Piliket ed Saramay Mankukurang ed Liwawa
Piliket ed Saramay Mankukurang ed Liwawa
“Dago kayo, tan manakar itayo ed silew nen Jehova.”—ISAIAS 2:5.
1, 2. (a) Panon kaimportanti so liwawa? (b) Akin a seryoso so pasakbay a say dalin so sakbongan na kabilungetan?
SI Jehova so Lapuan na liwawa. Sikato so tinawag na Biblia bilang ‘say Manangiter na banwa nipaakar ed liwawa ed agew, tan saray panguksoyan na bulan tan saray bitewen a nipaakar ed liwawa ed labi.’ (Jeremias 31:35; Salmo 8:3) Sikato so Sakey ya amalsa ed banwa tayo, a bilang resulta et sakey a manliob a maong a nuklear a mangibubuga ed liwang na mabisbiskeg ya enerhiya, ya arum ed satan so diad nengneng na liwawa tan petang. Say melmelanting a porsiento na satan ya enerhiyan onsasabi ed sikatayo bilang sinag na agew so manusustuni’d bilay ed sayan dalin. No anggapoy sinag na agew, agtayo nabilay. Say dalin so magmaliw lan planeta ya agnapanbilayan.
2 Sinononot ed satan, natalosan tayo so inkaseryoso na sakey a kipapasen a deneskribe nen propetan Isaias. Inkuanto: “Nia say kabilungetan sakbongan to so dalin, tan say makapal a kabilungetan so saray balbaley.” (Isaias 60:2) Siempre, saya so agmanutukoy ed literal a kabilungetan. Aglabay ya ibaga nen Isaias ya onsabi agew et agla onsinag so banwa, bulan, tan bibitewen. (Salmo 89:36, 37; 136:7-9) Imbes, say tutukoyen to et say espiritual a kabilungetan. Tan satan so makadesyang. Kanian, agtayo makapambilay no anggapoy espiritual a liwawa no panon ya agtayo met nabilay no anggapoy literal a liwawa.—Lucas 1:79.
3. Nipaakar ed saray salita nen Isaias, anto so nepeg a gawaen na saray Kristiano?
3 Nisengeg ed saya, kaukolan a morekdeken tayo iray salita nen Isaias, ya anggaman asumpal ed kadaanan a Juda et walaan ni na malalaknab a kasumpalan natan. On, diad panaon tayo et asakbongan na espiritual a kabilungetan so mundo. Diad ontan a mapeligron kipapasen, say espiritual a liwawa so importantin maong. Satan so rason no akin a kaukolan a talinengen na saray Kristiano so bilin nen Jesus: “Pasindagen yo komon so silew yo ed arap na saray totoo.” (Mateo 5:16) Naliwawaan na saray matoor a Kristiano so kabilungetan parad saray mauyamo, a diad ontan et naikdan ira na pankanawnawa a makagamor na bilay.—Juan 8:12.
Mauddiem a Panaon ed Israel
4. Kapigan so pilimeron inkasumpal na saray mapropetikon salita nen Isaias, balet anto so wala lan kipapasen ed mismon panaon to?
4 Saray salita nen Isaias nipaakar ed kabilungetan a manakbong ed dalin so pilimeron asumpal sanen nankibalatar so Juda tan adakep ed Babilonia so totoo to. Balet, sakbay ni ingen na satan, diad mismon panaon nen Isaias et satan a nasyon so malaknab lan abilungetan ed espiritual, sakey a bengatlan amakiwas ed sikato a mamaseseg ed saray kanasyonan to: “O abung nen Jacob, dago kayo, tan manakar itayo ed silew nen Jehova”!—Isaias 2:5; 5:20.
5, 6. Antoran sengegan so lalon amauddiem ed panaon nen Isaias?
5 Nampropesiya si Isaias nipaakar ed Juda dia “ed saray agew nen Uzias, Jotam, Akaz, tan Ezekias, ar-ari na Juda.” (Isaias 1:1) Magulon panaon ed saman lapud politika, relihyoson pansimpisimpitan, inkabulok ed hustisya, tan panaglames ed saray mairap-bilay. Anggan nen manuuley iray matoor ya arari, a singa si Jotam, saray altar na palson dirios so nanengneng ed dakel a pukdol. Linmoor so situasyon lapud impanuley na saray agmatoor ya arari. Alimbawa, mas ni so ginawa na marelmeng ya Arin Akaz sanen imbagat to so ilalak to diad ritual a panagbagat ed dios a Moloc. Talagan kabilungetan itan!—2 Arari 15:32-34; 16:2-4.
6 Mauddiem met so kipapasen ed nanduruman lugar. Say Moab, Edom, tan Filistia so makapasesgan akatalindeg ed saray ketegan na Juda. Say mamaamianen a panarian na Israel, anggaman mikanayon et sakey a maangat a kabusol. Diad banda’d amianen, ginirogiro na Sirya so deen ed Juda. Say mas mapeligro ni ingen et say maruksan Asirya, a lawas manaanap na pankanawnawan mamalaknab ed pakayari to. Kaleganan na pampropropesiya nen Isaias, kinonkesta na Asirya so nasyon na Israel tan aderal lawari so Juda. Walay panaon ya asamsam na saray Asiryano so amin ya akutaan a syudad ed Juda likud ed Jerusalem.—Isaias 1:7, 8; 36:1.
7. Anton basbas so pinili na Israel tan Juda, tan panon a kinmiwas si Jehova?
7 Saratan a desyang so sinagmak na akisipanan a totoo na Dios lapud agnanmatoor ed sikato so Israel tan Juda. Singa saramay asalambit ed libro na Uliran, sikara so ‘angikaindan ed saray basbas na inkatunong, pian manakar ira ed saray dalan na kabilungetan.’ (Uliran 2:13) Ingen, anggaman sinmanok si Jehova ed totoo to, agto ra sigpot ya inkaindan. Imbes, pinatalindeg to si Isaias tan arum niran propeta pian mangitarya na espiritual a liwawa parad siopaman ed nasyon a siansian manggugunaet a manmatoor ed panaglingkor ed si Jehova. Say liwawan nitarya panamegley na sarayan propeta so mabmablin tuloy. Manangiter-bilay itan.
Panaon na Kabilungetan Natan
8, 9. Antoran sengegan so mamapabilunget ed mundo natan?
8 Mipadparan maong iray kipapasen natan ed panaon nen Isaias. Diad panaon tayo, si Jehova tan say nitronon Ari to, si Jesu-Kristo so impulisay na saray lider a totoo. (Salmo 2:2, 3) Papalikdoen na saray relihyoson lider na Kakristianoan iray pulok da. Ibabaga na saratan a lider a panseserbian da so Dios, balet ta diad katuaan to et maslak ed sikara so mangitatandoro ed saray dirios na sayan mundo—nasyonalismo, militarismo, kayamanan, tan bantog iran indibidual—nilikud ni ed pangibabangat da ed saray paganon doktrina.
9 Diad nanduruman pasen, saray relihyon na Kakristianoan so mibibiang ed saray bakal tan sibil a panlalaban a mangiyaalibansa na panagpalanit ed sakey a tribu (ethnic cleasing) tan arum niran makapatalagnaw a bengatla. Niarum ni, imbes ya ontalindeg ira ed nibase’d Biblian moralidad, imbaliwala odino aktibon intandoro na dakel ya iglesia so imoral iran agamil a singa say pilalawanan tan homoseksualidad. Bilang resulta na impangipulisay da ed saray estandarte na Biblia, saray pulok na Kakristianoan et singa saramay totoon sinaglawi na salmista nensaman: “Agda amta, nisay natalosan da; manaakar ira a pawilpawil ed kabilungetan.” (Salmo 82:5) Tua, say Kakristianoan, a singa say kadaanan a Juda, so walad pirmin kabilungetan.—Apocalipsis 8:12.
10. Panon ya onsisinag so liwawa ed kabilungetan natan, tan panon a nagugunggunaan iray mauyamo?
10 Diad utel na satan a kabilungetan, papasindagen nen Jehova so liwawa nisesengeg ed saray mauyamo. Lapud saya, uusaren toray alanaan a lingkor to diad dalin, say “matoor tan makabat ya aripen,” tan saraya so “singa silesilew dia ed mundo.” (Mateo 24:45; Filipos 2:15) Satan ya aripen a klase, a susuportaan na minilyon nin “arum a karnero” a kaiba ra, so mangiwawandag na espiritual a liwawan nibase’d Salita na Dios, say Biblia. (Juan 10:16) Diad sayan ambilunget a mundo, satan a liwawa so mangiiter na ilalo ed saray mauyamo, ya ontutulong ed sikaran nawalaan na pisisiglaotan ed Dios, tan makapaliis ira ed espiritual iran pakakulasbongan. Satan et mablin tuloy tan manangiter-bilay.
‘Igalang Ko so Ngaran Mo’
11. Anton impormasyon so intarya nen Jehova ed panaon nen Isaias?
11 Diad mauddiem iran panaon legan na impanbilay nen Isaias tan anggan diad mas mauddiem niran panaon ed saginonor sanen kinautibo na saray taga-Babilonia so nasyon nen Jehova, anton nengneng na panangigiya so intarya nen Jehova? Nilikud ed impangitarya toy moral a giya, malinlinew to lan indatak no panon so panumpal to’d saray gagala to nipaakar ed totoo to. Alimbawa, konsideraen so makapakelkelaw a propesiya a walad Isaias kapitulo 25 anggad 27. Ipapabitar na saray salita ed sarayan kapitulo so impangasikaso nen Jehova ed saray pamaakaran nensaman tan no panon ton gagawaen met itan natan.
12. Anto so impapuson balikas nen Isaias?
12 Unona, oniay inyabawag nen Isaias: “O Jehova, sika so Dios ko; sika so paatageyen ko, igalang ko naani ngaran mo.” Agaylan impapuson balikas na panangidayew! Balet anto so amakiwas ed propeta a mangibesngaw ed ontan a pikakasi? Say manunan sengegan so niparungtal ed katuloyan na bersikulo, ya oniay nabasa tayo: “Ta nanggawa ka [Jehova] na saray makapakelaw, saray pananimbawa lanti nen inmuna, dia ed katooran tan katuaan.”—Isaias 25:1.
13. Anton pikakabat so amabiskeg ed panamabli nen Isaias ed si Jehova? (b) Panon itayon makaaral ed alimbawa nen Isaias?
13 Nen panaon nen Isaias, dakel lay makapakelkelaw a ginawa nen Jehova parad Israel, tan saraya so nisulat. Mapatnag a kabisado nen Isaias irayan sulsulat. Alimbawa, amta to ya impaway nen Jehova so totoo to manlapud inkaaripen ed Ehipto tan inliktar to ra manlapud sanok na armada nen Faraon diad Ambalangan Dayat. Amta ton inwanwan nen Jehova so totoo to diad kalawakan tan intarok to ra ed Insipan a Dalin. (Salmo 136:1, 10-26) Impabitar na saratan a salaysay ed awaran a si Jehova a Dios et matoor tan napanmatalkan. “Saray pananimbawa” to—amin a bengatlan ginagala to—so ontua. Say inter na Dios a suston pikakabat so amabiskeg ed si Isaias a mankurang ed liwawa. Kanian sikato so maabig ya alimbawa ed sikatayo. No maalwar tayon aralen so nisulat a Salita na Dios tan iyaplika itan ed kabibilay tayo, mansiansia itayo met ed liwawa.—Salmo 119:105; 2 Corinto 4:6.
Aderal so Syudad
14. Anto so nipropesiya nipaakar ed sakey a syudad, tan nayarin anto itan a syudad?
14 Naromog ed Isaias 25:2 so sakey ya alimbawa na bilin na Dios, ya oniay nabasa tayo: “Ginawam so syudad a sakey a lusbo, say sakey a kinutaan a syudad ed sakey ya inkageba, say sakey a palasyo na saray sankaili ya aliwa a syudad la; sikato naani agla nipaalagey anggan kapigan.” Anto iyan syudad? Nayarin mapropetikon sasaglawien nen Isaias so Babilonia. On, sinmabi panaon a say Babilonia so nagmaliw a lusbo na saray bato.
15. Anton “baleg a syudad” so wala natan, tan anto naani so nagawa ed satan?
15 Kasin say syudad a sinalambit nen Isaias et walaay pipadparaan natan? On. Sasaglawien na libro na Apocalipsis so “baleg a syudad, a wala so pakauley to ed saray arari ed dalin.” (Apocalipsis 17:18) Satan a baleg a syudad et say “Babilonia a Baleg,” say sankamundoan ya empiryo na palson relihyon. (Apocalipsis 17:5) Natan, say manunan kabiangan na Babilonia a Baleg et say Kakristianoan, a saray klerigo to et mangigagaulo ed isusumpa ed kimey na totoo nen Jehova a panangipulong ed Panarian. (Mateo 24:14) Balet, singa say kadaanan a Babilonia, say Babilonia a Baleg so magano lan naderal, ya aglan balot niwala lamet.
16, 17. Panon a si Jehova so inggloria na saray kakabusol to nensaman tan ed sayan panaon?
16 Anto ni so propesiya nen Isaias nipaakar ed “kinutaan a syudad”? Oniay kuan nen Isaias nipaakar ed si Jehova: “Say baley a mabiskeg paliketen to ka; say syudad na saray makapakebbiew a nasyon ontakot ira naani ed sika.” (Isaias 25:3) Panon a sayan onsusumpan syudad, “say syudad na saray makapakebbiew a nasyon,” so mangigloria ed si Jehova? Bueno, nodnonoten no anto so agawa ed sankabiskegan ya ari na Babilonia, si Nabucodonosor. Kayari na makapatenyeg-kanonotan ya eksperiensia a mangipapatnag ed mismon kakapuyan to, sikato so apaskar a mamidbir ed inkatalonggaring nen Jehova tan say inka-makapanyari To. (Daniel 4:34, 35) Sano agamilen nen Jehova so pakayari to, bidbiren na kakabusol to iray makapanyarin gawa to, anggaman masuyat ira.
17 Kasin apaskar la so Babilonia a Baleg a mamidbir ed saray makapanyarin gawa nen Jehova? On. Legan na inmunan guerra mundial, saray alanaan a lingkor nen Jehova so nampulong anggaman ed kairapan. Nen 1918 et akautibo ira ed espiritual sanen nipangaw iray manangidaulon opisyales na Watch Tower Society. Tinmunda lawari so naorganisa lan panagpulong a kimey. Insan nen 1919, sikara so impawil tan pinabiskeg lamet nen Jehova panamegley na espiritu to, ya inggapo dan sumpalen so ganggan ya ipulong so maong a balita diad intiron atooan a dalin. (Marcos 13:10) Amin na saya so nipropesiya ed libro na Apocalipsis, ontan met ed epekto na saya ed saray kakabusol da. Saraya so ‘ataktakot tan angiter na galang ed Dios na tawen.’ (Apocalipsis 11:3, 7, 11-13) Agkabaliksan na satan ya amin da et akomberti, noagta apaskar iran mamidbir ed makapanyarin gawa nen Jehova ed sayan agawa, unong ya impasakbay la nen Isaias.
“Apireng na Duka”
18, 19. (a) Akin ya ag-abuyak na kakabusol so katooran na totoo nen Jehova? (b) Panon a “say kanta na saray makapakebbiew a totoo” et napaabeba?
18 Diad impangimano nen Isaias ed mapangasin impideneng nen Jehova ed saramay mankukurang ed liwawa, oniay kuanto ed si Jehova: “Sika so apireng na duka, sakey ya apireng na naukolan ed kairapan, sakey a salimbeng ed bagyo, sakey a sirum ed petang, sano say ngapos na saray makapakebbiew a totoo sikato so singa sakey a bagyo ya onsumpa ed bakor. Singa say petang ed sakey a pasen ya amaga paabebaen mo so tanol na saray sankaili; singa say petang lapu ed sirum na lurem, say kanta na saray makapakebbiew a totoo napaabeba.”—Isaias 25:4, 5.
19 Nanlapu la nen 1919, sinali na saray diktador so amin lan paraan pian buyaken so katooran na saray tuan managdayew, balet ta agda ayarian. Akin? Lapud si Jehova so apireng tan salimbengan na totoo to. Itatarya to so pakainawaan manlapud mandarlang a panamasegsegang tan tinmalindeg a singa malmalet a bakor sumpad bagyo na isusumpa. Sikatayo a mankukurang ed liwawa na Dios so matalek a manilalo ed panaon sano “say kanta na saray makapakebbiew a totoo napaabeba.” On, magunaet itayon manalagar ed agew sano naandi laray kakabusol nen Jehova.
20, 21. Anton bankete so intarya nen Jehova, tan anto so nilaktip ed satan a bankete diad balon mundo?
20 Aglambengat sasalimbengan nen Jehova iray lingkor to. Tataryaan to ira bilang maaron Ama ra. Kayari ton imbulos so totoo to manlapud Babilonia a Baleg nen 1919, imparaanan to ira na bankete lapud impanbiktorya, sakey a daakan a suplay na espiritual a tagano. Saya so nipasakbay ed Isaias 25:6, ya oniay nabasa tayo: “Si Jehova na saray ehersito manggawa naani ed saray amin a baley na sakey a liket ed saray mataba a bengatla, sakey a liket na saray alak ed tapew na saray bolirek, saray mataba a bengatla a napno na utek, tan saray alak ed tapew na saray bolirek napaitneng ira.” Agayla so inka-bendisionan tayo diad pinabang ed satan a ponsia! (Mateo 4:4) “Say dulang na Katawan” so abuntonan na saray bengatlan nakan. (1 Corinto 10:21) Panamegley na “matoor tan makabat ya aripen,” naikdan itayo na amin a bengatlan nakaukolan tayo ed espiritual a pantalos.
21 Tan wala ni so nagkalalo ed sayan intarya na Dios a bankete. Sayan espiritual a ponsia a panggagayagaan tayo natan so mangipanonot ed sikatayo nipaakar ed daakan a materyal a tagano a niwala naani ed insipan na Dios a balon mundo. Insan, say “sakey a liket ed saray mataba a bengatla” so mangilaktip ed daakan a materyal a tagano. Anggapo la naani so naerasan ed pisikal odino espiritual a pantalos. Agaylan pakainawaan itan parad saramay pinablin matoor a maniirap natan lapud nipasakbay a “kakisiran na tagano” a kabiangan na “tanda” na kiwawala nen Jesus! (Mateo 24:3, 7) Parad sikara, saray salita na salmista so makapaligliwan tuloy. Inkuanto: “Wala so daakan ya ilik ed tapew na dalin ed tapew na toktok na saray palandey.”—Salmo 72:16.
22, 23. (a) Anton “pandong,” odino “sakbong,” so naekal, tan panon? (b) Panon a naandi so ‘kabalawan na baley nen Jehova’?
22 Talinengen natan so mas makapakelkelaw ni a sipan. Diad impangiyaliling nen Isaias ed kasalanan tan patey diad sakey a “pandong,” odino sakey a “sakbong,” oniay kuan to: “Bagbagen [nen Jehova] dia ed saya a palandey so lupa na sakbong a manakbong ed saray amin a baley, tan say pandong a nibilkag ed tagey na saray amin a nasyon.” (Isaias 25:7) Isipen pa labat! Naandi la so kasalanan tan patey, a mamapabelat ed katooan a singa makaapos ya ules. Agaylay pampirawat tayo ed panaon sano saray gungguna na dondon bagat nen Jesus et sigpot lan nipagamor ed matulok tan matoor a sankatooan!—Apocalipsis 21:3, 4.
23 Diad impanukoy ed satan a maglorian panaon, oniay ipapaseguro ed sikatayo na apuyanan a propeta: “Inakmon [na Dios] so patey ed ando lan ando; et say Katawan a Jehova punasen to naani so saray lua ya onagus ed saray amin a lupa; et say kabalawan na baley to ekalen to naani a manlapu ed amin a dalin: ta si Jehova sikato so sinalita to.” (Isaias 25:8) Anggapo so ompatey manlapud natural iran sengegan odino mannangis lapud impatey na inad-aro. Agaylan abenditon pananguman! Niarum ni, agla narengel ed dalin so panagpabanday tan matilan propaganda ya abayag lan aanosan na Dios tan saray lingkor to. Akin ya agla narengel? Lapud galpongen la nen Jehova so lapuan na saratan—say ama na tila, si Satanas a Diablo, kaiba lay amin a bini nen Satanas.—Juan 8:44.
24. Panon ya onkiwas iramay mankukurang ed liwawa ed saray makapanyarin gawa nen Jehova ed biang da?
24 No molimolien iratan a pakanengnengan na pakayari nen Jehova, napakiwas iramay mankurang ed liwawa a mangikelyaw: “Nia, saya sikato so Dios tayo; sikato so inalagar tayo, tan sikato ilaban to itayo: saya sikato si Jehova; sikato so inalagar tayo, manliket tan manggayaga itayo dia ed panangilaban to.” (Isaias 25:9) Magano la, saray matunong a katooan so walaan na amin a rason a manggayaga. Sigpot lan naekal so kabilungetan, tan saray matoor so nalimbos met na liwawa nen Jehova diad ando lan ando. Wala ni kasi ilalon mas magloria? Anggapo la!
Kasin Nipaliwawa Yo?
• Akin ya importanti natan so mankurang ed liwawa?
• Akin ya intandoro nen Isaias so ngaran nen Jehova?
• Akin ya agbalot nabuyak na kakabusol so katooran na totoo na Dios?
• Antoran mayaman a bendision so akasagana ed saramay mankukurang ed liwawa?
[Tepetepet Parad Panagaral]
[Litrato ed pahina 12, 13]
Saray manaayam ed Juda so angibagat na ugugaw ed si Moloc
[Saray litrato ed pahina 15]
Apakiwas si Isaias a mangitandoro ed ngaran nen Jehova lapud pikabat to ed saray makapanyarin gawa nen Jehova
[Litrato ed pahina 16]
Saray matunong so nalimbos na liwawa nen Jehova ed ando lan ando