Kareenan Parad Balon Milenyo?

AGAWA so inagurasyon na Internasyonal a Taon parad Kultura a Walaay Kareenan diad Paris tan New York City nen Setyembre 14, 1999. Saya so improklama parad taon 2000 na General Assembly na Nasyones Unidas. Magunaet ya inkerew nen Federico Mayor, datin direktor-heneral na UNESCO, so “pamawala na sankagloboan a pakurang parad kultura a walaay kareenan tan anggapoy karawalan.”

Walay diparan na UNESCO a “lapud saray bakal et onggagapo ed kanonotan na totoo, nepeg met a diad kanonotan na totoo a niletneg iray depensa parad kareenan.” Mitunosan ed saya, getma na organisasyon ya iyalibansa so kultura a walaay kareenan diad panamegley na “edukasyon, pansasalatay ideya tan opinyon, tan kooperasyon.” Insalaysay nen Mr. Mayor ya agmagenap so “pagmaliw a mareen, nisay pagmaliw a kontran maong ed guerra, noagta magmaliw a manangiletneg na kareenan.”

Makapaermen ta say taon 2000 et andiay deen. Nipabitar la na modernon awaran, ontan met ed saray ebento ed taon 2000, ya agnayarian na toon amperen so bakal tan karawalan anggaman masimoon dan panggugunaetan itan.

Balet, makatantanda ta peteg a nisisiglaot so kareenan ed edukasyon. Manga 2,700 a taon ed apalabas et impasakbay la nen propeta Isaias ya: “Amin iray anak mo nibangat ira ed Jehova; et baleg naani deen na saray anak mo.” (Isaias 54:13) Pagpaunan anengneng met la na sayan propeta so panaon sano ondagsa iray totoo na amin a nasyon diad tuan panagdayew ed si Jehova a Dios pian paibangat ira ed saray dalan To. Tan antoy resulta? “Pitpiten da naani so saray kampilan da a pagmaliwen da a dingding na lukoy, tan saray gayang da a komkompay; say nasyon agnaani mangitagey na kampilan a sumpa ed nasyon, ag-ira met la manaral na bakal ed anggan kapigan.” (Isaias 2:2-4) Mitunosan ed satan a propesiya, mibibiang iray Tastasi nen Jehova ed sankamundoan ya edukasyonal a kimey ya akatulong la ed minilyon ta pian natalonaay pambusol lapud nasyonalidad tan rasa a sengegay maslak a pambabakal.

Diad kaunoran et anggapo laray bakal ed silong na Panarian na Dios, lapud satan so mangitarok na magnayon a kareenan tan kaligenan ed dalin. (Salmo 72:7; Daniel 2:44) Diad ontan et nasumpal iray salita na salmista: “Nengneng mo so saray gawa nen Jehova, no anto so kaingewan so ginawa to dia ed dalin. Sikato patundaen to so bakabakal angga ed sampot na dalin.”​—Salmo 46:8, 9.