Akin a Manseserbi Ka ed Dios?

Oniay aminsan ya insimbawa na matakot ed Dios ya ari ed anak to: “Amtaen mo so Dios na amam, tan manlingkor ka ed sikato ed ayadyari a puso tan ed maunor a kanonotan.” (1 Awaran 28:9) Malinew, labay nen Jehova a saray lingkor to so manlingkor ed sikato tekep na kapusoan a walaay otang a linawa tan apresasyon.

BILANG Tastasi nen Jehova, talagan aksobien tayo a nen pilpilimeron nipaliwawa ed sikatayo iray sipan na Biblia, saray kapusoan tayo so napno na pisalsalamat. Agew-agew a walay balon nanaaralan tayo nipaakar ed saray gagala na Dios. Diad lalon pikakabat tayo ed si Jehova et lalon sikatoy pampipilalekan tayon panlingkoran “[tekep na] ayadyari a puso tan ed maunor a kanonotan.”

Dakel a nagmaliw a Tastasi nen Jehova so tuloytuloy a manlilingkor ed si Jehova tekep na agnasabsabaan a gayaga legay bilay da. Anggaman kuan, walaray pigaran Kristiano a marakep so inggapo ra, balet asabi panaon et alingwanan da laray manamakiwas a rason a manadagdag ed sikatayon manlingkor ed Dios. Kasin nagagawa la itan ed sika? No ontan, agka naandian na ilalo. Say naandin gayaga so napapawil. Panon?

Morekdeken Iray Bendision Mo

Unona, dalepdepen iray panamendision a naaawat mo ed Dios ya inagew-agew. Isipen iray maong a regalo nen Jehova: saray dakerakel a palsa to​—a parad amin, antokaman so kipapasen da ed sosyedad odino ed panagbilay​—saray sipor laran probisyon ton tagano tan iinumen, say bunigas a panggagayagaan mo, say pikakabat mo ed katuaay Biblia, tan manuna’d amin, say impangiter to’d Anak to. Say impatey na Anak to so angiparaan ed dalan pian makapanlingkor ka ed Dios a walaan na malinis a konsiensia. (Juan 3:16; Santiago 1:17) No lalon dadalepdepen mo so kamaongan na Dios, lalon ombulaslas so panamablim ed sikato. Diad ontan et say pusom so mamakiwas ed sikan manlingkor ed sikato lapud amin a gagawaen to parad sika. Agpanduaruwaan a naliknam met la so singa ed insulat na salmista: “Amayamay ira, O Jehova a Dios ko, so saray makapakelaw a gawam a ginawam, tan say nonot mo nipaakar ira ed sikami: ag-ira nisalaysay a mauksoy ed sika . . . dakel ni ra nen saray nayari a bilangen.”​—Salmo 40:5.

Sarayan salita so insulat nen David, sakey a lakin awalaan met na saray problema ed bilay. Bilang kalangweran, baleg a panaon so inusar nen David a nanamot-amot lapud sikatoy inanap na marelmeng ya Arin Saul tan saray bataan to pian sikatoy pateyen. (1 Samuel 23:7, 8, 19-23) Si David so awalaan met ed saman na saray kakapuyan a kaukolan ton labanan. Binidbir to iya diad koma-40 a Salmo: “Saray agnabilang a mamauges linimpog da ak; saray kasulitan ko asagmak da ak kanian ontan ya agko nayarian so ontangwa; dakel ira nen saray buek na ulok kanian say pusok onkapuy ed siak.” (Salmo 40:12) On, agulo so bilay nen David, balet ta sikatoy agsigpot a tinalonaan na saratan. Inisip toray dalan na panamendision ed sikato nen Jehova, anggaman wadtan iray problema, et amoria ton atalonaan na saraman a bendision iray ir-irap to.

Sano natatalonaan ka na saray personal a problema odino liknaen mon onkakapuy ka, marakep no nodnonoten moray panamendision ed sika, a singa ed ginawa nen David. Agpanduaruwaan, say pangapresia ed ontan iran bendision so  mamakiwas ed sika pian idedikam so inkasika ed si Jehova; saratan a kaisipan so makatulong met ed sika pian napabilay mo lamet so naandin gayagam tan ontulong ed sika a makapanlingkor ed Dios tekep na maapresian puso.

Makatulong Iray Pantitipon ed Kongregasyon

Niarum ni ed kabukoran a pandalepdep ed kamaongan nen Jehova, kaukolan tayoy milimog ed saray kaparan Kristiano. Makapaseseg so maparanay a pipiaral a kaiba iray lalaki, bibii, tan saray kalangweran a mangaaro ed Dios tan determinado met a manlingkor ed sikato. Say alimbawa ra so managyat ed sikatayo parad intiron-kamarerwa a kimey diad panlingkor ed si Jehova. Say kiwala tayo ed Kingdom Hall so mamaseseg met ed sikara.

Tua, sano onsempet tayo kayari makapabanal a sanagew odino sano sikatayo so adismaya lapud sakey a problema odino kakapuyan, nayarin agla pampelengan so iyatendi ed miting ed Kingdom Hall. Diad saratan a bekta kaukolan a pegetan tayoy inkasikatayo, ‘miponitian,’ a singa panangibaga, ta pian natulok tayo so ganggan a mitipon ed saray kaparan Kristiano.​—1 Corinto 9:26, 27; Hebreos 10:23-25.

No bilang ta kaukolan itan, kasin ibaga tayo lan agtayo peteg ya inaro si Jehova? Andin balot. Saray matatken a Kristiano nensaman ya agnagiing so panangaro ra ed Dios et pirmin nansekar pian gawaey linawa na Dios. (Lucas 13:24) Si apostol Pablo so sakey ed ontan a Kristiano. Parungtalan ya imbalikas toy liknaan to ed onian dalan: “Amtak a dia ed siak, salanti, dia ed laman ko, anggapo so manayam a bengatlan maong: ta wala ed siak so panlabay, bangbalet say panggawa na kaabigan andi. Ta agko gawaen so kaabigan a labay ko komon: sabalet so mauges ya agko labay, sikato so gawaen ko.” (Roma 7:18, 19) Tan imbaga to ed saray taga-Corinto: “No ipulong ko so ebanghelyo, anggapo so pangloriaan ko; ta say kapilitan sikato so amasoot ed siak, . . . Ta no gawaen ko so saya ed bulos na linawak a dili, wala so upak: et no andi ed linawak a dili, wala so betang ko a mangasikaso a nipiya ed siak.”​—1 Corinto 9:16, 17.

Singa dakel met ed sikatayo, si Pablo so walaan na saray makasalanan a tendensia ya akasbel ed pilalek ton manggawa na maptek. Balet ta sikatoy akipuligesgesan sumpad saratan a tendensia, tan amin lawarin panaon et sikatoy matalona. Siempre, ag-agawaan itan nen Pablo diad dilin biskeg to. Insulat to: “Nayarian ko a gawaen so ganagana ed saman so mamabiskeg ed siak.” (Filipos 4:13) Si Jehova, ya angiter na pakayari ed si Pablo, so mangiter met na pakayari ed sika pian nagawaan moy maptek no patulongan ka ed sikato. (Filipos 4:6, 7) Kanian ‘mibangal ka nisesengeg ed pananisia,’ diad ontan et sika so bendisionan nen Jehova.​—Judas 3.

Agmo bukbukor so mibakal ed saya. Diad saray kongregasyon na Tastasi nen Jehova, saray matatken ed espiritual a Kristianon mamatatken so mansasagpot met a ‘mibangal nisesengeg ed pananisia,’ a mabulos iran ontulong ed sika. No asinggeran mo so sakey a matatken pian patulongan, sika so panggunaetan ton “tambayoen.” (1 Tesalonica 5:14, NW) Say kalat to et onkiwas a “singa sakey ya amotan [manlapud] dagem, tan sakey a siruman ed bagyo.”​—Isaias 32:2.

“Say Dios sikato so aro,” tan labay ton sikatoy panserbian na saray lingkor to tekep na aro. (1 Juan 4:8) No say panangarom ed Dios et nakaukolan a pabulaslasen lamet, gawaen moray matukoy a kundang, a singa nidatak ed tagey. Panliketan mo no agawaan mo itan.