Ontalindeg Kayon Nagnap Tekep na Mapekder a Kombiksion

“Lawas [ton] isesekar so inkasikato nisesengeg ed sikayo diad saray pikakasi to, ta pian diad kaunoran et sikayoy ontalindeg a nagnap tan tekep na mapekder a kombiksion ed amin a linawa na Dios.”​—COLOSAS 4:12, NW.

1, 2. (a) Anto so naimano na saray taga-paway ed inmuna iran Kristiano? (b) Panon a nipatnag ed libro na Colosas so maaron panangiyansakit?

 IYAANSAKIT a maong na saray patumbok nen Jesus iray kapananisiaan da. Sinaglawi nen Tertullian (managsulat nen komadua tan komatlon siglo K.P.) so panangasi ya impatnag da ed saray ulila, mairap-bilay, tan matakken la. Lapud saratan ya ebidensia na aro ya atekepan na kiwas, asagyat a maong iray agmananisia kanian oniay inkuan da nipaakar ed saray Kristiano, ‘Nengneng yo no panon so panaaroan da ed balang sakey.’

² Ipatnag na libro na Colosas so ontan a maaron panangiyansakit nen apostol Pablo tan say kaiba ton si Epafras ed saray agagi ed Colosas. Oniay insulat ed sikara nen Pablo: Si Epafras so “lawas ton isesekar so inkasikato nisesengeg ed sikayo diad saray pikakasi to, ta pian diad kaunoran et sikayoy ontalindeg a nagnap tan tekep na mapekder a kombiksion ed amin a linaway Dios.” Diad 2001, say  teksto-ed-taon na saray Tastasi nen Jehova et saray balikas ed Colosas 4:12: “Ontalindeg a nagnap tan tekep na mapekder a kombiksion ed amin a linawa na Dios.”

3. Anton duaran bengatla so impikasi nen Epafras?

³ Duaran aspekto so naimano yo ed saray pikakasi nen Epafras parad saray pinabpabli to: (1) a sikara so ‘diad kaunoran et ontalindeg a nagnap’ tan (2) sikara so ontalindeg a “tekep na mapekder a kombiksion ed amin a linawa na Dios.” Nilaktip iyan impormasyon diad Kasulatan pian nagunggunaan itayo. Kanian tepetan yoy inkasikayo, ‘Anto so nakaukolan kon gawaen pian makatalindeg ak a nagnap tan walaan na mapekder a kombiksion ed amin a linawa na Dios? Insan no gawaen ko itan, anto so epekto na satan?’ Amtaen tayo.

Panggunaetan so ‘Nagnap ya Italindeg’

4. Diad anton pantalos a saray taga-Colosas et nakaukolan a magmaliw a “nagnap”?

⁴ Pilalek a maong nen Epafras a saray espiritual ya agagi to ed Colosas so ‘diad kaunoran et ontalindeg a nagnap.’ Say terminon inusar dia nen Pablo, a nipatalos a “nagnap,” so mankabaliksan na ayadyari, anggapoy pankulangan, odino matatken la. (Mateo 19:21; Hebreos 5:14; Santiago 1:4, 25) Nayarin kabkabat yon say impakabautismoan na sakey a Tasi nen Jehova so agmankabaliksan a sikato et matakken lan Kristiano. Sinulat nen Pablo iray taga-Efeso, a manaayam ed sagur na Colosas, a panggunaetan na saray managpastol tan managbangat a tulongan so ‘amin pian makarateng ed pankakasakey na pananisia, tan say pikakabat ed Anak na Dios, dia ed too ya andi pankulangan to, dia ed sukat na kinaatagey na inkapno nen Kristo.’ Pinaseseg nen Pablo iray Kristiano a walad arum a pasen a magmaliw a ‘matatken ed isip.’​—Efeso 4:8-13; 1 Corinto 14:20.

5. Panon tayon nagawaan a manunan kalat so pagmaliw a nagnap?

⁵ No aliwa nin matakken ed espiritual so pigara diad Colosas, nakaukolan a gawaen da itan a kalat. Agta tua met itan natan? Balanglan abautismoan itayo pigaran dekada lay apalabas odino ed agano ni, kasin naiimano tayo a mabitar lay inyaligwas tayo ed panagkatunongan tan saray punto de bista tayo? Kasin ikokonsidera tayo niray prinsipyo na Biblia sakbay itayon mandesisyon? Kasin saray pamaakaran a misiglaotan ed Dios tan ed kongregasyon so walaan na mas babaleg nin betang ed bilay tayo, imbes ya ipasen tayo labat ya agtanton importanti? Agtayo dia nipatnag ya amin so paraan pian namorekdek so ontan ya ibubulaslas anggad pagmaliw tayon sigpot, balet konsideraen pa so duaran alimbawa.

6. Anton aspekto a nayarin onaligwas so sakey ed pagmaliw ya ayadyari, a singa si Jehova?

⁶ Unonan alimbawa: Ipasen pan binmaleg itayo ed lugar a walay panangidumaduma odino pambusol ed totoon sananey so rasa, nasyonalidad, odino rehyon da. Amta tayo a say Dios et agmanangidumaduma kanian nakaukolan ya ontan itayo met. (Gawa 10:14, 15, 34, 35) Diad kongregasyon odino sirkito tayo, walaray indibidual a kalimoglimog tayo a sananey so nanlapuan da. Ingen, wala ni kasi  so eem-eman yon negatibon liknaan odino inap ed saratan a totoo a midumaay nanlapuan da? Kasin mapayunget itayo, ya aliston mannonot na negatibo no nankasalanan odino naopendi itayo na sakey ed saratan? Tepetan yoy inkasikayo, ‘Kasin nakaukolan kon paaligwasen so inkasiak pian nawalaan ak na agmangidumaduman panmoria na Dios?’

7. Say pagmaliw a nagnap bilang Kristiano so nayarin manasaglawi ed pakagamor na anton panmoria ed arum?

⁷ Mikaduan alimbawa: Unong ed Filipos 2:3, nepeg ya “anggapon balot komon so gawaen [tayo] a lapud kasusumpa o pampasirayew, noag dia ed kaabebaan na kalakal balang sinansakey ibilang to so arum a magmaong nen say sikaton dili.” Komustay ibubulaslas tayo ed sayan pamaakaran? Balang too so walaan na kakapuyan tan kinaabig. No mainomay tayon nasita nensaman so kakapuyan na arum, inmaligwas tayo la kasi, ya agtayo ira iilaloan ya “ayadyari” la? (Santiago 3:2) Mas lalo natan, kasin iimanoen tayo​—ya aanapen tayo ni ingen​—iray paraan a mas matalonggaring so arum nen say sikatayo? ‘Aksobien ko a mas matalonggaring iyan agin bii nen say siak no nipaakar ed inkaanos.’ ‘Mas mabiskeg a pananisia so ipapatnag na saman a too.’ ‘Diad tua, sikato so magmaong a managbangat nen say siak.’ ‘Sikato so matalonggaring ed panagpasensia to.’ Nayarin nakaukolan ya onaligwas so arum a taga-Colosas ed sayan pamaakaran. Kasin ontan itayo?

8, 9. (a) Diad anton pantalos ya impikasi nen Epafras iray taga-Colosas ya “ontalindeg”a nagnap? (b) Anto so kabaliksan na ‘italindeg a nagnap’ nipaakar ed arapen?

⁸ Impikasi nen Epafras ya “ontalindeg a nagnap” iray taga-Colosas. Mapatnag ya impikasi nen Epafras ed Dios a no magmaliw la ran nagnap, matakken, mabisbiskeg lan Kristianos, “ontalindeg” la ra, odino mansiansia iran ontan.

⁹ Agtayo nipasen a mantultuloy ya ontan so balang sakey a Kristiano, pati say matakken la’d espiritual. Inkuan nen Jesus a walay anghelikon anak na Dios ya “agtinmalindeg ed katuaan.” (Juan 8:44) Tan impanonot nen Pablo ed saray taga-Corinto ya arum nensaman so abayag a nanlingkor ed si Jehova balet ta kinmasipa ed saginonor. Oniay impasakbay to ed saray agagi ton alanaan na espiritu: “Say mangisip a manalalagey, imanoen to komon ompan napelag.” (1 Corinto 10:12) Saya so angarum na puersa ed pikakasi a ‘diad kaunoran et ontalindeg a nagnap’ iray taga-Colosas. No nagmaliw laran nagnap, mabisbiskeg la, nakaukolan a mantultuloy ira ya ag-onsener, ag-onkesaw, odino ag-onkasipa. (Hebreos 2:1; 3:12; 6:6; 10:39; 12:25) Diad ontan et magmaliw iran “nagnap” ed agew na panangusisa tan unor lan panangabobon ed sikara.​—2 Corinto 5:10; 1 Pedro 2:12.

10, 11. (a) Anton pangaligan so inletneg ed sikatayo nen Epafras nipaakar ed pikakasi? (b) Mitunosan ed ginawa nen Epafras, anton determinasyon so labay yon gawaen?

¹⁰ Asingbat tayo la so kaimportantian na pangipikasi ed arum diad panalambit ed ngaran da, ya espisipikon ikerew ed si Jehova a tulongan, tambayoen, bendisionan tora, tan ikdan tora na masanton espiritu. Ontan so impikasi nen Epafras parad saray taga-Colosas. Tan nausisa tayo, a diad tua et nakaukolan tayon surien, ed saratan a salita so makanan suhestion ed no anto so ilaktip tayo ed pikakasi ed si Jehova nipaakar ed inkasikatayo. Maseguron nepeg tayoy onkerew na tulong ed si Jehova tekep na kalat a balang sinansakey ed sikatayo so ‘diad kaunoran et ontalindeg a nagnap.’ Kasin ontan so gagawaen yo?

¹¹ Akin no bitlaen yo’d pikakasi so kipapasen yo? Ibesngaw ed Dios no kaunongan lay iyaabanti yo ed pagmaliw a “nagnap,” mabisbiskeg tan matakken la’d espiritual. Patulongan kayo ed sikato a mangibiig ed saray nepeg a paaligwasen yo ni ed espiritual. (Salmo 17:3; 139:23, 24) Maseguron wala niray nepeg yon paaligwasen. Insan, imbes a nadismaya ed saya, espisipikon ikerew ed Dios a nakaukolan yo so tulong pian onaligwas. Maminpiga yon gawaen itan. Diad tua, akin no gawaen yon determinasyon a diad sayan ontumbok a simba et dukeyan yoy panpikasi yo ta pian ‘diad kaunoran et ontalindeg kayon nagnap.’ Tan lalon iplano itan legan yon ikokonsidera so teksto ed taon. Diad saray pikakasi yo, iyapasakey yo iray tendensian nayarin mamasener, mamatayer, odino mangikasipa ed sikayo manlapud panaglingkor ed Dios tan no panon yo itan a napaliisan.​—Efeso 6:11, 13, 14, 18.

Ipikasi Yo so Pakawalaay Mapekder a Kombiksion

12. Akin a lalon nakaukolan na saray taga-Colosas so pakawalaay “mapekder a kombiksion”?

¹² Wala met ni so impikasi nen Epafras ya importantin bengatla ta pian saray taga-Colosas et makatalindeg ed kaunoran bilang naabobonan na Dios.  Importanti met itan ed sikatayo. Anto itan? Impikasi ton makatalindeg ira a “tekep na mapekder a kombiksion ed amin a linawa na Dios.” Aliktob ira na inkaerehes tan makaderal iran pilosopiya, ya arum ed saratan so walaan na makapalikdon nengneng na tuan panagdayew. Alimbawa, adesdes ira a manngilin ed saray nikabiig ya agew a walaay panag-ayunal odino piesta, a datin kinaukolan nensaman ed Judion panagdayew. Inyapasakey na saray palson managbangat iray anghel, saramay makapanyarin espiritu ya inusar a mangipasabi na Ganggan ed si Moises. Isipen pa so kidunget ed ontan iran pakadesdesan! Dakerakel so makapawetwet iran mansusumlangan ya ideya.​—Galacia 3:19; Colosas 2:8, 16-18.

13. Say pamidbir ed anton sengegan so makatulong ed saray taga-Colosas, tan panon itayon natulongan ed satan?

¹³ Sinmuppiat si Pablo diad impangidanet to’d betang nen Jesu-Kristo. “Unong na impangawat yo sirin ed Kristo Jesus a Katawan, ontan so panakar yo ed sikato, linmamut tan nipaalagey ed sikato, tan nipaletneg ed pananisia yo, a singa say inkibangat yo.” On, nakaukolan ed biang (na saray taga-Colosas tan ed sikatayo) so pakawalaan na sigpot a kombiksion nipaakar ed betang nen Kristo diad gagala na Dios tan ed bilay tayo. Impaliwawa nen Pablo: “Dia ed sikato manayam ya ami kapnekan ed inka-dios a nipaakar ed laman, ta dia ed sikato agawa kayon nagnap, a sikato so ulo na amin a pakauley tan pakayari.”​—Colosas 2:6-10.

14. Akin a say ilalo ra et petepeteg ed saramay walad Colosas?

¹⁴ Saray taga-Colosas et alanaan na espiritun Kristianos. Walaan ira na nikabkabiig ya ilalo, bilay ed katawenan, tan wala la’d sikara so amin a rason pian pansiansiaen dan masnag itan ya ilalo. (Colosas 1:5) “Linawa na Dios” a nawalaan ira na mapekder a kombiksion nipaakar ed inkasegurado na ilalo ra. Wala ni kasi ed sikara so nanduaruwa ed satan ya ilalo? Anggapon balot! Midumaan kasi natan itan ed amin a walaay inter na Dios ya ilalon manbilay ed mangaraldalin a paraiso? Andin balot! Satan a putel ya ilalo so mabitar a kabiangan ed “linawa na Dios.” Konsideraen natan irayan tepet: No manggugunaet kayon napibiang ed “baleg ya ulop” a makaliktar ed ‘baleg a kairapan,’ panon so inkapeteg ed sikayo na ilalo yo? (Apocalipsis 7:9, 14) Kasin kabiangan itan ed ‘mapekder a kombiksion yo ed amin a linawa na Dios’?

15. Anton nantutumbokan a punto so indatak nen Pablo ya angilaktip ed ilalo?

¹⁵ Nipaakar ed sayan “ilalo,” agtayo labay ya ibagan saya et imposiblin pirawat odino kugip labat. Naimano tayo iya diad nantutumbokan a punton impresenta la nen Pablo ed saray taga-Roma. Diad satan a nantutumbokan a punto, say kada sakey et misiglaotan odino mitunosan ed ontumbok a punto. Imanoen pa so impangusar nen Pablo ed “ilalo” diad impankatunongan to: “Manliket itayo ni ed saray kairapan tayo: tan amta tayo a say kairapan, mangiter na anos; tan say anos, pakapatnagan [“naabobonan a kipapasen,” NW]; tan say pakapatnagan, ilalo; tan say ilalo agmangibabaing; ta say aro na Dios niyibung ed kapusoan tayo ed panamegley na espiritu santo.”​—Roma 5:3-5.

16. Diad impakaaral yo’d katuaan na Biblia, anton ilalo so agamoran yo?

¹⁶ Sanen pilimeron intongtong ed sikatayo na Tastasi nen Jehova so mensahe na Biblia, nayarin walay katuaan a makapainteres ed sikayo, a singa say kipapasen na inaatey odino say kikioli. Parad dakel, say manuna tan balon naamtaan da et say nibase’d Biblian posibilidad na pambilay diad mangaraldalin a paraiso. Nodnonoten pa so pilpilimeron impakadngel yo ed satan a bangat. Agaylan makapakelkelaw ya ilalo​—naandi la so sakit tan itatakken, makapambilay kayo a panggayagaan iray bunga na sagpot yo, tan niwala so kareenan ed saray ayayep! (Eclesiastes 9:5, 10; Isaias 65:17-25; Juan 5:28, 29; Apocalipsis 21:3, 4) Akagamor kayo la na makapakelkelaw ya ilalo!

17, 18. (a) Panon a tinmundas ed ilalo iray nantutumbokan ya impresenta nen Pablo ed saray taga-Roma? (b) Anton klase na ilalo so tinukoy na Roma 5:4, 5, tan kasin walaan kayo na ontan?

¹⁷ Onsabi panaon, nayarin nipaarap kayo ed isusumpa odino panamasegsegang. (Mateo 10:34-39; 24:9) Anggan ed agano niran panaon, diad nanduruman daldalin et nilolooban iray kaabungan na saray Tastasi odino apaskar iran magmaliw a refugee. Arum so dinuksa, akompiska iray literatura ra ed Biblia, odino puntirya na saray tilan report ed media. Antokaman a nengneng na panamasegsegang so nayarin kidudungetan yo, unong ed inkuan na Roma 5:3, makapanliket kayo anggaman ed kairapan lapud mangitarok itan na maabig a resulta. Unong ed insulat nen Pablo, nabayuboan yo so anos lapud kairapan. Insan say anos so mangitonton ed naabobonan a kipapasen. Amta yon  duga so gagawaen yo, a susumpalen yo so linawa na Dios, kanian naseguro yon aabobonan to kayo. Diad saray salita nen Pablo, natebek yon wala kayo ed “naabobonan a kipapasen.” Bilang pantultuloy, insulat nen Pablo a say ‘naabobonan a kipapasen, bilang resulta et [mamawala na] ilalo.’ Singa nikadkaduma itan. Akin ya indatak nen Pablo so “ilalo” ed sarayan nantutumbokan a kualidad? Agta maniilalo kayo la nensaman ni, sanen pilimeron nadngel yo so maong a balita?

¹⁸ Mabitar dia ya agtutukoyen nen Pablo so pilimeron alikna tayo diad paniilalo ed ayadyarin bilay. Say tutukoyen to dia et nagkalalo ni nen say satan; mas aralem, mas makapakiwas. Sano sitotoor itayon mansungdo tan diad ontan et namoria tayo ya aabobonan itayo na Dios, walaan iya na aralem  ya epekto ya omputel tan ombiskeg so iilaloan tayo la nen inmuna. Say iilaloan tayo so magmaliw la natan a mas peteg, lalon putel, tan mas maapit. Mas onlinew iyan apaaralem ya ilalo tayo. Talosen na satan so inkatoo tayo, say kada kalareker tayo. “Tan say ilalo agmangibabaing; ta say aro na Dios niyibung ed kapusoan tayo ed panamegley na espiritu santo.”

19. Panon a magmaliw a kabiangan na regular a pikakasi yo so nipaakar ed ilalo yo?

¹⁹ Say masimoon ya impikasi nen Epafras et mantultuloy a napakiwas tan kombinsido iray agagi to diad Colosas ed no antoy nigana ed arapen da, a walaan ira na “mapekder a kombiksion ed amin a linawa na Dios.” Komon ta ontan met so naynay ya iyaasingger na balang sakey ed sikatayo ed Dios nipaakar ed ilalo tayo. Diad saray personal a pikakasi yo, ilaktip yo so ilalo nipaakar ed balon mundo. Ibesngaw ed si Jehova so pampipirawat yo’d satan, tekep na nagnap a kombiksion a nagawa itan. Onkerew ed sikato na tulong pian napaaralem tan napalaknab yo so kombiksion yo. Singa ed impangipikasi nen Epafras a nawalaan iray taga-Colosas na “mapekder a kombiksion ed amin a linawa na Dios,” ontan met so gawaen yo. Naynay yon gawaen itan.

20. No walaray pigaran onkasipa ed Kristianon dalan, akin ya agtayo iya pakadismayaan?

²⁰ Agkayo nepeg a paisuawi odino nadismaya ed kanonotan ya aliwan amin et ontalindeg a nagnap tan tekep na mapekder a kombiksion. Arum so nayarin onsaew, onkasipa, odino onsuko. Agawa itan ed saramay maapit ed si Jesus, saray apostol to. Balet sanen angitapat lay Judas, kasin tinmayer odino tinmunda iray apostoles? Andin balot! Inyaplika nen Pedro so Salmo 109:8 pian ipatnag a wala so onsalat ed si Judas. Walay apilin kasalat, tan aktibon nantultuloy iray matoor ed Dios diad panagpulong a kimey da. (Gawa 1:15-26) Determinado ira ya ontalindeg a nagnap tekep na mapekder a kombiksion.

21, 22. Diad anton pantalos a naiimano so itatalindeg yo a nangnap tekep na mapekder a kombiksion?

²¹ Makaseguro kayo a naiimano so itatalindeg yo a nagnap tan mapekder a kombiksion yo ed amin a linawa na Dios. Naiimano tan aapresiaen itan. Na siopa?

²² Bueno, naiimano itan na saray agagi yo, a makapikabat tan mangaaro ed sikayo. Anggaman agnibabalikas itan na maslak panamegley na salita, say epekto so mipadpara ed nabasa tayo diad 1 Tesalonica 1:2-6: “Misalsalamat kami ed Dios ya andi ebas lapu ed sikayo ya amin, a sasalambiten mi kayo ed saray pikakasi mi: A nodnonoten mi ya andi tunda so gawa yo ed pananisia tan sagpot yo ed aro tan anos yo ed ilalo ed Katawan tayon Jesu-Kristo, ed arap na Dios tan Ama tayo. . . . Say ebanghelyo tayo agsinmabi ed sikayo ed salita labat, noag dia ed pakayari met, tan dia ed espiritu santo, tan dia ed dakel a pamasekder; . . . Tan nagmaliw kayon manag-alig ed sikami, tan dia ed Katawan.” Ontan met so nalilikna na saray matoor a Kristiano a kalimoglimog yo diad pakakaimano ra ed ‘itatalindeg yo a nagnap tan pakakawalaan yo na mapekder a kombiksion ed amin a linawa na Dios.’​—Colosas 1:23.

23. Diad sayan ontumbok a taon, anto so determinasyon yo?

²³ Segsegurado a satan so naiimano tan panliliketan na mangatatawen ya Ama yo. Panmatalekan itan. Akin? Lapud akatalindeg kayon nagnap tan walaan na mapekder a kombiksion “ed amin a linawa na Dios.” Makapaseseg ya insulat nen Pablo ed saray taga-Colosas so nipaakar ed impankurang da a ‘makana ed si Jehova anggad sigpot a pamaliket ed sikato.’ (Colosas 1:10) On, nayarian na saray ag-ayadyarin totoo so sigpot a pamaliket ed sikato. Ontan so ginawa na saray agagi yo ed Colosas. Gagawaen itan natan na saray kakaiba yon Kristiano. Nagawaan yo met itan! Kanian diad sayan ontumbok a taon, komon ta napaneknekan ed inagew-agew a pikakasi yo tan ed naynay a kiwas yo a determinado kayo a ‘diad kaunoran et ontalindeg kayon nagnap tan tekep na mapekder a kombiksion ed amin a linawa na Dios.’

Kasin Nanonotan Yo?

• Anto so lalanoren na ‘italindeg yon nagnap’?

• Antoran bengatla nipaakar ed inkasikayo so nepeg yon ilaktip ed pikakasi yo?

• Unong a nisuheri ed Roma 5:4, 5, anton nengneng na ilalo so labay yon niwala’d sikayo?

• Say naaral tayo so amakiwas ed sikayon nawalaan na anton kalat diad ontumbok a taon?

[Tepetepet Parad Panagaral]

[Litrato ed pahina 20]

Impikasi nen Epafras ya ontalindeg a nagnap iray agagi to bilang matakken a Kristiano, a walaan na mapekder a kombiksion nipaakar ed Kristo tan ed ilalo ra

[Saray litrato ed pahina 23]

Say seguradon ilalo yo tan mapekder a kombiksion yo so aagamilen met na minilyon ni