Mantultuloy a Mibansag ed Organisasyon nen Jehova
Mantultuloy a Mibansag ed Organisasyon nen Jehova
“Say Dios na kareenan . . . yadyarien to kayo komon ed ganaganan maabig a bengatla a gawa pian gawaen yo komon so linawa to.”—HEBREOS 13:20, 21.
1. Anto so bilang na populasyon na mundo, tan pigara so abilang a membro na pigaran relihyon?
NEN taon 1999, inmabot ed anemiran bilyon so populasyon na mundo! Unong ed report na The World Almanac, diad sayan bilang et ngalngalin 1,165,000,000 so Muslim; 1,030,000,000 so Romano Katoliko; 762,000,000 so Hindu; 354,000,000 iray Buddhista; 316,000,000 iray Protestanti; tan 214,000,000 iray Orthodox.
2. Anto so nibaga nipaakar ed relihyoson kipapasen natan?
2 Nipaakar ed nagagawan inkaapag-apag tan pakakakewkew na relihyon natan, amin kasi na sarayan minilyon so onkikiwas unong ed linawa na Dios? Andi, “ta say Dios aliwan Dios na kolkol, noag kareenan.” (1 Corinto 14:33) Diad biek a dapag, komusta so internasyonal ya impanaagi na saray lingkor nen Jehova? (1 Pedro 2:17) Say maalwar a panusisa so mamaneknek a ‘yadyarien na Dios na kareenan so ganaganan maabig a bengatla a gawa pian nagawaan so linawa to.’—Hebreos 13:20, 21.
3. Anto so agawa ed Jerusalem nen Pentecostes 33 K.P., tan akin?
3 Siempre, aliwan basiyan so bilang na saramay mililimog ed saray Tastasi nen Jehova ta pian nadetermina no panggayagaan day abobon na Dios; nisay pandinayewan na Dios iray estadistika. Agto pinili iray Israelita lapud ta sikaray “dakdakel a bilang” ed saray totoo. Diad tua, sikaray ‘sankaraisetan.’ (Deuteronomio 7:7) Balet lapud agnanmatoor so Israel, nen Pentecostes 33 K.P. et inyalis nen Jehova so pabor to ed balon kongregasyon a tugyopen na saray patumbok nen Jesu-Kristo. Sikaray alanaan na masanton espiritu nen Jehova tan maseseg ya angiyabawag na katuaan ed arum nipaakar ed Dios tan ed Kristo.—Gawa 2:41, 42.
Tuloytuloy ya Onaabanti
4. Akin a nibaga yon say inmunan Kristianon kongregasyon so nantultuloy ya inmabanti?
4 Nen inmunan siglo, say Kristianon kongregasyon so nantultuloy ya inmaligwas, alukasan iray balon teritorya, nanggawa iray babangatan, tan akagamor na babaleg a pakatalos nipaakar saray gagala na Dios. Nantultuloy ya akibansag iray inmunan Kristiano ed espiritual a pakaliwawaan a niparungtal panamegley na saray sulat a pinuyanan na Dios. Lapud apakiwas ira ed imbisita na saray apostol tan arum ni, asumpal da so ministeryo ra. Nisulat iyan amin parad sikatayo diad Kristianon Griegon Kasulatan.—Gawa 10:21, 22; 13:46, 47; 2 Timoteo 1:13; 4:5; Hebreos 6:1-3; 2 Pedro 3:17, 18.
5. Akin ya onaagliwas natan so organisasyon na Dios, tan akin a nepeg itayon mantultuloy a mibansag ed satan?
5 Singa saray inmunan siglon Kristiano, saray kaplesan a Tastasi nen Jehova so inmaligwas manlapud melag a gapoan. (Zacarias 4:8-10) Manlapu la’d pansamposampot na koma-19 a siglo, wala so malinew ya ebidensia a say espiritu nen Jehova so walad organisasyon to. Lapud nanmatalek itayo, aliwan diad pakayari na too, noagta diad panangiwanwan na masanton espiritu, nantultuloy itayon inmaligwas ed pakatalos tayo ed Kasulatan tan ed panggawa na linaway Dios. (Zacarias 4:6) Natan ta wala itayo la’d ‘kaunoran iran agew,’ importanti so tuloytuloy a pibansag ed onaaligwas ya organisasyon na Dios. (2 Timoteo 3:1-5) Say panggawa ed satan so ontulong ed sikatayo pian napansiansia tayon mabilay so ilalo tayo tan mibiang ed panangipulong ed niletneg lan Panarian na Dios sakbay ya onsabi so anggaan na sayan sistema na bengabengatla.—Mateo 24:3-14.
6, 7. Anton taloran aspekto so konsideraen tayo ya inaligwasan la na organisasyon nen Jehova?
6 Walad limog tayo iramay abayaglan mililimog ed organisasyon nen Jehova nanlapula nen dekaday 1920, 1930, tan 1940. Legan na saraman ya asasakbay a taon, siopa ed limog tayo so makaisip ed makatantandan imbulaslas tan progresibon inyaligwas na organisasyon anggad sayan panaon? Isipen pa iray makatantandan ebento ya agawa ed modernon agew ya awaran tayo! Talagan makapatumang ed espiritual so panmolimoli ed agawaan la nen Jehova diad panamegley na totoo to a naorganisa ed teokratikon paraan.
7 Si David nensaman so mandinayew a maong sanen minolimoli toray makapakelkelaw a kimey nen Jehova. “No komon ta ipaliwawak tan salitaen ko ra,” kuanto, “dakel nira nen saray nayari a bilangen.” (Salmo 40:5) Nipapaarap itayo met ed parehon limitasyon, ya agtayo nidalatdat so amayamay a matalonggaring tan makapadinayew iran gawa nen Jehova ed panaon tayo. Anggaman kuan, konsideraen tayo so taloran aspekto ya inaligwasan la na organisasyon nen Jehova: (1) say progresibon espiritual a pakaliwawaan, (2) say inmaligwas tan apalaknab a ministeryo, tan (3) say nipanpanaon iran pananguman ed saray pananontonan na organisasyon.
Misalsalamat ed Espiritual a Pakaliwawaan
8. Mitunosan ed Uliran 4:18, anton espiritual a pakaliwawaan so akatulong ed sikatayo pian natebek so nipaakar ed Panarian?
8 Nipaakar ed progresibon espiritual a pakaliwawaan, apaneknekan a tua so Uliran 4:18. Oniay kuan na satan: “Say basbas na matunong sikato so singa liwawa na kabuasan, ya onsinag ya onsinag angga ed nagnap ya agew.” Agaylay pisalsalamat tayo ed progresibon espiritual a pakaliwawaan a naeeksperiensia tayo! Diad kombension ed Cedar Point Ohio nen 1919, nipabitar so Panarian na Dios. Sayan Panarian so uusaren nen Jehova pian pasantosen toy ngaran to tan iyalangon so inkasoberano to. Diad tua, say espiritual a pakaliwawaan so akatulong ed sikatayon manebek a manlapud Genesis anggad Apocalipsis et pepekderan na Biblia so gagala nen Jehova a pasantosen so ngaran to panamegley na Panarian ya uleyan na Anak to. Ditan akadependi so maglorian ilalo parad amin a manangaro na inkatunong.—Mateo 12:18, 21.
9, 10. Nen dekada na 1920, anto so naaralan nipaakar ed Panarian tan ed say duaran mankontraan ya organisasyon, tan panon iyan makatulong?
9 Diad kombension ed Cedar Point nen 1922, pinaseseg na manunaan ya espiker, si J. F. Rutherford so totoo na Dios ya “iyabawag, iyabawag, iyabawag, so Ari tan say panarian to.” Diad artikulon “Birth of the Nation,” a nipalapag ed The Watch Tower na Marso 1, 1925, nipaimano so aralem a pakatalos ed espiritual nipaakar ed saray propesiya ya angipabitar ed inkiletneg na Panarian na Dios nen 1914. Atebek met ed dekada na 1920 a wala so duaran mankontraan ya organisasyon—say organisasyon nen Jehova tan say organisasyon nen Satanas. Wala so bakal ed baetan dan dua, tan niwala itayo ed mananalon dapag no mantultuloy itayon mibansag ed organisasyon nen Jehova.
10 Panon ya akatulong ed sikatayo iyan espiritual a pakaliwawaan? Lapud say Panarian na Dios tan say Arin Jesu-Kristo et aliwan kabiangan na mundo, ag-itayo met nayarin magmaliw a kabiangan na satan. Diad pansiansia tayon biig ed mundo et nipanengneng tayo a wala itayo ed dapag na katuaan. (Juan 17:16; 18:37) Sano imanoen tayo so makawetwet iran problema a manasalot ed sayan marelmeng a sistema, agaylay pisalsalamat tayo ta ag-itayo kabiangan na organisasyon nen Satanas! Tan agaylan apaboran itayo lapud maligen itayo ed espiritual diad loob na organisasyon nen Jehova!
11. Anton Makasulatan a ngaran so inadapta na totoo na Dios nen 1931?
11 Diad kombension ed Columbus, Ohio nen 1931, ginawa so matukoy ya impangiyaplika ed Isaias 43:10-12. Inadapta na saray Estudyante na Biblia so pakabidbiran a ngaran a Tastasi nen Jehova. Agaylan pribilihyo so pangipaamta ed ngaran na Dios ta pian say arum et nayarin ontawag ed satan ta pian nisalba!—Salmo 83:18; Roma 10:13.
12. Anton espiritual a pakaliwawaan nipaakar ed baleg ya ulop so nitarya nen 1935?
12 Sakbay na dekaday 1930, dakel ed totoo na Dios so medyo manduaruwa nipaakar ed ilalo ra ed arapen a bilay. Arum so nampirawat la ed bilay diad tawen balet ta asagyat ira ed saray bangat na Biblia nipaakar ed paraiso ed dalin. Diad kombension ed Washington, D.C. nen 1935, makapalikliket a naamtaan a say baleg a karaklan, odino baleg ya ulop, a walad Apocalipsis kapitulo 7 so manutukoy ed grupo a walaan na mangaraldalin ya ilalo. Nanlapula’d saman et mapmaples so katitipon na baleg ya ulop. Agtayo ta misalsalamat ta say pakabidbiran ed baleg ya ulop et aliwa lan misteryo ed sikatayo? Say inkapeteg nipaakar ed totoon natitipon ed baleg a bilang manlapud amin a nasyon, tribu, tan pansasalita so mamakiwas ed sikatayo a papelesen so kurang tayo legan a mibabansag itayo ed organisasyon nen Jehova.
13. Anton baleg ya isyu so nipabitar diad kombension ed St. Louis nen 1941?
13 Say baleg ya isyu a nepeg ya imanoen na sosyedad na too so nipabitar ed kombension diad St. Louis, Missouri nen 1941. Say sankatalbaan ya inkasupremo, odino inkasoberano. Saya so isyu a nepeg a nasolbar a tampol, tan say baleg tan makapataktakot ya agew a nagawa so maples ya onsasabi! Nipaimano met nen 1941 so misiglaotan ya isyu nipaakar ed integridad, ya angiyabuloy ed sikatayo a mangipatnag ed no iner so dapagan tayo bilang indibidual nipaakar ed inkasoberano na Dios.
14. Diad internasyonal a kombension nen 1950, anto so naaralan nipaakar ed saray prinsipe ya asalambit ed Isaias 32:1, 2?
14 Diad internasyonal a kombension ed New York City nen 1950, saray prinsipe ya asalambit diad Isaias 32:1, 2 so malinew ya atalosan. Saman so makapalikliket a bekta sanen nansalita si Brother Frederick Franz nipaakar ed satan a tema tan impaliwawa ton saray prinsipe ed balon dalin et walad limog tayo. Diad saman a kombension tan diad saray tinmumbok ni, wala so dakerakel a sinag na espiritual a liwawa. (Salmo 97:11) Agaylay pisalsalamat tayo a say basbas tayo et “singa liwawa na kabuasan, ya onsinag ya onsinag angga ed nagnap ya agew”!
Iyaabanti ed Ministeryo Tayo
15, 16. (a) Panon itayon inmabanti ed ministeryo tayo legan na dekaday 1920 tan 1930? (b) Antoran publikasyon so amaligsa ed Kristianon ministeryo ed apalabas iran dekada?
15 Say komaduan paraan ya inabantian na organisasyon nen Jehova et misiglaotan ed manunan kimey tayo a panangipulong na Panarian tan panaggaway babangatan. (Mateo 28:19, 20; Marcos 13:10) Pian nagawaan iyan kimey, lawas ipupurek na organisasyon ed sikatayo so kaimportantian na pamalaknab ed ministeryo tayo. Nen 1922 et amin a Kristiano so apaseseg a mibiang ed panagpulong a kimey. Responsabilidad a mismo na kada sakey so pangisindag ed liwawa to tan diad ontan et nawalaan na personal a pibibiang ed panangipulong na katuaan. (Mateo 5:14-16) Nen 1927, agawa iray kundang pian igana so Simba bilang agew parad lawak na serbisyo. Ginmapo nen Pebrero 1940, nagmaliw lan kaslakan so pakanengneng ed saray Tastasi diad saray karsada a kawalaan na saray negosyo a mangiyoopresi na The Watchtower tan Consolation (natan et Awake!).
16 Apawala nen taon 1937 so bokletan Model Study, a mangidadanet ed pankaukolan na saray panagpawil ta pian nibangat ed arum so katuaan na Biblia. Diad saray taon kayari na saman, nidanet a maong so panangiyaral na Biblia. Apaligsa iyan nengneng na ministeryo tekep na inkipaway na libron “Let God Be True” nen 1946 tan say Say Katuaan a Mangitonton ed Andi-anggaan a Bilay nen 1968. Diad kaplesan, uusaren tayo so libron Pikakabat a Mangitonton ed Andi-Anggaan a Bilay. Say pangobri ed sayan materyal so mangiletneg na malet a Makasulatan a pundasyon ed panaggawa na babangatan.
Onaabanti Tekep na Saray Pananguman ed Pananontonan na Organisasyon
17. Mitunosan ed Isaias 60:17, panon ya inmaligwas so organisasyon nen Jehova?
17 Say komatlon paraan ya inaligwasan na organisasyon nen Jehova et nipaakar ed saray pananguman ed pananontonan na organisasyon. Unong ed Isaias 60:17, oniay insipan nen Jehova: “Lapu ed gansa mangiyakar ak naani na balitok, et lapu ed balatyang mangiyakar ak naani na pilak, et lapu ed kiew mangiyakar ak na gansa, tan lapu ed saray bato mangiyakar ak na balatyang. Et gawaen ko naani met so saray panuleyan mo [“manangasikasom,” NW] a deen, tan saray manamairap [“manangipabtang,” NW] mo gawaen ko ra a matunong.” Pian makapitunosan ed sayan propesiya, ginawa iray kundang pian napaaligwas so panangasikaso ed kimey a panangipulong na Panarian tan ed panagpastol ed pulok.
18, 19. Antoran pananguman ed pananontonan na organisasyon so niwala ed loob na dakel lan taon?
18 Nen 1919 aturo so service director ed kada kongregasyon a mangorganisa ed lawak na serbisyo. Saya so amaligsa ed ministeryo tayo ed lawak. Say panangibotos ed saray mamatatken tan ministeryal a lingkor ed saray kongregasyon so inekal la nen 1932, a mananda ed impangiwaklit tayo ed saray demokratikon paraan. Walay sananey nin makatantandan adampot nen 1938 sanen ginmapon turoen so amin a lingkor ed kongregasyon a nagkalalon mitunosan ed saray uksoyan diad saray teokratikon pananuro nen asasakbay a Kristianon kongregasyon. (Gawa 14:23; 1 Timoteo 4:14) Nen 1972 saray manangasikaso tan ministeryal a lingkor so tinuron manserbi, unong ed inkaturo na saray lalaki ed limog na inmuunan Kristianos. Imbes a sakey labat a laki so manserbi bilang manangasikaso ed sakey a kongregasyon, ipapabitar na Filipos 1:1 tan arum niran teksto a saramay makakapet ed Makasulatan iran kakaukolanen parad saray manangasikaso et tugyopen na sakey ya ulop na mamatatken.—Gawa 20:28; Efeso 4:11, 12.
19 Nen 1975 et inyaplika so sakey ya uksoyan parad saray komite na Mananguley ya Ulop na saray Tastasi nen Jehova pian mangasikaso ed sankamundoan iran kimey na organisasyon na Dios. Aturo iray Branch Committee pian mangasikaso ed kimey diad nasasakopan da iran teritorya. Nanlapula’d saman, say imano so niyapasakey ed panamasimpli ed kimey diad saray hedkuarter tan diad saray sanga na Watch Tower Society ta pian “naseguro so nagkalalon importanti iran bengatla.” (Filipos 1:9, 10, NW) Saray responsabilidad a nipasakbat ed saray katambayan a pastol nen Kristo so manasaglawi ed panangidaulo ed panag-ebanghelyon kimey, panagbangat ed loob na kongregasyon, tan manepeg a panagpastol ed pulok na Dios.—1 Timoteo 4:16; Hebreos 13:7, 17; 1 Pedro 5:2, 3.
Aktibon Panangidaulo nen Jesus
20. Say pantultuloy a pibansag ed organisasyon nen Jehova so mankaukolan na pamidbir ed anton betang nen Jesus?
20 Say pantultuloy a pibansag ed onaaligwas ya organisasyon nen Jehova et kakaukolanen toy pamidbir ed impabtang na Dios a betang nen Jesu-Kristo bilang “ulo na kongregasyon.” (Efeso 5:22, 23, NW) Makatantanda met so nibaga ed sikatayo diad Isaias 55:4: “Nia, sikato so inter ko [Jehova] a nipaakar a tasi ed saray baley a pangulo tan managganggan ed saray baley.” Maseguron amta nen Jesus no panon so mangidaulo. Kabat to met iray karnero to, tan saray gawa ra. Diad tua, sanen sinuri to so pitoran kongregasyon ed Asia Minor, oniay aminlima ton imbalikas: ‘Amtak iray gawa yo.’ (Apocalipsis 2:2, 19; 3:1, 8, 15) Amta met nen Jesus iray pankaukolan tayo, a singa say Ama to, si Jehova. Sakbay ton imbalikas so Modelon Pikakasi, inkuan nen Jesus: “Si Ama yo amta to ray antokaman a kaukolan yo, ed arapen a mankerew kayo ed sikato.”—Mateo 6:8-13.
21. Panon a nipatnag so panangidaulo nen Jesus ed Kristianon kongregasyon?
21 Panon a nipatnag so panangidaulo nen Jesus? Sakey la et diad panamegley na saray Kristianon manangasikaso, saray “langkap a lalaki.” (Efeso 4:8, NW) Ililitrato na Apocalipsis 1:16 iray alanaan a manangasikaso a walad nikawanan a lima nen Kristo, walad panangontrol to. Natan, iwawanwan nen Jesus so uksoyan nipaakar ed saray mamatatken, balanglan saratan a lalaki so walaan na mangatatawen odino mangaraldalin ya ilalo. Unong a nipaliwawa la ed akadkaunan artikulo, sikara so aturo panamegley na masanton espiritu a mitunosan ed saray Makasulatan a kakaukolanen. (1 Timoteo 3:1-7; Tito 1:5-9) Nen inmunan-siglo, sakey a grupo na mamasiken ed Jerusalem so anugyop ed mananguley ya ulop a walaan na panangasikaso ed saray kongregasyon tan ed inkalapagan a panangipulong ed Panarian. Ontan met so pangaligan a tutumboken ed loob na organisasyon nen Jehova natan.
Mantultuloy a Mibansag!
22. Anton tulong so itatarya na Mananguley ya Ulop?
22 Saray intereses na Panarian diad dalin so nimatalek ed “matoor tan makabat ya aripen,” ya irerepresenta na Mananguley ya Ulop na saray Tastasi nen Jehova. (Mateo 24:45-47) Say Mananguley ya Ulop so manunan mangaasikaso ed panangitarya na espiritual a bilin tan direksion ed Kristianon kongregasyon. (Gawa 6:1-6) Balet, sano saray agagi et naapektaan na kalamidad, kekerewen na Mananguley ya Ulop ed sakey odino dakel nin legal ya ahensia pian mangitarya na tulong tan mangapiger odino mangipaalagey ed saray aderal ya ayaman tan saray Kingdom Hall. Sano walaray Kristiano a papairapen odino papasegsegangen, walaray kundang a gawaen pian pabiskegen ira ed espiritual. Tan “diad magulon panaon,” amin a sagpot so gagawaen pian mantultuloy ya onabanti so panagpulong a kimey.—2 Timoteo 4:1, 2.
23, 24. Antokaman so onsabi ed totoo to, anto so tuloytuloy ya itatarya nen Jehova, tan anto so nepeg a determinasyon tayo?
23 Antokaman so onsabi ed totoo to, si Jehova so tuloytuloy a mangitatarya na espiritual a tagano tan nakaukolan a direksion. Mangiiter met so Dios na pakatebek tan aralem a pakatalos ed saray responsablin agagi pian iparaan ira ed nagkalalon iyaabanti tan pananguman diad teokratikon organisasyon. (Deuteronomio 34:9; Efeso 1:16, 17) Seguradon itarya nen Jehova so nakaukolan tayo pian nasumpal tayo so niganggan ed sikatayo a panaggaway-babangatan tan sumpalen so ministeryo tayo ed sankamundoan.—2 Timoteo 4:5.
24 Walaan itayo na nagnap a kompiyansa ya agbalot ikaindan nen Jehova so matoor a totoo to; iliktar to ra ed onsasabin ‘baleg a kairapan.’ (Apocalipsis 7:9-14; Salmo 94:14; 2 Pedro 2:9) Walad sikatayo so amin a rason pian mantinien so niwala la’d sikatayon kompiyansa a manpekder anggad kasampotan. (Hebreos 3:14) Komon ta determinado tayo sirin a mantultuloy a mibansag ed organisasyon nen Jehova.
Panon Yon Ebatan?
• Akin a nibaga tayon mantutultuloy ya onaabanti so organisasyon nen Jehova?
• Anto so mamaneknek a panggagayagaan na totoo na Dios so progresibon espiritual a pakaliwawaan?
• Panon a niwala iray aligwas ed Kristianon ministeryo?
• Antoran nipanpanaon a pananguman so ginawa ed saray pananontonan na organisasyon ed limog na saray lingkor nen Jehova?
[Tepetepet Parad Panagaral]
[Litrato ed pahina 17]
Singa si David, agtayo sarag ya isalaysay so amin a makapakelkelaw iran gawa nen Jehova
[Litrato ed pahina 18]
Say pulok na Dios so agunggunaan ed nipanpanaon iran pananguman ed saray pananontonan na organisasyon