Say Biblia​—Libron Panaralan Parad Panagbilay

“SAY salita na Dios sikatoy mabilay tan mabiskeg, tan makdem nen say anggan dinan a kampilan a duaray tarem . . . tan masiglat a mangibiig ed saray nonot tan saray getma na puso.” (Hebreos 4:12) Sayan deskripsion ed nagawaan na Salitay Dios et seguradon mangibiig ed say Biblia bilang nagkalalo ni nen say basta maong labat a libro.

“Say mensahe na satan et importanti ed bilay tayo a singa say panaglinawa tayo,” so impanegek na sakey a managsulat nipaakar ed relihyon. Insan inyarum to: “Sano konsideraen na sakey so pampirawat tan pankaukolan tayo parad panamaabig natan tan basaen so Biblia tekep na satan a punto de bista, niwala iray makapakelaw a resulta.” Singa sakey a lamparaan a masmasnag, say Biblia so mangisisindag na liwawa ed dakel iran komplikadon pamaakaran tan problema ed bilay natan.​—Salmo 119:105.

On, say kakabatan a nibalikas ed Biblia so walaan na pakayarin manmoldi ed panagnonot tayo, ontulong ed sikatayo a manolbar ed saray problema, mamaaligwas ed kualidad na bilay tayo, tan mangiter ed sikatayo na saray dunong pian natalonaan iray situasyon ya agtayo nauman. Sankaimportantian ed amin, tutulongan itayo na Biblia a nakabatan tan naaro so Dios.

Libron Mangiiter na Gagala

Say Autor na Biblia, si Jehova a Dios et ‘kabat to iray amin a kagagawa tayo.’ Mas amta to iray pisikal, emosyonal, tan espiritual a pankaukolan tayo nen say sikatayon mismo. (Salmo 139:1-3) Sikatoy sinononot a mangidadatak na malinew iran limitasyon parad walna na too. (Miqueas 6:8) Makatunongan a natalosan iratan a limitasyon tan panangidirehi tan aralen so manbilay a mitunosan ed saratan. Maliket so too a “say gayaga to wala ed ganggan nen Jehova,” inkuan na salmista. “Antokaman a gawaen to ombuna.” (Salmo 1:1-3) Satan ya iilaloan et seguradon makanepegan na panangusisa tayo.

Si Mau­rice, a nanretiro lan maestro, so lawas manisia a say Biblia et walaan na kablian ed awaran tan panagaral. Ingen, panduaruwaan toy impangipuyan na Dios ed satan. Kayari ton dinengel so sakey ya eksplinasyon no akin ya inter na Dios so nisulat a Salita to ed totoo, inusisa nen Mau­rice so nanduruman propesiya ed Biblia. Sanen sikatoy malangwer ni, inaral toy kadaanan ya awaran, literatura, siensia, tan geograpiya. Aksobien ton sikatoy makabat a maong ed pakatalos ton dili pian bidbiren so dakel niran alimbawa a manuporta ed inkanapanmatalkan na Biblia.  “Akalotan ak ed ag-aliklikas a panangusil ed inkakomportabli, kayamanan, tan likeliket ed bilay. Makapaermen, nansiansia ak ya ag-apakabatan tan ignoranti ed karakpan tan inkamatua na sankatalonggaringan a libron nisulat ed kapiganman.”

Natan diad masulok to lan 70, si Mau­rice, diad panutukoy ed salaysay ed impayawar nen Jesus ed si apostol Tomas, onia so inkuanto tekep na pisasalamat: “Say limak so niwawanwan ed ‘mandalan sugat’ a sigpot ak lan kombinsido a say Biblia et katuaan.” (Juan 20:24-29) Singa ed suston inkuan la nen apostol Pablo, iwawalwal na Biblia iray getma na puso, tan mangiiter itan na kabaliksan ed bilay. Talagan sakey itan a libron panaralan parad panagbilay.

Mamabiskeg ed Maprobleman Bilay

Mangiiter met so Biblia na simbawa ya ontulong ed totoo pian sigpot dan niwaklit iray mauges ya ugali. Atalonaan nen Dan­iel so marutak ya ugalin panagsigarilyo, tan nitunda to met so iyaakar ed alablabas a panag-party tan panag-inum na alkohol. (Roma 13:13; 2 Corinto 7:1; Galacia 5:19-21) Diad realistikon paraan, pian sigpot a niwaklit so ontan iran ugali tan pian nisulong so “balon personalidad,” kaukolan so determinadon sagpot. (Efeso 4:22-24, NW) “Sakey itan ya angat,” inkuan nen Dan­iel, “lapud ag-itayo ayadyari.” Anggaman ontan, sikatoy tinmalona. Natan et inagew-agew lan manbabasa na Salitay Dios si Dan­iel, tan satan so mamapaapit ed sikato ed si Jehova.

Legay ibabaleg to, lawas ya aralem so respeto nen Dan­iel ed Biblia​—anggaman agto nin balot abasa itan​—tan sikatoy nilabilabin nampikasi ed Dios. Ingen, walay kulang. Sikatoy agmaliket. Asabi makatantandan impanguman sanen pilpilimeron anengneng toy ngaran na Dios ed Biblia. (Exodo 6:3; Salmo 83:18) Nanlapu la’d saman, inusar toy ngaran nen Jehova sano sikatoy manpikasi, tan saray pikakasi to so nagmaliw a personal a maong. “Si Jehova so nagmaliw a sankaapitan a persona ed siak, tan sikato ni sankaapitan a kaarok.”

Antis ton naaralan so nipaakar ed Biblia, say panmoria nen Dan­iel ed arapen et makapasinagem. “Mapatpatnag la so nagagawa ed mundo,” inkuanto. “Tinmakot ak, tan nanggunaetan koy mansiansian okupado pian agko nanonotan itan.” Insan naaralan ton mangiletneg so Dios na inkahustisya parad amin diad alinisan a dalin, a ditan et panggayagaan na matulok a totoo so magnayon a kareenan tan liket. (Salmo 37:10, 11; Daniel 2:44; Apocalipsis 21:3, 4) Natan et walaan la si Dan­iel na seguradon ilalo. Sayan manamabiskeg ya impluensia na Biblia so tinmulong ed sikaton napansiansia so positibon panmoria ed bilay.

Tulong diad Panalona ed Saray Problema ed Emosyon

Mantaon na pitora si George sanen naulila’d ina. Sikatoy napapagaan sano onugip la ed labi, ya agto amta no kasin makabangon ni ed ontumbok ya agew. Insan abasa to so inkuan nen Jesus nipaakar ed ipapatey tan kikioli: “Onsabi oras, ya amin so saray wala ed saray lubok narengel da so bosis [nen Jesus], et ompaway ira.” Sikato met so atenyeg ed saray salita nen Jesus: “Siak so kiolian, tan say bilay. Say manisia ed siak, anggan inatey la, nabilay ni.” (Juan 5:28, 29; 11:25) Saratan ya ideya so makatunongan, matukoy, tan makaligliwa. Inkuan nen George: “Sayan katuaan so aglabat onaapelo ed kanonotan noagta manenyeg met ed puso.”

Si Dan­iel, ya asalambit ed akadkauna, so walaan met na saray katatakotan. Sikatoy agnayarian nen ina to a pabalegen, kanian sikatoy impanayam ed nanduruman foster home. Liknaen ton naynay a sikatoy agkabiangan na sankaabungan tan pirawrawat toy kaligenan na pagmaliw a kabiangan na sakey a maaron pamilya. Diad kaunoran, aromog toy aanapen to diad impanaral toy Biblia. Akapilimog si Dan­iel ed Kristianon  kongregasyon na saray Tastasi nen Jehova tan nagmaliw a kabiangan na espiritual a pamilya, a ditan to aliknan naaabrasa tan aaroen na arum. On, say Biblia so makagungguna diad praktikal tan makapenek ed emosyonal a paraan.

Tandaan, sankanengneng nen Jehova so walad puso tayo tan amta to so pirawat tayo. Say Dios et “simbangen to so saray puso,” tan sikatoy mangiiter “ed balang too na unong ed saray dalan to.”​—Uliran 21:2; Jeremias 17:10.

Praktikal a Simbawa ed Bilay na Pamilya

Mangiiter so Biblia na praktikal a simbawa no nipaakar ed saray siglaotan ed too. Onia so inkuan nen George: “Say makapadetdet a maong iran kipapasen ed bilay et saray gotgotan ed personalidad odino agpantatalosan.” Panon ton tatalonaan iratan? “No liknaen kon walay barong na sakey a too ed siak, iyaplikak so diretsaan a simbawa na Mateo 5:23, 24: ‘Mikarenan ka ed agim.’ Say simplin bengatla a nitongtong ko so walan problema et mamawala na maabig iran resulta. Naliknak so kareenan na Dios a sasaglawien na Biblia. Epektibo tan praktikal a tuloy itan.”​—Filipos 4:6, 7.

Sano walay agpanpaknaan na san­asawa, kaukolan dan dua so ‘magmaliw a masiglat ya ondengel, mapalna ed pansalita, mairap a manpasnok.’ (Santiago 1:19) Satan a simbawa so mamaaligwas ed komunikasyon. Inyarum ni nen George: “No iyaplikak so simbawan aroen tan tratoen koy asawak a singa siak a dili, niwalan tampol iray resulta. Lalon mainomay to ak a respetoen.” (Efeso 5:28-33) On, ibabangat ed sikatayo na Biblia no panon ya aksobien tan talonaan iray dili tayon ag-inkayadyari tan no panon tayo met a natalonaan iray ag-inkayadyari na arum.

Magnayon a Simbawa

Inkuan nen Arin Solomon: “Manmatale’ka ed Jehova ed simoon a pusom, tan agka onsaral ed tapew na dili a pakatalos mo: Dia ed saray amin a dalan mo sikato so bidbiren mo, et sikato itonton to so saray basbas mo.” (Uliran 3:5, 6) Agaylan simpli, balet ta aralem, iratan a salita!

Say Biblia so biskeg parad pankaabigan. Ontulong itan ed saray manangaro ed Dios pian itunos day bilay da ed linawa to tan pian naromog so liket diad ‘panakar ed ganggan nen Jehova.’ (Salmo 119:1) Antokaman iray sirkumstansia tayo, lugan na Biblia so panangiwanwan tan simbawa a nakaukolan tayo. (Isaias 48:17, 18) Basaen itan ya inagew-agew, dalepdepen so nabasa yo, tan iyaplika itan. Pansiansiaen na satan a malinew so kanonotan yo tan akasentro ed saray bengatla a malinis tan makagungguna. (Filipos 4:8, 9) Agyo labat naaralan no panon so pambilay tan panggayaga ed bilay noagta no panon met ya aroen so Manamalsa na bilay.

Diad panumbok ed satan a kurang, say Biblia so magmaliw ed sika a nagkalalo ni nen say basta labat maong a libro a singa met ed saray minilyon ya arum ni. Talagan napaneknekan mon sakey a libron panaralan parad panagbilay!

[Litrato ed pahina 6]

Napabiskeg na Biblia so determinasyon mo pian natalonaan iray makaderal ya ugali

[Litrato ed pahina 7]

Ibabangat ed sika na Biblia no panon kan napaapit ed Dios