyagel ed sikatayo manlapud saray mapeligron tuloy a situasyon. Saya so nagkalalo lan importanti natan lapud amin a nasyon so natitipon parad “bakal na baleg ya agew na Dios, a Makapanyarin-amin” diad Armagedon—Apocalipsis 16:14-16.
22. Anto so nepeg a determinasyon tayo nipaakar ed saray panonot nen Jehova?
22 Ta pian nagamoran tayo so agkanepegan a langkap ya andi-anggaan a bilay, nepeg tayon aroen a mapalalo iray panonot nen Jehova tan sigpot-puson unoren iratan. Komon ta niwala’d sikatayo sirin so awawey na salmista ya angikanta na: “Saray panamintuan mo matunong iran andi-anggaan: ikdan moak na pakatalos, et nabilay ak.” (Salmo 119:144) Tan komon ta ipanengneng tayo so determinasyon tayo ya apatnagan ed saray salita na salmista: “Tinmawag ak ed sika [Jehova]; ilaban moak, et unoren ko so saray panamintuan mo.” (Salmo 119:146) On, diad salita tan gawa, komon ta paneknekan tayo a petepeteg ya aaroen tayon maong iray panonot nen Jehova.
Panon Yon Ebatan?
• Panoy impanmoria na salmista ed saray panonot nen Jehova?
• Akin a nakaukolan tayo iray panonot na Dios?
• Anto so betang na saray miting tayo nipaakar ed saray panonot na Dios?
• Panon itayon ibiig na saray panonot na Dios manlapud sayan mundo?
[Tepetepet Parad Panagaral]
[Litrato ed pahina 15]
Inaron maong na salmista iray panonot nen Jehova
[Saray litrato ed pahina 16, 17]
Diad panumbok ed alimbawa nen Ana, kasin determinado kayo ya ag-onsaew ed saray miting?
[Litrato ed pahina 18]
No tuloken tayo iray panonot nen Jehova, nibiig itayo bilang malinis tan makapaliket parad serbisyo ed sikato