Tataryaan nen Jehova Iray Totoo To na Panagpainawaan
Report na Saray Manangiyabawag na Panarian
Tataryaan nen Jehova Iray Totoo To na Panagpainawaan
SAY sakey a sirum a panagpainawaan diad sakey a basbas ed palandey et makapalikliket a nabantag parad sakey a naksawan lan managbaroy. Diad Nepal, saratan a panagpainawaan et tatawagen a chautara. Say kaslakan a chautara so walad asingger na masalumpapak a kiew a “banyan,” sakey a masirum a pasen a napampainawaan. Say inkitarya na chautara et sakey a gawa na panangasi, tan maslak ya angipaalagey ed satan so agkabkabat.
Saray eksperiensia ed Nepal so mangipanengneng no panon a si Jehova a Dios et Lapuan na gayaga tan espiritual a pakainawaan ed dakel a naksawan la “iran managbaroy” diad sayan sistema na bengabengatla.—Salmo 23:2.
• Si Lil Kumari so manaayam diad marakdakep a syudad na Pokhara, a walaan na balibalin babantagen a nasasakbongay niebe iran Palandey na Himalaya. Balet lapud mapaga ed panlegpet to’d pamilya to, liknaen nen Lil Kumari ya anggapoy tanton nailaloan to diman. Sanen sakey ed saray Tastasi nen Jehova so binmisita ed sikato, sikatoy apakiwas lapud masnag ya ilalo ed Biblia tan tampol a sikatoy impaiyaralan na Biblia.
Anggaman panliketan nen Lil Kumari so panagaral, aliwan mainomay so pangitultuloy ed satan lapud pirmin isusumpa na pamilya to. Balet ta agsinmuko. Regular ya inmatendi ed saray Kristianon miting tan inyaplika toy nanaaralan to, nagkalalo la ed pamaakaran na panagpasakop na asawan bii. Bilang resulta, say masiken to tan ina to so akamorian say panaaral nen Lil Kumari na Biblia et pakakagunggunaan na intiron pamilya.
Say masiken to tan pigaran kakanayon to so manaaral met la natan na Salitay Dios. Diad agano nin asamblea ya agawa diad Pokhara, nanggayagaan nen Lil Kumari so programa kaibay 15 a kakanayon to. Inkuan nen Lil: “Say abung mi so nagmaliw a panagpainawaan lapud say pamilya mi natan so nankakasakey ed tuan panagdayew, tan aromog ko lay tuan kareenan na nonot.”
• Anggaman isesebel so inkaapag-apag na caste diad Nepal, siansian mabiskeg a mangiimpluensia itan ed kabibilay na totoo. Kanian, dakel so interesado ed ibabaga na Biblia nipaakar ed inkaparpareho tan agpanangidumaduma. Diad impakaamta a say “Dios anggapo so pangiduma to” et anguman a maong so kabibilay nen Surya Maya tan say pamilya to.—Gawa 10:34.
Si Surya Maya so agonigon a maong lapud ag-inkahustisya na inkaapag-apag na caste tan ed detdet na nigalet a maong iran tradisyon tan kustombre. Bilang debosyonada, dakel a taon a kinmerew na tulong si Surya Maya ed saray talintaon dirios to. Balet ta agnaebatan iray dasal to. Sakey ya agew sanen sikatoy onkekerew na tulong, say apo ton bii a mantaon na anemira a si Babita so inmasingger ed sikato tan intepet to: “Akin ya onkekerew kayo’y tulong ed saray talintao ya anggapon balot so nagawaan da?”
Nalmoan a say ina nen Babita et iyaaralan na Biblia na sakey ed Tastasi nen Jehova. Maligsan inimbitaan nen Babita so bai to ed sakey a Kristianon miting. Sanen inmatendi si Surya Maya, sikatoy nikelawan ed impakanengneng to’d totoon nandurumay kipapasen da ed panagbilay a magaygayagan manuulop ya anggapoy panangibiig. Tampol a sikatoy impaiyaralan na Biblia. Anggaman nanresulta iya ed impangipulisay la ed sikato na saray kakaabay to, sikatoy ag-adismaya; nisay sikatoy asebelan ed espiritual ya iyaaligwas to lapud limitadon abilidad to ed panagbasa tan panagsulat.
Diad apalabas a waloy taon, anemiran membro na pamilya to, kaibay masiken to tan taloran ananak da, so nagmaliw a Tastasi nen Jehova. Si Surya Maya so sakey natan a sigpot-panaon a ministro, sakey a regular payunir, a magaygayagan ontutulong ed arum a mangiyepas ed saray ambelat ya awit da diad peteg a panagpainawaan a si Jehova labat so makapangitarya.