Espisyal ya Anunsio

DIAD impangisampot ed tinaon a miting na Watch Tower Bible and Tract Society of Pennsylvania nen Oktubre 7, 2000, walay espisyal ya anunsio a ginawa na tsirman, si John E. Barr na Mananguley ya Ulop. Sayan anunsio so nibase ed saray paliwawa di Theodore Jaracz tan Daniel Sydlik ed asasakbay na saman ya agew.​—Nengnengen so pahina 12-16 tan 28-31 ed sayan magasin.

Diad impangidanet ed importantin tuloy a punto, onia so inyanunsio nen Brother Barr: “‘Say matoor tan makabat ya aripen’ tan say Mananguley ya Ulop so angimatalekan ed intereses ya atagtagey a tuloy nen saramay nipabtang ed legal iran korporasyon. Nidatak ed saray karta na balang sakey ed saratan ya ahensia iray pamaakaran ya ageteray panangontrol da. Balet, say Uloen tayo, si Jesu-Kristo, so anuro ed matoor ya aripen a klase parad amin a ‘kayarian,’ to odino ed intereses na Panarian dia ed dalin.”​—Mateo 24:45-47.

Nipaakar ed korporasyon ed Pennsylvania, onia so inyarum nen Brother Barr: “Nanlapula’d impagmaliw na satan ya inkorporasyon nen 1884, say Watch Tower Bible and Tract Society of Pennsylvania so walaan na importantin betang ed modernon-agew ya awaran tayo. Anggaman ontan, satan so legal labat ya ahensia ya usaren na ‘matoor tan makabat ya aripen’ sano kaukolan itan.”

Diad saray diskurso ra, impaliwawa di Brother Sydlik tan Jaracz ya anggaman say “matoor tan makabat ya aripen” so angimatalekan ed amin a mangaraldalin a kayarian na Katawan, agmangamper itan ed aripen a klase a mangiyabuloy ed kualipikadon lalaki manlapud limog na “arum a karnero” a mangasikaso ed pigaran gendat lan administratibo iran responsabilidad. (Juan 10:16) Nisay wala so antokaman a Makasulatan a rason a mangipilit ya amin odino siopaman ed saray direktor na legal iran ahensia ya uusaren na Tastasi nen Jehova et kaukolan ya alanaan iran Kristiano.

Inkuan nen Brother Barr ed saray dumerengel a diad agano ni, walaray pigaran membro na Mananguley ya Ulop na Tastasi nen Jehova a manlilingkor bilang direktor tan opisyales so boluntaryon inmekal manlapud board of directors na amin a korporasyon ya uusaren na “say matoor tan makabat ya aripen” diad Estados Unidos. Saray napanmatalkan ya agagin lalaki manlapud arum a karneron klase so imbotos bilang kasandi.

Peteg a makagungguna iyan desisyon. Lapud saya et lalon dakel a panaon so nausar na saray membro na Mananguley ya Ulop ed panangiparaan na espiritual a tagano tan ed panangasikaso ed espiritual iran pankaukolan na sankamundoan ya impanaagi.

Bilang konklusyon, inkuan na tsirman ed saray aliketan ya inmatendi: “Anggaman saray nanduruman legal tan administratibon kimey so nipabtang ed saray eksperiensiadon manangasikaso, . . . amin da so manserbi ed silong na espiritual a panangidirehi na Mananguley ya Ulop. . . . Amin tayo so sipipikasin manilalo ed panamendision nen Jehova ed nankakasakey iran sagpot tayo ed panggawa na linawa to, parad kigalangan tan kigloriaan na matalonggaring a ngaran to.”