Inorganisa nen Pablo Iray Panagkontribusyon Parad Sasanto

SARAY espiritual a bengatla so manunan importanti ed saray tuan Kristiano. Anggaman kuan, importanti met ed sikara so pangasikaso ed pisikal a pankaabigan na arum. Mabetbet a mangitatarya ira parad saramay maniirap. Lapud inaagin aro et napapakiwas iray Kristiano ya ontulong ed saray kaparan mananisia a mankakaukolan.​—Juan 13:34, 35.

Apakiwas si apostol Pablo lapud aro to ed espiritual iran agagi to pian mangorganisa na osos ed limog na saray kongregasyon na Acaya, Galacia, Macedonia, tan say distrito na Asia. Anto so rason no akin a kaukolan iya? Panon a naorganisa so programa parad tulong? Anto so reaksion da? Tan akin a nepeg ya interesado tayo ed agawa?

Kipapasen na say Kongregasyon na Jerusalem

Kayari na Pentecostes 33 K.P., saray Judio tan proselitan nanlalapud arum a lugar a nagmaliw a babangatan sanen Pentecostes so nansiansia ni ed Jerusalem pian nagkalalon makaaral nipaakar ed tuan pananisia. No kaukolan, maliket ya ontulong iray kaparan managdayew a manakbat ed pankaukolan parad satan ya impansiansia ni. (Gawa 2:7-11, 41-44; 4:32-37) Say sibil a kaguloan so nayarin resulta na nagkalalon pankaukolan legan a saray nasyonalistan Judio so angisagyat ed panrebeldi tan karawalan na pangkat. Balet, pian anggapoy naerasan a patumbok nen Kristo, inagew-agew a binunogan iray mankakaukolan a balo. (Gawa 6:1-6) Impasyan pinasegsegang nen Herodes so kongregasyon, tan nen kapegleyay dekada na 40 K.P., pirmin inapektaan na eras so Judea. Diad tua, amta na saray patumbok nen Jesus ya amin iraya so nayarin nanresulta ed samay tatawagen nen Pablo ya “irirap,” ‘kairapan,’ tan “panamsam ed saray kayarian [da].”​—Hebreos 10:32-34; Gawa 11:27–12:1.

Nen ngalngali 49 K.P., siansia nin mairap so kipapasen. Kanian, kayarin inmabobon ya iyapasakey nen Pablo so panagpulong ed saray Gentil, kinerew di Pedro, Santiago, tan Juan ed sikato a “pakanonoten . . . so saray duka.” Satan so nanggunaetan nen Pablo a gawaen.​—Galacia 2:7-10.

Pangorganisa ed Osos

Si Pablo so angasikaso ed pundo parad duruka iran Kristiano diad Judea. Nen ngalngali 55 K.P., inkuanto ed saray taga-Corinto: “Nisengeg ed osos lapu ed saray sasantos, unong na ingganggan ko ed saray iglesia na Galacia, ontan met so gawaen yo. Dia ed balang unonan agew na sinimbasimba balang sakey ed sikayo mangibiig na yatol to, unong ed yaaligwas to . . . [Insan] saray abobonan yo ed saray sulat, sikara so ibibak a mangawit na panangasi yo ed Jerusalem.” (1 Corinto 16:1-3) Kayari sakey taon inkuan nen Pablo a saray taga-Macedonia tan taga-Acaya so  akitulongan met. Tan sanen say atugyop a kantidad et impawit ed Jerusalem, ipapanengneng na say inkiwala na saray manangilaman manlapud distrito na Asia a saray kongregasyon ed satan a rehyon so angi-osos met.​—Gawa 20:4; 2 Corinto 8:1-4; 9:1, 2.

Anggapoy pinilit a mangiter na mas nen say nasarag to. Imbes, satan so pamaakaran na pampapanoan ta pian antokaman a sobra et onsalipotpot ed kulang diad limog na sasanto diad Jerusalem tan Judea. (2 Corinto 8:13-15) “Balang sakey gawaen to komon so ginetma to ed puso to,” inkuan nen Pablo, “aliwa a dia ed kaermenan odino dia ed pasootan; ta say Dios aroen to so sililiket a mangiter.”​—2 Corinto 9:7.

Angiter so apostol na maabig a rason ed saray taga-Corinto pian magmaliw a mabunlok. ‘Nisengeg ed sikara nagmaliw a duka [si Jesus], pian sikara so onyaman’ ed espiritual. (2 Corinto 8:9) Maseguron kaliktan dan aligen so inkamabunlok to. Niarum ni, lapud papayamanen ira na Dios “ed ami’ langkap,” manepeg labat ya ontulong iran mangiter ed saray pankaukolan na sasanto.​—2 Corinto 9:10-12.

Awawey na Saray Akibiang

Dakel so naaralan tayo nipaakar ed boluntaryon panangiter diad pangonsidera ed awawey na saray akibiang nen inmunan-siglo a programa ya itutulong parad sasanto. Impanengneng na osos so mas ni nen say kapagaan parad duruka iran kaparan managdayew ed si Jehova. Impabitar na satan a walay bedber na impanaagi ed saray Kristianon Judio tan Gentil. Say pangiter tan pangawat na saray kontribusyon so mangipapatnag na inkasaksakey tan pankakaaro na sarayan Gentil tan Judio. Manginanabang ira ed materyal ontan met ed espiritual.​—Roma 15:26, 27.

Nayarin diad inmuna et ag-inimbitaan nen Pablo iray Kristianon taga-Macedonia a mibiang lapud sikara met so walad pirmin kairapay-bilay. Balet, ‘nantultuloy ira ya akikasi a napribilihyoan a mangiter.’ Agayla, anggaman manasagmak ira na “baleg a subok ed silong na kairapan” et malikeliket iran angiter ya “onlabas ni ed mismon pakasarag da”! (2 Corinto 8:1-4, NW) Mapatnag a kalaktip ed say baleg a subok ed sikara et saray akusasyon a sikara so mangaagamil na relihyon ya ilegal parad saray Romano. Kanian natalosan a walaan iray pililikna ed saray agagi ran taga-Judea, a manasagmak na mipara iran kairapan.​—Gawa 16:20, 21; 17:5-9; 1 Tesalonica 2:14.

Anggaman inusar nen Pablo so datin inkaseseg na saray taga-Corinto parad osos pian napaseseg iray taga-Macedonia, say inkaligsa na saray taga-Corinto so kinmapuy. Natan et sinalambit na apostol so inkamabunlok na saray taga-Macedonia pian napakiwas iray taga-Corinto. Naimano ton kaukolan toran panonotan a panaon la pian sumpalen so ginapoan da ed apalabas a taon. Anto ta so agawa?​—2 Corinto 8:10, 11; 9:1-5.

Inggapo nen Tito so osos ed Corinto, balet linmesa iray problema a nayarin angamper ed saray sagpot to. Kayarin kinmonsulta ed si Pablo diad Macedonia, pinmawil si Tito a kaiba ni duara pian pabiskegen so kongregasyon ed Corinto tan sumpalen so osos. Arum so nayarin angikuan a sinali nen Pablo ya anamoten iray taga-Corinto. Nayarin saya so rason no akin ya imbaki to so taloran lalaki pian sumpalen so osos tan inrekomenda to so balang sakey ed sikara. Inkuan nen Pablo: “Napaliisan ya, pian siopaman a too anggapo komon so mamalaw ed sikami dia ed kanonotan na saya a kadaakan ya iter mi. Ta nonoten mi so saray bengatlan galgalangen, aliwa lambengat a dia ed arap na Katawan, noag  dia met ed arap na totoo.”​—2 Corinto 8:6, 18-23; 12:18.

Pangitulor ed Kontribusyon

Diad primabera na 56 K.P., say indonasyon a kuarta so akaparaan la pian awiten ed Jerusalem. Si Pablo so mila ed saray manangilaman ya apili na saray angidonasyon. Oniay kuan na Gawa 20:4: “Sikato so inibaan ya angga ed Asia nen Sopatro a taga Berea, anak nen Pirro, et dia ed saray taga Tesalonica, di Aristarco tan Segundo, tan si Gayo a taga Derbe, tan si Timoteo; et dia ed saray taga Asia, di Tiquico tan Trofimo.” Mapatnag a kaiba da met si Lucas, a nayarin angilaman ed saray Kristiano diad Filipos. Kanian, manga siamiran lalaki so akila ed sayan gagala.

“Say atipon ya amin ed sayan osos so nayarin baleg a kantidad,” so kuan na iskolar a si Dieter Georgi, “lapud say unor iran sagpot da, ya angilanor la’d si Pablo tan dakel ni ran manangilaman, so agla komon nansagpotan tan nanggastosan.” Say grupo so aglabat la mangiter na seguridad noagta manalimbeng met ed si Pablo manlapud antokaman ya akusasyon nipaakar panagsaol. Saramay imbaki so angilaman ed saray kongregasyon na Gentil ed arap na sasanto diad Jerusalem.

Diad impanlayag da manlapud Corinto a mamaarap ed Sirya, akasabi komon iray manangilaman ed Jerusalem ed Paskua. Balet, lapud balita a getman ipapatey si Pablo kanian nauman iray plano. (Gawa 20:3) Nayarin gagala na kakabusol to a sikatoy pateyen da legan a manbabaroy ed dayat.

Wala ni ray arum a kapagaan nen Pablo. Antis a pinmikal, sikatoy nansulat ed saray Kristiano ed Roma ya ipikasi ran sikato so ‘nilaban komon ed saray matulay a wala ed Judea, tan say panagpaga to a manulong ed Jerusalem makapaliket komon ed saray sasantos.’ (Roma 15:30, 31) Anggaman andi-duaruwan naawat na sasanto iray kontribusyon tekep na baleg a pisasalamat, nayarin nampagaan nen Pablo so gulo a nagawa ed limog na saray Judio ed inkalapagan diad isabi to.

Seguradon lawas walad kanonotan nen Pablo iray pobri. Anggaman ag-ibabaga na Kasulatan no kapigan so impangiparesibi ed kontribusyon, say impangipatulor ed satan so angiyalibansa na pankakasakey tan amakiwas ed saray Kristianon Gentil ya ipatnag so pisasalamat da ed saray kaparan managdayew a Judio parad espiritual a kayamanan a naawat da manlapud sikara. Say inyapireng nen Pablo ed templo ag-abayag kayari na insabi to ed Jerusalem so amalesa na gulo a sengeg na inkaaresto to. Balet saya so angiter ed sikato’d saginonor na saray pankanawnawa a mantasi ed saray gobernador tan arari.​—Gawa 9:15; 21:17-36; 23:11; 24:1–26:32.

Saray Kontribusyon Tayo Natan

Manlapu la nen inmuna siglo, dakel lay angumanan​—balet aliwan saray manunan prinsipyo. Makatunongan a pinakabatan iray Kristiano nipaakar ed saray pinansyal a pankaukolan. Antokaman iray inkontribusyon da parad saramay mankakaukolan so nepeg a boluntaryo, a napapakiwas lapud aro ed Dios tan ed kaparan too.​—Marcos 12:28-31.

Say itutulong a ginawa parad sasanto nen inmunan siglo so pakanengnengan a say panangasikaso na ontan iran kontribusyon so nepeg ya organisadon tuloy tan asikasoen a maong ed matuan paraan. Siempre, kabat nen Jehova a Dios iray pankaukolan, tan mangiiter na probisyon parad saray lingkor to ta pian makapantultuloy iran manginabang na maong a balita na Panarian ed arum anggaman ed saray kairapan. (Mateo 6:25-34) Ingen, antokaman so kipapasen na panagbilay tayo, amin tayo so makapanggawa na betang tayo. Diad ontan a paraan, “say akatipon na dakel anggapo so sulok to; tan say akatipon na daiset anggapo so kulang to.”​—2 Corinto 8:15.