Kasin Manbibilay Kayo Unong ed Dedikasyon Yo?

“Dinanman a gawaen yo, gawaen yon mabulos, a singa nipaakar ed Katawan, et aliwan dia ed saray totoo.”​—COLOSAS 3:23.

1. Diad sekular a pantalos, anto so kabaliksan na salitan “dedikasyon”?

 PANON a nadampot na saray atleta so kapantokan na abilidad da? Diad tennis, soccer, basketball, baseball, lumbay-batik, golf, odino arum nin pagalaw, say sankamaongan so ontalonggaring panamegley lambengat na agnagiing a dedikasyon. Manunaan so pangikondisyon ed pisikal tan mental. Saya so mitukoyan a maong ed sakey ed saray uker na salitan “dedikado,” salanti “sigpot a nisiglaot ed sakey a kurang na kanonotan odino kiwas.”

2. Anto so kabaliksan na “dedikasyon” diad Biblia? Iyilustra.

² Anggaman ontan, anto so kabaliksan na “dedikasyon” diad Biblia? Say “pangidedika” so nipatalos ed Hebreon verb a walaan na kabaliksan a “mansiansian biig; onsian; onekal.” * Diad Israel nensaman, akapeket ed turbanti na Atagey a Saserdoten si Aaron so “masanton tanda na dedikasyon,” a mansyayap a plata na puron balitok ya akaukitan na Hebreo iran salita parad “Kien nen Jehova so Kasantosan.” Satan so mangipanonot ed atagey a saserdote a nepeg ton paliisan so panggaway antokaman a mamabanday ed santuaryo “lapud say tanda na dedikasyon, say panaglanan larak na Dios to, so walad sikato [nensaman].”​—Exodo 29:6; 39:30; Levitico 21:12, NW.

3. Panon a nepeg ya apektaen na dedikasyon so kondukta tayo?

³ Natalosan tayo ed sayan konteksto a say dedikasyon et sakey a seryoson pamaakaran. Kabaliksan na satan so boluntaryon pangipabidbir bilang sakey a lingkor na Dios, tan mankaukolan itan na malinis a kondukta. Sirin, natalosan tayo no akin ya inaon nen apostol Pedro so inkuan nen Jehova: “Masantos kayo komon ta masantos ak.” (1 Pedro 1:15, 16) Bilang dedikadon Kristianos, ambelat so responsabilidad tayo a manbilay unong ed dedikasyon tayo, a manmatoor anggad anggaan. Balet anto so lalanoren na Kristianon dedikasyon?​—Levitico 19:2; Mateo 24:13.

4. Panon tayon nadampot so kundang parad dedikasyon, tan anto so napangiyalilingan tayo ed satan?

⁴ Kayari tayon agamoran so suston pikakabat nipaakar ed si Jehova a Dios tan ed saray gagala to ontan met ed si Jesu-Kristo tan say betang to ed saratan a gagala, personal itayon nandesisyon a manlingkor ed Dios diad intiron puso, kanonotan, kamarerwa, tan biskeg. (Marcos 8:34; 12:30; Juan 17:3) Nayari ni ingen a moriaen itan bilang personal a samba, nagnap a dedikasyon ed Dios. Say dedikasyon tayo et aliwan resultay emosyon labat. Satan so maalwar tan masimoon a ninonot, ya inusar so pakayari na panagkatunongan. Sirin, permanenti itan a desisyon. Ag-itayo magmaliw a singa samay nambaka ed uma insan tinmunda la’d pegley lapud mairap itan a trabaho odino lapud mabayag ni odino agsegurado so panagani. Konsideraen iray alimbawa na arum ya ‘angiyan ed lima ra ed araro’ na teokratikon responsabilidad antokaman so babeng odino irap.​—Lucas 9:62; Roma 12:1, 2.

Agda Inikbanan so Dedikasyon Da

5. Panon a nagmaliw a matalonggaring ya alimbawa si Jeremias bilang dedikadon lingkor na Dios?

⁵ Say mapropetikon ministeryo nen Jeremias  ed Jerusalem so sinmaknap na masulok ya 40 a taon (647-607 K.K.P.), tan mairap itan ya asainmin. Amta toray mismon limitasyon to. (Jeremias 1:2-6) Nakaukolan to so pakpel tan panagsungdo pian naarap toray anawet-tenten a totoo na Juda dia ed inagew-agew. (Jeremias 18:18; 38:4-6) Balet, nanmatalek si Jeremias ed si Jehova a Dios, ya amabiskeg ed sikato kanian apaneknekan to a sikatoy peteg a dedikadon lingkor na Dios.​—Jeremias 1:18, 19.

6. Anton alimbawa so impanengneng nen apostol Juan ed sikatayo?

⁶ Komusta balet so nipaakar ed matoor ya apostol Juan, a masiken lan nibantak ed agla natutuboan ya isla na Patmos makasengeg ed “salita na Dios tan say impantasi nen Jesu-Kristo”? (Apocalipsis 1:9) Sikato so nansungdo tan nambilay unong ed dedikadon talindeg to bilang Kristiano diad loob na ngalngali 60 a taon. Sikatoy nambilay ni kasumpal na impaneral na saray Romanon armada ed Jerusalem. Sikato so apribilihyoan a mangisulat ed sakey ya Ebanghelyo, taloran apuyanan a sulat, tan say libro na Apocalipsis, ya akanengnengan toy pasingawey na bakal ya Armagedon. Kasin sikatoy tinmunda sanen naamtaan ton ag-onsabi ed panaon to so Armagedon? Kasin sikatoy nagmaliw ya agmananginenen? Andi, si Juan so nansiansian matoor anggad impatey to, ya amta ton anggaman ‘asingger lay aturon panaon,’ say kasumpalan na saray nipasingawey ed sikato et dia ni’d saginonor a panaon.​—Apocalipsis 1:3; Daniel 12:4.

Saray Modernon Alimbawa na Dedikasyon

7. Panon a nagmaliw a maong ya alimbawa so sakey ya agin laki nipaakar ed Kristianon dedikasyon?

⁷ Diad modernon panaon, nilibo ed saray matoor a Kristiano so maseseg a nansiansia ed dedikasyon da anggaman agda naimatonan so Armagedon. Sakey lay Earnest E. Beavor ed Inglatera. Sikatoy nagmaliw a Tasi nen 1939 kagapo na Guerra Mundial II, tan intunda to so onaaligwas lan negosyo ton press photography ta pian makaloob ed sigpot-panaon a ministeryo. Lapud impanmantini to ed neutralidad to bilang Kristiano, sikatoy apriso ed loob na duay taon. Nansiansian mapekder met so pamilya to, tan nen 1950 et nanaral so taloran ananak to ed Watchtower Bible School of Gilead pian nipasal ed misionaryon kimey, diad New York. Ontanlay seseg nen Brother Beavor ed panagpulong kanian sikatoy tinawag na kakaaro to bilang Armagedon Ernie. Matoor ton ginegemtan so dedikasyon to, tan anggad impatey to nen 1986, inyabawag to so panasingger lay Armagedon a bakal na Dios. Agto minoria so dedikasyon to bilang temporaryon kontrata ed Dios! *​—1 Corinto 15:58.

8, 9. (a) Anton ehemplo so impatnag na dakel a kalangweran diad España legan na uley nen Franco? (b) Antoran tepet so matukoy?

⁸ Sakey nin ehemplon walaay ag-ontayer a seseg  et saramay taga-España. Legan na uley nen Franco (1939-75), tinmalindeg so nilasus a dedikadon kalangweran a Tastasi bilang neutral a Kristianos. Dakel ed sikara so impriso na militar ed loob na 10 a taon odino onsulok ni. Sakey a Tasi, si Jesús Martín, so asentensiaan ni ingen na 22 a taon ed prisoan, no panaaruman. Sikato so pirmin dinuksa legan ya akapriso diad Amianen ya Aprika. Mairap iyan amin, balet agto akikompromiso.

⁹ Diad kaslakan, ag-amta na sarayan kalangweran a lalaki no kapigan ira nibulos, no bilang ta nibulos nira, lapud nidunget ira ed aminpiga tan nantutumbokan a sentensia. Ingen, pinansiansia ra so integridad da tan minantini ra so seseg da ed ministeryo anggaman adakep ira. Sanen anguman a siansia so situasyon nen 1973, dakel ed sarayan Tastasi, a masudsulok nin 30 años so edad da’d saman, so nibulos ed prisoan tan linmoob iran tampol ed sigpot-panaon a ministeryo, ya arum so nagmaliw ya espisyal payunir tan managbiahen manangasikaso. Nambilay ira unong ed dedikasyon da diad prisoan, tan karaklan so nantultuloy a nanggawa’d satan manlapu la’d inkibulos da. * Komusta tayo natan? Kasin manmamatoor itayo unong ed dedikasyon tayo a singa sarayan matoor?​—Hebreos 10:32-34; 13:3.

Suston Panmoria ed Dedikasyon Tayo

10. (a) Panon tayon nepeg a moriaen so dedikasyon tayo? (b) Panon so panmoria nen Jehova ed serbisyo tayo’d sikato?

¹⁰ Panon tayon moriaen so dedikasyon tayo ed Dios a manggaway linawa to? Kasin manunaan itan ed bilay tayo? Antokaman so kipapasen tayo, malangwer tayo man odino matakken, de-asawaan odino walad kasuloan, mabunigas odino masakit, nepeg a manbanikel tayon manbilay unong ed dedikasyon tayo, mitukoyan ed saray sirkumstansia tayo. Say situasyon na sakey so nayarin mangiyabuloy ed sikato a manlingkor ed sigpot-panaon a ministeryo bilang payunir, bilang boluntaryo ed sangan opisina na Watch Tower Society, bilang misionaryo, odino diad panagbaroy a ministeryo. Diad biek a dapag, arum ya atateng so okupadon maong, ya aasikasoen daray pisikal tan espiritual a pankaukolan na pamilya ra. Kasin agtanton makana ed imaton nen Jehova so daiset ya oras ya uusaren da ed ministeryo kada bulan no ikompara ed dakel ya oras ya uusaren na sigpot-panaon a lingkor? Andi. Ag-iilaloan na Dios ed sikatayo so agtayo nayarian. Sinaglawi nen apostol Pablo iyan prinsipyo: “No wadtan so kasiglatay linawa, naawat so unong na wala ed sakey a too, aliwa ya unong na anggapo ed sikato.”​—2 Corinto 8:12.

11. Diad anto so akadependian na kilalaban tayo?

¹¹ Antokaman so kaso, say kilalaban tayo so akadependi, aliwan ed antokaman a nayarin nagawaan tayo, noagta unong ed agkanepegan a panangasi nen Jehova panamegley nen Kristo Jesus a Katawan tayo. Malinew ya insalaysay nen Pablo: “Amin nankasalanan, tan makulang  ira ed gloria na Dios; et apatunongan ira met ed grasya to ya andi bayar a lapud inkarondon a wala ed Kristo Jesus.” Balet, saray kimey tayo so paneknek na aktibon pananisia tayo ed saray sipan na Dios.​—Roma 3:23, 24; Santiago 2:17, 18, 24.

12. Akin ya agtayo nepeg so mangikompara?

¹² Agnakaukolan ya ikompara tayo ed arum so oras ya uusaren tayo ed panaglingkor ed Dios, saray nipalima tayo a literatura ed Biblia, odino say bilang na iyaaralan tayo na Biblia. (Galacia 6:3, 4) Antokaman so nagawaan tayo ed Kristianon ministeryo, nepeg a nodnonoten tayo iray salita nen Jesus a pagmaliwen toy sakey a mapaabeba: “Ontan kayo met, sano agawa yo so amin a niganggan ed sikayo, kuan yo, Ariripen kami, ya andi kakanaan; ginawa mi so nepeg mi a gawaen.” (Lucas 17:10) Kaunongan kabetbet a nayarian tayon peteg ya ibaga a ginawa tayoy ‘amin a niganggan ed sikatayo’? Kanian say tepet et, Anto so nepeg a kualidad na serbisyo tayo ed Dios?​—2 Corinto 10:17, 18.

Usaren a Makana so Kada Agew

13. Anton awawey so nakaukolan tayo legan tayon susumpalen so dedikasyon tayo?

¹³ Kayari ton sinimbawa iray kaasawaan a bibii, lalaki, ananak, kaatengan, tan ariripen, oniay insulat nen Pablo: “Dinanman a gawaen yo, gawaen yon mabulos, a singa nipaakar ed Katawan, et aliwan dia ed saray totoo: Kabaten yo ya awaten yo ed Katawan naani so tumang a tawir; manlingkor kayo ed Kriston Katawan.” (Colosas 3:23, 24) Ag-itayo manseserbi pian pandinayewen so totoo ed nagagawaan tayo ed serbisyo ed si Jehova. Panggugunaetan tayon lingkoran so Dios diad panumbok ed ehemplo nen Jesu-Kristo. Sinumpal to so limitado-ed-panaon a ministeryo to tekep na inkaganatan.​—1 Pedro 2:21.

14. Anton pasakbay so inter nen Pedro nipaakar ed kaunoran iran agew?

¹⁴ Impatnag met nen apostol Pedro so inkaganatan. Diad komaduan sulat to, impasakbay to a diad kaunoran iran agew et walaray managludlurey​—saray apostata tan manduaruwa​—a mamalesa  na tepetepet nipaakar ed kiwawala nen Kristo, unong ed mismon pilpilalek da. Balet, inkuan nen Pedro: “Say Katawan agto bayagen so sipan to, a singa say arum igaton da a mabayag; noag ingen masungdo ed sikayo, agto labay a wala so siopaman a natawtaw noag ingen amin komon nagegemtan da so panagsibkel. Balet say agew na Katawan onsabi a singa matakew.” On, seguradon onsabi so agew nen Jehova. Kanian nepeg tayon pampagaan ed inagew-agew no panon kasegurado tan kaputel so pananisia tayo ed sipan na Dios.​—2 Pedro 3:3, 4, 9, 10.

15. Panon tayon morekdeken so kada agew na bilay tayo?

¹⁵ Pian maalwar itayon makapambilay unong ed dedikasyon tayo, nepeg tayon usaren so kada agew a mangidayew ed si Jehova. Kada nasumpal so sanagew, sarag tayo kasin molimolien tan isipen no panon itayon akatulong ed arum a paraan diad impamasantos ed ngaran na Dios tan ed impangiyabawag ed maong a balita na Panarian? Nayarin diad panamegley na malinis a kondukta tayo, makapabiskeg a pantotongtong tayo, odino maaron panangiyansakit tayo ed pamilya tan kakaaro. Kasin inusar tayoray walan pankanawnawa pian inabang tayo’d arum so ilalo tayo bilang Kristiano? Wala kasi so tinulongan tayon nannonot a maong nipaakar ed saray sipan na Dios? Diad espiritual a pantalos, komon ta pamunaten tayo ed kada agew so bengatlan ankabli, a singa panangibaga et mantipon na makanakana tan maespiritual a bengatla.​—Mateo 6:20; 1 Pedro 2:12; 3:15; Santiago 3:13.

Pansiansiaen Yon Malinew so Inenengneng Yo’d Arapen

16. Diad antoran paraan a sasalien nen Satanas a pakapuyen so dedikasyon tayo ed Dios?

¹⁶ Manbibilay tayo ed panaon a lalon oniirap parad saray Kristiano. Buburagasen nen Satanas tan saray alipores to so pandumaan na maong  tan mauges, malinis tan marutak, moral tan imoral, maong ya ugali tan makapuy ya ugali. (Roma 1:24-28; 16:17-19) Pinainomay to so pakatilolan na kapusoan tan kanonotan tayo panamegley na remote control na TV odino keyboard na kompyuter. Nayarin omburagas, odino nisuawi so espiritual ya inenengneng tayo ed arapen ta pian agtayo nibiig iray masilib a gawa to. Say determinasyon tayo a manbilay unong ed dedikasyon tayo so onkapuy tan makaikban itayo ed bebembenan tayon “araro” no ikompromiso tayoray espiritual a papablien tayo.​—Lucas 9:62; Filipos 4:8.

17. Panon itayon natulongan na simbawa nen Pablo pian napansiansia tayo so relasyon tayo ed Dios?

¹⁷ Saray salita nen Pablo ed kongregasyon na Tesalonica so nipanpanaon sirin: “Sikato’ya so linaway Dios, salanti kisantos yo, a paliisan yo so lawan; a balang sakey ed sikayo kabaten to no panon so panagbemben to ed laman ton dili ed loob na kasantosan tan kagalangan, aliwa a dia ed kairapan na panibeg, a salanti singa saray Gentiles ya agda kabat so Dios.” (1 Tesalonica 4:3-5) Lapud imoralidad, adispelosip so arum ed Kristianon kongregasyon​—saramay angibaliwala ed dedikasyon da ed Dios. Inabuloyan dan onletey so relasyon da ed Dios, kanian sikatoy nagmaliw ya ag-importanti ed bilay da. Ingen, inkuan nen Pablo: “Say Dios agto itayo tinawag ed karumsisan, noag dia ed kasantosan. Kanian say mangipulisay, aliwa a say too so ipulisay to, noag say Dios, a sikato so mangiter na espiritu santo to ed sikayo.”​—1 Tesalonica 4:7, 8.

Anto so Determinasyon Yo?

18. Anto so nepeg a determinasyon tayo?

¹⁸ No apresiaen tayo so inkaseryoso na dedikasyon tayo ed si Jehova a Dios, anto so determinado tayon gawaen? Say mapekder a determinasyon tayo et nepeg tayon pansiansiaen a malet so maong a konsiensia nipaakar ed kondukta tan ministeryo tayo. Oniay insimbawa nen Pedro: “Bangta wala so maong a konsiensia yo, pian dia ed saman so panalabutob da ed sikayo a singa mauges kayon totoo, nabaingan ira so mamalaw na maong a panagbilay yo ed Kristo.” (1 Pedro 3:16) Nayarin nasagmak tan nipaarap itayo ed panangabuso lapud Kristianon kondukta tayo, balet ontan met so agawa ed si Kristo lapud pananisia tan katooran to ed Dios. Inkuan nen Pedro: “Bangta si Kristo nanlikna na irap ed laman to, sikayo nepeg yo met so managamil na saratan a kanonotan; ta say nanlikna na irap ed laman intalirak to so kasalanan.”​—1 Pedro 4:1.

19. Anto so kaliktan tayo a nibaga nipaakar ed sikatayo?

¹⁹ On, say mapekder a determinasyon tayo a manbilay unong ed dedikasyon tayo so manalimbeng ed sikatayo manlapud saray patit na mundo nen Satanas a mansasakit ed espiritual, moral, tan pisikal. Balet nagkalalo ni nen say satan, nagamoran tayo so kompiyansa a walaan itayo na abobon na Dios, a mas magmaong nen say antokaman a bengatla ya iyoopresi nen Satanas tan saray alipores to. Kanian agkomon balot nibaga ya inkaindan tayo so aro a walad sikatayo nen pilimero tayon naamtaan so katuaan. Imbes, nibaga komon ed sikatayo so nikuan ed saramay walad kongregasyon na Tiatira nen inmunan-siglo: “Amtak so saray gawam, tan say arom tan pananisiam tan panaglingkor tan kasungdoan mo, tan saray gawam a kaunoran nagkalalo ra nen saray akauna.” (Apocalipsis 2:4, 18, 19) On, agtayo komon magmaliw a malainem-em nipaakar ed dedikasyon tayo, balet magmaliw itayon “marlang ed espiritu,” a maseseg anggad anggaan​—tan say anggaan et asingger la.​—Roma 12:11; Apocalipsis 3:15, 16.

[Saray paimano ed leksab]

Kasin Nanonotan Yo?

• Anto so lalanoren na dedikasyon?

• Antoran alimbawa na saray dedikadon lingkor na Dios nensaman tan natan so makanan aligen tayo?

• Panon tayon nepeg a moriaen so serbisyo tayo ed Dios?

• Anto so nepeg a determinasyon tayo nipaakar ed dedikasyon tayo ed Dios?

[Tepetepet Parad Panagaral]

[Litrato ed pahina 15]

Nanmatoor si Jeremias anggaman ed inaayep a panagmaltrato

[Litrato ed pahina 16]

Impatnag nen Ernest Beavor so alimbawa ed saray ananak to bilang maseseg a Kristiano

[Litrato ed pahina 17]

Nansiansian matoor so nilasus a kalangweran a Tastasi diad saray prisoan ed España

[Saray litrato ed pahina 18]

Diad espiritual a pantalos, komon ta pamunaten tayo so bengatlan ankabli diad kada agew