Tulongan so Arum a Mankurang a Makana ed si Jehova

“Sikami . . . andi tunda min mankerew tan manggawa na pikakasi a nipaakar ed sikayo, pian . . . mankurang kayo a makana ed Katawan ya onarap ed amin a makapaliket, mamabunga ed ganaganan maabig a gawa.”​—COLOSAS 1:9, 10.

1, 2. Anto so nagkalautlan panlapuan na liket tan inkapnek?

 “MANAAYAM kami ed sakey a trailer a walad sakey a bangkag. Lapud pinasimpli mi so kabibilay mi, dakel so panaon min mangipasabi na maong a balita ed totoo. Sikami so mayamyaman ya abendisionan na pribilihyo ya ontulong ed dakel a mangidedika ed bilay da’d si Jehova.”​—Sanasawa, a sigpot-panaon a ministros a taga-Abalaten Aprika.

² Agkayo kasi miabobon a makapaliket so ontulong ed arum? Panliliketan na arum so naynay ya itulong ed saray mansasakit, mankaukolan, odino maneermen. Maseguro iray tuan Kristiano a say sankabalegan a nitulong da ed arum et say panginabang da na pikakabat nipaakar ed si Jehova a Dios tan ed si Jesu-Kristo. Saya lambengat so makapangitonton ed arum a mangawat ed dondon nen Jesus, makabayubo na maong a relasyon ed Dios, tan makagamor na andi-anggaan a bilay.​—Gawa 3:19-21; 13:48.

3. Anton nengneng na tulong so makanepegan na imano tayo?

³ Komusta balet so itulong ed saramay manlilingkor la ed Dios, a mankukurang la ed “Dalan”? (Gawa 19:9) Maseguron interesado kayon maong ed sikara, ingen ta nayarin agyo ni nibiig no panon so lalon pakatulong ed sikara. Odino lapud situasyon yo, nayarin limitado so pakatulong ed sikara, ya agkayo tanton napepenek. (Gawa 20:35) Nipaakar ed saratan ya aspekto, makaaral itayo ed libro na Colosas.

4. (a) Anto iray kipapasen sanen sinulat nen Pablo iray taga-Colosas? (b) Panon ya apilanor si Epafras?

⁴ Sanen sinulat nen apostol Pablo iray Kristiano ed Colosas, sikatoy walad pangawan ed Roma, balet ta sarag toy manpaloob na saray bisita. Singa ed iilaloan yo, inusar nen Pablo so limitadon kawayangan to pian ipulong so Panarian na Dios. (Gawa 28:16-31) Si Pablo so binisita na saray kapara ton Kristiano, a nayari ni ingen a panapanaon ya akaiba to ed pangawan so arum. (Colosas 1:7, 8; 4:10) Sakey lay Epafras, a maseseg ya ebanghelisador a taga syudad na Colosas diad Frigia, a walad nipugaron lawak ed bukig na Efeso diad Asia Minor (kaplesan a Turkey). Mausausar si Epafras diad inkiletneg na kongregasyon ed Colosas, tan sikatoy nansagpot nisesengeg ed saray kongregasyon a walad asingger a Laodicea tan Hierapoles. (Colosas 4:12, 13) Akin a nambaroy ni si Epafras pian minengnengan ed si Pablo diad Roma, tan anto so naaralan tayo ed inkiwas nen Pablo?

Epektibon Tulong ed Saray Taga-Colosas

5. Akin ya insulat nen Pablo ed saray taga-Colosas so nipaakar ed ginawa to?

⁵ Ta pian nipanon ed si Pablo iray kipapasen ed kongregasyon na Colosas, nambiahe si Epafras ed Roma anggaman mairap. Insalaysay to so nipaakar ed pananisia, aro, tan panag-ebanghelyo na saraman a Kristiano. (Colosas 1:4-8) Balet, sinaglawi to met so papagaan ton negatibo iran impluensia a mamepeligro ed espiritualidad na saray taga-Colosas. Kinmiwas si Pablo panamegley na sakey ya apuyanan a sulat, a sinuppiat to so pigara ed saray panmoria ya ikakayat na saray palson managbangat. Nagkalautlan inyapasakey to so manunan betang nen Jesu-Kristo. * Kasin niyapasakey labat ed manuna iran katuaan na Biblia so intulong to? Panon to nin tinulongan iray taga-Colosas, tan  antoran leksion so naaralan tayo nipaakar ed pananulong ed arum?

6. Anto so pinabitar nen Pablo ed sulat to’d saray taga-Colosas?

⁶ Diad gapo na sulat to, inter nen Pablo so aralem a pakatalos nipaakar ed sakey a nengneng na tulong a nayarin agtayo naiimano. Sakey itan a paraan na itutulong ya epektibo anggaman niarawi si Pablo tan Epafras ed Colosas. Oniay pinekderan nen Pablo: “Misalamat kami ed Dios ya Ama na Katawan tayon Jesu-Kristo, a pikakasi mi kayon naynay.” On, saraya so espisipikon pikakasi parad saray Kristiano ed Colosas. Inyarum ni nen Pablo: “Sayan sengegan sikami met, nanlapu ed agew ya impakadngel mi, andi tunda min mankerew tan manggawa na pikakasi a nipaakar ed sikayo, pian napano kayo komon na kakabatan na linawa to ed amin a karunongan a maespiritu tan pakatalos.”​—Colosas 1:3, 9.

7, 8. Anton pamaakaran so mabetbet a nilalaktip ed saray pikakasi tayon bukor tan ed kongregasyon?

⁷ Amta tayo a si Jehova so “Dumerengel na pikakasi,” kanian makapanmatalek itayo a sikatoy akaparaan ya ondengel ed saray pikakasi tayo daput no mitunosan iratan ed linawa to. (Salmo 65:2, NW; 86:6; Uliran 15:8, 29; 1 Juan 5:14) Balet, no nipaakar ed pangipikasi ed arum, antoray iyan na pikakasi tayo?

⁸ Mabetbet tayon nonoten tan ipikasi so ‘intiron ulopan na agagi tayo ed mundo.’ (1 Pedro 5:9, NW) Odino nayarin onasingger itayo ed si Jehova nisesengeg ed saray Kristiano tan arum nira a walad lugar ya adalan na desyang odino trahedya. Sanen nadngelan na saray inmunan-siglon babangatan ed arum a pasen so nagagawan eras diad Judea, dakel a pikakasi so insaklang da parad saray agagi ra anggan sakbay nin nipatulor so pundon parad tulong. (Gawa 11:27-30) Diad panaon tayo, mabetbet a narengel ed saray Kristianon miting iray pikakasin nipaakar ed intiron impanaagi odino nipaakar ed baleg a grupo na saray agagi, a nakaukolan a natalosan na dakel ta pian nibalikas day “Amen.”​—1 Corinto 14:16.

Magmaliw ya Espisipiko ed Pikakasi

9, 10. (a) Antoran alimbawa so mangipanengneng a matukoy so pangipikasi ed saray espisipikon indibidual? (b) Panon ya asaglawi si Pablo ed espisipikon pikakasi?

⁹ Ingen ta itatarya ed sikatayo na Biblia iray alimbawa na espisipiko tan personal ya impangipikasi ed arum. Molimolien so komento nen Jesus a nikurit ed Lucas 22:31, 32. Akapaliber ed sikato so 11 a matoor ya apostoles. Amin da so mankaukolan na tulong na Dios dia ed mairap iran panaon a manatalaran ed sikara, kanian impikasi ira nen Jesus. (Juan 17:9-14) Balet, si Pedro so espisipikon tinukoy nen Jesus, a nikabiig so impikasi to parad satan a babangatan. Arum niran alimbawa: Impikasi nen Eliseo a tulongan na Dios so sakey a too, say ayudante to. (2 Arari 6:15-17) Si Gaio so impikasi nen apostol Juan a mantultuloy ya onabig ed pisikal tan espiritual a paraan. (3 Juan 1, 2) Tan say arum a pikakasi so niyapasakey ed espisipiko iran grupo.​—Job 42:7, 8; Lucas 6:28; Gawa 7:60; 1 Timoteo 2:1, 2.

¹⁰ Nipabitar ed saray sulat nen Pablo so espisipikon tuloy iran pikakasi. Inkerew to a sikatoy ipikasi ra odino sikaran sankakaiba. Oniay nabasa ed Colosas 4:2, 3: “Mansiansia kayo a malet ed pikakasi a panpuyatan yo a tekep na pisasalamat; tan sakey pikasi yo kami met, pian say Dios ilukasan to kami komon na pinto a nipaakar ed salita, a mangisalita na misteryo nen Kristo, a lapud saya wala ak met ya abalor.” Konsideraen met irayan arum nin alimbawa: Roma 15:30; 1 Tesalonica 5:25; 2 Tesalonica 3:1; Hebreos 13:18.

11. Sanen sikatoy walad Roma, siopa so impikasi nen Epafras?

¹¹ Tua met itan ed kaiba nen Pablo diad Roma. “Si Epafras, a sikato so sakey ed sikayo, . . lugayan to kayo, ya andi-ebas so panseseet to ed kaabigan yo ed saray pikakasi to.” (Colosas 4:12) Say salitan nipatalos a “panseseet” so mangisuheri na “pipupuligesgesan,” a singano sakey a gymnast ed saray pagalaw nensaman. Kasin say masimoon labat ya impikasi nen Epafras et say sankamundoan a  muyong na saray mananisia odino saray tuan managdayew ed intiron Asia Minor? Impabitar nen Pablo ya espisipikon impikasi nen Epafras iramay walad Colosas. Amta nen Epafras so kipapasen da. Agtayo amta so kangaranan dan amin, nisay amta tayo no antoran problema so inkidungetan da, balet isipen pa so pigaran posibilidad. Nayarin mibabarangkaan so malangwer nin Lino ed impluensia na kasmak iran pilosopiya, tan nayarin mankaukolan si Rufo na biskeg pian naresistian toy pananagyat na dati iran aagamilen to ed Judaismo. Lapud agmananisia so masiken to, ompan mankaukolan si Persis na panagsungdo tan kakabatan pian napabaleg to so ananak to unong ed Katawan, tan ompano si Asincrito, ya anagmak na makapatey lan sakit, so mankaukolan na nagkalalon ligliwa? On, kabat nen Epafras iramay walad nanlapuan ton kongregasyon, tan sikara so masimoon ton impikasi lapud kaliktan to tan si Pablo a saratan a debosyonado so mankurang a makana ed si Jehova.

12. Panon itayon magmaliw a lalon espisipiko ed saray personal a pikakasi tayo?

¹² Kasin naimano yo la so pangaligan tayo​—sakey a paraan pian natulongan so arum? Unong ed naimano la, saray mapublikon pikakasi diad saray Kristianon miting et naynay a malaknab, lapud nanduruman kipapasen na dumerengel. Balet diad saray personal odino pampamilyan pikakasi tayo, mas espisipiko itayo. Lapud panapanaon ya ikekerew tayo’d Dios ya iwanwan tan bendisionan toray amin a managbiahen manangasikaso odino saray espiritual a managpastol, agtayo kasi nayarian no maminsan so magmaliw ya espisipiko? Singa bilang, akin a saglawien ed pikakasi so ngaran na manangasikaso na sirkito ya ombibisita ed kongregasyon yo odino say konduktor na Panagaral na Kongregasyon ed Libro? Ipapabitar na Filipos 2:25-28 tan 1 Timoteo 5:23 so personal a panagpaga nen Pablo ed bunigas nen Timoteo tan ed si Epafrodito. Nipatnag tayo met kasi so ontan a panangiyansakit ed saramay mansasakit a kabkabat tayo?

13. Antoran nengneng na situasyon so matukoy ya ilaktip ed personal iran pikakasi tayo?

¹³ Tua, nepeg tayon paliisan so mibali ed personal lan pamaakaran na arum, balet manepeg a nipatnag ed saray pikakasi tayo so puron interes ed saramay kabat tan iyaansakit tayo. (1 Timoteo 5:13; 1 Pedro 4:15) Nayarin naandiay trabaho so sakey ya agi, tan agtayo nayarian so mangiter ed sikato na trabaho. Ingen, nayarin salambiten tayo so ngaran to tan bitlaen so paniirap to diad personal iran pikakasi tayo. (Salmo 37:25; Uliran 10:3) Wala kasi so kabat tayon agin bii ya inmakulaw lan anggapoy pamilya lapud sikato so determinadon miasawa “dia ed linawa na Katawan lambengat”? (1 Corinto 7:39) Diad personal iran pikakasi yo, akin no sikatoy ipikasi yo ed si Jehova a nabendisionan tan natulongan a mantultuloy a matoor ed panlilingkor to? Bilang sakey nin alimbawa, nayarin sinimbawa na duaran mamatatken so sakey ya agin akapankasalanan. Akin no sikatoy panapanaon dan bitlaen ed saray personal a pikakasi ra?

14. Panon a misiglaotan iray espisipikon pikakasi ed pananulong ed arum?

¹⁴ Dakel iray posibilidad a sarag yon ilaktip ed saray personal a pikakasi yo iray indibidual a mankaukolan na tulong, tambayo, kakabatan, tan masanton espiritu nen Jehova, odino ed dinanman ed saray bungan pawalaen na satan. Lapu ed kaarawi odino arum nin sirkumstansia, nayarin isipen yon limitado so niiter yon materyal odino direktan tulong. Balet agyo lilingwanan ya ipikasi iray agagi yo. Amta yon labay da met so mankurang a makana ed si Jehova, ingen ta nayarin mankakkaukolan iray tulong pian magnayon dan nagawaan itan. Say tombok ed pakatulong et saray pikakasi yo.​—Salmo 18:2; 20:1, 2; 34:15; 46:1; 121:1-3.

 Pampelengan so Pamabiskeg ed Arum

15. Akin a nepeg itayon magmaliw ya interesado ed unor a kabiangan na Colosas?

¹⁵ Siempre, say masimoon tan espisipiko iran pikakasi so aliwan alenleneg a paraan pian natulongan so arum, nagkalalo la ed saramay asingger ed sikayo tan papablien yo. Pinalinew itan na libro na Colosas. Papanisiaan na dakel ya iskolar a kayarin inter nen Pablo so panangiwanwan nipaakar ed doktrina tan praktikal a simbawa, inyarum to lambengat iray panangilugay odino personal iran pabano to. (Colosas 4:7-18)Diad pidumaan, naamtaan tayo la a lugan na sayan unor a kabiangan na libro so makatantandan simbawa, tan dakel so naaralan ni ed sayan parti.

16, 17. Anto so nibaga tayo nipaakar ed saray agagi ya asalambit ed Colosas 4:10, 11?

¹⁶ Oniay insulat nen Pablo: “Si Aristarco ya ibak ya impangaw lugayan to kayo, tan si Marcos, a kapinsan nen Bernabe (ya angawat kayo na bilin a nipaakar ed sikato; no wala ed sikayo, awaten yo), tan si Jesus, a tatawagen na Justo a sikara so apigalsim; sikaraya labat so ibibak ed kimey nipaakar ed panarian na Dios, totoo ya alimbawa ra so sakey a ligliwa [“makapabiskeg a tulong,” NW] ed siak.”​—Colosas 4:10, 11.

¹⁷ Impakabat dia nen Pablo so pigaran agagi a makanepegan na nikadkaduman imano. Inkuanto a kaiba ira ed saray agalsiman, a walaan na Judion abenegan. Dakel so agalsiman a Judio diad Roma, tan pigara so nagmaliw lan Kristiano ed saman. Siansia, saraman a sinalambit nen Pablo so tinmulong ed sikato. Nayarin ag-ira masuyat a milimog ed saray Kristianon Gentil, tan nanliketan da so akiulop ed si Pablo diad impanpulong ed saray Gentil.​—Roma 11:13; Galacia 1:16; 2:11-14.

18. Panon a kinomendaan nen Pablo so pigaran kaiba to?

¹⁸ Imanoen so komento nen Pablo: ‘Sarayan mismo so nagmaliw a makapabiskeg a tulong ed siak.’ Inusar to so sakey a Griegon salita ya aminsan labat a pinmatnag ed Biblia. Impatalos itan na  dakel a managpatalos bilang “ligliwa.” Balet, wala so sananey nin Griegon salita (pa·ra·ka·le’o) a kaslakan a nipapatalos a “ligliwa.” Inusar itan nen Pablo ed arum nin pakabasaan ed saya lanlamang a sulat balet ta duma so inusar to la ed Colosas 4:11.​—Mateo 5:4; Gawa 4:36; 9:31; 2 Corinto 1:4; Colosas 2:2; 4:8.

19, 20. (a) Anto so kabaliksan na salitan inusar nen Pablo ed saray agagin tinmulong ed sikato diad Roma? (b) Diad antoran paraan so nayarin intulong na saratan ya agagi ed si Pablo?

¹⁹ Saramay binitla nen Pablo ed ngaran so aglambengat nantambayo ed sikato. Say Griegon termino a nipatalos a “makapabiskeg a tulong” diad Colosas 4:11 so sagpaminsan ya usaren ed sekular iran teksto pian tukoyen so sakey a tambal a pamakepay pakakaaburido. Oniay nabasa ed New Life Version: “Agaylan tulong ira ed siak!” Inusar na Today’s English Version iyan balikas: “Sikara so nagmaliw a baleg a tulong ed siak.” Anto ta so nayarin ginawa na saraman a Kristianon agagi pian natulongan si Pablo?

²⁰ Nayarin nabisita si Pablo, balet dakel so agto nagawaan, a singa say panaliw na manunaan iran pankaukolan to​—tagano tan kawesen no panaoy ambetel. Panon ton makala na saray lukot a panaralan odino manaliw na saray usaren to ed pansulat? (2 Timoteo 4:13) Agyo kasi naisip so intulong na saratan ya agagi parad saray pankaukolan nen Pablo, a ginawa ray manunan bengatla a singa say pitindaan odino pagmaliw ya ibabaki to? Nayarin labay ton komustaen tan pabiskegen so sakey a kongregasyon. Agto iratan nagawaan lapud sikatoy nipangaw, kanian saratan ya agagi so nayarin binmisita ed si Pablo, ya impasabi da ray mensahe, tan intarok da ray resulta. Agaylan makapabiskeg!

21, 22. (a) Akin a makapainteres ed sikatayo iray salita ed Colosas 4:11? (b) Anto so pigaran paraan a niyaplika tayo so alimbawa na saramay kaiba nen Pablo?

²¹ Say insulat nen Pablo nipaakar ed pagmaliw a “makapabiskeg a tulong” so mangiter na aralem a pakatalos ed no panon tayon natulongan so arum. Nayarin mankukurang la ran makana ed si Jehova no nipaakar ed moral iran estandarte to, onaatendi ed saray Kristianon miting, tan mibibiang ed panagpulong a kimey. Lapud satan, makanepegan ira na apresasyon tayo. Balet, wala ni kasi so nagawaan tayo pian magmaliw itayon “makapabiskeg a tulong,” a singa saramay tinmulong ed si Pablo?

 ²² No walay kabat yon agin bii a sikakabat a manguunor ed 1 Corinto 7:37 balet ta anggapo so kakanayon to, sarag yo kasin ipibiang ed pigaran aktibidades na pamilya yo, ya imbitaan yo ed sakey a panangan odino iyatendi ed melag a pandaragup na saray kakaaro odino kakanayon? Akin no sikatoy imbitaan yon mibansag ed pamilya yo no mi-kombension odino manbakasyon kayo? Odino itagar yon mansaliw na tagano no malublubay so panaon yo. Ontan met so nagawaan ed saray balo, odino ed saramay agmakamaneho. Naromog yon makagungguna so idengel ed saray eksperiensia ra odino onkuno ed sikara nipaakar ed saray kaslakan a bengatla a singa say pampili na masamit a prutas odino pampili na kawes na ugugaw. (Levitico 19:32; Uliran 16:31) Say natural a resulta et lalon onapit so balang sakey. Diad ontan et mabulos iran patulongan ed sikayo no walay pasaliw dan tambal ed parmasya, odino arum ni. Maseguron akatulong iray agagin kaiba nen Pablo ed Roma diad praktikal, makapabiskeg a paraan, a singa gagawaen yo met la. Manlapu la’d nensaman anggad natan, say kaaruman nin bendision et onelet so bedber na panangaro, tan mapekder so determinasyon tayo ed matoor a panaglingkor ed si Jehova.

23. Anto so maabig a pangusaran tayo na panaon tayo?

²³ Umamengen tayo paray situasyon a nidalatdat ed sayan artikulo. Alimbawa lambengat iratan, balet saraya so mangipanonot ed sikatayo ed peteg iran situasyon a nasarag tayoy magmaliw a lalon “makapabiskeg a tulong” ed saray agagi tayo. Say punto et aliwan say pamayubo ed pagmaliw a matulong ed kaparan too. Aliwan satan so kalat na saray agagin asalambit ed Colosas 4:10, 11. ‘Ibiba ira ed kimey nipaakar ed panarian na Dios.’ Direktan misiglaotan ed satan so makapabiskeg a resulta. Ontan met komon so gawaen tayo.

24. Anto so manunan rason no akin ya ipikasi tayo tan pabiskegen tayo so arum?

²⁴ Salambiten tayo so ngaran na arum diad personal iran pikakasi tayo tan panseetan tayo iran pabiskegen lapud saya: Maseguro itayo a labay na saray agagi tayo so ‘mankurang a makana ed Katawan ya onarap ed amin a makapaliket.’ (Colosas 1:10) Misiglaotan itan a punto ed arum nin bengatla a sinalambit nen Pablo sanen insulat to so nipaakar ed saray pikakasi nen Epafras a manasaglawi ed saray taga-Colosas, ta pian “ontalindeg [iran] nagnap tan tekep na mapekder a kombiksion ed amin a linawa na Dios.” (Colosas 4:12, NW) Panon tayon nadampot itan? Usisaen tayo.

[Paimano ed leksab]

Kasin Naimano Yo?

• Panon tayon makatulong panamegley na personal iran pikakasi tayo?

• Diad anton pantalos ya arum a Kristiano so nagmaliw a “makapabiskeg a tulong” ed si Pablo?

• Diad antoran nengneng na kipapasen so pagmaliw tayon “makapabiskeg a tulong”?

• Anto so kalat tayo no ipikasi tan pabiskegen tayoray agagi tayo?

[Tepetepet Parad Panagaral]

[Litrato ed pahina 18]

Sarag yo kasi so mangitagar na sakey a Kristiano no manpasyar kayon sankapamilyaan?

[Credit Line]

Diad impangiyabuloy na Green Chimney’s Farm