Kilalaban Parad Saramay Ondapag ed Liwawa
Kilalaban Parad Saramay Ondapag ed Liwawa
“Si Jehova sikato so silew ko tan kilabanan ko; siopa so takotan ko naani?”—SALMO 27:1.
1. Antoray manangiter-bilay a probisyon nen Jehova?
SI Jehova so Lapuan na sinag na agew a nanggawan posibli ed kiwalay bilay diad dalin. (Genesis 1:2, 14) Sikato met so Manamalsa ed espiritual a liwawa, a mangekal ed makapatey a kabilungetan na mundo nen Satanas. (Isaias 60:2; 2 Corinto 4:6; Efeso 5:8-11; 6:12) Nibaga na saramay ondapag ed liwawa so inkuan na salmista: “Si Jehova sikato so silew ko tan kilabanan ko; siopa so takotan ko naani?” (Salmo 27:1a) Balet, unong ya agawa ed panaon nen Jesus, say nailaloan labat na saramay ondapag ed kabilungetan et makapasinagem a panangukom.—Juan 1:9-11; 3:19-21, 36.
2. Diad kadaanan iran panaon, anto so agawa ed saramay angipulisay ed liwawa nen Jehova tan ed saramay tinmalineng ed salita to?
2 Diad panaon nen Isaias, maslak ed akisipanan a totoo nen Jehova so angipulisay ed liwawa. Bilang resulta, anengneng nen Isaias so inkaderal na mamaamianen a panarian na Israel bilang sakey a nasyon. Tan nen 607 K.K.P., aderal so Jerusalem tan say templo tan adakep iray manaayam ed Juda. Balet, saramay tinmalineng ed salita nen Jehova so apabiskeg a manresisti’d apostasya ed saraman ya agew. Nipaakar ed 607 K.K.P., insipan nen Jehova a makaliktar iramay tinmalineng ed sikato. (Jeremias 21:8, 9) Natan, sikatayon mangaaro ed liwawa so makaaral a maong ed walan agawa nensaman.—Efeso 5:5.
Say Liket na Saramay Walad Liwawa
3. Natan, anton panagmatalek so niwala’d sikatayo, anton “matunong a nasyon” so inaro tayo, tan anton “mabiskeg a syudad” so walad satan a “nasyon”?
3 “Walaan kami na mabiskeg a syudad; panangilaban so ipasen [na Dios] naani nipaakar ed saray bakor tan panagtalayapan. Lukasan yo so saray pinto, pian say matunong a nasyon a mangunor nasisia makaloob.” (Isaias 26:1, 2) Saraya so manangitandoron salita na totoo a nanmatalek ed si Jehova. Saray matoor a Judio ed panaon nen Isaias so nanilalo ed si Jehova, bilang say alenleneg a tuan Lapuan na seguridad, aliwan diad palson dirios na kanasyonan to. Natan et ontan met so panagmatalek tayo. Niarum ni, inaro tayo so “matunong a nasyon” nen Jehova—say “Israel na Dios.” (Galacia 6:16; Mateo 21:43) Inaro met nen Jehova iyan nasyon lapud matoor a kondukta na satan. Lapud panamendision to, say Israel na Dios so walaan na “mabiskeg a syudad,” singa-syudad ya organisasyon ya ontutulong tan manasalimbeng ed satan.
4. Anton awawey na kanonotan so maabig a bayuboan tayo?
4 Moriaen na saramay walad loob na sayan “syudad” a ‘kawaloen [nen Jehova] ed ayadyari a deen so kanonotan a mansiansia ed sikara; lapu ed nanmatalek ira ed [si Jehova].’ Tutulongan nen Jehova iramay nikiling so kanonotan da ed panagmatalek ed sikato tan manguunor ed saray matunong a prinsipyo to. Kanian tinalineng na saray matoor ed Juda so panamilin nen Isaias: “Manmatalek kayo ed Jehova lawas; ta dia ed Jehova, si Jehova lanlamang sikato so ando lan ando a batondampay.” (Isaias 26:3, 4; Salmo 9:10; 37:3; Uliran 3:5) Saramay walaan na ontan ya awawey na kanonotan so manilalo ed si Jehova bilang say alenleneg a putel a batondampay. Panggayagaan da so “ayadyari a deen” ed sikato.—Filipos 1:2; 4:6, 7.
Kipaabeba na Saray Kabusol na Dios
5, 6. (a) Panon a nipaabeba so kadaanan a Babilonia? (b) Anton dalan ya apabaingan so “Babilonia a Baleg”?
5 Anto balet no manirap iramay manmamatalek ed si Jehova? Ag-ira nepeg ya ontakot. Saratan a bengatla so iyabuloy nen Jehova ed sakey a panaon, balet ta diad saginonor et sikatoy mangitarok na pakainawaan, tan nipaarap ed panangukom iramay pansesengegay irap. (2 Tesalonica 1:4-7; 2 Timoteo 1:8-10) Konsideraen so kaso na sakey a “mapangta a syudad.” Inkuan nen Isaias: “Inyakseb [nen Jehova] so saray manaayam ed tagey, say mapangta a syudad: sikato so impangabeba to, sikato, so impangabeba to angga ed dalin; sikato so inyakar to angga ed dabok, say sali sikato so igatin to, anggan saray salisali na duka, tan saray kurang na naukolan.” (Isaias 26:5, 6) Say mapangta a syudad ya asalambit dia et nayarin say Babilonia. Satan a syudad so maseguron amairap ed totoo na Dios. Balet anto so agawa ed Babilonia? Nen 539 K.K.P., atalo itan ed saray Medo tan Persiano. Agaylan inkiyabeba!
6 Diad panaon tayo, adeskribin maong ed saray mapropetikon salita nen Isaias so agawa ed “Babilonia a Baleg” nanlapu la’d 1919. Sinagmak na satan a mapangtan syudad so makapabaing ya inkagba ed satan a taon sanen apaskar itan a mangibulos ed totoo nen Jehova manlapud espiritual ya inkadakep. (Apocalipsis 14:8) Mas makapabaing ni ingen so tinmumbok ya agawa. Satan a melag a grupo na Kristianos so sinmublay ya ‘angigatin-gatin’ ed datin angautibo ed sikara. Nen 1922 inyabawag da so onsasabin anggaan na Kakristianoan, a mangiwawakawak ed apatiran laldis na trumpeta na anghel diad Apocalipsis 8:7-12 tan say taloran abagey a nipasakbay ed Apocalipsis 9:1–11:15.
‘Say Dalan na Matunong et Inkatunong’
7. Anton panangigiya so nagamoran na saramay ondadapag ed liwawa nen Jehova, tan siopa so iilaloan da, tan anto so papablien da?
7 Itatarya nen Jehova so kilalaban ed saramay ondapag ed liwawa to, tan iwawanwan toray basbas da, unong ed ontumbok ya impabitar nen Isaias: “Say dalan na matunong sikato so inkatunong: sika a matunong ka itonton mo so dalan na matunong. On, dia ed dalan na saray panangukom mo, O Jehova, nanalagar kami ed sika; ed ngaran mo, say makapannodnonot lanlamang a ngaran mo, sikato so pilalek na kamarerwa mi.” (Isaias 26:7, 8) Si Jehova et matunong a Dios, tan saramay mandayew ed sikato so nepeg ya ontumbok ed matunong iran estandarte to. Sano gawaen da itan, iwanwan ira nen Jehova, a painomayen toy pankurangan da. Diad itumbok ed panangiwanwan to, ipanengneng na sarayan mauyamo a maniilalo ira ed si Jehova ta sigpot-puso ran papablien so ngaran to—say ‘pakanodnonotan’ ed sikato.—Exodo 3:15.
8. Anton napanuliranan ya awawey so impatnag nen Isaias?
8 Pinabli nen Isaias so ngaran nen Jehova. Mapatnag itan ed ontumbok iran salita to: “Ed kamarerwak nampilalekan ta ka dia ed labi; on, ed espirituk ed dalem ko anapen taka a maseeseet: ta sano saray panangukom mo wala dia ed dalin, saray manaayam ed mundo aralen da so inkatunong.” (Isaias 26:9) Si Jehova so pinilalek nen Isaias ‘tekep na kamarerwa to’—diad intiron inkatoo to. Ilitrato ed kanonotan so impangusar na propeta ed mareen iran oras ed labi pian manpikasi ed si Jehova, ya ibabalikas to so sankaaraleman iran kanonotan to tan maseet ton pipirawaten so panangigiya nen Jehova. Agaylan abig ya alimbawa! Niarum ni, naaralan nen Isaias so inkatunong manlapud saray panangukom nen Jehova. Diad saya, papanonotan to itayo a nakaukolan tayo so tuloytuloy a manbantay, a mansiansian alerto ed panebek ed linawa nen Jehova.
Arum so Dinmapag ed Kabilungetan
9, 10. Antoran kiwas na panangasi so ginawa nen Jehova ed matungangan nasyon to, balet panon iran kinmiwas?
9 Impatnag nen Jehova so matalonggaring a maaron-panangasi to ed Juda, makapaermen balet ta ag-ira kinmiwas ya amin. Mabetbet, pinili na karaklan so manrebeldi tan man-apostata imbes a dia ra ed liwawa na katuaan nen Jehova. Inkuan nen Isaias: “Say pamalangkap nipatnag komon ed marelmeng, anggan ontan agmakaaral na inkatunong; dia ed dalin na inkatunong managamil naani ed inkalingo, tan agto napatnagan so kaatageyan nen Jehova.”—Isaias 26:10.
10 Diad panaon nen Isaias sanen sinalimbengan nen Jehova so Juda sumpad saray kakabusol to, ag-iya binidbir na karaklan. Sanen pinalaboan to ray kareenan, sayan nasyon et andiay pisasalamat. Kanian inkaindan ira nen Jehova, a nanserbi ira ed ‘arum a kakatawan,’ ya inabuloyan to’d kaunoran a nadakep iray Judio diad Babilonia nen 607 K.K.P. (Isaias 26:11-13) Anggaman kuan, pinmawil tan agogolan ed kaunoran so nasyon diad nianakan dan dalin.
11, 12. (a) Anto so sinagmak na saray angautibo ed Juda? (b) Nen 1919 anto so arapen na datin angautibo ed saray alanaan a lingkor nen Jehova?
11 Komusta balet iramay angautibo ed Juda? Oniay mapropetikon ebat nen Isaias: “Sikara so inatey, ag-ira ombilay; sikara so anino, ag-ira onalagey la; kanian dinalaw mo tan binagbag mo ra, tan ginawam so amin a pakanodnonotan ed sikara a natawtaw.” (Isaias 26:14) On, kayari na inkagba to nen 539 K.K.P., anggapo lay arapen na Babilonia. Onsabi panaon et naandi la so syudad. Sikato so magmaliw ya “inatey,” tan say maawang ya empiryo to so nikurit lambengat ed awaran. Agaylan pasakbay ed saramay maniilalo ed saray makapanyari ed sayan mundo!
12 Saray aspekto na sayan propesiya so walaan na kasumpalan sanen inabuloyan na Dios iray alanaan a lingkor to a nadakep ed espiritual nen 1918 insan imbulos to ra nen 1919. Manlapud saman a manpatuloy, say arapen na datin angautibo ed sikara, manuna say Kakristianoan, so magmaliw lan mauddiem. Balet ta daakan a tuloy iray bendision a manatalaran ed totoo nen Jehova.
“Pinabaleg Mo so Nasyon”
13, 14. Antoran mayaman a bendision so panggagayagaan na saray alanaan a lingkor nen Jehova nanlapu la’d 1919?
13 Benendisionan nen Jehova so magbabawin awawey na saray alanaan a lingkor to nen 1919 tan pinabulaslas to ra. Unona, nisentro so imano diad panagtipon ed unor laran kabiangan na Israel na Dios, insan “say baleg ya ulop” na “arum a karnero” so ginmapon natipon. (Apocalipsis 7:9; Juan 10:16) Sarayan bendision so nipasakbay ed propesiya nen Isaias: “Pinabaleg mo so nasyon, O Jehova, pinabaleg mo so nasyon, naraydayew ka; pinaawang mo so saray amin a ketegan na dalin. Jehova, dia ed gonigon dinalaw da ka; angiyapay ira na pikakasi sanen say pananusam wala ed tapew da.”—Isaias 26:15, 16.
14 Natan, saray ketegan na Israel na Dios so linmaknab la ed intiron dalin, tan say baleg ya ulop ya ondarakel la so manbilang lay manga anemiran milyon a maligligsan mibibiang ed kimey na panangipulong ed maong a balita. (Mateo 24:14) Agaylan panamendision nen Jehova! Tan agaylan kigloriaan na ngaran to! Niyaabawag la itan a ngaran diad 235 a daldalin—sakey a makapakelkelaw a kasumpalan na sipan to.
15. Anton simbolikon inkioli so agawa nen 1919?
15 Kinaukolan na Juda so tulong nen Jehova pian nibulos ira ed impakadakep da ed Babilonia. Agda itan nagawaan a bukor. (Isaias 26:17, 18) Mipadpara, say inkibulos na Israel na Dios nen 1919 so paneknek ed pananulong nen Jehova. Ag-itan agawa no anggapoy tulong to. Tan makapasagyat a tuloy so impanguman ed kipapasen da ya inyaliling itan nen Isaias ed kikioli: “Saray inatey mo ombilay ira; saray inaatey a laman ko onalagey ira. Liing tan mankanta kayo, sikayo, a manayam dia ed dabok; ta say linaew mo sikato ed singa linaew na saray dika, tan say dalin ipaway [“iyanak,” NW] da naani so saray inatey.” (Isaias 26:19; Apocalipsis 11:7-11) On, singa panangibaga, saramay inatey so nianak lamet parad apasimbalon kimey!
Proteksion Legan na Mapeligron Panaon
16, 17. (a) Nen 539 K.K.P., anto so kinaukolan a gawaen na saray Judio ta pian naliktaran da so kageba na Babilonia? (b) Nayarin anto iray “silir” natan, tan panon itayon nagunggunaan ed saratan?
16 Say proteksion nen Jehova so lawas nakaukolan na saray lingkor to. Balet, magano to lan iyunat so lima to ed unor a pankanawnawa sumpad mundo nen Satanas, tan say tulong to so nagkalalon nakaukolan na saray mandadayew ed sikato. (1 Juan 5:19) Nipaakar ed satan a mapeligron panaon, oniay impasakbay ed sikatayo nen Jehova: “Gala, baley ko, onloob ka ed saray silir mo, tan ikapot ko so saray pintom ed liberliber mo: yamot mo so inkasika ed daiset a panaon angga ed say kasanokan onlabas. Ta, nia, si Jehova ompaway a manlapu ed pasen to pian dusaen to so saray manaayam ed dalin lapu ed inkauges da: say dalin met lakseban to so dala to, tan anggan kapigan agto la sakbongan so saray inatey to.” (Isaias 26:20, 21; Sofonias 1:14) Impatnag na sayan pasakbay ed saray Judio so pakaliktar da ed kageba na Babilonia nen 539 K.K.P. Saramay ontalineng ed satan so nansiansia komon ed saray kaabungan da, a liktar manlapud saray mangokonkestan sundalo a walad karsada.
17 Natan, “saray silir” ya asalambit ed propesiya so nayarin mangilitrato ed samplon nilibo a kongregasyon na totoo nen Jehova diad intiron mundo. Saratan a kongregasyon et sakey a proteksion anggad natan, sakey a pasen a pakaromogan na saray Kristiano na kaligenan diad limog na saray agagi ra, a walad maaron panangasikaso na mamatatken. (Isaias 32:1, 2; Hebreos 10:24, 25) Saya so nagkalalo lan tua no nipaakar ed inkaasingger lay anggaan na sayan sistema na bengabengatla sano akadependi so kilalaban ed katutulok.—Sofonias 2:3.
18. Panon a ‘pateyen nen Jehova so tongol a wala ed dayat’?
18 Nipaakar ed satan a panaon, oniay impropesiya nen Isaias: “Dia ed saman ya agew si Jehova lapu ed panamegley na anawet tan baleg tan mabiskeg a kampilan dusaen to naani so Leviatan a marlas ya uleg, tan say Leviatan a makiwi ya uleg; et pateyen to naani so tongol a wala ed dayat.” (Isaias 27:1) Anto so modernon-agew a “Leviatan”? Ompatnag, satan so “daan ya uleg,” si Satanas a mismo, pati say marelmeng a sistema na bengabengatla, ya uusaren to a mibakal sumpad Israel na Dios. (Apocalipsis 12:9, 10, 17; 13:14, 16, 17) Nen 1919, agla atekmelan na Leviatan so totoo nen Jehova. Onsabi panaon, satan so sigpot lan naandi. (Apocalipsis 19:19-21; 20:1-3, 10) Kanian, ‘pateyen nen Jehova so tongol a wala ed dayat.’ Kaleganan ni, agbalot ontalona so antokaman a gawaen na Leviatan sumpad totoo nen Jehova. (Isaias 54:17) Agaylan makaligliwa itan a panamaseguro!
‘Sakey ya Ubasan na Manburaboran Alak’
19. Anto so kipapasen na nakdaan natan?
19 Nipaakar ed amin na sayan liwawa a manlapud si Jehova, agta walaan itayo na amin a rason pian manliket? On! Alay dakep ya indeskribe nen Isaias so gayaga na totoo nen Jehova sanen insulat to: “Dia ed saman ya agew: Sakey ya [“manburaboran,” NW] ubasan na alak, sikato so kantaan yo. Siak si Jehova a managtalima ed sikato, sikato so salogen ko ed balang kasanlilikna: ompan wala so manduksa ed sikato, sikato so talimaen ko ed labi tan agew.” (Isaias 27:2, 3) Tinalima nen Jehova so “ubasan” to, say nakdaan na Israel na Dios, tan ed saray makulin kakaiba ra. (Juan 15:1-8) Say resulta et bunga a mangitatarok na gloria ed ngaran to tan panliliketan a maong na saray lingkor to ed dalin.
20. Panon a sasalimbengan nen Jehova so Kristianon kongregasyon?
20 Naliliketan itayo ta tinmunda lay sanok nensaman nen Jehova ed saray alanaan a lingkor to—a lapud satan et inyabuloy toran nadakep ed espiritual nen 1918. Inkuan a mismo nen Jehova: “Sanok andi ed siak saray tala tan saray sabitan wala ra komon a sumpa ed siak ed bakal! Manakar ak komon ed tapew da, poolan ko ra komon a bansag. Odino andi sikato so ombemben komon ed biskeg [“pakdaal,” NW] ko, pian makapipakna [“mikareenan,” NW] ed siak; on, paulyan mo a sikato komon so mipakna ed siak.” (Isaias 27:4, 5) Pian naseguro to a tuloytuloy a manbunga iray ubasan to na daakan a ‘manburaboran alak,’ pongpongen tan upoten nen Jehova so antokaman a singa-sabsabitan ya impluensia a maneral ed sikara. Kanian, anggapo komon so mameligro ed pankaabigan na Kristianon kongregasyon! Amin komon so ‘ontalindeg ed pakdaal nen Jehova,’ ya anapen so pabor tan proteksion to. Diad panggawa’d satan, makapikareenan itayo ed Dios—sakey a bengatlan importantin tuloy lapud amiduan sinalambit itan nen Isaias.—Salmo 85:1, 2, 8; Roma 5:1.
21. Diad anton dalan ya apano na “bunga” so mabunan dalin?
21 Nia niray katuloyan a bendision: “Dia ed saray agew ya onsabi si Jacob manlamot; say Israel manbolaklak tan onsimit: et panoen da so lupa na mundo ed bunga.” (Isaias 27:6) Nasusumpal la iyan bersikulo nanlapula’d 1919, a mangitatarya na makapakelaw ya ebidensia na pakayari nen Jehova. Say dalin so papanoen na saray alanaan a Kristiano na “bunga,” a makapabunigas ya espiritual a tagano. Diad utel na sakey a mauges a mundo, magayaga ran pansiasiansiaen so nitandoro iran estandarte na Dios. Tan sikaray tuloytuloy a bebendisionan nen Jehova tekep na idaraak. Bilang resulta, say minilyon a kakaiba ra, say arum a karnero, “so mangisasaklang [ed Dios] na sagradon serbisyo ed agew tan labi.” (Apocalipsis 7:15, NW) Komon ta mansiansia ed kanonotan tayo so engranden pribilihyo a mibiang ed “bunga” tan manginabang ed satan diad arum!
22. Antoran bendision so nagamoran na saramay mangawat ed liwawa?
22 Diad sarayan maatap a panaon, a sasakbungan na kabilungetan so dalin tan pirmin bilunget ed saray nasyon, agta misalsalamat itayo ta isisindag nen Jehova so espiritual a liwawa ed totoo to? (Isaias 60:2; Roma 2:19; 13:12) Parad amin a mangawat ed satan, say ontan a liwawa so mankabaliksan na kareenan na nonot tan gayaga natan, pati say andi-anggaan a bilay ni ingen diad arapen. Tekep na maabig a rason, sirin, sikatayo a mangaaro ed liwawa so impapuson mangidayew ed si Jehova tan mibansag ed inkuan na salmista: “Si Jehova sikato so biskeg na bilay ko; Siopa ni antakot ko naani? Manalagar ka ed Jehova: ibalap mo so pusom et sikato pabiskegen to so pusom: on, manalagar ka ed Jehova.”—Salmo 27:1b, 14.
Kasin Nanonotan Yo?
• Anto so walan arapen na saramay manlalames ed totoo nen Jehova?
• Anton idaraak so nipropesiya diad Isaias?
• Antoran “silir” so nepeg tayon pansiansiaan, tan akin?
• Akin a say kipapasen na totoo nen Jehova so mangitarok na dayew ed sikato?
[Tepetepet Parad Panagaral]
[Kahon ed pahina 22]
BALON PUBLIKASYON
Maslak ed impormasyon a siningbat ed sayan duaran aaralen ya artikulo so nipresenta la bilang paliwawa ed programa na distriton kombension parad 2000/2001. Diad sampot na paliwawa, walay balon publikasyon a nipaway, ya apauloan na Isaiah’s Prophecy—Light for All Mankind I. Sayan 416-pahinan libro so mankarga na bersikulo por bersikulo ya impaningbat ed pilimeron 40 a kapitulo na libro na Isaias.
[Litrato ed pahina 18]
Saray matunong lambengat so makaloob ed “mabiskeg a syudad” nen Jehova, say organisasyon to
[Litrato ed pahina 19]
Si Jehova so inanap nen Isaias “diad labi”
[Litrato ed pahina 21]
Sasalimbengan nen Jehova so “ubasan” to tan papabunaen to itan