Asingger la so Agew na Panangukom nen Jehova!
Asingger la so Agew na Panangukom nen Jehova!
“Say baleg ya agew nen Jehova asingger, sikato so asingger tan masigsiglat a maomaong.”—SOFONIAS 1:14.
1. Anto so impasakbay na Dios panamegley nen Sofonias?
PAGANIGANI lan onkiwas si Jehova sumpad saray marelmeng. Ontalineng! Saya so pasakbay to: “Upoten ko naani so too . . . pegpegen ko naani so too ed lupa na dalin.” (Sofonias 1:3) Saratan a salita na Soberanon Katawan a Jehova so sinaglawi nen propeta ton si Sofonias, a nayarin apo-ed-dapan nen matoor ya Arin Ezekias. Satan a panangiyabawag, ya asaglawi ed panaon nen maong ya Arin Josias, so ag-angipasakbay na marakep a pansumpalan na saramay marelmeng a manaayam diad dalin na Juda.
2. Akin a saray kiwas nen Josias so ag-angamper ed agew na panangukom nen Jehova?
2 Say impanpropesiya nen Sofonias so seguradon lalon angipamoria ed si Arin Josias a nakaukolan a linisan so Juda manlapud marutak a panagdayew. Balet, saray sagpot na ari ya ekalen so palson relihyon ed dalin da so agsigpot ya angekal ed amin a karelmengan diad limog na totoo odino anakbong ed saray kasalanan na laki to, si Arin Manases, ya “amano ed Jerusalem na maalas a dala.” (2 Arari 24:3, 4; 2 Awaran 34:3) Kanian segurado ya onsabi so agew na panangukom nen Jehova.
3. Panon tayon naseguro a posibli so kiliktar ed “agew na sanok nen Jehova”?
3 Ingen, walaray makaliktar ed satan a makapataktakot ya agew. Kanian oniay impaseseg na propeta na Dios: “Ed arapen a say pangigeter mamapaway, ed arapen a say agew onlabas a singa taep; ed arapen a say masebeg a sanok nen Jehova onsabi ed sikayo, ed arapen a say agew na sanok nen Jehova onsabi ed sikayo. Anapen yo si Jehova, sikayo ya amin a mauyamo ed dalin, ya angunor na saray panguksoyan to: anapen yo so inkatunong, anapen yo so kauyamoan: nayari a sikayo naani niyamot dia ed agew na sanok nen Jehova.” (Sofonias 2:2, 3) Legan tayon nononoten so ilalo a nilaban legan na agew na panangukom nen Jehova, konsideraen tayo so libro na Biblia a Sofonias. Nisulat ed Juda sakbay na 648 K.K.P., kabiangan itan ed “mapropetikon salita” na Dios, a kaukolan tayon sigpot-puson imanoen.—2 Pedro 1:19.
Inyunat nen Jehova so Lima To
4, 5. Panon ya asumpal so Sofonias 1:1-3 ed saray marelmeng diad Juda?
4 “Say salita nen Jehova” ed si Sofonias so ginmapo tekep ed pasakbay ya akauna lan nibaga. Oniay inyabawag na Dios: “Siak upoten ko naani a sigpot so saray amin a bengatla ed lupa na dalin, kuan nen Jehova. Upoten ko naani so too tan ayep; upoten ko naani so saray manok ed saray tawen, tan saray sira ed dayat, tan saray kagapolan pati say marelmeng et pegpegen ko naani so too ed lupa na dalin, kuan nen Jehova.”—Sofonias 1:1-3.
5 On, panganggaen nen Jehova so alablabas a karelmengan diad dalin na Juda. Siopa so usaren na Dios a ‘mangupot ed amin a bengatla ed tapew na dalin’? Lapud ompatnag a nampropesiya si Sofonias ed aganggano nin panuuley nen Arin Josias, a ginmapo nen 659 K.K.P., saraman a mapropetikon salita so manutukoy ed pankibalatar na Juda tan say kabiseran syudad to, say Jerusalem, diad lima na Babilonia nen 607 K.K.P. Diad satan a panaon, ‘naupot’ iray marelmeng diad Juda.
6-8. Anto so nipasakbay ed Sofonias 1:4-6, tan panon ya asumpal itan a propesiya ed kadaanan a Juda?
6 Diad pangipapasakbay ed saray gawaen na Dios sumpad palso iran managdayew, onia so kuan na Sofonias 1:4-6: “Unaten ko naani so limak ed tapew na Juda, tan ed tapew na saray amin a manaayam ed Jerusalem et pegpegen ko naani so kera nen Baal ed saya a pasen, tan say ngaran na Chemarim pati saray saserdote; tan saray manpipikasi ed ehersito na tawen ed toktok na saray abung; tan saray manpipikasi, a mansamba ed Jehova tan mansamba ed panamegley nen Malcam. Tan saray ombeneg a manlapud ed katutumbok ed Jehova; tan saray agnananap ed Jehova, odino agnananap a nipaakar ed sikato.”
7 Inyunat nen Jehova so lima to sumpad totoo na Juda tan Jerusalem. Galpongen toray managdayew ed si Baal, say Canaanitan dios na inkamabuna. Saray nanduruman dirios so atawag a Baal lapud sikaray ipapasen na saray managdayew da bilang mangokontrol tan walaan na impluensia ed espisipikon paspasen. Singa bilang, wadtan so Baal a dinayew na saray Moabita tan Midianita diad Palandey Peor. (Numeros 25:1, 3, 6) Diad intiron Juda, galpongen nen Jehova iray saserdote nen Baal, ontan met ed saray agmatoor a saserdoten Levita ya anumlang ed ganggan na Dios da diad impilimog ed sikara.—Exodo 20:2, 3.
8 Galpongen met na Dios iramay ‘manpipikasi ed ehersito na katawenan,’ a mapatnag a mangaagamil na astrolohiya tan panagdayew ed banwa. (2 Arari 23:11; Jeremias 19:13; 32:29) Ondapo met so sanok na Dios ed saraman so manasalin mangilaok na palson relihyon ed tuan panagdayew diad ‘pampikasin mansamba ed si Jehova tan mansamba ed panamegley nen Malcam.’ Say Malcam et nayarin sananey a ngaran nen Moloc, say manunan dios na saray Amonita. Say panagdayew ed si Moloc so mangilaktip ed panagbagat na ugaw.—1 Arari 11:5; Jeremias 32:35.
Asingger Lay Anggaan na Kakristianoan!
9. (a) Anto so nankasalananan na Kakristianoan? (b) Aliwan singa saray matunganga ed Juda, anto so determinado tayon gawaen?
9 Ipanonot na sayan amin ed sikatayo so nipaakar ed Kakristianoan, a pinmalalo ed palson panagdayew tan astrolohiya. Tan say betang to ed panangibagat na minilyon a bilay diad altar na saray pambabakal a susuportaan na klero so talagan makapagulgula! Agtayon balot komon aaligen iray agmatoor ed Juda, a ‘binmeneg manlapud itutumbok da ed si Jehova,’ a nagmaliw ya agmananginenen tan agla nananap ed sikato odino nampaiwanwan ed sikato. Imbes, mantinien tayo komon so integridad tayo ed Dios.
10. Panon yon ipaliwawa so mapropetikon kabaliksan na Sofonias 1:7?
10 Saray tinmumbok a salita na propeta so ontukoy ed saray managgaway-mauges na Juda tan saray marelmeng ed panaon tayo. Onia so kuan na Sofonias 1:7: “Mandeen ka ed arapan nen Katawan a Jehova; ta say agew nen Jehova asingger la: ta si Jehova mangitadia na sakey a bagat, sikato pinasanto to so saray binagaan to.” Sarayan “binagaan” et mapatnag a saray Caldeon kalaban na Juda. Say “bagat” et say Juda a mismo, pati say kabiseran syudad to. Inyabawag sirin nen Sofonias so gagala na Dios a naderal so Jerusalem, tan sayan propesiya so manutukoy met ed kadederal na Kakristianoan. Diad tua, lapud asingsingger la natan so agew na panangukom na Dios, say intiron mundo so nepeg a ‘mandeen ed arapan na Katawan a Jehova’ tan ontalineng ed ibabaga to panamegley na “melag a pulok” na alanaan iran patumbok nen Jesus tan saray kakaiba ra, say “arum a karnero” to. (Lucas 12:32; Juan 10:16) Say sigpot a kadederal so manatalaran ed amin ya ag-ondengel tan onsusumpa ed uley na Panarian na Dios.—Salmo 2:1, 2.
Magano Lay Agew na Panagogol!
11. Anto so manunan kabaliksan na Sofonias 1:8-11?
11 Nipaakar ed agew nen Jehova, onia so inyarum ni na Sofonias 1:8-11: “Nagawa naani dia ed agew na bagat nen Jehova, a dusaen ko naani ray prinsipe, tan saray anak na ari, tan amin ya akakawes na kawes a sankaili. Et dia ed satan ya agew dusaen ko ray amin ya onlukso ed sasabien, a mamano ed abung na katawan da ed panagduksa tan panamalingo. Et dia ed satan ya agew, kuan nen Jehova, wala naani tanol na panakis a manlapu ed wangalan na sira, tan agogol a manlapu ed komadua a gaton, tan baleg ya ungol a manlapu ed saray pukdol. Managogol kayo, sikayo manaayam ed Mactes; ta amin a baley na Canaan nabagbag; saray amin ya inuklopan na pilak napegpeg ira.”
12. Panon ya aromogan a say arum et “akakawes na kawes a sankaili”?
12 Si Arin Josias so tumbokan nen Jehoaz, Jehoiakim, tan Jehoiachin. Insan onsublay so uley nen Zedekias, a pakatandaan la na kadederal na Jerusalem. Anggaman nipapaarap la ed sikara itan a desyang, arum a nampirawat ya awaten na saray kabangibang a nasyon so ‘nankakawes na kawes a sankaili.’ Mipadpara, dakel natan so mangipapatnag diad nanduruman dalan ya ag-ira kabiangan na organisasyon nen Jehova. Lapud mapatnag a kabiangan ira na organisasyon nen Satanas, sikara so nadusa.
13. Mitunosan ed propesiya nen Sofonias, anto so agawa sanen nilusob na saray taga-Babilonia so Jerusalem?
13 “Satan ya agew” na pikuekuentaan na Juda so mipetekan ed agew nen Jehova a mangipaakseb ed panangukom to’d saray kabusol to, pian panganggaen so karelmengan, tan pian paneknekan so inkasupremo to. Diad inlubak na saray taga-Babilonia ed Jerusalem, say kelyaw so onsabi manlapud Wangalan na Sira. Posiblin tinawag ya ontan lapud asingger itan ed lakoan na sira. (Nehemias 13:16) Saray armada na Babilonia so onloob ed sular a tinawag a komaduan ayaman, tan say “baleg ya ungol manlapud pukdol” et nayarin mankabaliksan na ungol na manasingger iran Caldeo. Wala so ‘panagogol’ na saray manaayam ed Mactes, a nayarin say atagey a Lawak na Tyropoe. Akin a managogol ira? Lapud ontunda la so panagnegosyo pati say ‘panag-uklop na pilak.’
14. Panon kalaknab so panangusisa na Dios ed saray mankuan a mandadayew ed sikato?
14 Panon kalaknab so panangusisa nen Jehova ed saray mankuan a mandadayew ed sikato? Oniay intuloy na propesiya: “Nagawa naani dia ed satan a panaon, ya usisaen ko naani so Jerusalem ed saray tingkaw; et dusaen ko naani so totoo ya akayurong ed saray bolirek to, a kuan da ed saray puso ra, Si Jehova agnaani manggawa na maong, agmet naani manggawa na mauges. Et say kayamanan da magmaliw naani a samsam, tan saray abung da ed kabagbag; on, sikara mangipaalagey ira naani na saray abung, balet agda ra naani panayaman; tan mantanem ira naani na saray ubas, balet ag-ira naani oninum na alak to.”—Sofonias 1:12, 13.
15. (a) Anto so agawa ed saray apostatan saserdote na Jerusalem? (b) Anto so manatalaran ed saray kaplesan a mangaagamil na palson relihyon?
15 Isasamok na saray apostatan saserdote na Jerusalem so palson relihyon ed panagdayew ed si Jehova. Anggaman liknaen dan maligen ira, sikaray anapen nen Jehova a singa walaan na man-agaag a lampara a manliwawa ed espiritual a kabilungetan a panaamotan da. Anggapo so makapaliis ed proklamasyon tan kipaakseb na madibinon panangukom. Saramay andiay-pagan apostata so naingkeg a singa’ra gaer na alak ed bariles. Agda labay so nagirogiro ed dinanman a deklarasyon na manasingger lan isalet na Dios ed saray pakurang na totoo, balet ta agda napaliisan so pangukom na Dios ed sikara. Agmet makapaliis iray kaplesan a mangaagamil na palson relihyon, kalaktip laray membro na Kakristianoan tan saramay nan-apostata ed panagdayew ed si Jehova! Diad agda pangaksobi a saraya la so “kaunoran ya agew,” oniay ikuan da ed kapusoan da, “si Jehova agmanggawa na maong, agmet naani manggawa na mauges.” Agaylan nalilingo ira!—2 Timoteo 3:1-5; 2 Pedro 3:3, 4, 10.
16. Anto so agawa sanen nipaakseb so madibinon panangukom ed Juda, tan panon itayon naapektaan ed satan a naamtaan tayo?
16 Apasakbayan iray apostata na Juda a samsamen na saray taga-Babilonia so kaykayamanan da, pankibalataren daray kaabungan da, tan alaen daray bunga na ubasan da. Anggapo lay kakanaan na saray materyal a bengatla sano nipaakseb so madibinon panangukom ed Juda. Ontan met so nagawa sano say agew na panangukom nen Jehova so onsabi ed peles a sistema na saray bengatla. Komon ta walaan itayo sirin, na maespiritual a panmoria tan ‘mantipon na saray kayamanan ed tawen’ diad pantultuloy a pangiyuna ed panaglingkor ed si Jehova ed bilay tayo!—Mateo 6:19-21, 33.
“Asingger la so Baleg ya Agew nen Jehova”
17. Unong ed Sofonias 1:14-16, panon lan kaasingger so agew na panangukom nen Jehova?
17 Panon lan kaasingger so agew na panangukom nen Jehova? Unong ed Sofonias 1:14-16, onia so ipapaseguro na Dios: “Say baleg ya agew nen Jehova asingger, sikato so asingger tan masiglat a maomaong, salanti say bosis na agew nen Jehova: say mabayani a laki onakis ya ampaipait a tuloy diman. Satan ya agew sikato so agew na sanok, agew na gonigon tan irap, agew na kabagbag tan pankibalatar, agew na bilunget tan uddiem, agew a malurem tan makapal a bilunget. Agew na tambuyog tan panangibalap na bakal, sumpa ed saray syudad a kinutaan, tan sumpa ed saray atagey a bakor a pibakal.”
18. Akin ya agtayo nepeg ya ikuan a mabayag ni so agew na panangukom nen Jehova?
18 Apasakbayan laray matungangan saserdote, prinsipe, tan totoo na Juda a ‘say baleg ya agew nen Jehova et asingger la.’ Parad Juda et ‘mansiglat so agew nen Jehova.’ Ontan met ed panaon tayo, anggapo komon so manisip a mabayag ni so pangipaakseb nen Jehova ed panangukom to ed saray marelmeng. Imbes, no panon a kinmiwas a tampol so Dios diad Juda, ‘siglatan’ to met so agew na panangipaakseb to. (Apocalipsis 16:14, 16) Agaylan makapaot-ot a panaon itan parad amin a mangibaliwala ed saray pasakbay nen Jehova ya ipapasabi na Tastasi to tan ed saramay agmangaagamil na tuan panagdayew!
19, 20. (a) Anto so arum ed saray aspekto na kidapo na sanok na Dios ed Juda tan Jerusalem? (b) Nipaakar ed kaderal na saray marelmeng a kipaarapan na sayan sistema na bengabengatla, antoran tepet so onlesa?
19 Say indapo na sanok na Dios ed Juda tan Jerusalem so nagmaliw ya ‘agew na gonigon tan irap.’ Makasengeg ed saray managlubak a taga-Babilonia, dakel ya irap so sinagmak na saray manaayam ed Juda, pati say pirmin inkagonigon diad arap na ipapatey tan kadederal. Satan ya ‘agew na kabagbag na pankibalatar’ et ambilunget, mauddiem, tan makapal a bilunget, a nayarin aliwa labat a piguratibo noagta literal met, lapud say asewek tan saray bangkay so walad nanduruman lugar. Satan so “agew na tambuyog tan panangibalap na bakal,” balet saray pasakbay so nipaknol ya andi-kakanaan.
20 Anggapoy agawaan na saray managbantay ed Jerusalem diad impangigeba na saray taga-Babilonia ed “atagey a bakor.” Saray malet a niletneg ed sayan marelmeng a sistema na bengabengatla so anggapoy kakanaan sumpad mangatatawen iran ayura na Dios, ya akaparaan ton usaren diad paneral to ed saray marelmeng. Iilaloan yo met kasi so nilaban? Mapekder kayo kasin ontalindeg ed dapag nen Jehova ‘a yapiger to so amin a mangaro ed sikato; bangbalet amin na bagel gaygayen tora’?—Salmo 145:20.
21, 22. Panon a nasumpal so Sofonias 1:17, 18 ed panaon tayo?
21 Agaylan makapataktakot ya agew na panangukom so nipasakbay diad Sofonias 1:17, 18! “Yakar ko naani so irap ed saray totoo,” so kuan nen Jehova, “pian manakar ira a singa bulag a totoo, lapu ed nankasalanan ira a sumpa ed Jehova; et say dala ra nikalbo naani a singa dabok, tan say laman [“pait,” NW] da a singa dutak. Anggan say pilak da anggan say balitok da agda ra naani nayarian ya ilaban ed agew na sanok nen Jehova; balet say amin a dalin naakmon naani ed apoy na imon to: tan gawaen to naani so anggaan, on, makapataktakot ya anggaan, na saray amin a manaayam dia ed dalin.”
22 Singa ed ginawa to la diad panaon nen Sofonias, itarok nen Jehova so kairapan ed “amin a manaayam dia ed dalin,” saramay ag-ontalineng ed pasakbay to. Lapud nankasalanan ira ed Dios, sikaray pakaskasin mankarkarapkap a singa bulag a totoo, ya agmakaromog na kililiktar. Diad agew na panangukom nen Jehova, say dala ra “so nikalbo naani a singa dabok,” bengatlan andiay-kakanaan. Talagan makapabanday so panganggaan da, ta itaytayak na Dios iray bangkay, pati saray pait, na sarayan marelmeng ed dalin, a “singa dutak.”
23. Anggaman agmakaliktar iray managgaway-mauges ed “agew na sanok nen Jehova,” anton ilalo so itatarya na propesiya nen Sofonias?
23 Anggapo so makapangisalba ed saramay onsumpa ed Dios tan ed totoo to. Agmet niliktar na anggan saray pilak nisay balitok iray managgawa na mauges na Juda, anggan saray abunton a kayamanan tan pasuksok so agmakasalimbeng odino makapangipaliis dia “ed agew na sanok nen Jehova” sumpad Kakristianoan tan ed saray kabiangan na sayan sistema na bengabengatla. Diad satan ya agew na panagdesisyon, “say amin a dalin naakmon naani ed apoy na imon” na seseg na Dios diad panigway to ed saray marelmeng. Lapud walaan itayo na pananisia ed mapropetikon salita na Dios, kombinsido itayo a wala tayo la’d pansamposampot na “panaon na anggaan.” (Daniel 12:4, NW) Asingger la so agew na panangukom nen Jehova, tan magano to lan idapo so panangibales ed saray kakabusol to. Ingen, say propesiya nen Sofonias so mangitatarya na ilalo na kililiktar. Anto sirin so nakaukolan ed biang tayo pian nasalimbengan itayo ed agew na sanok nen Jehova?
Panon Yon Ebatan?
• Panon ya asumpal so propesiya nen Sofonias ed Juda tan Jerusalem?
• Anto so manatalaran ed Kakristianoan tan ed amin a marelmeng ed panaon tayo?
• Akin ya agtayo nepeg ya isipen a mabayag ni so agew na panangukom nen Jehova?
[Tepetepet Parad Panagaral]
[Litrato ed pahina 13]
Makpel ya inyabawag nen Sofonias ya asingger lay agew na panangukom nen Jehova
[Credit Line]
Nanlapud Self-Pronouncing Edition of the Holy Bible a mankarga na King James tan say Revised iran version
[Litrato ed pahina 15]
Sinmabi so agew nen Jehova ed Juda tan Jerusalem panamegley na saray taga-Babilonia nen 607 K.K.P.
[Litrato ed pahina 16]
Kasin iilaloan yo so nilaban sano deralen la nen Jehova iray marelmeng?