Si Jehova so Dadayewen na Nipawil a Totoo To Diad Intiron Dalin

“Ipawil ko ed saray baley so malinis a pansasalita [“puron lenguahe,” NW], pian sikara ya amin tawagan da komon so ngaran nen Jehova.”​—SOFONIAS 3:9.

1. Akin ya asumpal ed Juda tan arum niran nasyones iray mensahe na panangukom?

 AGAYLAN mapuersa iray mensahe na panangukom ya impuyan nen Jehova ya ipasabi nen Sofonias! Asumpal iratan a mensahe na panangukom ed nasyon na Juda tan say kabisera to, say Jerusalem, lapud aggagawaen na papangulo tan saray totoo bilang intiraminti so linawa nen Jehova. Sagmaken met na kabangibang iran nasyon, a singa say Filistia, Moab, tan Ammon, so sanok na Dios. Akin? Lapud maruksan isusumpa ra ed totoo nen Jehova, diad loob la na dakel a siglo. Diad satan met a rason, naderal so sankamundoan a pakayari na Asirya, ya aglan balot niletneg lamet.

2. Siopa so mapatnag ya angibagaan ed Sofonias 3:8?

² Balet, walaray maptek-impanwalnan totoo diad Juda nensaman. Saraya so nanilalo ed pangukom na Dios ed saray marelmeng tan mapatnag a sikara so angibagaan ed sarayan salita: “Manalagar kayo a nipaakar ed siak, kuan nen Jehova, angga ed agew ya iyaalagey ko a mansamsam; ta say panangigeter ko sikato so panipon ed saray nasyon, pian ikalbok ed sikara so sanok ko, salanti say masebeg a sanok ko; ta say amin a dalin naakmon naani ed apoy na imon ko.”​—Sofonias 3:8.

Parad Siopa so “Puron Lenguahe”?

3. Anton mensahe na ilalo so nipuyan ed si Sofonias ya ipasabi to?

³ On, impasabi nen Sofonias iray mensahe na panderal nen Jehova. Balet ta apuyanan met so propeta a mangilaktip ed alay abig a mensahe na ilalo​—makaligliwan tuloy ed saramay mantultuloy a matoor ed si Jehova. Unong a nirekord ed Sofonias 3:9, oniay inyabawag nen Jehova: “Saman la ipawil ko ed saray baley so malinis a pansasalita [“puron lenguahe,” NW], pian sikara ya amin tawagan da komon so ngaran nen Jehova, pian manlingkor ira ed sikato a benebenek.”

4, 5. (a) Anto so nagawa ed saray agmatunong? (b) Siopa so nagunggunaan ed saya, tan akin?

 ⁴ Walaray totoo ya agnaikdan na puron lenguahe. Onia so impaimano na propesiya nipaakar ed sikara, a kuanto: “Sikato naani pangekal ko ed pegley mo ed saray mapangta a manliket ed sika.” (Sofonias 3:11) Kanian saray mapangta a nanmudmora ed saray ganggan na Dios tan angagamil na ag-inkatunong so naekal. Tan siopa so nagunggunaan ed saya? Oniay ibabaga na Sofonias 3:12, 13: “Paulyan ko [Jehova] naani ed pegley mo so sakey a pinairap tan duka a baley et sikara onapireng ira naani ed ngaran nen Jehova. Say kera ed Israel ag-ira naani manggawa na inkauges, ag-ira met naani mansalita na saray tila; say matila a dila agmet naani naromog ed sangi ra; ta sikara mantagano ra naani tan ondukol ira naani, tan anggapo naani so antakot ed sikara.”

⁵ Say matoor a nakdaan ed kadaanan a Juda so nagunggunaan. Akin? Lapud kinmiwas ira unong ed sarayan salita: “Anapen yo si Jehova, sikayo ya amin a mauyamo ed dalin, ya angunor na saray panguksoyan to: anapen yo so inkatunong, anapen yo so kauyamoan: nayari a sikayo naani niyamot dia ed agew na sanok nen Jehova.”​—Sofonias 2:3.

6. Anto so agawa ed pilimeron kasumpalan na propesiya nen Sofonias?

⁶ Diad inmunan kasumpalan na propesiya nen Sofonias, dinusa na Dios so agmatoor a Juda diad impangiyabuloy to’d Sankamundoan a Pakayari na Babilonia a manaeg tan mangautibo ed satan nen 607 K.K.P. Alegyas so arum, kaiba lay propeta Jeremias tan arum nin matoor ed si Jehova anggaman akautibo ira. Nen 539 K.K.P., say Babilonia so tinalo na saray Medo tan Persiano ed uley nen Arin Ciro. Kayari ngalngalin duay taon, si Ciro so angipaakseb na ganggan ya angiyabuloy ed nakdaan na Israel a makapawil ed nianakan dan dalin. Sinmabi panaon, nipaalagey lamet so templo na Jerusalem, tan nipawil so inka-saserdote pian nibangat so totoo nipaakar ed Ganggan. (Malaquias 2:7) Kanian pinaaligwas nen Jehova so akapawil a nakdaan​—daput no manmatoor ira.

7, 8. Siopa so kiyaplikaan na mapropetiko iran salita na Sofonias 3:14-17, tan akin ya ontan so ebat yo?

⁷ Nipaakar ed saramay manggayaga ed satan a kipawil, oniay impasakbay nen Sofonias: “Mankanta ka, O anak a bii na Sion; oneyag ka, O Israel; manliket ka tan manggayaga ka ed simoon a puso, O anak a bii na Jerusalem. Si Jehova inekal to so saray pangukom mo, imbantak to so kabusol mo: say Ari na Israel, salanti si Jehova, wala ed pegley mo; agka naani antakot ed mauges anggan kapigan. Dia ed satan ya agew nikuan mo naani ed Jerusalem. Agka antakot: O Sion, agmo yabuloy ya onkapuy iray limam. Si Jehova a Dios mo wala ed pegley mo, sakey a makapanyari a mangilaban naani; manliket naani a tekep na gayaga ed sika; manpainawa naani ed aro to; manliket naani ed sika ed panagkanta.”​—Sofonias 3:14-17.

⁸ Tutukoyen na sarayan mapropetikon salita so nakdaan a nibulos manlapud impangautibo na Babilonia tan nipawil ed dalin na inmunan atateng da. Saya so nipabitar ed Sofonias 3:18-20: “Tiponen ko naani so saray maneermen lapu ed matuyaw a tipon a sikara so kayarian mo nensaman; a dia ed sikato say awit ed tapew to sikato nensaman so balaw. Nia, ed satan a panaon tumangan ko naani so saray amin a mamaermen ed sika; et ilaban ko naani so samay piley, tan itipon ko naani so samay pinataynan; et gawaen kora naani a galang tan ngaran, a say baing da wala nensaman ed amin a dalin. Dia ed satan a panaon iloob ta kayo naani, tan dia ed satan a panaon tiponen takayo naani; ta gawaen takayo naani a sakey a ngaran tan sakey a galang ed saray amin a baley ed dalin, sano ipawil ko so inkadakep  yo ed arap na saray mata yo, kuan nen Jehova.”

9. Panon a pinabantog nen Jehova so ngaran to mitukoyan ed Juda?

⁹ Nonoten pa so inkatalagnaw na saramay walad kaliberliber a nasyon a kakabusol na totoo na Dios! Saray manaayam ed Juda so kinautibo na makapanyarin Babilonia, ya anggapoy mapatnag ya ilalo ed pakapawil da ni. Niarum ni, nankibalatar so dalin da. Balet diad pakayari na Dios, nipawil ira ed nianakan dan dalin kayari na 70 a taon, bangta saray kakabusol a nasyon so mamaarap la’d kaderal. Agayla so ginawa nen Jehova a ngaran parad sikato diad impangipawil to’d saratan a matoor a nakdaan! Ginawa to ra a “sakey a ngaran tan sakey a galang ed saray amin a baley ed dalin.” Agaylan kirayewan nen Jehova tan ed saramay angakbibit ed ngaran to so ontan ya inkipawil!

Nitandoro so Panagdayew ed si Jehova

10, 11. Kapigan nagawa so babaleg a kasumpalan na propesiya nen Sofonias nipaakar ed panangipawil, tan panon tayon naseguro iya?

¹⁰ Walay sananey a panangipawil ya agawa nen inmunan siglo na Komon a Panaon, sanen tinipon nen Jesu-Kristo so nakdaan na Israel parad tuan panagdayew. Saya so pasimar ed no anto so nagawa ni, lapud ta say babaleg a kasumpalan na panangipawil et dia ni’d arapen. Oniay impasakbay na propesiya nen Miqueas: “Dia ed saray kaunoran ya agew nagawa naani, a say palandey na abung nen Jehova niletneg naani ed toktok na saray palandey, tan sikato naani nipaatagey ed tagey na saray pukdol; et saray baley onagus ira naani ed sikato.”​—Miqueas 4:1.

¹¹ Kapigan iya nagawa? Unong ed propesiya, “dia ed saray kaunoran ya agew”​—on, legan na sarayan “kaunoran ya agew.” (2 Timoteo 3:1) Nagawa iya sakbay a mangangga so peles a marelmeng a sistema na bengabengatla leleg a mandadayew iray nasyones ed palson dirios. Oniay kuan na Miqueas 4:5: “Saray amin a baley manakar ira balang sakey ed ngaran na dios to.” Tan komusta met iramay tuan managdayew? Inmebat so propesiya nen Miqueas: “Et manakar itayo naani dia ed ngaran nen Jehova a Dios tayo ed ando lan ando lawas.”

12. Panon a nitandoro so tuan panagdayew ed sarayan kaunoran lan agew?

 ¹² Kanian diad sarayan kaunoran ya agew, “say palandey na abung nen Jehova niletneg [la] naani ed toktok na saray palandey.” Say nitandoron tuan panagdayew ed si Jehova so nipawil la, malet a niletneg, tan matalonggaring nen say amin nin klase na relihyon. Unong ya impasakbay met na propesiya nen Miqueas, ‘saray baley onagus ira naani ed satan.’ Tan saramay mangaagamil na tuan relihyon so ‘manakar ed ngaran nen Jehova a Dios [da] ed ando lan ando lawas.’

13, 14. Kapigan linmoob iyan mundo ed ‘unor lan kabiangan na saray agew,’ tan anto so nagagawa manlapu la’d saman nipaakar ed tuan panagdayew?

¹³ Saray ebento a kasusumpalan na propesiya na Biblia so mamaneknek ya akaloob la iyan mundo ed ‘unor lan kabiangan na saray agew’​—say kaunoran iran agew to​—nen taon 1914. (Marcos 13:4-10) Ipapabitar na awaran ya inggapo la’d saman nen Jehova a tiponen ed tuan panagdayew so sakey a matoor a nakdaan na saray alanaan a walaan na mangatatawen ya ilalo. Saya so tinumbokan na panagtipon ed “baleg ya ulop . . . a nanlapu ed balang nasyon tan amin na saray kailalakan, tan binaleybaley, tan salita”​—a walaan na ilalon manbilay ya andi-anggaan diad dalin.​—Apocalipsis 7:9.

¹⁴ Nanlapula nen Guerra Mundial I ya angga ed sayan panaon, say panagdayew ed si Jehova na saramay mangaakbibit ed ngaran to so maples ya inmabanti diad panangidirehi to. Manlapud pigpigaran libo kayari na Guerra Mundial I, saray managdayew ed si Jehova natan so manbilang la na ngalngali anemiran milyon, ya atiptipon ed ngalngali 91,000 a kongregasyon diad 235 a daldalin. Kada taon, sarayan manangiyabawag na Panarian so mangitatalaga na masulok a sakey bilyon ya oras ed mapublikon panangidayew ed Dios. Mapatnag a sarayan Tastasi nen Jehova so manusumpal ed mapropetiko iran balikas nen Jesus: “Saya ya ebanghelyo na panarian nipulong naani ed sankamundoan ya onkanan pamintuan ed saray amin a nasyones; et saman la onsabi so anggaan.”​—Mateo 24:14.

15. Panon a nasusumpal natan so Sofonias 2:3?

¹⁵ Ipapaimano na Sofonias 3:17: “Si Jehova a Dios mo wala ed pegley mo, sakey a makapanyari a mangilaban naani.” Say espiritual ya aligwas a panggagayagaan na saray lingkor nen Jehova ed sarayan kaunoran ya agew so mapatnag a resulta na impagmaliw ton ‘walad pegley da’ bilang say makapanyarin-amin a Dios da. Tua met itan natan a singa ed inkipawil lamet na kadaanan a Juda nen 537 K.K.P. Nanengneng tayo sirin no panon a babaleg so kasumpalan na Sofonias 2:3 ed panaon tayo, ya oniay kuan na satan: “Anapen yo si Jehova, sikayo ya amin a mauyamo ed dalin.” Nen 537 K.K.P., say “amin” so angilaktip ed nakdaan iran Judio ya akapawil manlapud impangautibo na Babilonia. Natan et irerepresenta na satan iray mauyamo ed amin a nasyon diad intiron dalin, saramay paborablin kinmiwas unong ed panagpulong a kimey ed intiron mundo tan dinmagsa ed “palandey na abung nen Jehova.”

 Onaaligwas so Tuan Panagdayew

16. Anto so nayarin reaksion na saray kakabusol tayo nipaakar ed aligwas na saray lingkor nen Jehova ed sayan modernon panaon?

¹⁶ Kayari na 537 K.K.P., dakel ed saray akapaliber a nasyon so akigtot ed inkipawil lamet na saray lingkor na Dios ed tuan panagdayew diad nianakan dan dalin. Balet, satan ya inkipawil so walaan na limitadon tuloy a kasumpalan. Naisip yo la kasi no anto so ibabaga na arum, pati saray ombubusol ed saray totoo na Dios, ed nanenengneng da a makapakelaw ya ilalaknab, ibubulaslas, tan iyaabanti na saray lingkor nen Jehova ed sayan modernon panaon? Nayarin inisip na pigara ed sarayan kakabusol so inisip na saray Fariseo sanen anengneng da so indagsa na totoo ed si Jesus. Inkelyaw da: “Nia! Say mundo tinmumbok ed sikato.”​—Juan 12:19.

17. Anto so inkuan na sakey a managsulat nipaakar ed saray Tastasi nen Jehova, tan anton imbulaslas so naeeksperiensia ra?

¹⁷ Diad libro ton These Also Believe, inkuan nen Propesor Charles S. Braden: ‘Literal ya akobrian la na Tastasi nen Jehova so dalin lapud panagpulong da. Petepeteg lan nibaga ya anggapo lay relihyon ed mundo ya angipatnag na ontanlan inkaseseg tan inkakuli a mangikayat ed maong a balita na Panarian nen saray Tastasi nen Jehova. Maseguron ombiskeg lan ombiskeg iyan muyongan.’ Susto so inkuanto! Sanen insulat to iratan a salita manga 50 taon lay apalabas, wala lambengat so 300,000 a Tastasi a manpupulong ed intiron mundo! Anto la kasi so nibaga to natan ed laknab na kimey tayo, ta ngalngali 20 danay la ed karakel​—manga anemiran milyon​—so bilang na mangipupulong na maong a balita?

18. Anto so puron lenguahe, tan siopa so angiteran na Dios ed satan?

¹⁸ Panamegley na propeta to, oniay insipan na Dios: “Saman la ipawil ko ed saray baley so malinis a pansasalita [“puron lenguahe,” NW], pian sikara ya amin tawagan da komon so ngaran nen Jehova, pian manlingkor ira ed sikato a benebenek.” (Sofonias 3:9) Diad sarayan kaunoran ya agew, saray Tastasi nen Jehova so ontatawag ed ngaran nen Jehova, a sikatoy nankakasakey dan panlilingkoran diad agnapakset a bedber na aro, on, “benebenek.” Sikara so angiteran nen Jehova na puron lenguahe. Sayan puron lenguahe so manasaglawi ed suston pakatalos ed katuaan nipaakar ed Dios tan ed saray gagala to. Si Jehova lambengat so makapangitarya na pakatalos panamegley na masanton espiritu to. (1 Corinto 2:10) Siopa so pangiiteran to na masanton espiritu to? Dia lambengat “ed saramay manguunor ed sikato bilang manuley.” (Gawa 5:32) Saray Tastasi nen Jehova lambengat so mabulos a manguunor ed Dios bilang Manuley diad amin a bengatla. Satan so rason no akin a makakaawat ira na espiritu na Dios tan mansasalita na puron lenguahe, say katuaan a nipaakar ed si Jehova tan ed saray makapakelaw a gagala to. Uusaren da iyan puron lenguahe pian idayew si Jehova ed sankadalinan diad malaknab tan mabulaslas a paraan.

19. Anto so sasaglawien na pansalita na puron lenguahe?

¹⁹ Say pansalita na puron lenguahe so aliwa lambengat a manasaglawi ed panisia ed katuaan tan pangibangat ed satan diad arum noagta itunos met na sakey so kondukta to ed saray ganggan tan prinsipyo na Dios. Saray alanaan a Kristiano so mangidadaulo ed panaanap ed si Jehova tan mansasalita ra na puron lenguahe. Isipen pa no anto so agawaan la na satan! Anggaman abawasan lay bilang da a kulang lan 8,700, manga anemiran milyon nin arum so mangaalig ed pananisia ra diad panaanap ed si Jehova tan pansasalita na puron lenguahe. Saraya so ondarakel a baleg ya ulop a manlalapud amin a nasyon a mangaagamil na pananisia ed dondon bagat nen  Jesus, mangisasaklang na sagradon serbisyo ed mangaraldalin a saban na espiritual a templo na Dios, tan makaliktar ed ‘baleg a kairapan’ a magano lan onsabi ed sayan agmatunong a mundo.​—Apocalipsis 7:9, 14, 15.

20. Anto so manatalaran ed saray matoor ya alanaan tan ed saramay tugyopen na baleg ya ulop?

²⁰ Say baleg ya ulop so nipaarap ed matunong a balon mundo na Dios. (2 Pedro 3:13) Si Jesu-Kristo tan say 144,000 ya alanaan iran apaoli ed mangatatawen a bilay, a manserbi bilang kaiba ton arari tan saserdote, so manugyop ed balon manuley ya ulop diad dalin. (Roma 8:16, 17; Apocalipsis 7:4; 20:6) Saray akaliktar ed baleg a kairapan so manggawa ed dalin a paraiso tan mantultuloy iran mansalita na puron lenguahe ya inter na Dios. Bilang prinsipyo, onaplika ed sikara irayan salita: “Amin iray anak mo [lalaki tan bibii] nibangat ira ed Jehova; et baleg naani deen na saray anak mo. Dia ed inkatunong so kipasenan mo.”​—Isaias 54:13, 14.

Say Sankabalegan a Panagbangat a Kimey Diad Awaran

21, 22. (a) Singa nipabitar ed Gawa 24:15, siopa so nakaukolan a nabangatan na puron lenguahe? (b) Anton agnaparaan a panagbangat a kimey so nagawa ed dalin diad silong na uley na Panarian?

²¹ Say abalbaleg a grupo a walaay pankanawnawan nabangatan na puron lenguahe diad balon mundo so sinaglawi ed Gawa 24:15, a kuanto: “Wala naani kioli ed bilay na saray matunong tan agmatunong.” Nensaman, binilyon lan totoo so nambilay tan inatey ya andian ni na suston pikakabat ed si Jehova. Diad mauksoy a paraan, pabilayen to lamet ira. Tan nakaukolan a nibangat ed saratan ya apaoli so puron lenguahe.

²² Agaylan abig a pribilihyo so pibiang ed satan a malaklaknab a panagbangat a kimey! Satan so sankalaknaban a panagbangat a kimey a nagawa ed awaran na katooan. Amin na satan so nasumpal ed silong na mapalabon uley nen Kristo Jesus diad pakayari na Panarian. Bilang resulta, nanengneng a siansia na katooan so kasumpalan na Isaias 11:9, a kuanto: “Say dalin napano naani ed pikakabat ed Jehova, singa saray danum sakbongan da so dayat.”

23. Akin a nibaga yo a balbaleg so pribilihyo tayo bilang totoo nen Jehova?

²³ Agayla so inka-pribilihyoan tayo ed sarayan kaunoran ya agew a manparaan parad satan ya alay abig a panaon sano petepeteg a panoen na pikakabat nen Jehova so dalin! Tan agayla so inka-pribilihyoan tayo met a magmaliw a totoo na Dios natan, a makakaeksperiensia ed engranden kasumpalan na saray mapropetikon salita a nikurit ed Sofonias 3:20! Nabasa tayo so panamaseguro nen Jehova: “Gawaen takayo naani a sakey a ngaran tan sakey a galang ed saray amin a baley ed dalin.”

Panon Yon Ebatan?

• Antoray kasumpalan na propesiya nen Sofonias nipaakar ed panangipawil?

• Panon ya onaaligwas so tuan panagdayew ed sarayan kaunoran ya agew?

• Anton malaklaknab a kimey ed panagbangat so nagawa ed balon mundo?

[Tepetepet Parad Panagaral]

[Litrato ed pahina 25]

Pinmawil so totoo nen Jehova ed nianakan dan dalin pian iletneg lamet so puron panagdayew. Amta yo kasi so kabaliksan na saya natan?

[Saray litrato ed pahina 26]

Diad pansasalita ra ed “puron lenguahe,” inanabang na saray Tastasi nen Jehova so makapaligliwan mensahe na Biblia