Kaunongan Kalaknab so Panangaro Yo?
Kaunongan Kalaknab so Panangaro Yo?
“Aroen mo so kaparam a too unong ed sikan dili.”—MATEO 22:39.
1. No inaro tayo si Jehova, akin a nepeg met ya aroen tayo so kaparan too?
SANEN atepetan si Jesus no anto so sankatalonggaringan a ganggan, oniay ebat to: “Aroen mo so Katawan a Dios mo ed masimoon a pusom, tan dia ed masimoon a kamarerwam, tan dia ed masimoon a nonot mo.” Insan inaon to so mikaduan ganggan a mipadpara ed samay inmuna: “Aroen mo so kaparam a too unong ed sikan dili.” (Mateo 22:37, 39) On, say aro ed kaparan too so pakabidbiran ed sakey a Kristiano. On, no inaro tayo si Jehova, nepeg tayon aroen so kapara tayon totoo. Akin? Lapud ipapanengneng tayo so aro tayo ed Dios diad panguunor ed Salita to, tan igaganggan itayo na Salita to ya aroen so kaparan too. Kanian, no agtayo inaro iray agagi tayo, aliwan puro so panangaro tayo ed Dios.—Roma 13:8; 1 Juan 2:5; 4:20, 21.
2. Anton klase na aro so nepeg tayon ipatnag ed kaparan too?
2 Sanen imbaga nen Jesus a nepeg tayon aroen so kapara tayon too, say tutukoyen to et mas ni nen say pikakaaro. Tan tinukoy to so aro a midumaan ed samay sipor lan nalilikna ed loob na pamilya odino ed baetan na laki tan bii. Tutukoyen to so klase na aro ya ipapatnag nen Jehova ed saray dedikadon lingkor to ontan met ed ipapatnag dan aro ed sikato. (Juan 17:26; 1 Juan 4:11, 19) Sakey a Judion eskriba, ya atebek nen Jesus, a matudion mansasalita, so akiabobon ed sikato a say pangaro ed Dios et nepeg a dia “ed amin a puso, tan ed amin a pakatalos, tan ed amin a biskeg.” (Marcos 12:28-34) Sikato so duga. Say aro a bayuboan na sakey a Kristiano ed Dios tan ed kaparan too so manasaglawi ed liknaan tan kanonotan tayo. Satan so nalilikna ed puso tan iwawanwan na kanonotan.
3. (a) Panon so impangibangat nen Jesus ed samay toon “makabat ed ganggan” a sikato so nepeg a nawalaay malaknab a panmoria ed no siopa so kapara ton too? (b) Panon ya onaplika so ilustrasyon nen Jesus ed saray Kristiano natan?
3 Unong ed report nen Lucas, sanen inkuan nen Jesus a nepeg tayon aroen so kapara tayon too, onia so intepet na “sakey a makabat ed ganggan”: “Siopa so kaparak a too?” Inmebat si Jesus panamegley na sakey a parabolo. Sakey a too so pinekpek, tinakewan, tan ngalngali la ompatey nen imbatikan da ed gilig na dalan. Unona et walay dinmalan a saserdote insan sakey a Levita. Sikato so agda inim-imano. Diad kaunoran, sinmabi so sakey a Samaritano, anengneng to iyan asugatan a too, tan kinmiwas tekep na pirmin panangasi ed sikato. Siopa ed sarayan talo so maabagey ed kaparan too na sayan asugatan? Mapatnag so ebat. (Lucas 10:25-37) Nayarin abigla iyan too a makabat ed Ganggan diad nadngel ton imbaga nen Jesus a say Samaritano so magmaong a kaparan too nen samay saserdote tan Levita. Mapatnag a tutulongan nen Jesus iyan too pian naaro to so kapara ton too diad mas malaknab a paraan. Ontan met so pangaro na saray Kristiano. Konsideraen pa so amin a sasayakupen na panangaro ra.
Aro ed Loob na Pamilya
4. Iner so unonan pangipatnagan na sakey a Kristiano ed aro to?
4 Aaroen na saray Kristiano so kapamilyaan da—inaro na saray kaasawaan a bibii so kaasawaan dan lalaki, saray kaasawaan a lalaki ed asawan bibii, saray atateng ed ananak. (Eclesiastes 9:9; Efeso 5:33; Tito 2:4) Tua, niwawala so bedber na natural a panangaro ed loob na maslak a pamilya. Balet, saray balitan nipaakar ed abuyak iran panamaley, panangabuso ed asawa, tan inkaindan odino naabuson ananak so pakapatnagan a nadedesdes iray pamilya natan, tan agmagenap iray natural a liknaan parad pamilya pian paeleten itan. (2 Timoteo 3:1-3) Pian peteg a napaaligwas so bilay na pamilya ra, nakaukolan ya agamilen na saray Kristiano so klase na aro ya ipapatnag nen Jehova tan si Jesus.—Efeso 5:21-27.
5. Siopa so kerewan na saray atateng na tulong diad panamabaleg ed ananak da, tan antoray resultan agamoran na dakel?
5 Momoriaen na saray Kristianon kaatengan iray ananak da bilang inmatalek nen Jehova, tan sikatoy kekerewan day tulong diad panamabaleg ed sikara. (Salmo 127:3-5; Uliran 22:6) Diad onian dalan et nababayuboan da so Kristianon aro, ya ontulong ed sikara pian nabantayan da iray ananak da manlapud makaderal ya impluensia a nayarin pakapatitan na saray kalangweran. Bilang resulta, naeksperiensia na dakel a Kristianon atateng so liket ya alikna met na sakey ya ina ed Netherlands. Kayari ton naimatonan so inkabautismoan na anak ton laki—sakey ed 575 ya indibidual ya abautismoan ed Netherlands nen katantaon—oniay insulat to: “Diad sayan bekta, maabig so resulta na impansakripisyok ed apalabas a 20 a taon. Amin a panaon tan biskeg—ontan met ed sakit na linawa, sagpot, tan ermen, so alingwanan la natan.” Agaylan liket to lapud mabulos a nandesisyon so anak ton laki a manlingkor ed si Jehova. Say pantok a 31,089 a manangipalapag a nanreport ed Netherlands nen katantaon so mangilaktip ed dakel nin imbangat na kaatengan da a mangaro ed si Jehova.
6. Panon a makatulong so Kristianon aro pian napabiskeg so bedber na panamaley?
6 Tinawag nen Pablo so aro bilang ‘singer ed inkayadyari,’ tan pansiansiaen na satan so panamaley anggaman ed maproblema iran panaon. (Colosas 3:14, 18, 19; 1 Pedro 3:1-7) Sanen impaiyaralan na Biblia ed saray Tastasi nen Jehova so sakey a laki ed Rurutu, sakey a melag ya isla a ngalngali 700 a kilometro manlapud Tahiti, pirmi so insumpa na akulaw to. Diad saginonor, inala na akulaw to iray anak da, insan tinmaynan, tan nanayam ira ed Tahiti. Siansian impanengneng na laki so panangaro to diad regular a pangipapawit toy kuarta tan tatawagan tora ed telepono pian amtaen to no walaray nakaukolan na akulaw to odino say ananak to. Kanian ginawa na sayan laki so anggaay nayarian to pian sumpalen iray obligasyon to bilang Kristiano. (1 Timoteo 5:8) Sikato so naynay a nampikasi a natugyop lamet komon so pamilya to, tan pinmawil so akulaw to ed saginonor. Sanen akapawil lay akulaw to, sikatoy tinrato to tekep na “aro, anos, kauyamoan.” (1 Timoteo 6:11) Nen 1998, sikato so abautismoan tan pirmi so panlikliket to sanen impaiyaralan na Biblia so akulaw to. Satan a panangiyaral so sakey ed 1,351 a nikokondukta ed teritoryan walad panangasikaso na sanga ed Tahiti nen imbeneg a taon.
7. Unong ed sakey a laki ed Alemanya, anto so amaelet ed panamaley to?
7 Diad Alemanya, sinumpa na sakey a laki so interes na akulaw to ed katuaan na Biblia lapud panisiaan ton papalikdoen labat na saray Tastasi nen Jehova so akulaw to. Balet diad saginonor et sinulat to imay Tasin inmunan akatongtong nen akulaw to: “Salamat ta inkabkabat yo so akulaw ko ed saray Tastasi nen Jehova. Diad pilimero et aburido ak lapud walaray makapuy a dengeldengel ko nipaakar ed sikara. Balet natan, lapud akaatendi ak la ed saray miting kaiba so akulaw ko, amoriak ya aliwa ak manaya. Amtak a say dedengelen ko et katuaan, tan nagmaliw a mas malet so panamaley mi.” Say 162,932 a Tastasi nen Jehova ed Alemanya—tan say 1,773 ed saray isla a walad panangasikaso na sanga na Tahiti—so mangilaktip ed dakel a pamilyan nankakasakey ed maridios ya aro.
Aroen Iray Kristianon Agagi Tayo
8, 9. (a) Siopa so mangibabangat ed sikatayo ya aroen so agagi tayo, tan pakiwasen itayo na aro a manggawa na anto? (b) Mangiter na alimbawa ed no panon a makatulong so aro ed saray agagi pian makapantutulongan ira.
8 Inkuan nen Pablo ed saray Kristiano a taga-Tesalonica: “Sikayon dili binangatan kayo la na Dios a mangaro ed sakey tan sakey.” (1 Tesalonica 4:9) On, saramay ‘binangatan nen Jehova’ so manaaroan ed balang sakey. (Isaias 54:13) Say aro ra so nipapatnag ed kiwas, unong ya impatnag nen Pablo sanen inkuanton: “Lapu ed aro magmaliw kayo ya ariripey sakey tan sakey.” (Galacia 5:13; 1 Juan 3:18) Alimbawa, gagawaen da iya sano bisitaen da iray mansasakit ya agagi, pasesegen so nagogonigon, tan tulongan iray makapuy. (1 Tesalonica 5:14) Say puron Kristianon aro tayo so ontulong ed ibulaslas na espiritual a paraiso tayo.
9 Diad Kongregasyon na Ancón—sakey ed 544 a kongregasyon diad Ecuador—impatnag na saray agagi so aro ra diad praktikal a paraan. Naandian ira na trabaho odino pambilay lapud kairapan ed pinansyal, kanian denesidi na saray manangipalapag so mananap na kuarta diad panlaklako ray tagano ed saray managsigay a taga-diman sano onsempet iratan kayari na sanlabin impansigay. Amin so akitulongan, pati ananak. Onggapo ira ed 1:00 na palbangon ta pian akaparaan laray tagano kasabi na 4:00 na kabuasan sano ompawil laray managsigay. Panaapagan na agagi so nalmoan dan kuarta unong ed pankaukolan da. Say ontan a pantutulongan ed balang sakey so angipatnag na puron Kristianon aro.
10, 11. Panon tayon nipatnag so aro ed saramay agtayo personal a kabkabat?
10 Balet, aliwa lambengat a saray Kristianon kabkabat tayo so aroen tayo. Inkuan nen apostol Pedro: “Aroen so intiron ulopan na saray agagi.” (1 Pedro 2:17, NW) Inaro tayo so amin ya agagi tayo lapud amin da et kapara tayon managdayew ed si Jehova a Dios. Diad panaon na kairapan et sakey iyan pankanawnawa pian nipatnag itan ya aro. Alimbawa, leleg na 2000 a serbisyon taon, pirmi so delap ed Mozambique, tan nanirap so dakel ed Angola lapud nagagawan guerra sibil. Say baleg a bilang na 31,725 ya agagi ed Mozambique tan say 41,222 ed Angola so naapektaan ed saratan ya inkagawa. Kanian, saray Tastasi ed kabangibang ya Abalaten Aprika so angipatulor na dakerakel a probisyon pian napakepa so gonigon na saray agagi ra ed saratan a dalin. Say inkamabulos dan manginagnag ed “sulok” da ed saray mankaukolan ya agagi ra so angipatnag na aro ra.—2 Corinto 8:8, 13-15, 24.
11 Napapatnagan met so aro sano onaayuda iray agagi a nanlapud dakel a bansa pian mangipaalagey na saray Kingdom Hall tan Assembly Hall ed mairap iran bansa. Sakey lan alimbawa et diad Solomon Islands. Anggaman ed kaguloan, walay 6-porsienton indaak na manangipalapag diad Solomon Islands nen katantaon, a walaan na pantok a 1,697. Implano ra so pampaalagey na Assembly Hall. Anggaman dakel a taga-isla so manataynan la ed bansa ra, walaray boluntaryon nanlapud Australia ya ontutulong ed panagpaalagey. Diad saginonor, nakaukolan lan onalis iray boluntaryo, balet nipasal laray agagi a taga diman a mangilaos ed pundasyon. Say tinuop lan balatyang a taglang (steel structure) na hall so impatulor a nanlapud Australia, tan say pakasumpal na sayan alay abig a bilding parad panagdayew—diad panaon a dakel a pampaalageyan na bilding so abandonado la—so maabig a pantasi nipaakar ed ngaran nen Jehova tan ed aro na saray agagi.
Singa say Dios, Aroen Tayo so Mundo
12. Panon tayon aligen si Jehova diad awawey tayo ed saramay agtayo kapananisiaan?
12 Kasin say aroen tayo lambengat et say pamilya tan kaagian tayo? Andi, no ‘aaligen tayo so Dios.’ Inkuan nen Jesus: “Ontanlay impangaro na Dios ed mundo, ya inter to so bogbogtong ya Anak to, pian siopaman a manisia ed sikato agnatawtaw, noag ingen wala so bilay ton andi-anggaan.” (Efeso 5:1; Juan 3:16) Singa si Jehova a Dios, maaro tayon onkiwas parad amin—pati saramay agtayo kapananisiaan. (Lucas 6:35, 36; Galacia 6:10) Nagkalalo la ed sayan pamaakaran, ipulong tayo so maong a balita na Panarian tan ibaga tayo ed arum so matalonggaring a panangaro na Dios ed sikara. Manresulta iya ed kilalaban na siopaman ya ondengel.—Marcos 13:10; 1 Timoteo 4:16.
13, 14. Anto so pigaran eksperiensia na agagi ya angipatnag na aro ed saray aliwan-Tastasi, anggaman ed pirmin panangisakripisyo ra?
13 Konsideraen pa so apatiran espisyal payunir a ministro diad Nepal. Niasain iraya ed sakey a syudad diad abalaten-sagur na bansa, tan diad apalabas a limaran taon, impatnag da so aro ra diad maanos ya impanpulong da ed syudad tan diad ararawi iran baryo. Pian nakobrian day teritorya ra, manbibisikleta ira ed loob na dakel ya oras diad kapetang na masulok a 100 degrees Fahrenheit. Say aro ra tan “seseg da a manggawa na maabig” so amawala na maong iran resulta sanen atugyop so sakey a grupo na panagaral na libro diad sakey ed saratan a baryo. (Roma 2:7) Nen Marso 2000, walay 32 a totoo a dinmengel ed publikon paliwawa na ombibisitan manangasikaso na sirkito. Say Nepal so walaan na pantok a 430 nen katantaon, a dinmaak na 9 porsiento. Si Jehova so mapatnag a mamebendision ed seseg tan aro na saray agagi ed satan a bansa.
14 Diad Colombia, walaray temporaryon espisyal payunir a nampulong ed saray Wayuu Indian. Pian nagawaan da iya, nakaukolan dan aralen so balon lenguahe, balet ta say maaron interes da so atumangan sanen walay 27 ya inmatendi ed publikon paliwawa anggaman ed biewbiew ya uran. Say maaron inkaseseg ya impanengneng na sarayan payunir so akatulong ed 5-porsiento ya indaak ed Colombia tan walay pantok a 107,613 a manangipalapag. Diad Denmark, labay ni na sakey ya akulaw lan agi so manginabang na maong a balita ed arum, balet ta sikato so agla makayari. Sikato so porsigidon nampulong ed saray interesado panamegley na sulat. Diad kaplesan, sikato so misusulatan ed 42 a totoo tan mangikokondukta na 11 a panangiyaral na Biblia. Sikato so kabiangan ed pantok a 14,885 a manangipalapag a nanreport ed Denmark nen katantaon.
Aroen Yoy Kakabusol Yo
15, 16. (a) Panon kalaknab so inkuan nen Jesus a nepeg a pagmaliwan na aro tayo? (b) Panon so maaron impideneng na saray responsablin agagi ed sakey a toon walaay palson akusasyon ed saray Tastasi nen Jehova?
15 Inkuan nen Jesus ed samay too a makabat ed Ganggan a say Samaritano so moriaen bilang maabagey ed kaparan too. Dia ed Sermon to ed Palandey, lalon pinalaknab nen Jesus so inkuanto: “Nadngelan yo lan asalita, Aroen moy kaparam a too, tan gulaen moy kabusol mo: Et ingen kuan ko ed sikayo, Aroen yo ray kabusol yo, tan pikasi [yo so] saray mamasegsegang ed sikayo: Pian nayarian yoy magmaliw ya anak ira nen Ama yon wala ed tawen.” (Mateo 5:43-45) Anggan walay onsumpa’d sikatayo, panggunaetan tayon “say maong so panaeg mo ed mauges.” (Roma 12:19-21) No posibli, inabang tayo ed sikara so mablin tuloy a kayarian tayo, say katuaan.
16 Diad Ukraine, sinaglawi na sakey ya artikulo ed peryodikon Kremenchuk Herald so Tastasi nen Jehova bilang mapeligron sekta. Seryoso iya lapud diad Europa et ontan so ibabaga na arum nipaakar ed saray Tastasi nen Jehova pian tangguyoren da so totoo a nepeg a pegetan odino sebelan iray kimey na saray Tastasi. Kanian, inasinggeran so editor tan kinerew ed sikato a mangipalapag na sakey a nisulat a balikas a mangorehi ed artikulo. Sikato so inmabobon, balet tekep na satan ya artikulo, inimprinta to so sakey a balikas a say inmunan artikulo et nibase’d katuaan. Kanian sikatoy inasinggeran lamet na saray responsablin agagi tekep na dakel nin impormasyon. Diad kaunoran, amoria lanlamang na editor ya aliwa so inmunan artikulo, tan walay impalapag to a bababawien toy inkuan to. Say prangka tan mapangasin impideneng da ed sikato so sakey a maaron paraan pian nauksoy iyan situasyon, tan maong so nansumpalan na satan.
Panon Tayon Nabayuboan so Aro?
17. Anto so mangipabitar ya aglawas mainomay so onkiwas a maaro ed arum?
17 Sano nianak so sakey ya ugaw, tampol ya ar-aroen itan na atateng. Balet ta aglawas nisipor so maaron pideneng ed saray wala la’d edad. Satan so rason no akin a nayarin aminpigan imbaga ed sikatayo na Biblia a manaaroan ed balang sakey—sakey a bengatlan nepeg tayon pankimeyan. (1 Pedro 1:22; 4:8; 1 Juan 3:11) Amta nen Jesus a nasubok so panangaro tayo sanen inkuanton nepeg tayon perdonaen so agi tayo “angga ed maminpitomplo a pito.” (Mateo 18:21, 22) Sikatayo so pinaseseg met nen Pablo a “mantetepelan.” (Colosas 3:12, 13) Agpankelawan no akin a nibaga ed sikatayon: “Gegemtanen yo so aro.” (1 Corinto 14:1, NW) Panon tayon nagawaan iya?
18. Anto so ontulong ed sikatayo pian nabayuboan so aro ed arum?
18 Unona, lawas tayon nodnonoten so aro tayo ed si Jehova a Dios. Sayan aro so mabiskeg a tulong pian naaro tayo so kapara tayon too. Akin? Lapud sano gawaen tayo itan, mangipatnag iyan maong ed personalidad na mangatatawen ya Ama tayo tan kigloriaan tan kirayewan to itan. (Juan 15:8-10; Filipos 1:9-11) Komadua, nayarian tayon moriaen iray bengatla unong ed panmoria nen Jehova. No makapankasalanan itayo, mankasalanan itayo ed si Jehova; ingen, naynay to itayon peperdonaen tan tuloytuloy to itayon aaroen. (Salmo 86:5; 103:2, 3; 1 Juan 1:9; 4:18) No bayuboan tayo so panmoria a singa si Jehova, sikatayo so onkiling a mangaro ed arum tan mamerdona ed saray kasalanan da ed sikatayo. (Mateo 6:12) Komatlo, makapideneng itayo ed arum unong ed labay tayon pideneng da’d sikatayo. (Mateo 7:12) Lapud ag-itayo ayadyari, naynay tayon nakaukolan so panamerdona. Alimbawa, sano walay nibaga tayon makapasakit ed arum, iilaloan tayo a nonoten dan balang sakey so panapanaon a makapankakasalanan ed dila. (Santiago 3:2) No labay tayon maaro so pidedeneng na arum ed sikatayo, nepeg a maaro met so pideneng tayo’d sikara.
19. Panon tayon nagamoran so tulong na masanton espiritu diad pamayubo ed aro?
19 Komapat, sarag tayoy onkerew na tulong na masanton espiritu lapud say aro et kabiangan na bungay espiritu. (Galacia 5:22, 23) Say pikakaaro, liknaan ed pamilya, tan romantikon aro so mabetbet a nikasiporan. Balet nakaukolan tayo so tulong na espiritu nen Jehova ta pian nabayuboan tayo so aro a walad si Jehova, say aro ya ayadyarin bedber na pankakasakey. Nayarian tayoy onkerew na tulong na masanton espiritu diad pambasa ed apuyanan a Biblia. Alimbawa, no aralen tayo so impanbilay nen Jesus, naimano tayo no panon so impideneng to’d totoo, tan sikatoy naaralan tayon aligen. (Juan 13:34, 35; 15:12) Niarum ni, sarag tayoy onkerew na masanton espiritu ed si Jehova, nagkalalo ed saray situasyon a naiirapan tayon onkiwas ed maaron dalan. (Lucas 11:13) Diad kaunoran, nagegemtan tayo so aro diad pansiansia ed Kristianon kongregasyon. Say pakapilimog ed maaron agagi tayo so ontulong pian nabayuboan tayoy aro.—Uliran 13:20.
20, 21. Anton matalonggaring a pakapatnagan na aro so ginawa na saray Tastasi nen Jehova legan na 2000 a serbisyon taon?
20 Katantaon, wala so pantok a 6,035,564 a manangipalapag na maong a balita diad intiron mundo. Angusar iray Tastasi nen Jehova na dagup a 1,171,270,425 ya oras a manaanap ed totoo a panginabangan day maong a balita. Lapud aro, inanosan da so petang, uran, tan betel diad panusumpal da’d sayan kimey. Lapud aro, apakiwas iran mangitongtong ed satan diad saray kaeskuelaan da tan katrabahoan da tan onsingger ed saray agda kabkabat diad karsada tan arum niran pasen. Dakel ed saray lalaen na Tastasi et agmanginennenen, walara met so onsusumpa. Balet, walaray angipatnag na interes, kanian walay 433,454,049 a panagpawil, tan 4,766,631 a panangiyaral na Biblia so nikokondukta. *
21 Agaylan pakapatnagan iyan amin na aro na Tastasi nen Jehova ed Dios tan ed kapara ran totoo! Agbalot ombetel itan a panangaro. Matalek itayo a napamintuan ed 2001 a serbisyon taon so mas babaleg a pantasi ed katooan. Komon ta mantultuloy so bendision nen Jehova ed saray matoor tan maseseg a managdayew to legan a ‘gagawaen da so amin a bengatla tekep na aro’!—1 Corinto 16:14.
[Paimano ed leksab]
^ par. 20 Parad kompleton detalyi na Report ed 2000 a Serbisyon Taon, nengnengen so tsart diad pahina 18-21.
Kasin Nipaliwawa Yo?
• Siopa so aaligen tayo sano aaroen tayo so kapara tayon too?
• Kaunongan kalaknab so nepeg a panangaro tayo?
• Anto so pigaran eksperiensia a pakapatnagan na Kristianon aro?
• Panon tayon nabayuboan so Kristiano aro?
[Tepetepet Parad Panagaral]
[Tsart ed pahina 18-21]
2000 SERBISYON TAON A REPORT NA SARAY TASI NEN JEHOVA ED SANKAMUNDOAN
(Nengnengen so tomo)
[Saray litrato ed pahina 15]
Say Kristianon aro so mamaelet ed sakey a pamilya
[Saray litrato ed pahina 17]
Say aro so mamakiwas ed sikatayo a manginabang na ilalo tayo ed arum