Panag-opera ya Ag-uusaran na Dala​—“Manunan Medikal a Paraan”

DIAD silong na paulon “‘Bloodless’ Surgery,” inreport na magasin a Maclean’s a saray doktor ed intiron Canada so “mamapawala na saray balon metodo a diad apalabas a limay taon et say tatawagen a panag-opera ya ag-uusaran na dala so nagmaliw lan manunan medikal a paraan.” Sakey la’d sikara si Brian Muirhead, anesthesiologist diad Winnipeg’s Health Sciences Centre. Antoy anagdag ed sikato a mansukimat nipaakar ed alternatibon panagtambal ya ag-uusaran na dala?

Nen 1986, inawat nen Dr. Muirhead so angat a pan-opera ed 70 años lan masiken a walaan na mandadalan ulcer, a sikatoy kinmerew a tambalen ya agsaksakan na dala lapud nibase ed Biblia iran sisiaen to bilang sakey ed Tastasi nen Jehova. (Gawa 15:28, 29) Si Dr. Muirhead “so angagamil ed mataltalag ya usaren a metodo a pangi-ineksion na saline solution ed pasienti pian mansiansian atagey so pressure na dala to,” so inreport na Maclean’s. “Matalona so operasyon, tan satan so amabiskeg ed onlalaknab ya opinyon nen Muirhead a ‘dakerakel lay isasaksak min dala. Inisip kon panaon la pian mananap na saray kasandi.’”

Say panagsukimat parad panag-opera ya ag-uusaran na dala (bloodless surgery) so “apapeles lapud kapagaan ed arapen a suplay na indonasyon a dala​—tan lapud katatakot na dakel a pasienti a makalay sakit ed panagpasaksak.” Lapud tulong na impansukimat na saray doktor ya angigapo na balo iran metodo, aliwan saray Tastasi nen Jehova labat so nagugunggunaan noagta ontan met ed dakel nira. “Likud ed pakaekal la na panangisaksak [na dala] ed dakel a kaso, say panag-opera ya ag-uusaran na dala so mamawas ed kapeligroan​—anggaman samet labat​—ya impeksion manlapud kontaminado a dala,” kuan na Maclean’s. Balet anggan say “aliwan kontaminado” a dala et walay peligro ed pakaimpeksion lapud temporaryon pamaer ed immune systems na saray pasienti.

Anto so manusuporta ed mapekder a sisiaen na Tastasi nen Jehova nipaakar ed kasandin panagtambal ya ag-uusaran na dala? Nayarin interesado kayo a mamasa ed brosyur a How Can Blood Save Your Life? Maliket iray Tastasi nen Jehova a manginabang ed sikayo ed satan.