“Mapalar so Too a Makaromog na Kakabatan”

SIKATO so sakey a manag-anlong, arkitekto, tan ari. Lapud tinaon ya almo a masulok a 200 milyon a dolyar, sikatoy mayaman a tuloy nen siopakaman nin ari ed dalin. Sikato met so bantog lapud kakabatan to. Diad pirmin pandinayew na ombibisitan reyna et nikelyaw to: “Nia, say kapaldua agnibaga ed siak; say kakabatan mo tan ka-aligwasan talonaan da so galang a nadngelan ko.” (1 Arari 10:4-9) Ontan so kipapasen nen Arin Solomon na kadaanan ya Israel.

Si Solomon so parehon walaan na saray kayamanan tan kakabatan. Tan lapud satan a kipapasen to a sikatoy nagkalautlan kualipikado a mandesisyon no dinan ed saratan a dua so talagan kakkaukolan. Oniay insulat to: “Mapalar so too a makaromog na kakabatan, tan say too a makagamor na pakatalos. Ta say pakagamor ed sikato magmaong nen say pakagamor ed pilak, tan say pinabangan ed sikato magmaong nen say dalisay a balitok. Sikato so mamabli nen saray rubi: tan anggapo ed saray bengatla a napanpilalekan mo so makapipara ed sikato.”​—Uliran 3:13-15.

Balet, iner so pakaromogan na kakabatan? Akin a mas mabli itan nen saray kayamanan? Antoray makapasagyat a nengneng na satan? Ebatan na koma-8 a kapitulo na libro na Biblian Uliran, ya insulat nen Solomon, irayan tepet diad makapalikliket a paraan. Nirepresenta ditan so kakabatan, a singano sarag na satan so mansalita tan onkiwas. Tan ipaparungtal a mismo na kakabatan so pakasagyatan ontan met ed kablian na satan.

“Sikato Mankelyaw a Maksil”

Onggapo so kapitulo 8 na Uliran tekep na tepet a rhetorical: “Agta mankelyaw so kakabatan, tan say pakatalos papawayen to bosis to?” * On, say kakabatan tan pakatebek so mankelkelyaw, balet ta midumaan itan a tuloy ed imoral a bii a sanibsanib ed ambilunget iran pasen pian mangiyeesaes na saray makaayat a salita ed saray layag na begtebegtew tan palpalaran nin tobonbalo. (Uliran 7:12) “Agta mankelyaw so kakabatan, tan say pakatalos papawayen to so bosis to? Ed tapew na toktok na saray atagey a pasen ed asingger ed dalan, a panaabetan na saray basbas, sikato so manalagey; ed abay na saray wangalan, ed lolooban na syudad, ed sasabien ed saray pinto, sikato mankelyaw a maksil.” (Uliran 8:1-3) Say mabiskeg tan makbaw a bosis na kakabatan so malinlinew a narengel diad mapublikon paspasen​—diad saray wangalan, diad saray nansangaan na saray karsada, tan diad saray lolooban na sakey a syudad. Maininomay a narengel na totoo kanian onkiwas ira.

Siopa so makapangiburi a say maridios a kakabatan et nirekord diad apuyanan a Salita na Dios, say Biblia, a niwala lawari ed amin a totoon mapilalek a gamoran itan? “Say Biblia so libron walaan na sankarakelan a managbasa diad awaran,” kuan na The World Book Encyclopedia. Inyarum to ni: “Mas dakel a kopya na Biblia so nibubunog nen say dinanman nin libro. Aminpigapiga met lan nipatalos so Biblia, tan ed dakel niran lenguahe, nen say dinanman nin libro.” Lapud wala  la so kompleton Biblia odino kabiangan na satan diad masulok a 2,100 a lenguahe tan pansasalita, masulok a 90 porsiento ed sankatooan so anggan panon et makala la na kabiangan na Salita na Dios ed mismon pansasalita ra.

Mapublikon iyaabawag na Tastasi nen Jehova so mensahe na Biblia ed inerman a pasen. Diad 235 a daldalin, sikaray aktibon mangipupulong ed maong a balita na Panarian na Dios tan mangibabangat ed totoo nipaakar ed saray katuaan a naromog diad Salitay Dios. Say uusaren dan nibase’d Biblia a dyurnal a Say Panag-Bantayan, a nipalapag ed 140 a lenguahe, tan say Awake!, a niimprinta ed 83 lenguahe, a kada sakey et walaan na sirkulasyon a masulok a 20 milyon. Talagan say kakabatan so mantutultuloy ya onkekelyaw diad saray mapublikon pasen!

“Say Bosis Ko Sikato so Nipaakar ed Saray Anak na Totoo”

Onggapon mansalita so nirepresentan kakabatan, diad impangikuan: “Ed sikayo, O totoo, onkelyaw ak; tan say bosis ko sikato so nipaakar ed saray anak na totoo. O sikayo karaklan, talosan yo so kabintaan; tan, sikayo maatiw, walaan kayo komon na makatalos a puso.”​—Uliran 8:4, 5.

Say kelyaw na kakabatan so malaklaknab. Iimbitaan to so amin a katooan. Anggan saray ag-eksperiensiado so naiimbitaan ya onggamor na kasiliban, odino inkaalwar, tan saray makulangkulang et say pakatalos. On, panisiaan na Tastasi nen Jehova so Biblia bilang libron parad amin a totoo tan anggapoy panaglabi a papasesegen da so amin a nakatongtong da ya usisaen itan pian naala daray salita na kakabatan a wadtan.

“Say Sangik Manbalikas na Tua”

Bilang pangituloy ed ikekerew to, oniay kuan na kakabatan: “Dengelen yo, ta mansalita ak na manunaan a bengabengatla; tan say panlukas na saray bibil ko sikato naani maptek a bengabengatla. Ta say sangik manbalikas na tua; tan say karelmengan sikato so kadimla na saray bibil ko. Amin iray salita na sangik wala’ra ed inkatunong; anggapo so bengatla a pikewet a marumsis ed sikara.” On, saray bangat na kakabatan et ekselenti tan maptek, matua tan matunong. Anggapo so bengatlan makapalikdo odino pikewet ed saratan. “Amin mapatar ira ed makatalos, tan maptek ed saray makaromog na pikakabat.”​—Uliran 8:6-9.

Matukotukoy so pangipapaseseg na kakabatan: “Awaten yo so panangibangat ko, ya aliwan pilak; tan say pikakabat nen say pinili a balitok.” Sayan kerew so makatunongan, “ta say kakabatan sikato so magmaong nen saray rubi; tan amin iray bengatla a napanpilalekan ag-ira makapipara ed sikato.” (Uliran 8:10, 11) Balet akin? Antoy rason no akin a say kakabatan et mas mabli nen saray kayamanan?

“Say Bungak Sikato so Magmaong Nen Say Balitok”

Saray regalon niiter na kakabatan ed saray dumerengel to so mas mabli nen say balitok, pilak, odino saray rubi. Diad impangiladatdat ed no anto irayan regalo, kuan na kakabatan: “Siak a kakabatan ginawak so binta a panag-ayaman ko, tan naromog ko so pikakabat tan say kalakal. Say takot ed Jehova sikato so panggula ed mauges: pangta, tan karangalan, tan say mauges a dalan, tan say marumsis a sangi, kagulak.”​—Uliran 8:12, 13.

 Say kakabatan so mamawala na kasiliban tan abilidad a mannonot ed say walaan na ontan. Say toon walaan na maridios a kakabatan so walaan met na panamagalang tan takot ed Dios, ta “say takot ed Jehova sikato so sengeg na kakabatan.” (Uliran 9:10) Kanian, kagula toy kagula nen Jehova. Say inkamapaatagey, inkalastog, imoral a walna, tan mabanday a panagsalita so agnaromog ed sikato. Say panggula to ed mauges so manasalimbeng ed sikato manlapud sinisiblet a panangusar na pakayari. Agaylan importanti ed saramay walad responsablin posisyon ed loob na Kristianon kongregasyon, pati ed saray ulo na pamilya, ya anapen day kakabatan!

“Say pananimbawa sikato so kien ko, tan aralem a pikakabat,” so intuloy na kakabatan. “Siak so pakatalos; walaan ak na pakapanyari. Lapu ed siak saray arari manari ra, tan saray prinsipe mangiter ira na katunongan. Lapu ed siak saray prinsipe manuley ira, tan saray ankabli, pati saray amin ya ukom ed dalin.” (Uliran 8:14-16) Saray bunga na kakabatan et laktipen toy aralem a pakatalos, pakarandan, tan inkabiskeg​—bengabengatlan kakkaukolan na saray manuley, atagey ya opisyales, tan dederlengen. Importantin tuloy so kakabatan ed saramay walad pakayari tan saramay manisimbawa ed arum.

Say tuan kakabatan so niwala ed amin, balet agnaromog itan na amin. Walaray mangipulisay ed satan odino paliisan da itan, anggano satan so sankaala da la. “Aroen ko so saray mangaro ed siak,” so kuan na kakabatan, “et saray mananap ed siak a maseeseet naromog da ak.” (Uliran 8:17) Say kakabatan so nagamoran lambengat na saramay masimoon a mananap ed satan.

Saray dalan na kakabatan so maptek tan matunong. Tutumangan toray manaanap ed sikato. Kuan na kakabatan: “Kaykayamanan tan dayew wala’ra ed siak; on, maando a kasil tan inkatunong. Say bungak sikato so magmaong nen say balitok, on, nen say dalisay a balitok; et say munat ko magmaong nen say pinili a pilak. Manakar ak ed dalan na inkatunong, dia ed pegley na saray basbas na inkatunong: pian nagawak so saray mangaro ed siak a manawir na kayarian, tan pian napanok so saray panangisimpenan da na kayamanan.”​—Uliran 8:18-21.

Nilikud ni ed saratan ya ekselentin kalidad tan ugali a singa say kasiliban, abilidad a mannonot, kaabebaan, aralem a pakatalos, praktikal a kakabatan, tan pakarandan, kabiangan met so kaykayamanan tan galang ed saray regalo na kakabatan. Say makabat a too so nayarin makagamor met na kayamanan diad panamegley na matunong iran paraan, tan sikatoy onaligwas ed espiritual. (3 Juan 2) Lapud kakabatan et napagalangan met so sakey a too. Niarum ni, sikatoy napepenek met ed nagamoran to, tan walaan na deen na nonot tan malinis a konsiensia ed Dios. On, maliket so toon akaromog na kakabatan. Saray bunga na kakabatan so peteg a magmaong nen say agogolan a balitok tan apilin pilak.

Agaylan nipanpanaon iyan simbawa parad sikatayo, lapud manbibilay itayo ed sayan materyalistikon mundo a nidadanet so pakagamor na kayamanan diad antokaman a paraan tan antokaman so nagawa! Komon ta agtayo nalibangan so kablian na kakabatan odino usarey  agmatunong iran paraan pian onyaman. Agtayon balot ibabaliwala iray mismon probisyon a mangipagamor na kakabatan​—saray Kristianon pantitipon tayo tan say personal a panagaral tayo na Biblia tan saray palapagan a nitatarya panamegley na “matoor tan makabat ya aripen”​—nisesengeg lambengat ed pakagamor na kaykayamanan.​—Mateo 24:45-47.

“Nipasen Ak a Nanlapu ed Inkaando lan Ando”

Say inkirepresenta na kakabatan a naromog ed koma-8 a kapitulo na Uliran so aliwa lambengat a paraan pian isalaysay iray pakabidbiran na sakey ya ipapasen a kualidad. Satan so simboliko met a mangirerepresenta ed sankaimportantian a palsa nen Jehova. Ituloy nin ikuan na kakabatan: “Si Jehova kinayarian toak dia ed gapo na dalan to, arapen na saray gawa to nen inmuna. Nipasen ak a nanlapu ed inkaando lan ando, nanlapu ed gapo, arapen a wala so dalin. Sanen anggapo so saray kalinsurong, siak nipaway ak, sanen anggapo so subosubol a daakan ed danum. Arapen a niletneg so saray palandey, arapen a nipaway so saray pukdol; Leleg ya agto ni ginawa so dalin, ni say gapo na dabok na mundo.”​—Uliran 8:22-26.

Agaylan miulibayan so walad tagey a deskripsion na nirepresentan kakabatan ed walan nibaga nipaakar ed “say Salita” diad Kasulatan! “Dia ed gapo wala so Salita,” insulat nen apostol Juan, “tan say Salita so wala ed Dios, tan say Salita so sakey a dios.” (Juan 1:1, NW) Say nirepresentan kakabatan et piguratibon mangirerepresenta ed Anak na Dios, si Jesu-Kristo, ed kiwawala to sakbay a nagmaliw a too. *

Si Jesu-Kristo so “say panguloan ed amin a pinalsa; ta dia ed sikato apalesa so amin a bengatla, dia ed katawenan tan tapew na dalin, saray bengatla a nanengneng tan bengabengatlan agnanengneng.” (Colosas 1:15, 16) “Sanen inletneg to [nen Jehova] so saray tawen, wala ak diman,” itutuloy na nirepresentan kakabatan, “sanen saray subol na kalinsurong binmiskeg, Sanen initer to ed dayat so ketegan to, pian saray danum agda luksoan so ganggan to, sanen tinandaan to so saray panangiletnegan na dalin; Diad saman wala ak ed abay to, singa uloen a komikimey; tan siak nensaman so inagew-agew a panggayagaan to, a malikeliket lawas ed arap to, A malikeliket ed panag-ayaman a dalin to; et say panggayagaan ko wala nensaman ed saray anak na totoo.” (Uliran 8:27-31) Say panguloan ya Anak nen Jehova so walad dikingan na Ama to, ya aktibon akikimeyan ed sikato​—say agnaparaan a Manamalsa na katawenan tan dalin. Sanen pinalsa nen Jehova a Dios so inmunan too, akibiang so Anak ed kimey To bilang Uloen a Komikimey. (Genesis 1:26) Agpankelawan a say Anak na Dios so interesadon tuloy tan panlikliketan to ni ingen so katooan!

“Bendito So Too ya Ondengel ed Siak”

Bilang nirepresentan kakabatan, inkuan na Anak na Dios: “Natan sirin, ana’ko ra, dengelen yoak; ta bendito so saray manonton ed saray dalan ko. Dengelen yo so panangibangat, tan onkabat kayo komon, tan sikato so agyo ipulisay. Bendito so too ya ondengel ed siak, a manbantay ya inagew-agew ed saray wangalan ko, a manaalagar ed saray patukok na saray pintok. Ta anggan siopa a makaromog ed siak naromog to so bilay, tan makagamor na pamalangkap nen Jehova. Balet say mankasalanan sumpa ed siak lamesen to so dili a kamarerwa to: saray amin a manggula ed siak aroen da so patey.”​—Uliran 8:32-36.

Si Jesu-Kristo so mismon mangilalaman ed kakabatan na Dios. “Walara ed sikato ya amin ya akaamot so saray kayamanan na karunongan tan pakatalos.” (Colosas 2:3) Sikato sirin so talinengen tayo a maong tan maapit a tumboken iray bakat to. (1 Pedro 2:21) Say pangipulisay ed sikato et pakarisgoan na mismon bilay tayo tan lablabayen tayo so patey, ta “anggapo so arum a kilabanan.” (Gawa 4:12) On, awaten tayo si Jesus bilang samay sakey ya intarya na Dios parad kilabanan tayo. (Mateo 20:28; Juan 3:16) Diad ontan et naeksperiensia tayo so liket a manlalapud ‘pakaromog na bilay tan pakalay panamalangkap nen Jehova.’

[Saray paimano ed leksab]

[Saray litrato ed pahina 26]

Importantin tuloy so kakabatan ed saramay walad responsablin posisyon

[Saray litrato ed pahina 27]

Agyo ibabaliwala iray probisyon a mangipapagamor na kakabatan