Saray Tastasi nen Jehova​—Onaabanti Tekep na Mapekder a Kombiksion!

Report ed Tinaon a Miting

DIAD sarayan agew a kasmak so panduaruwa, nibiig iray Tastasi nen Jehova bilang Kristianon walaay mapekder a kombiksion. Nipabitar iya ed tinaon a miting na Watch Tower Bible and Tract Society of Pennsylvania, a ginawa nen Sabado, Oktubre 7, 2000, diad Jersey City, New Jersey, Assembly Hall na Tastasi nen Jehova. *

Diad manangilukas iran komento to, oniay inkuan na tsirman, a si John E. Barr, membro na Mananguley ya Ulop na Tastasi nen Jehova: “Diad binilyon a wadiad dalin, sikatayo labat so makapikabat tan manisia a say inad-aron Anak nen Jehova, si Kristo Jesus, so nitrono la ed katawenan, a manuuley la ed utel na kakabusol to.” Niparungtal so ebidensia na satan a mapekder a kombiksion diad anemiran makapasagyat a report a nanlapud intiron mundo.

Impanaeg na Katuaan na Biblia ed Espiritismo Diad Haiti

Kasmak a maong so espiritismo diad Haiti. Oniay inkuan na Branch Committee coordinator a si John Norman: “Kaslakan et aagamilen na totoo so voodoo pian salimbengan day inkasikara.” Nanduaruwa balet so sakey ya albularyo ya aputot so ulpo to lapud aksidenti. Oniay inumameng to, ‘Panon iyan nagawa ed siak no sasalimbengan ak na saray espiritu?’ Singa met ed arum, nibangat ed sayan too so katuaan panamegley na saray Tastasi nen Jehova tan sikatoy atulongan a nibulos ed espiritismo. Napatnagan so posibilidad na ibubulaslas diad Haiti lapud nen Abril 19, 2000 et mamipat ed karakel na saray manangipalapag na Panarian so inmatendi ed Memoryal na impatey nen Kristo.

Say Inkaseseg ed Maaw-awang a Teritorya na Korea

Diad Korea, 40 porsiento ed saray Tastasi nen Jehova so walad sigpot-panaon a serbisyo. “Lapud sayan dakerakel a manangiproklama,” kuan na Branch Committee coordinator a si Milton Hamilton, “say teritorya min masulok a 47 milyon a totoo so nakokobrian a maminsan ed kada bulan.” Nikadkaduma met so inyaligwas na saray kongregasyon a sign-language. Diad sakey a sirkiton sign-language, walay nikokonduktan 800 a panangiyaral na Biblia. Saya so promedyo na sakey ya iyaaralan ed kada sakey a manangipalapag. Makapaermen balet ta nipipisok iray kalangweran ya agagin lalaki lapud neutral a talindeg da. Balet, sarayan matoor a Kristiano so paborablin impidenengan tan sikara so mabetbet a naikdan na saray trabahon mankaukolan na panagmatalek.

 Pananustuni ed Saray Pankaukolan na Ibubulaslas ed Mexico

Walay pantok a 533,665 a manangiproklama na Panarian a nanreport ed lawak na kimeyan diad Mexico nen Agosto 2000. Masulok a mamitlo na satan a karakel na indibidual so inmatendi ed Memoryal. “Say kalat mi ed sayan taon et mangipaalagey ni na 240 a Kingdom Hall,” so inkuan na Branch Committee coordinator a si Rober Tracy. Inyarum to ni: “Balet, dakel nin siansia so nakaukolan mi.”

Napanuliranan iray kalangweran ed limog na Tastasi nen Jehova diad Mexico. Nipaakar ed sakey a kalangweran, oniay inkuan na sakey a pari a Katoliko: “Labay ko a walay anggan sakey a singa sikato diad limog na saray patumbok ko. Pandinayewan ko irayan totoo lapud determinasyon da tan makabat a panangusar da ed Biblia. Idedepensa ra so nipaakar ed Dios, anggano pakarisgoan na bilay da.”

Katooran Anggaman ed Gulo Diad Sierra Leone

Manlapu la’d Abril 1991, sanen binmetag so guerra sibil diad Sierra Leone, nilibon totoo so pinatey, asugatan, odino abaldado. “Pirmi so epekto na bakal tan kairapan ed totoo,” so inreport na Branch Committee coordinator a si Bill Cowan. “Interesado la natan ya ondengel so dakel a datin agmanginennenen ed mensahe tayo. Sikara lan mismoy linma’d saray Kingdom Hall anggaman pilpilimero da ni labat so miaral. Saray agagi so mabetbet a sasabaten la ed karsada tan nikekerew ed sikara so sakey a panangiyaral na Biblia.” Anggaman ed tuloytuloy ya ag-inkaligen ed sayan bansa, say kimey a panangipulong ed Panarian so mamapawala na bunga diad Sierra Leone.

Malaknab a Programa na Panagpaalagey Diad Abalaten ya Aprika

Diad kaplesan et wala so pankaukolan na pigan libo a Kingdom Hall diad teritorya ya aasikasoen na sangan opisina ed Abalaten ya Aprika. Nilibon hall so nipaalagey la. “Imbes a mantitipon ira ed sakey ya alulong odino diad silong na kiew, a singa gagawaen ed apalabas, saray agagi tayo so makapantitipon la ed matukoy a pasen a walaay napanyurongan,” so inkuan na membro na Branch Committee a si John Kikot. “Anggaman simpli so inkadesinyo na maslak ed sarayan Kingdom Hall, kaslakan et nibiig bilang sankarakepan ed saray bilding ed lugar da. Diad arum a pasen et naimano a mas adobli so bilang na sakey a kongregasyon diad tinmumbok a taon kayarin nipaalagey so Kingdom Hall.”

Balon Kailalakan na Saray Tastasi Diad Ukraine

Legan na 2000 a serbisyon taon, naimano ed sayan bansa so sakey a pantok na 112,720 a manangipalapag. Masulok a 50,000 ed saraya so akaamta na katuaan na Biblia ed loob na apalabas a limay taon. “Petepeteg, amalesa si Jehova na sakey a balo, malangwer a kailalakan na saray Tastasi a mangiyabawag ed ngaran to!” so inkuan nen John Didur, say coordinator na Branch Committee. Inyarum to ni: “Diad loob na apalabas a duay taon, akapangipalima kami na masulok a 50 milyon a magasin, a misimbangan ed bilang na populasyon na bansa. Diad promedyo et makakaawat kami ed kada bulan na sanlibon sulat manlapud saray interesadon totoo ya onkekerew na nagkalalon impormasyon.”

Arum Niran Makapasagyat a Parti na Programa

Si Daniel Sydlik, a membro na Mananguley ya Ulop, so angiter na makapasagyat a paliwawa. Say artikulon “No Panon a Miduma so Mananguley ya Ulop ed Legal a Korporasyon,” a pinmaway ed sayan magasin, so nibase ed satan a presentasyon a napnoy impormasyon.

Si Theodore Jaracz na Mananguley ya Ulop so angipaliwawa ed makapatenyeg-kanonotan a diskurso ya atemaan na “Saray Manangasikaso tan Ministeryal a Lingkor so Aturo ed Teokratikon Paraan.” Sakey ed saray artikulon pinmaway ed sayan magasin so nibase ed satan a tema.

Say tinaon a miting so angilaktip met ed makapasagyat a paliwawa nen David Splane, a membro na Mananguley ya Ulop, nipaakar ed teksto-ed-taon parad taon 2001. Nibase ed saray salita nen apostol Pablo, salanti: “Ontalindeg a nagnap tan tekep na mapekder a kombiksion ed amin a linawa na Dios.” (Colosas 4:12, NW) Saray Tastasi nen Jehova ed intiron mundo so determinadon manggawa ed satan legan dan matoor ya ipupulong so maong a balita na Panarian na Dios diad sankadalinan.​—Mateo 24:14.

[Paimano ed leksab]