No Panon a Miduma so Mananguley ya Ulop ed Legal a Korporasyon

NANLAPULA nen Enero 1885 et gagawaen iray tinaon a miting na Watch Tower Bible and Tract Society of Pennsylvania. Sanen peles a nagagaway panagtipon ed saray alanaan a Kristiano nen mansamposampot lay koma-19 a siglo, saray direktor tan opisyales ed sayan korporasyon so walaan na mangatatawen ya ilalo. Diad tua, onia so naynay lawarin kipapasen.

Nilikud ed sakey. Nen 1940, si Hayden C. Covington​—say legal counsel na Sosyedad ed saman tan kabiangan na “arum a karnero” a walaan na mangaraldalin ya ilalo​—so niboton direktor na Sosyedad. (Juan 10:16) Sikatoy nanserbi bilang bise presidenti na Sosyedad manlapud 1942 anggad 1945. Diad saman a panaon, si Brother Covington so inmekal bilang direktor pian ontulok ed ompatnag a linawa nen Jehova ed saman​—ya amin a direktor tan opisyal na korporasyon ed Pennsylvania et kaukolan ya alanaan iran Kristiano. Sinalatan nen Lyman A. Swingle si Hayden C. Covington bilang kabiangay board of directors, tan si Frederick W. Franz so niboton bise presidenti.

Akin ya impasen na saray lingkor nen Jehova ya amin iray direktor tan opisyal na Watch Tower Bible and Tract Society of Pennsylvania et kaukolan ya alanaan iran Kristiano? Lapud diad saman a panaon et maapit a nisiglaot iray board of director tan opisyales na korporasyon ed Pennsylvania diad Mananguley ya Ulop na Tastasi nen Jehova, a lawas intiramintin tugyopen na alanaan na espiritu a lalaki.

Sakey a Maawaran a Tinaon a Miting

Diad tinaon a miting a ginawa nen Oktubre 2, 1944, diad Pittsburgh, inkana na saray membro na korporasyon ed Pennsylvania so anemiran resolusyon a nan-amenda ed karta na satan. Unong ed karta, say panagbotos so nipagamor ed saray mangidodonar na pundo parad kimey na Sosyedad, balet ta inekal itan a probisyon lapud komatlon impan-amenda. Onia so impaimano na report ed saman a tinaon a miting: “Saray membro ed Sosyedad so nigeter ed ag-onsulok a 500 . . . Kada apili et nepeg a sigpot-panaon a lingkor na Sosyedad odino part-time a lingkor na company [kongregasyon] na tastasi nen Jehova tan nepeg a pakapatnagan na espiritu na Katawan.”

Unong ed satan, saray direktor na Sosyedad so kaukolan ya ibotos na saray indibidual a sigpot a debosyonado ed si Jehova, kaunongan man so kabaleg na kuarta ya indonasyon da parad kiyabanti na kimey na Panarian. Saya so apaneknekan a mitunosan ed kalkalna iran iyaaligwas a nipasakbay diad Isaias 60:17, ya onia so nabasa tayo unong ed New World Translation: “Imbes a gansa mangiyakar ak na balitok, tan imbes a balatyang mangiyakar ak naani na pilak, tan imbes a kiew, gansa, tan imbes a batobato, balatyang; tan manuro ak na kareenan bilang saray manangasikaso yo tan inkatunong bilang saray manangipabtang na kimey yo.” Diad panutukoy ed “saray manangasikaso” tan “saray manangipabtang na kimey,” sayan propesiya so manutukoy ed iyaaligwas ed organisasyonal iran pananontonan ed limog na totoo nen Jehova.

Agawa iyan importantin kundang a panangipetek ed organisasyon unong ed teokratikon paraan diad sampot na “duan libo talon lasus a labi tan kabuasan,” ya asalambit diad Daniel 8:14 unong ed New World Translation. Diad satan a panaon, “say masanton pasen” so “nitarok ed dugan kipapasen.”

Balet, kayari na makatantandan tinaon a miting nen 1944, nansiansia so sakey a makanan tepet. Lapud say Mananguley ya Ulop so maapit a nisiglaot ed saman ed pitoran-membro na board of directors na korporasyon ed Pennsylvania, kasin kabaliksan na saya a say Mananguley ya Ulop so agnayarin balot a tugyopen na onsulok ed pitoran alanaan iran Kristiano? Sakey ni, lapud saray direktor so imbotos na saray membro na korporasyon, kasin saray membro na korporasyon so  mangibotos na saray membro na Mananguley ya Ulop kada tinaon a miting? Kasin saray direktor tan opisyal na Watch Tower Bible and Tract Society of Pennsylvania tan saray membro na Mananguley ya Ulop et saksakey met lanlamang, odino mandumaan ira?

Sakey nin Makatantandan Tinaon a Miting

Naebatan irayan tepet diad tinaon a miting a ginawa nen Oktubre 1, 1971. Diad saman a miting, impabitar na sakey ed saray espiker a say mananguley ya ulop na “matoor tan makabat ya aripen” et nilasus a taon lan niwala sakbay na Watch Tower Bible and Tract Society of Pennsylvania. (Mateo 24:45-47) Sakey a mananguley ya ulop so aporma nen Pentecostes 33 K.P., masulok a 18 siglo sakbay a niwala so korporasyon ed Pennsylvania. Pilimero, say mananguley ya ulop so tugyopen na 12 apostol, aliwan 7 lalaki. Mapatnag, say bilang na satan so naaruman ed saginonor, ta ‘saray apostol tan saray mamasiken ed Jerusalem’ so angidaulo.​—Gawa 15:2.

Nen 1971 impaliwawa na saman lanlamang ya espiker a saray membro na Watch Tower Society so agnayarin mangiboto na saray membro na alanaan a Mananguley ya Ulop. Akin? Inkuanto: “Lapud say mananguley ya ulop na ‘aripen’ a klase so agtinuro na siopaman a too. Satan so tinuro nen . . . Jesu-Kristo, say Ulo na tuan Kristianon kongregasyon tan say Katawan tan Uloen na say ‘matoor tan makabat ya aripen’ a klase.” Malinew sirin a saray membro na Mananguley ya Ulop so agnayarin ibotos na saray membro na dinanman a legal a korporasyon.

Onia so makatantandan balikas ya intuloy na espiker: “Say mananguley ya ulop so andian na saray opisyal a singa ed Board of Directors na Sosyedad, salanti, presidenti, bise presidenti, secretary-treasurer tan assistant secretary-treasurer. Walaan labat itan na tsirman.” Diad loob na dakel a taon, say presidenti na korporasyon ed Pennsylvania et sikato met so manunaan a membro na Mananguley ya Ulop. Aliwa lan onia so kipapasen. Anggaman agnampapara ed eksperiensia odino abilidad, saray membro na Mananguley ya Ulop so manpapara ed responsabilidad. Inyarum na espiker: “Siopaman a membro na mananguley ya ulop so nayarin magmaliw a tsirman na satan anggano aliwan sikatoy presidenti na say . . . Sosyedad . . . Satan so mandependi ed sistema na pansusublayan parad inka-tsirman ed mananguley ya ulop.”

Diad satan a makatantandan tinaon a miting nen 1971, ya alinewan so pandumaan na alanaan na espiritu iran membro na Mananguley ya Ulop tan saray direktor na korporasyon ed Pennsylvania. Siansia, nantultuloy iray membro na Mananguley ya Ulop a nanserbi bilang direktor tan opisyales na Sosyedad. Balet say tepet natan ya onlelesa et: Wala tay Makasulatan a rason a nepeg a membro na Mananguley ya Ulop iray direktor na Watch Bible and Tract Society of Pennsylvania?

Say ebat et anggapo. Say korporasyon ed Pennsylvania so aliwan say mogmon legal ya ahensia ya uusaren na Tastasi nen Jehova. Wala niray arum. Sakey et say Watchtower Bible and Tract Society of New York, Incorporated. Satan so mamapakurang ed kimey tayo ed Estados Unidos. Mapatnag so panamendision nen Jehova ed satan a korporasyon, anggaman kaslakan ed saray direktor tan opisyales na satan et kabiangan na “arum a karnero.” Say International Bible Students Association so nauusar diad Britanya. Wala niray arum a legal ya ahensia ya uusaren pian iyalibansa iray interes na Panarian diad arum a bansa. Amin na saratan so mantutulongan tan walaan na betang ed kipupulong na maong a balita ed intiron dalin. Inerman so kawalaan na saratan odino siopaman iray manseserbi bilang direktor odino opisyales, sarayan ahensia so nigigiya ed teokratikon paraan tan uusaren na Mananguley ya Ulop. Kanian, saratan ya ahensia so apabtangan na saray kimey a gawaen diad pangilaknab ed intereses na Panarian.

Makagungguna ed sikatayo so pakawalaan na legal iran ahensia. Kanian sikatayoy manpapasakop ed saray ley na komunidad tan nasyon, unong a kakaukolanen na Salitay Dios. (Jeremias 32:11; Roma 13:1) Lapud saray legal ya ahensia, napapainomay so kimey tayon pangiwakawak ed mensahe na Panarian diad panangimprinta ed saray Biblia, libro, magasin, brosyur, tan arum niran babasaen. Saratan ya ahensia so onkakana met bilang legal iran korporasyon pian naasikaso  iray pamaakaran a mitukoyan ed property ownership, saray sagpot ed itutulong (relief efforts), saray kontrata ed pangusar na saray pasilidad a pankombensionan, tan arum nira. Misalsalamat itayo ed saray nagagawaan na saratan a legal ya ahensia.

Nitatandoro so Ngaran nen Jehova

Nen 1944, inamendaan so Article II na karta na Watch Tower Bible and Tract Society of Pennsylvania pian idanet iray gagala na sayan korporasyon. Unong ed karta, saray gagala na Sosyedad et mangisakop ed sayan manunan gagala: “Pian ipulong so ebanghelyo na panarian na Dios diad silong nen Kristo Jesus ed amin a nasyon bilang pantasi ed ngaran, salita tan inkasupremo na Makapanyarin-amin a Dios a JEHOVA.”

Nanlapula nen 1926 ‘say matoor ya aripen’ so angitandoro ed ngaran nen Jehova. Nagkalalo lan makatantanda so 1931 sanen inadapta na saray Estudyante na Biblia so ngaran a Tastasi nen Jehova. (Isaias 43:10-12) Kalaktip ed saray publikasyon na Sosyedad ya angitandoro ed ngaran na Dios et saray libron Jehovah (1934), “Let Your Name Be Sanctified” (1961), tan “The Nations Shall Know That I Am Jehovah”​—How? (1971).

Nagkalalon nipaimano so New World Translation of the Holy Scriptures, impalapag ya intiro ed Ingles nen 1960. Lugan na satan so ngaran nen Jehova ed amin a pakabasaan ed Tetragrammaton diad Hebreon Kasulatan. Sayan patalos so angilaktip met ed ngaran na Dios ed 237 a pakabasaan ed Kristianon Griegon Kasulatan a no iner et apatnagan unong ed maalwar ya impansuri a napanmatalkan iya. Agaylan pisalsalamat tayo ta, diad nanduruman dalan, inabuloyan nen Jehova so “aripen” tan say Mananguley ya Ulop to pian usaren iray kayarian ed pangipalapag tan legal iran ahensia diad pangipakabat ed ngaran to ed intiron dalin!

Niyalibansa so Panangibunog ed Salita na Dios

Saray totoo nen Jehova so mantutultuloy ed pantatasi ra ed ngaran to tan mangiyaalibansa ra ed Salita to diad pangipapalapag tan pangibubunog ed minilyon a nibase ed Biblia iran palapagan ontan met ed Biblia a mismo. Diad asasakbay na dekada na taon 1900, say Watch Tower Society so nagmaliw ya akankayarian ed kanepegan ed panagkopya na The Emphatic Diaglott, a Griego-Ingles ya interlinear ya edisyon nen Benjamin Wilson ed Kristianon Griegon Kasulatan. Say Sosyedad so angipalapag ed edisyon na saray Estudyante na Biblia a King James Version, ya angilaktip ed 500-pahina ya apendise. Impalapag met na Sosyedad nen 1942 so King James Version a walaan na marginal iran reperensia. Insan nen 1944 ginmapo so Sosyedad ya angimprinta ed American Standard Version na 1901, a manguusar ed ngaran na Dios. Say ngaran a Jehova so pinmatnag met ed The Bible in Living English, nen Stephen T. Byington, impalapag na Sosyedad nen 1972.

Saray legal ya ahensian uusaren na Tastasi nen Jehova so ontutulong ed kiyiimprinta tan kibubunog na amin na sarayan patalos na Biblia. Anggaman ontan, say makatantandan maong et say mismon maapit a pankokoopera na Watch Tower Society tan say grupo na alanaan a Tastasi nen Jehova a tugyopen na New World Bible Translation Committee. Manliket itayo ta, diad intiraminti odino ed kabiangan, masulok la natan a 106,400,000 a kopya na sayan patalos so niimprinta la ed 38 a lenguahe. Talagan say Watch Tower Bible and Tract Society of Pennsylvania et sakey a sosyedad na Biblia!

‘Say matoor ya aripen’ so ‘aturo a mangasikaso ed amin a kayarian na katawan to.’ Laktipen na saraya iray pasilidad diad hedkuarter ed New York State, E.U.A., tan saray 110 a sanga ya onkukurang natan ed sankamundoan. Kabat na saray membro na aripen a klase a sikaray mikuentaan ed paraan a panguusar da ed nimatalek  ed sikara. (Mateo 25:14-30) Ingen, agsesebelan na saya so ‘aripen’ ed pangabuloy ed saray kualipikadon manangasikaso ed limog na “arum a karnero” pian mangasikaso ed legal tan administratibo iran responsabilidad. Diad tua, saya so mangiyabuloy ed saray membro na Mananguley ya Ulop a makapangideboto na mas malaem a panaon “ed pikakasi tan dia ed panangipulong na salita.”​—Gawa 6:4.

Legan ya iyabuloy na saray kipapasen ed sayan mundo, say Mananguley ya Ulop, a mangilalaman ed “matoor tan makabat ya aripen,” so mangusar ed legal iran ahensia. Matukoy iraya, balet ta agsigpot a kakkaukolan. No say legal ya ahensia so nabuyak lapud ganggan na gobierno, say panagpulong so mantultuloy. Anggan natan, diad saray isla a walaray panameget tan anggapo iray nausar a legal ya ahensia, say mensahe na Panarian so niyaabawag, walaray magmamaliw a babangatan, tan mantutultuloy ya ondaraak so teokrasya. Ontan so nagagawa lapud saray Tastasi nen Jehova so mantatanem tan mansasalog, tan ‘say Dios so mamapabaleg.’​—1 Corinto 3:6, 7.

Legan a mantatalaran itayo ed arapen, matalek itayo ya asikasoen nen Jehova so espiritual tan materyal iran pankaukolan na totoo to. Sikato tan say Anak to, si Jesu-Kristo, so mantultuloy a mangitarya na mangatatawen a panangidirehi tan suporta a nakaukolan pian nasumpal so panangipulong ed Panarian. Siempre, antokaman so agawaan tayo bilang lingkor na Dios et agawa ‘aliwan diad panamegley na puersa militar, nisay diad pakayari, noagta diad panamegley na espiritu nen Jehova.’ (Zacarias 4:6, NW) Manpikasi itayo sirin parad tulong na Dios, a kabat tayon diad biskeg ya itatarya nen Jehova et nasumpal tayo so kimey a pagagawa to ed sikatayo ed sayan panaon na anggaan!