Kasin Saya so Sankaabigan a Karera Parad Sika?

NO sakey kan bautismadon Kristiano, say aro ed Dios so maseguron amakiwas ed sikan manggaway linawa to. Niarum ni, say ministeryo so seguradon ginawam a karera. On, ingganggan nen Jesu-Kristo so amin a papatumbok to a magmaliw iran managgaway babangatan. (Mateo 28:19, 20) On, nayarin mantratrabaho ka natan pian legpeten moy inkasika. Balet bilang patumbok nen Jesus tan sakey ed saray Tastasi nen Jehova, say sankaimportantian et sakey kan Kristianon ministro, ya iyuunam ed bilay so panangipulong ed Panarian.​—Mateo 24:14.

Nayarin ngalngali ka la man-biente años odino onsulok ni. Ompan ninodnonot mo lan maong no anton kurso so dampoten mo ed bilay. Diad panimbang ed saray pampilian ya akalukas ed sika, say pakapnek mon mismo so nayarin importantin nodnonoten.

Konsideraen pa sirin so inkuan nen Jørgen a taga-Denmark nipaakar ed pinili to. Satan so deneskribe nen Jørgen bilang “sakey a maabig a dalan na kabibilay a niyapasakey mo so sankaimportantian a kimey.” Si Eva, sakey a 31 años a bii ed Gresya, so angikuan: “No ikomparak so bilay ko ed saray kaedaran ko, lawas kon nibabaga a satan so mas makabaliksan ni, mas makapnek, tan mas makapaliket.” Anton karera so pakaromogan ed ontan ya inkapnek? Panon mon nadampot so ontan a karera?

Kasin Iwanwan Ka na Dios?

Medyo mairap so pampili na karera. Diad tua, pirawat na arum a mabitabitar la komon ya ipatnag na Dios so labay ton pagawa’d sikara.

Sanen si Moises so walad Midian, sikatoy ingganggan nen Jehova ya ompawil ed Ehipto pian ibulos toray Israelita manlapud inkaaripen. (Exodo 3:1-10) Pinmayawar so anghel na Dios ed si Gideon, ya aturon mangisalba ed Israel manlapud panaglames. (Uko-ukom 6:11-14) Si David so manpapastol na karnero sanen ingganggan na Dios si Samuel a sikatoy lanaan to bilang ontumbok ya ari na Israel. (1 Samuel 16:1-13) Aliwan ontan a paraan so kiwawanwan tayo natan. Imbes, nakaukolan tayon simbangen iray bengatla tan desidien no panon tayon usaren so inter na Dios iran abilidad tayo.

Inlukas nen Jehova so “sakey a baleg a puerta a mangitonton ed kimey” parad kalangweran iran Kristiano natan. (1 Corinto 16:9, NW) Panon ya ontan? Diad imbeneg a dekada, say bilang na manangiyabawag na Panarian so dinmaak na masulok a 2,125,000 ya anggad masulok ya 6,000,000 ed intiron mundo. Siopa so ontutulong a mangitarya ed minilyon a Biblia, libro, brosyur, magasin, tan tract a nakaukolan parad espiritual a probisyon da tan ed kimey na panangipulong ed maong a balita diad intiron mundo? Sayan abenditon pribilihyo so panggagayagaan na saray membro na pamilyay Bethel ed sankamundoan.

Makagunggunan Bilay

Say Bethel so mankabaliksan na “Abung na Dios,” tan saray ayaman a Bethel so panaayaman na saray Kristianon boluntaryo a manlilingkor diad saray hedkuarter tan ed saray sangan opisina na Watch Tower Society. (Genesis 28:19, paimano’d-leksab, NW) Saray pamilyay Bethel natan so nayarin iyaliling ed organisadon-maong iran ‘sankaabungan a nipaalagey lapud kakabatan’ tan niletneg unong ed aro ed si Jehova.​—Uliran 24:3.

Anto so nibaga nipaakar ed singa-pamilyan kipapasen ed Bethel? Oniay kuan na sakey a 25 años a membro na pamilyay Bethel ed Estonia: “Panliketan ko so pakapiulop ed saray kaaro nen Jehova diad amin a panaon. Saya so siansia nin sankablian a bengatla parad siak diad Bethel.”​—Salmo 15:1, 2.

Diad sankamundoan, ngalngalin 19,500 ya indibidual  natan so manggagayaga ed pribilihyo na serbisyo diad Bethel. (Salmo 110:3) Diad Estados Unidos, 46 a porsiento na saramay walad Bethel so manedad na 19 ya anggad 29. Singa si Isaias, inkuan dan: “Wadia ak; ibaki moak.” (Isaias 6:8) Si Isaias​—a dedikado la ed si Jehova​—so namboluntaryo ed sakey a kaaruman a pribilihyo na serbisyo. Saya so mapatnag a mankabaliksan na panangisakripisyo ed arum niran personal a bentaha. Saramay manlilingkor diad Bethel so anaynan ed saray ayaman da tan ed lugar da, ontan met ed kainaan, kaamaan, agagin lalaki tan bibii, tan kakaaro ra. Mabulos irayan nansakripisyo “nisengeg ed ebanghelyo.”​—Marcos 10:29, 30.

Bilang resulta, agaylan espiritual a bendision so wala diad Bethel! Oniay insalaysay na sakey a marikit a membro na pamilyay Bethel diad Russia: “Diad pagmaliw a masakripisyo, dakel so naaralan mi a makatulong ed sikamin manbilay diad balon mundo. Nibagak a diad kipapasen ko et dakdakel niray bendision nen Jehova nen saray sakripisyok.”​—Malaquias 3:10.

Bilay Diad Bethel

Anto so kipapasen na bilay diad Bethel? Mipakna iray membro na pamilyay Bethel a satan et makapabiskeg, makapnek, tan makapaliket ni ingen. Si Jens, a 43 años to la, so nanggayaga ed serbisyo ed Bethel. Akin? Inkuanto: “Lapud naliliknak a kabiangan kami ed sankalaknaban a sagpot ed panusumpal na sakey ya importantin kimey. Natebek ko so laknab tan kaimportantian na kimey nen Jehova.”

Manlapud Lunes anggad Sabado, say agew diad Bethel so igapo ed morning worship. Saya so paningbat ed Biblia, ya idauloan na eksperiensiadon matatken. Diad saray labi na Lunes et walay sakey oras ya usaren ed pampamilyan panagaral na Biblia diad tulong na Say Panag-Bantayan, a tumbokan no maminsan na paliwawan imbase’d Makasulatan a tema a nagkalalo lan matukoy ed pamilyay Bethel.

Anto ni so dalanen na sakey kasabi to ed Bethel? Pian nipaamta ed saray balon membro so bilay ed Bethel, walaray matakken ya agagi ed pamilya a manlektyur ed sikara nipaakar ed nanduruman aspekto na serbisyo ed Bethel. Diad loob na pigaran simba legan na pilimeron taon to, atendian na balon membro na pamilyay Bethel so alay abig a sinimban panagaral a denesinyon mamalaknab ed pakatalos to ed Kasulatan. Saray balon tinawag so manggayaga met ed nikaduman programa ed panagbasa na Biblia. Legan na pilimeron taon da ed serbisyo ed Bethel, basaen na saray balon membro na pamilya so intiron Biblia.

Anto so epekto na sayan amin a panangipasal? Oniay ebat nen Joshua, sakey a 33 años a membro na pamilyay Bethel diad Hong Kong: “Say Bethel so talagan amaaralem ed apresasyon ko ed si Jehova. Makapilimog ak ed dakel ya eksperiensiadon agagi ya inusar da lawarin amin so panaon da diad panlilingkor ed si Jehova. Nagkalalo lan panggagayagaan ko iray espiritual a programa, a singa say morning worship tan Watchtower Study na pamilya. Niarum ni, labay koy mauksoy tan simplin dalan na kabibilay. Lapud saya, anggapo iray agnakaukolan a panaburidoan ko. Naaralan ko met no panon ya asikasoen iray bengatla unong ed Kristianon paraan, tan saya so lawas apaneknekan a makagungguna.”

Uusaren na saray membro na pamilyay Bethel so dakel a panaon tan sagpot da diad panggawa ed saray bengatlan namboluntaryoan da. Salanti, pian manunan usaren so pisikal tan mental ya abilidad da diad panumpal ed asainmin da diad Bethel. Dakerakel a bengatla so nakaukolan a sumpalen. Arum so mamapaandar ed saray printing press odino mantratrabaho ed apisan na libro, gawaan na libro a nipapatulor ed dakel a kongregasyon. Arum so mankikimey diad kusina, pananganan, odino pesakan. Saray asainmin so mangilaktip ed panaglinis, panagdalus, panagpaalagey a kimey, tan dakel ni. Arum so walaan na responsabilidad a mangasikaso ed kagawaan diad sarayan departamento. Arum so mangaasikaso ed bunigas odino mankikimey ed opisina. Amin a nipabtang a trabaho diad Bethel so mangilalanor ed makapaliket iran angat tan makagunggunan tuloy. Say kimey ed Bethel so nagkalalo lan makapnek lapud mangiyaalibansa itan ed intereses na Panarian tan gagawaen itan makasengeg ed aro ed Dios.

Saray membro na pamilyay Bethel so niasain ed saray kongregasyon, a naeeksperiensia ran mismo iray gungguna na kimey da. Panliliketan  da so iyatendi ed saray miting ed kongregasyon tan pibibiang ed panagpulong a kimey. Bilang resulta, nababayuboan na saray membro na pamilyay Bethel so mabiskeg a pisisiglaotan ed saray agagi ra ed lokal iran kongregasyon.​—Marcos 10:29, 30.

Si Rita, a membro na pamilyay Bethel diad Britanya, so angikuan: “Misalsalamat ak ed kongregasyon! Diad piaaral ko tan pampupulong ko, napapabiskeg a maong so pananisiak no nanengneng kon wadman iray pinablin agagi, ananak, tan saray maedad la! Antokaman so nagawa, wadman ira. Satan so akatulong ed siak a magmaliw a mas lalon maseseg ed serbisyok ed Bethel.”

Say bilay ed Bethel et aliwan puros trabaho, miting, lawak na kimeyan, tan panagaral. Panggagayagaan met na pamilya iray panaon na panagrelaks. Panapanaon et walaray makapalikliket tan makapatumang ed espiritual a programa na “Family Night,” a mangiiter na pankanawnawa pian napanggayagaan iray talento na dakel tan pakaamtaan na makapaseseg iran bengatla nipaakar ed bilay na arum a manseserbi diad Bethel. Makapaliket met so makagungguna tan makapabiskeg iran panagpasyar a kaibay arum. Nitarya met so pigaran pasilidad a panagligliwaan, ontan met ed saray librarya parad personal a panagbasa tan panagsukimat. Tan agmet lilingwanan so marakep a pantutuyaw diad saray lamisaan no oras lay panangan.

Oniay kuan nen Tom, a membro na pamilyay Bethel diad Estonia: “Asingger labat ed Bethel so dayat, tan wala met ed asingger so masansanting a katakelan a panpapasyaran min sanasawa. Tunggal paminsan met a manggagalaw ak na golf, hockey, tan tennis a kaiba iray kakaaro ed kongregasyon tan diad Bethel. Tan sano marakep so panaon, manbisikleta kami.”

Anto so Gawaen MoPian Onkualipika?

Siempre, say Bethel so manunan pasen a ditan isasaklang na saray matatken ed espiritual a Kristiano so sagradon serbisyo ed si Jehova tan mankikimey ira parad saray kapananisiaan ed intiron mundo. Nepeg a kapeten na saramay magmaliw  a membro na pamilyay Bethel so pigaran kualipikasyon. Anto so gawaen mo pian onkualipika ka ed serbisyo ed Bethel?

Singa si Timoteo, ya akikimey ed si apostol Pablo, saramay angawat ed serbisyo ed Bethel so nepeg a walaan na maong a talindeg ed kongregasyon. (1 Timoteo 1:1) Si Timoteo so “walaan maong a dengel na inkasikato a manlapu ed saray agagi a wala ed Listra tan Iconio.” (Gawa 16:2) Anggaman malangwer ni, kabisado la nen Timoteo so Kasulatan tan maong so inkiletneg to ed katuaan. (2 Timoteo 3:14, 15) Ontan met a pikakabat ed Biblia so iilaloan ed saramay angawat ed serbisyo ed Bethel.

Saray membro na pamilyay Bethel so nakaukolan a walaan na espiritu na dilin-panagsakripisyo. Mapatnag a tuloy so espiritu na dilin-panagsakripisyo tan inkamabulos nen Timoteo a mangiyuna ed intereses na Panarian kanian oniay nikuan nen Pablo nipaakar ed sikato:  “Anggapo so took a kaparay kalakal [to], a mangisakit a peteg ed kipapasen yo. Ta sikaran amin anapen da so kayarian dan dili; ya aliwan saray bengatlan kayarian nen Jesu-Kristo. Et kabat yo a say impakasalsali la ed sikato, a, singa sakey ya ugaw a manlingkor ed ama, ontan so impiulop to ed siak a nanlingkor ed kikayat na ebanghelyo.”​—Filipos 2:20-22.

Say nakaukolan ed serbisyo ed Bethel et maespiritual a lalaki tan bibii. Saray uksoyan parad saray membro na pamilyay Bethel so mamabulaslas ed sikara diad espiritual panamegley na panagaral na Biblia, inkamaparanay ed saray Kristianon miting tan ed lawak na ministeryo, tan pililimog ed saray Kristiano a matakken ed espiritual. Kanian saramay walad Bethel so natutulongan ya ontumbok ed simbawa nen Pablo: “Ontan so panakar yo ed [si Kristo Jesus], linmamut tan nipaalagey ed sikato, tan nipaletneg ed pananisia yo, a singa say inkibangat yo, ya ondaak ed pisasalamat.”​—Colosas 2:6, 7.

Lapud klase na kimey diad Bethel, saramay naawat ed sayan pribilihyo na serbisyo so nepeg a mabiskeg ed pisikal tan maong so bunigas da. No nakapet mo irayan kualipikasyon ya asalambit mi, a 19 años ka odino onsulok ni, tan bautismado la ed loob na manga sakey taon, pasesegen mi kan mannonot ed serbisyo ed Bethel.

Amin Tayo so Walaan na Betang

Bilang Kristiano, maseguron amin tayo so manpipilalek a mangiyuna ed intereses na Panarian diad bilay tayo tan magmaliw ya intiron-kamarerwa ed serbisyo tayo ed si Jehova. (Mateo 6:33; Colosas 3:23) Napaseseg tayo met iramay manlilingkor ed Bethel a mantultuloy ed panangisaklang da na sagradon serbisyo ditan. Tan nagkalalo lan pasesegen iray kalangweran ya agagi ya onkualipika ed serbisyo ed Bethel diad pandampot ed sayan abenditon pribilihyo.

Say serbisyo ed Bethel so dalan na kabibilay a makapnek ed espiritual​—sakey a peteg a sankaabigan a karera parad sika. Ontan ed biang nen Nick, a ginmapon nanserbi ed Bethel diad edad a 20. Kayari na samploy taon a serbisyo ed Bethel, oniay kuanto: “Mabetbet ak a misasalamat ed si Jehova lapud agkanepegan a panangasi to. Anto ni so anapen ko? Dia et kalimog mi iray matoor a Kristiano a gagawaen day anggaay nayarian da a manlingkor ed si Jehova.”

[Kahon/Litrato ed pahina 22]

ANTO SO NAGAWAAN NA MAMATATKEN TAN ATATENG?

Nagkalautlan pasesegen na mamatatken tan saray managbiahen manangasikaso iray kalangweran a lalaki a man-aplay diad Bethel. Diad agano ni, pinmatnag ed sakey a simplin impansurbi ed saray kalangweran nin membro na pamilyay Bethel a 34 porsiento ed sikara so pinaseseg na saray Kristianon manangasikaso a gawaen dan kalat so serbisyo ed Bethel. On, nayarin nailiwan ira ed nanlapuan dan kongregasyon. Balet maabig a nodnonoten ya anggaman alay abig so impluensia nen Timoteo ed saray kalangweran a walad Listra tan Iconio, saray matatken diman so angiyabuloy ed sikato a mikimey ed si Pablo. Agda inkuan a naandian iray baleg a katulongan ed kongregasyon diad impiulop nen Timoteo ed apostol.​—1 Timoteo 4:14.

Nagkalalo lan panggunaetan na saray Kristianon atateng so pagmaliw a positibon impluensia ed ananak da nipaakar ed saya. Diad surbi ya asalambit ed gapo, inkuan na 40 porsiento ed saramay atepetan a saray atateng da so manunan amaseseg ed sikara ya onloob ed serbisyo ed Bethel. Oniay inkuan na sakey ya agin bii a manseserbi ed Bethel ed loob la na pigaran taon: “Say bilay na atateng ko ed serbisyo ra ed si Jehova so pirmin amabiskeg ed siak ya onloob ed serbisyo diad Bethel. Diad pakakaimaton ko ed alimbawa ra ed sigpot-panaon a ministeryo, amtak a saya so sankaabigan tan makapnek a tuloy a dalan na bilay a pilien.”

[Kahon ed pahina 24]

PINABLI RA SO SERBISYO ED BETHEL

“Papablien ko so serbisyok ed Bethel. Makapaliket a naamtaan a manlilingkor ak ed si Jehova ed loob na intiron agew tan ontan so gawaen ko lamet ed ontumbok ya agew, insan diad ontumbok niran ag-agew. Lapud satan, nawawalaan ak na maong a konsiensia tan napapano so isip ko na positibo iran kanonotan.”

“Say Bethel so lugar a napangitalagaan moy amin a panaon tan biskeg mo diad panaglingkor ed si Jehova ya anggapoy pakasbelan. Saya so mangiter na akindalem a gayaga. Balet nanengneng mo met so organisasyon nen Jehova manlapud duman anggulo. Naliknam a maong a wala ka ed pinagkasentro na kimey na organisasyon, tan saya so makapaliket a maong.”

“Say iloob ed Bethel so sankaabigan a bengatlan agawa ed siak ed kapiganman. Tuloytuloy dia so edukasyon. Tan say edukasyon dia so, aliwan parad mismon gegemtan ko, noagta parad si Jehova. Say kimey ko dia et aliwan kaapaan.”

“Lapud panguusar ko ed saray talentok diad Bethel, napnapnek ak tan walaan ak na deen lapud nauusar iratan parad si Jehova tan parad saray agagi.”

“Agko naromog so peteg ya inkapnek tan liket ed datin karerak. Nampirawatan ko la ed loob na dakel a taon so pakapikimeyan ed tan parad saray agagik. Satan so rason no akin a linmoob ak ed Bethel. Naliliknak so peteg ya inkapnek diad pakaamtan amin a sagpot ko so mangungguna ed arum diad espiritual a paraan tan kirayewan itan nen Jehova.”