Anto so Espiritual a Paraiso?

SI Gustavo so binmaleg ed melag a syudad diad Brazil. * Manlapud inkaugaw to et nibangat ed sikato a saray maong a totoo so onla ed tawen kayari ipatey. Anggapoy amta to nipaakar ed gagala na Dios a walay panaon a panggayagaan na saray matoor a totoo so ayadyarin bilay ed mangaraldalin a paraiso. (Apocalipsis 21:3, 4) Tan wala ni bengatlan agto amta. Agto amoria ya anggan natan et naeksperiensia to lay espiritual a paraiso.

Kasin nadngel mo la itan ya espiritual a paraiso? Antam ta no anto itan tan no anto so kakaukolanen pian magmaliw a kabiangan na satan? Siopaman a malabay a magmaliw a tuan maliket so kaukolan a makaamta nipaakar ed satan a paraiso.

Panaanap ed Espiritual a Paraiso

Ompatnag ya agrealistiko so pangibaga ya anggan natan et makapanayam so too ed paraiso. Sayan mundo so aliwan paraiso. Dakdakel iray totoon makakaeksperiensia ed indeskribe na Hebreon ari nensaman: “Nia, saray lua na saray naaposan, tan andian ira na managligliwa; et dia ed abay na saray manangapos da wala nensaman so pakayari; balet andian ira na managligliwa.” (Eclesiastes 4:1) Nilasus milyon so maniirap lapud abulok iran sistema ed politika, relihyon, tan ed ekonomya, tan anggapoy pakainawaan da, anggapoy “managligliwa.” Dakel met iray mantalikarkar pian nabayaran iray otang da, napabaleg iray anak da, tan nagawaan iray dakel niran bengatla pian nabilay. Saraya met so nayarin mankaliktan na managligliwa, sakey a makapalemew ed pakabebelatan labat. Parad sikaran amin, say bilay so aliwan paraiso.

Iner sirin so espiritual a paraiso? Bueno, say Ingles a salitan “paradise” so misiglaotan ed Griego, Persiano, tan Hebreo iran salita a mankabaliksan na parki odino hardin, sakey a mareen, makarepreskon pasen. Isisipan na Biblia ya onsabi panaon say dalin so magmaliw a paraiso, singa-hardin ya ayaman parad saray rasa na totoon andiay kasalanan. (Salmo 37:10, 11) Diad panisip ed saya, natalosan tayon say espiritual a paraiso et sakey a kipapasen a makaruyruyo ed mata tan makapakalma, pian panliketan na sakey so pikakareenan ed kaparan too tan ed Dios. Nalmoan nen Gustavo a natan et wala so ontan a paraiso, tan ondarakel a bilang na totoo so magmamaliw a kabiangan na satan.

Diad edad a 12, nandesisyon si Gustavo a labay toy magmaliw a pari na Romano Katoliko. Diad impangiyabuloy na atateng to, sikatoy linmoob ed relihyoson seminaryo. Diman et sikatoy akibiang ed musika, teatro, tan politika, ya indalangirang na simbaan pian nasagyat iray kalangweran. Amta to a say pari so nepeg komon a mangideboto ed inkasikato ed totoo tan sikato so agnayarin mangasawa. Ingen, arum ed saray kabat nen Gustavo a papari tan seminarista so nalalanor ed imoral iran agamil. Ag-abayag, ginmapo lan manbuanges si Gustavo lapud ontan a kipapasen. Malinew, agto ni aromog so espiritual a paraiso.

Aminsan, abasa nen Gustavo so sakey a tract a nibase ed Biblia a mangisasalaysay nipaakar ed mangaraldalin a paraiso. Satan so angitonton ed sikaton umamengen so gagala na bilay. Inkuan to: “Ginapoan kon basaen a maparanay so Biblia, balet agko itan atalosan. Agko anggan anengneng a wala manayay ngaran na Dios.” Tinaynan toy seminaryo tan inmasingger ed Tastasi nen Jehova,  a papatulongan pian natalosan to so Biblia. Kayari na saman, maples so inyaligwas to tan ag-abayag et indedika toy bilay to ed Dios. Naaaralan la nen Gustavo so nipaakar ed espiritual a paraiso.

Totoo Parad Ngaran na Dios

Naaralan nen Gustavo a say ngaran na Dios, a Jehova et aliwa labat lan sakey a punton paninteresan na sakey a manaaral na Biblia. (Exodo 6:3) Satan so importantin kabiangan na tuan panagdayew. Imbangat nen Jesus iray patumbok to a manpikasi: “Ama min wala ka ed tawen, nagalang komon so ngaran mo.” (Mateo 6:9) Nipaakar ed saray Gentil a nagmaliw a Kristianos, onia so kuan nen babangatan a Santiago: ‘Dinmalaw so Dios . . . ed saray Gentiles, pian mangala ed sikara na totoo a nipaakar ed ngaran to.’ (Gawa 15:14) Nen inmunan siglo, say “totoo nipaakar ed ngaran to” et say Kristianon kongregasyon. Kasin walay totoo parad ngaran na Dios natan? On, tan amoria nen Gustavo a saratan a totoo et saray Tastasi nen Jehova.

Aktibo iray Tastasi nen Jehova diad 235 iran bansa tan teritorya. Manbilang ira na masulok ya anemiran milyon a ministros, tan wala ni waloran milyon ya interesadon totoo ya onaatendi la ed saray miting da. Kabkabat ira lapud mapublikon panagpulong da, susumpalen day salita nen Jesus: “Saya ya ebanghelyo na panarian nipulong naani ed sankamundoan ya onkanan pamintuan ed saray amin a nasyones.” (Mateo 24:14) Balet, akin ya alikna nen Gustavo ya aromog to lay espiritual a paraiso diad pililimog ed saray Tastasi nen Jehova? Inkuanto: “Inkomparak so anengneng ko ed mundo tan nagkalalo la diad seminaryo ed say anengneng ko ed limog na saray Tastasi nen Jehova. Say baleg a pidumaan et say aroan ed limog na saray Tastasi nen Jehova.”

Ontan met so inkomento na arum nipaakar ed saray Tastasi nen Jehova. Si Miriam, sakey a marikit a taga-Brazil so angikuan: “Agko amta no panoy pagmaliw a maliket, anggan diad loob na pamilyak. Say pilpilimeron akanengnengan kon walay pan-aaroan et diad limog na saray Tastasi nen Jehova.” Sakey a lakin manngaran na Christian so angikuan: “Sagpaminsan a mibabali ak ed espiritismo, balet aliwan importanti so relihyon ed siak. Mas papablien ko so kipapasen ko’d bilay tan say trabahok bilang enhinyero. Ingen, sanen impaiyaralan na Biblia so akulaw ko ed saray Tastasi nen Jehova, naimanok so angumanan to. Pandinayewan ko met so liket tan seseg na saray Kristianon bibii ya ondadalaw ed sikato.” Akin ya ontan so ibabaga na totoo nipaakar ed saray Tastasi nen Jehova?

Anto so Espiritual a Paraiso?

Say sakey a bengatla no akin a nikadkaduma iray Tastasi nen Jehova et say apresasyon da ed pikakabat ed Biblia. Manisia ira a tua so Biblia tan satan so Salita na Dios. Kanian, ag-ira basta kontento ya amtaen iray manunan bangat na relihyon da. Walay tuloytuloy a programa ra ed personal a panagaral tan panagbasa ed Biblia. Leleg ya ombabayag so pililimog na sakey ed saray Tastasi nen Jehova, mas ondarakel so naaaralan to nipaakar ed Dios tan say linawa To unong a niparungtal ed Biblia.

Satan a kakabatan so angibulos ed saray Tastasi nen Jehova manlapud saray bengatlan mangeekal ed liket na totoo, a singa saray anito tan makaderal iran ideya. Inkuan nen Jesus: “Say katuaan sikayo so gawaen to a bulos,” tan nalmoan na saray Tastasi nen Jehova a tua iya. (Juan 8:32) Si Fernando, a datin angagamil na espiritismo, so angikuan: “Say pikabat nipaakar ed andi-anggaan a bilay so abalbaleg a pakainawaan. Natatakot ak ompan saray ateng ko odino siak so ompatey.” Say katuaan so angibulos ed si Fernando manlapud takot to ed mundo na espiritu tan say tatawagen a bilay kayari ipatey.

Diad Biblia, say pikakabat ed Dios so misiglaotan a tuloy ed paraiso. Onia so kuan nen propeta Isaias: “Ag-ira naani mamaunong odino mamagbag dia ed amin a masanto a palandey ko; ta say dalin napano naani ed pikakabat ed Jehova, singa saray danum sakbongan da so dayat.”​—Isaias 11:9.

 Siempre, agmagenap so kakabatan lambengat pian nitarok so kareenan ya impasakbay nen Isaias. Kaukolan ya iyaplika na sakey no anto so naaralan to. Inkomento nen Fernando: “No babayuboan na sakey iray bunga na espiritu, walay nitutulong to parad espiritual a paraiso. Tutukoyen nen Fernando so impanawag nen apostol Pablo ed maong iran kualidad a nepeg a bayuboan na sakey a Kristiano bilang “say bunga na espiritu.” Indatak to iratan bilang say “aro, liket, deen, kasungdoan, kauyamoan, kaabigan, sisia, tayadno, dangka.”​—Galacia 5:22, 23.

Kasin naimanom no akin a say pililimog ed komunidad na saray indibidual a manggugunaet a mamayubo ed saratan a kualidad so talagan singa ka walad paraiso? Say espiritual a paraiso ya impasakbay nen propeta Sofonias so niwala ed limog na ontan iran totoo. Inkuanto: “Ag-ira naani manggawa na inkauges, ag-ira met naani mansalita na saray tila; say matila a dila agmet naani naromog ed sangi ra; ta sikara mantagano ra naani tan ondukol ira naani, tan anggapo naani so antakot ed sikara.”​—Sofonias 3:13.

Say Makanan Betang na Aro

Nayarin naimanom a say pilimero ed saray bunga na espiritu a binitla nen Pablo et say aro. Naynay a sasalambiten iyan kualidad diad Biblia. Inkuan nen Jesus: “Lapu ed saya amin a too nabidbiran da a sikayo ray babangatan ko, no wala so aro yo ed sakey tan sakey.” (Juan 13:35) Tua, aliwan ayadyari iray Tastasi nen Jehova. No maminsan et walay agda pantatalosan a singa agawa ed saray apostol nen Jesus. Balet peteg a manaaroan ira, tan ipipikasi ra so pananuporta na masanton espiritu leleg dan babayuboan itan a kualidad.

Bilang resulta, nikadkaduma so panmumuyong da. Anggapo ed limog da so tribu-tribu odino inkaapag-apag lapud nasyonalismo. Diad tua, dakel a Tastasi a walad saray lugar a walay “ethnic cleansing” tan palanit a panagpatey ed rasa sanen mansamposampot laran taon na koma-20 siglo so analimbeng ed balang sakey anggan diad katigway na mismon bilay da. Anggaman “nanlapu ed balang nasyon tan amin na saray kailalakan, tan binaleybaley, tan salita,” panggagayagaan da so pankakasakey a mairap a natalosan anggad agmo ni naeksperiensia itan.​—Apocalipsis 7:9.

Paraiso ed Limog na Saramay Manggagawa na Linaway Dios

Anggapoy inka-agum, imoralidad, tan kasibletan ed espiritual a paraiso. Saray Kristiano so abilin: “Agkayo miaabobon unong ed sayan mundo: noag ingen manguman kayo lapu ed kapasimbalo na kanonotan yo, pian nasali yo no anto so maong, tan makapaliket, tan nasnaspot a linawa na Dios.” (Roma 12:2) Sano manbilay itayo a malinis, maptek ed moral tan gawaen so linawa na Dios ed arum iran paraan, makatulong itayon mangiletneg ed espiritual a paraiso tan makapangarum itayo ed dilin liket tayo. Nalmoan nen Carla a tua iya. Inkuan to: “Imbangat ak nen amak a mankimey ya impasya pian agak ompapeg ed arum parad pinansyal. Balet anggaman liknaen kon maligen ak lapud impanaral ko ed unibersidad, asaew koy pankakasakey na pamilya tan say kaligenan a niiter lambengat ed sikatayo na pikakabat manlapud Salita na Dios.”

Siempre, agmakapangekal na saray problema ed bilay so panggayaga ed espiritual a paraiso. Mansakit nin siansia iray Kristiano. Nayarin  say bansa a panaayaman da so magulo lapud sibil a gotgotan. Dakel so manasagmak na kairapan. Siansia, say maapit a relasyon ed si Jehova a Dios​—ya importantin kabiangan na say espiritual a paraiso​—et kabaliksan ton makapanilalo itayo ed sikato parad suporta. On, iimbitaan to itayon ‘ipaawit ed sikato so awit tayo’ tan dakel so mamekder ed makapakelkelaw a paraan na impanulong to ed sikara ed saray sankairapan a situasyon. (Salmo 55:22; 86:16, 17) Insipan na Dios ya agto taynan iray managdayew to anggan diad “lawak na anino na patey.” (Salmo 23:4) Say panmatalek tayo ed inkamaparaan na Dios a manuporta ed sikatayo so ontulong pian napansiansia tayoy “deen na Dios, a talonaan ton amin a pakatalos,” a satan so tombok parad espiritual a paraiso.​—Filipos 4:7.

Pakatulong ed Espiritual a Paraiso

Maslak a totoo so malabay ya onla ed saray parki odino hardin. Labalabay day manakar-akar ditan odino onyurong ed bangko tan panggayagaan iray kaliberliber. Mipadpara, dakel so magayagan mililimog ed saray Tastasi nen Jehova. Nalilikna ran makaparepresko, mareen, tan makapabiskeg so pantutuyaw. Balet, kaukolan a mantinien so sakey a marakep a hardin ta pian mantultuloy so singa-paraison nengneng to. Mipadpara, niwala labat so espiritual a paraiso ed sayan aliwan paraiso a mundo lapud ta babayuboan na saray Tastasi nen Jehova itan, tan bebendisionan na Dios iray sagpot da. Panon sirin a makapangiter na makabaliksan a betang so sakey ed satan a paraiso?

Unona, kaukolan kan milimog ed kongregasyon na Tastasi nen Jehova, paiyaralan ka na Biblia ed sikara, tan onggamor na pikakabat manlapud Biblia a basiyan na espiritual a paraiso. Inkuan nen Carla: “Anggapoy espiritual a paraiso no anggapoy espiritual a tagano.” Laktipen na saya so regular a pambasa ed Salita na Dios tan molimolien no anto so binasam. Mamaapit ed sika so nagamoran mon pikakabat ed si Jehova a Dios, tan mansumpal ed pangarom ed sikato. Naaralan mo met so mitongtong ed sikato ed pikakasi tan onkerew na panangiwanwan to tan say espiritu to pian ontulong ed sika leleg mon gagawaen so linawa to. Inkuan nen Jesus a manggunaet a manpikasi. (Lucas 11:9-13) Inkuan nen apostol Pablo: “Mikasi kayo ya andi tunda.” (1 Tesalonica 5:17) Say pribilihyon pitongtong ed Dios diad pikakasi tekep na sigpot a panmatalek a narerengel to ka so importantin kabiangan na espiritual a paraiso.

Diad ilalabas na panaon, say bilay mo so onaligwas lapud nanaaralan mo, tan agmanbayag et kaliktan mo met lan itongtong itan ed arum. Diad ontan et sarag mo lan tuloken so ganggan nen Jesus: “Pasindagen yo komon so silew yo ed arap na saray totoo; pian nanengneng da so saray maong a gawa yo, et galgalangen da so Ama yo a wala ed tawen.” (Mateo 5:16) Say panginabang ed arum na pikakabat ed si Jehova a Dios tan si Jesu-Kristo tan say pangitandoro ed matalonggaring ya aro ya impanengneng da’d sankatooan so mangitarok na baleg a liket.

Onsabi la so panaon sano say intiron dalin so magmaliw a pisikal a paraiso​—singa-hardin a lugar ya anggapoy polusyon tan manepeg a panayaman na saray matoor a totoo. Say inkiwala na espiritual a paraiso ed sayan “maatap a panaon a mairap a pidenengan” so ebidensia na pakapanyari na Dios tan sakey a pagpauna ed no antoy sarag tan labay ton gawaen ed arapen.​—2 Timoteo 3:1, NW.

Anggan natan la, saramay manggagayaga ed espiritual a paraiso so makaeksperiensia ed espiritual a kasumpalan na Isaias 49:10: “Ag-ira naani naerasan tan napgaan; agmet ira nasakitan na petang tan say banwa: ta say wala so panangasi to ed sikara itonton to ra, a dia ed abay na subol na danum so pangyarapan to ed sikara.” Pekderan nen José so katuaan na satan. Nampirawatan toy magmaliw a bantog a musikero, balet aromog toy nagkalalon inkapenek ed panlilingkor ed Dios diad loob na Kristianon kongregasyon. Inkuan to: “Panggagayagaan ko natan so makabaliksan a bilay. Maligen ak ed loob na Kristianon impanaagi, tan kabat ko si Jehova bilang maaron Ama a napanmatalkan tayo.” Say liket a nalilikna nen José​—tan saray kapara ton minilyon nin arum​—so maabig ya adeskribe diad Salmo 64:10: “Dia ed Jehova so panliketan na matunong tan manilalo ed sikato.” Agaylan abig ya impaneskribe ed espiritual a paraiso!

[Paimano ed leksab]

[Litrato ed pahina 10]

Legan a panggagayagaan so espiritual a paraiso, nepeg itayon ontulong a mamalaknab ed satan!