Embahador​—Say Inkausar na Satan Diad Biblia

UNONG ed inkausar na satan diad Biblia, sakey ya opisyal a manangilaman ya imbaki na sakey a manuley ed espisyal ya okasyon parad espisipikon gagala. Kaslakan et matatken lan lalaki so nanserbi ed sayan kapasidad. Kanian, saray Griegon salita a pre·sbeuʹo (‘onakto bilang embahador’ [Efeso 6:20, NW]; ‘magmaliw ya embahador’ [2 Corinto 5:20, NW]) tan pre·sbeiʹa (“ulop na saray embahador” [Lucas 14:32, NW]) so namparan misiglaotan ed salitan pre·sbyʹte·ros, a mankabaliksan na “masiken; matatken.”​—Gawa 11:30, NW; Apocalipsis 4:4, NW.

Dinmateng si Jesu-Kristo bilang “apostol,” odino “imbaki” nen Jehova a Dios. Sikato imay ‘angitarok na bilay tan ag-ipapatey lapu ed inkipasen na ebanghelyo.’​—Hebreos 3:1; 2 Timoteo 1:10.

Sanen apaoli la ed tawen si Kristo, tan lapud anggapo la’d dalin bilang too, aturo iray matoor a papatumbok to ya onakto a kasalat to, “kasandi nen Kristo” bilang embahadores na Dios. Espisipikon sinalambit nen Pablo so inka-embahador to. (2 Corinto 5:18-20) Singa ed amin ya alanaan a papatumbok nen Jesu-Kristo, sikato so imbaki ed saray nasyon tan totoo a nisian ed si Jehova a Dios say Supremon Soberano​—sikaray embahador ed mundo ya anggapoy pikakareenan ed Dios. (Juan 14:30; 15:18, 19; Santiago 4:4) Bilang sakey ya embahador, intarok nen Pablo so mensahe na pipupulangan ed Dios panamegley nen Kristo kanian tinukoy toy inkasikato sanen nipriso bilang “embahador ya aka-golonggolong.” (Efeso 6:20, NW) Say inki-golonggolong to so pakapatnagan na inkaruksa na sayan mundo nipaakar ed Dios, ed si Kristo, tan ed uley na Mesianikon Panarian, lapud saray embahador so anggad kapiganman et impasen ya agnepeg a sakitan. Imparungtal na satan so pirmin inkaruksa tan sankagrabian iran insulto ed saray nasyon sanen agda nirespeto iray embahador a nibakin mangilaman ed Panarian na Dios ed silong nen Kristo.

Diad panusumpal ed betang to bilang embahador, nirespeto nen Pablo iray ley na bansa balet nansiansian neutral ed mapolitika tan militar iran aktibidad na mundo. Saya so mitunosan ed prinsipyo a saray embahador na saray gobierno na mundo so nepeg ya ontulok ed ley balet ta mansiansian neutral ed bansa a nibakian da.

Singa si apostol Pablo, amin a matoor, alanaan, atagibi ed espiritu iran patumbok nen Kristo, a walaan na mangatatawen a pibabaley, so “embahadores a kasandi nen Kristo.”​—2 Corinto 5:20; Filipos 3:20.

Say pangawat na sakey a too ed sarayan embahador na Dios so pakadeterminaan no panon so pideneng na Dios ed sikato. Angidatak si Jesu-Kristo na prinsipyo diad ilustrasyon to nipaakar ed sakey a too a makankayarian na ubasan tan imbaki ton pilimero iray aripen to, insan say anak to, bilang manangilaman to. Maruksan minaltrato na saray managdalus ed ubasan iraman ya aripen tan pinatey da so anak na akankien. Lapud saya et dineral na samay akankien iramay maruksan managdalus. (Mateo 21:33-41) Angiter si Jesus na sananey nin ilustrasyon, nipaakar ed ari a saray aripen to so pinapatey sanen nibaki ira bilang mensaheros a mangimbita na saray sankaili a mibansal. Saramay nantrato ed saray manangilaman to ed ontan a  nengneng so nibilang a kakabusol na ari. (Mateo 22:2-7) Malinew ya imbaga nen Jesus so prinsipyo sanen inkuanto: “Say mangawat na siopaman ya ibakik siak so awaten to. Et say mangawat ed siak awaten to so angibaki dia ed siak.”​—Juan 13:20; nengnengen met so Mateo 23:34, 35; 25:34-46.

Inusar met nen Jesus so manangiyalibansay kareenan a kimey na embahador pian iyilustra so dilin pankaukolan tayo na pikakareenan ed si Jehova a Dios tan isuko so amin pian tumboken iray bakat na Anak to ta pian nagamoran so pabor na Dios tan andi-anggaan a bilay. (Lucas 14:31-33) Midumaan, inyilustra to so makulangkulang a pililimog ed saraman so mangibabaki na embahadores a mansalitan sumpa ed sakey ya angiteran na Dios na maarin pakapanyari. (Lucas 19:12-14, 27) Saray Gabaonita so maabig ya ehemplo ed inkiwas a mataktika tan matalonan paraan ed pikakareenan.​—Josue 9:3-15, 22-27.

Sakbay-Kristiano Iran Ibabaki

Diad sakbay-Kristianon panaon, anggapoy opisyal ya inkabetang ed uley ya eksakton misimbangan ed modernon-agew ya embahador. Anggapo so opisyal a residenti pian mangilaman ed uley na sananey a bansa. Kanian, saray terminon “mensahero” (diad Hebreo, mal·ʼakhʹ) tan “ibabaki” (diad Hebreo, tsir) so mas dugan paneskribe ed saray kimey da ed panaon na Biblia. Balet, say rangko tan kipapasen da so diad maslak a pamaakaran et mipadpara ed saraman so embahadores, tan arum ed sarayan aspekto so nakonsidera dia. Sarayan lalaki so opisyal a manangilaman a walaan na saray mensahe parad saray uley tan indibidual a manuley.

Aliwan singa saray embahador natan, saray ibabaki nensaman, odino mensaheros, so agnanayam ed saray kabisera na sananey a bansa noagta sikaray nibaki labat no wala iray espisyal ya okasyon parad espisipiko iran gagala. Mabetbet a walay rangko na saratan a totoo (2 Arari 18:17, 18), tan nirespeton maong so inkabetang da. Lapud satan, sikaray pinagamoran na seguridad sano ombisita ira ed arum iran manuley.

Say trato ya impagamor ed saray mensahero, odino ibabaki na sakey a manuley, so impasen bilang panagtrato ed manuley tan say pananguley to. Kanian, sanen pinaboran nen Rahab iray mensaheron imbaki nen Josue bilang espiya ed Jerico, susto so inkiwas nen Rahab lapud amoria to a si Jehova so Dios tan Ari na Israel. Kanian pinaboran met nen Jehova si Rahab panamegley nen Josue. (Josue 6:17; Hebreos 11:31) Say pirmin impanumlang ed agnisulat ya internasyonal a kustombre ed panagrespeto ed saray ibabaki et samay inkiwas nen Hanun ya ari na Ammon, ya angibakian nen Arin David na pigaran lingkor bilang pakapatnagan na pikakaaro. Dinengel na ari na Ammon iray prinsipe to, a lingo ya angipasen ed saray mensahero bilang espiya, tan pinabpabanday to iray mensahero ed publiko, a pakapatnagan na agto panagrespeto ed si David tan say uley to. Sayan andiay respeton kiwas so angitonton ed bakal.​—2 Samuel 10:2–11:1; 12:26-31.

Imbes a pasempeten so sakey ya embahador, unong a gagawaen na saray nasyon natan sano abuyak iray diplomatikon siglaotan, saray totoo nensaman a panaon so angibaki na saray mensahero, odino ibabaki, bilang pinagkasangiyan ed sakey tan sakey legan na panaon na gotgotan diad gunaet a napapawil so mareen a siglaotan. Tinukoy nen Isaias iratan bilang “mensaheros na kareenan.” (Isaias 33:7, NW) Angipasabi si Hezekias na kerew parad pikakareenan ed si Senakerib ya ari na Asirya. Anggaman sisigensigenen nen Senakerib iray akutaan a syudad na Juda, pinadalan na saray Asiryano iray mensahero lapud sikaray onaakto bilang ibabaki nen Hezekias. (2 Arari 18:13-15) Sakey nin alimbawa na saya so naimano ed awaran nipaakar ed si Jefte, sakey ya ukom ed Israel. Sikatoy angipawit na sakey a sulat ed ari na saray Amonita panamegley na saray mensahero pian ikatunongan so lingon inkiwas to tan pian solbaren so gotgotan nipaakar ed saray kanepegan ed nasasakopan. Kinaliktan nen Jefte a no nayadyari et solbaren da so pamaakaran ya anggapoy bakal, diad panamegley na saray ibabaki to. Sarayan mensahero so naabuloyan a labaslabasan daray armada ya anggapoy makasbel.​—Uko-ukom 11:12-28.