Sigpot ya Ontalindeg Tekep na Mapekder a Kombiksion

“Sakey ya Obra-Maestran Proyekto”

NANLAPULAD inmuunan agew na modernon-agew ya awaran da, interesadon maong iray Tastasi nen Jehova ed sakey ed saray propesiya nen Jesu-Kristo: “Saya ya ebanghelyo na panarian nipulong naani ed sankamundoan ya onkanan pamintuan ed saray amin a nasyones; et saman la onsabi so anggaan.” (Mateo 24:14) Sanen manasingger lay 1914, salanti, say gapoan na “saray kaunoran ya agew,”​—ginapoan met la na saray masimoon ya Estudyante na Biblia tekep na mapekder a kombiksion so agnaparaan a sankamundoan a kampanya parad edukasyon a nibase’d Masanton Kasulatan.​—2 Timoteo 3:1.

Pian nadampot da so getman pangiyabawag ed maong a balita ed sankadalinan, inusar na sarayan lingkor nen Jehova so sakey a metodon balo, mabitabitar, tan malinew. Pian nagkalalo ni so naamtaan nipaakar ed satan, pawilen tayo pay apalabas.

Balon Paraan Pian Niyabawag so Maong a Balita

Enero ed saman na taon 1914. Isipen pan sakey ka ed saray 5,000 ya akayurong ed pinabilunget ya auditoryum diad New York City. Walad arap mo so abalbaleg a tilon. Sakey a laki ya amputi lay buek to tan aka-amerikanay andukey so pinmatnag ed tilon. Akabantay ka la na saray sine ya anggapoy narengel, balet ta sayan laki so mansasalita, tan narengel moray ibabalikas to. Presenti ka ed pilpilimeron nipaway a teknolohiya, tan say mensahe na satan so nikadkaduma. Say espiker et si Charles Taze Russell, say inmunan presidenti na Watch Tower Society, tan say palabas et say “Photo-Drama of Creation.”

Amoria nen C. T. Russell so potensyal na saray motion picture pian nasabi so dakerakel a totoo. Kanian nen 1912 et inggapo ton imparaan so “Photo-Drama of Creation.” Diad kaunoran et satan so nagmaliw a waloy-oras a palabas na nilitraton slide tan motion picture, a de-kolor tan de-tanol.

Lapud adesinyo ed apatiran kabiangan, irepaso na “Photo-Drama” ed saray manbabantay so panamalsa a manpatuloy ed awaran na too a mamantok ed gagala nen Jehova a Dios parad dalin tan ed sankatooan diad sampot na Milenyon Uley nen Kristo. Pigaran taon ni so linmabas sakbay a satan a parehon teknolohiya so apannegosyoan. Ingen, minilyon so nambantay ed “Photo-Drama of Creation” a libre!

Niparaan iray sankaabigan a niplakan musika ontan met ed 96 a niponograpon paliwawa parad “Photo-Drama.” Saray stereoptic slide so indibuho iran litrato a mangiyiilustra ed awaran na mundo. Kapilitan met so panggawa na nilasus iran balon lamina tan drowing. Arum ed saray de-kolor ya slide tan pelikula so inanosan ya indrowing. Tan satan so aminpigan kinopya, ya anggad asabin  apawalay 20 a san-epat a set. Diad ontan et posiblin nipanengneng so kabiangan na “Photo-Drama” ed 80 nanduruman syudad ed nanduruman agew!

Diad Benegan na Saray Eksena

Antoy agawa ed benegan na saray eksena legan ya ipapaway so “Photo-Drama”? “Say Drama so onggapo ed palabas a nipaakar ed si Brother Russell,” inkuan na Estudyante na Biblian si Alice Hoffman. “Legan a sikatoy ompapatnag la ed tilon tan ombibiswat laray bibil to, nipatogtog met lay ponograpo . . . tan panliketan min dengelen so bosis to.”

Diad panaglawi ed time-lapse a potograpiya, nanonotan ni nen Zola Hoffman: “Akayurong ak diman a mankelkelaw legan a babantayan mi so inkilitrato na saray agew na panamalsa. Wadman iray lirio ya ombubuskag ed mismon pakanengneng mi.”

Inyarum met nen mahilig ed musikan Karl F. Klein na Mananguley ya Ulop na Tastasi nen Jehova: “Bangta nipapalabas iratan, wala so nibabansag a mararakep a tuloy a musika, a singa saray papablien a Narcissus tan Humoreske.”

Wadtan met iray makatantandan inkagawa. “No maminsan et walaray pakalingoan a panelekan,” nanonotan ni nen Clayton J. Woodworth, Jr. “Walay inkagawan leleg a nipapatogtog so rekord a ‘Flee as a Bird to Your Mountain,’ say pinmaway ed tilon et say litrato na abalbaleg a gigantosaurus, ayep ed antis na Delap ya agaylay kabaleg to”!

Nilikud ed regular a “Photo-Drama of Creation,” agnambayag et wadtan met laray set a “Eureka Drama.” (Nengnengen so kahon.) Say sakey a set et tugyop na saray nirekord a lektyur, pati met la iray nirekord a musika. Bangta say sananey a set et tugyop to iratan a rekord pati met iray slide. Anggaman say “Eureka Drama” et andian na saray motion picture, satan so matalonan tuloy no nipapaway ed saray pasen ya agtanton matoo.

Mapuersan Uusaren ed Panagpulong

Kasabi pansamposampot na 1914, say “Photo-Drama” so nipalabas la ed dagup na masulok a 9,000,000 a nambantay ed Amianen ya Amerika, Europa, tan Australia. Anggaman dagdaiset ed bilang, saray Estudyante na Biblia so walaan na nakaukolan a mapekder a kombiksion pian niyabawag so maong a balita diad panamegley na sayan balon uusaren. Maliket dan nannanagnagan so nakakaukolan a pundo pian naarkila iray matukoy a pasen parad sarayan panangipalabas. Nisesengeg ed satan et baleg so agawaan na “Photo-Drama of Creation” ed impangipakabat ed Salita tan saray gagala na Dios ed saramay nambantay.

Oniay insulat na sakey a too ed si C. T. Russell: “Makatantanda so agawa ed bilay ko diad samay inmunan impanbantay ko ed Drama; odino, nibagak a makatantanda ed impakawalaan koy pikakabat ed Biblia.” Onia met so kuan na sananey nin indibidual: “Dawdawit ak a naandian na pananisia ed relihyon tan liknaen kon siak so sinalba na ‘Photo-Drama of Creation’ a nipalabas dia nen imbeneg a tiagew. . . . Natan et walaan ak la na saman a kareenan ya agniiter na mundo tan agkon balot isalat itan ed amin a kayamanan na satan.”

Oniay komento nen Demetrius Papageorge, abayag lan membro na staff na hedkuarter na Sosyedad: “Say ‘Photo-Drama’ et sakey ya obra-maestran proyekto, sano isipen tayo so kinaraiset na saray Estudyante na Biblia tan kinamelag na walan gastosen ed saman. Talagan say espiritu nen Jehova so walad benegan na satan!”

[Kahon/Saray litrato ed pahina 8, 9]

Say “Eureka Drama”

Waloy bulan kayari na pilpilimeron impangilabas ed “Photo-Drama,” amoria na Sosyedad so pankaukolan na pamawalay sananey a bersion na satan a tinawag ya “Eureka Drama.” Bangta say kompleton “Photo-Drama” so tuloy nin nipapalabas ed angkabaleg a syudades, saray set na “Eureka” so angiparungtal na ontan met lanlamang iran manunan mensahe diad saray purok tan baryo. Sakey a bersion na “Eureka Drama” so adeskribin angiter ed “agagin bibii na nikadkaduman pankanawnawa” a manpulong. Akin ya ontan? Lapud say kargaan na saray rekord na ponograpo so manbelat la na 14 a kilo. Siempre, parad sakey a palabas et kapilitan met so pangawit na ponograpo.