“Say Katawan Inmoli ed Bilay a Tua”

Isipen pa so inkagonigon na saray babangatan nen Jesus lapud impatey na Katawan da. Say ilalo ra et aliling to imay bangkay ya impasen nen Jose na Arimatea diad lubok. Naandi met so antokaman iran iilaloan ya ibulos nen Jesus iray Judio ed pamapairap na Roma.

NO SAMAN so anggaan la na pamaakaran, abuyak la komon iray babangatan nen Jesus a singa saray patumbok na dakel a mankuan iran Mesias. Balet ta mabilay si Jesus! Unong ed Kasulatan, sikatoy aminpigan pinmayawar ed saray patumbok to kayarin tuloy na impatey to. Kanian, arum ed sikara so apakiwas a mangikelyaw: “Say Katawan inmoli ed bilay a tua!”​—Lucas 24:34.

Kaukolan ya idepensa na saray babangatan so pananisia ra’d si Jesus bilang say Mesias. Diad panggawa ed satan, nagkalalo ya impabitar da so inkioli to manlapud saray inaatey bilang mabiskeg a paneknek na inka-Mesias to. On, “saray apostoles tinasian da ed baleg a pakayari so inkioli ed bilay na Katawan a Jesus.”​—Gawa 4:33.

No wala ed saman so amaneknek a palikdo iman ya inkioli​—nayarin diad impamaaksobi ed sakey ed saray babangatan a palikdo iman odino diad pangipanengneng a say bangkay nen Jesus et wala ni’d lubok​—say Inkakristiano so abuyak la komon diad kagapo ni labat. Balet ta aliwan onman so agawa. Lapud pikakabat a mabilay so Kristo, linma iray patumbok nen Jesus ed amin a pasen ya inyaabawag da so inkioli to, tan  dakerakel so nagmaliw a mananisia ed apaolin Kristo.

Akin a napanisiaan yo met so inkioli nen Jesus? Antoy paneknek a peteg iyan agawa?

Akin a Konsideraen so Ebidensia?

Inreport na amin ya apatiran Ebanghelyo so inkioli nen Jesus. (Mateo 28:1-10; Marcos 16:1-8; Lucas 24:1-12; Juan 20:1-29) * Tinukoy na arum a kabiangan na Kristianon Griegon Kasulatan tekep na inkaseguro so nipaakar ed inkioli nen Kristo manlapud patey.

Agpankelawan a say inkioli nen Jesus so inyabawag na saray patumbok to! No peteg a sikatoy pinaoli na Dios, saman so makapakelkelaw a tuloy a balita a nadngel ed mundo ed kapiganman. Kabaliksan na satan a wala so Dios. Sakey ni, kabaliksan na satan a si Jesus et mabilay natan.

Panon itayon naimpluensiaan na satan? Bueno, impikasi nen Jesus: “Saya sikato so andi-anggaan a bilay, a naamtaan da ka a saksakey a tuan Dios, tan saman so imbakim, salanti Jesu-Kristo.” (Juan 17:3) On, makagamor itayo na manangiter-bilay a pikakabat nipaakar ed si Jesus tan ed Ama to. Diad pangiyaplika ed ontan a pikakabat, anggano ompatey itayo, sikatayoy napaoli, lapud apaoli si Jesus. (Juan 5:28, 29) Nawalaan itayo na ilalon andi-anggan a bilay ed paraison dalin diad silong na mangatatawen a Panarian na Dios diad lima na niglorian Anak to, si Jesu-Kristo, say Ari na arari.​—Isaias 9:6, 7; Lucas 23:43; Apocalipsis 17:14.

Kanian, importanti sirin so tepet ed no kasin peteg ya inmoli si Jesus manlapud saray inaatey. Mangimpluensia itan ed bilay tayo natan tan saray iilaloan tayo ed arapen. Satan so rason no akin ya iimbitaan mi kan mangusisa ed apatiran alasir na ebidensia ya inatey si Jesus tan sikatoy apaoli.

Peteg ya Inatey si Jesus ed Kiew

Ibabaga na arum a manduaruwa ya, anggaman nipasak si Jesus et sikatoy ag-inatey ed kiew. Ibabaga ran sikatoy manpapanabos ni labat tan pinmawil so liknaan to lapud inkabetel na lubok. Ingen, papaneknekan na amin a walan reperensia a say bangkay nen Jesus so inyan ed lubok.

Lapud si Jesus et pinatey ed arap na publiko, walaray akatasi ed katuaan a sikatoy peteg ya inatey ed kiew. Say impatey to so sineguro na senturion ya akan-obligasyon ed pamatey. Saman ya opiser a sundalo et sakey a propesyonal, a say trabaho to et laktipen toy paneguron inatey la si Jesus. Sakey ni, sanen aseguro lan inatey si Jesus insan impaala na Gobernador na Roma a si Pontio Pilato ed si Jose na Arimatea so bangkay to pian niponpon.​—Marcos 15:39-46.

Anggapo lay Karga na Lubok

Say anggapoy kargan lubok so angiter ed saray babangatan na unonan paneknek ed inkioli nen Jesus, tan sayan ebidensia so siansian agnasuppiat. Si Jesus so niponpon ed balon lubok, sakey ya agnin balot angiponponan. Asingger iman ed lugar ya angipasakan tan seguradon mainomay a naromog ed saman. (Juan 19:41, 42) Amin a salaysay na Ebanghelyo so mantunosan a sanen sinmabi iray kaaro nen Jesus diad lubok ed onkomaduan kabuasan kayari impatey to, anggapo la imay bangkay to.​—Mateo 28:1-7; Marcos 16:1-7; Lucas 24:1-3; Juan 20:1-10.

Say anggapoy kargan lubok so pankelawan na saray kabusol nen Jesus, no panon a pankelawan met itan na saray kaaro to. Abayag lan panggugunaetan na saray kabusol to so pakanengneng ed sikaton inatey la tan niponpon. Sanen asumpal day getma ra, impaguardiaan dan maong tan kinapotan da so lubok. Anggaman ontan, diad kaimbuasan na pilimeron agew na simba et anggapoy karga na lubok.

Kasin inala na kakaaro nen Jesus so bangkay to manlapud lubok? Seguradon andi, lapud ipapanengneng na saray Ebanghelyo a sikaray  agonigon a maong kayari impatey to. Sakey ni, seguradon agbalot gawaen na saray babangatan so bengatlan amta ra a panamalikdo a pakapasegsegangan tan kipateyan da.

Siopa so angekal ed karga na lubok? Saray kakabusol nen Jesus lambengat so nibagan angala ed bangkay. Anggano ikuan lan inala ra, sikara komon so angipaway ed satan ed saginonor pian suppiaten so ibabaga na saray babangatan ya inmoli si Jesus tan sikatoy mabilay. Balet anggapoy ontan ya agawa, lapud say Dios so kinmiwas.

Kayari pigaran simba, saray kakabusol nen Jesus so agsinmuppiat sanen pinaneknekan nen Pedro: “Sikayon lalaki a taga-Israel, dengel yo so sarayan salita: Si Jesus a taga-Nazaret, laki ya inabobonan na Dios ed sikayo ed panamegley na saray gawa a makapanyari, tan makapakelaw, tan saray tanda a ginawa na Dios ed panamegley to, dia ed sikayo, unong na kabat yo met la, so sayan niyawat lapu ed tinandaan a linawa tan lawas a pikakabat na Dios, pinate’yo tan impasak yo ed krus ed panamegley na lima na saray maramsak a totoo: Say Dios, balet, pinaoli to ed bilay, a naukpos ed saray irap na patey: lapud agnayari a pokpokan na patey. Ta inkuan nen David nipaakar ed sikato, sankanengneng ko lawas so Katawan ed arap ko . . . Laot ni say laman ko manpainawa ed ilalo: Ta agmo paulyan so kamarerwak a manayam ed Hades, tan agmo met yabuloy a say Santom nanengneng to so kabulok.”​—Gawa 2:22-27.

Dakel so Akanengneng ed Apaolin Jesus

Diad libro na saray Gawa, onia so inkuan na managsulat na Ebanghelyo a si Lucas: “Ed [saray apostol] met kayari inkairirap to, [si Jesus] pinmanengneng a mabilay, ed dakel a pamintuan, a pinmatnag ed dakel ed sikara ed loob na apataploy agew, tan akisalita ed sikara na saray bengatla nipaakar ed panarian na Dios.” (Gawa 1:2, 3) Dakel a babangatan so akanengneng ed apaolin Jesus ed nanduruman inkagawa​—diad hardin, diad dalan, legan na panangan, diad Dayat na Tiberias.​—Mateo 28:8-10; Lucas 24:13-43; Juan 21:1-23.

Susuppiaten na saray kritiko so inkapeteg na sarayan impayawar. Ibabaga ran saray managsulat so angimbento ed saray salaysay, odino ibabaga ran walaray ompatnag ya agpantutunosan ed saratan. Diad tua, saray angkelag labat a panduruma ed saray salaysay na Ebanghelyo so mamaneknek ya anggapoy impankokomplot. Onlaknab so pikakabat tayo nipaakar ed si Jesus sano iter na sakey a managsulat iray detalyi a manuporta ed arum a salaysay nipaakar ed pigaran inkagawa diad mangaraldalin a bilay nen Kristo.

Kasin kugkugip labat iray impayawar nen Jesus kayari inkioli to? Antokaman a panuppiat ed saratan et agnapanisiaan, lapud sikatoy anengneng na dakerakel a totoo. Arum ed sikara et saray sumisigay, bibii, sakey a lingkor ed sibil, tan anggan si apostol Tomas a manduaruwa, ya akombinse labat sanen anengneng toy agnasuppiat a paneknek ya inmoli si Jesus manlapud saray inaatey. (Juan 20:24-29) Diad pigaran inkagawa, ag-abidbir a tampol na saray babangatan nen Jesus so apaolin Katawan da. Aminsan, masulok a 500 a totoo so akanengneng ed sikato, a maslak ed sikara so mabilay ni sanen inusar nen apostol Pablo iman ya inkagawa bilang ebidensia diad pangidedepensa to ed kioli.​—1 Corinto 15:6.

Say Mabilay a Jesus so Walaan na Impluensia ed Totoo

Say inkioli nen Jesus so aliwan pamaakaran labat a pangusisaan odino pandebatian. Say katuaan  a sikatoy mabilay so mangiimpluensia ed totoo ed amin a pasen diad positibon paraan. Nanlapu nen inmunan siglo, dakerakel a totoo a datin agmananginunang odino sigpot ya onsusumpa ed Inkakristiano so anguman la tan sigpot lan segurado a satan so tuan relihyon. Antoy tinmulong ed sikaran anguman? Apaneknekan da diad panaaral da ed Kasulatan a pinaoli na Dios si Jesus bilang maglorian espiritun pinalsa ed tawen. (Filipos 2:8-11) Sikaray angagamil na pananisia ed si Jesus tan ed probisyon nen Jehova a Dios parad kilalaban panamegley na dondon bagat nen Kristo. (Roma 5:8) Aromog na saratan ya indibidual so peteg a liket diad panggawa ed linawa na Dios tan diad panbilay unong ed saray bangat nen Jesus.

Nonoten pa no antoy kabaliksan na pagmaliw a Kristiano nen inmunan siglo. Anggapoy nagungguna ed inkabantog, pakayari, odino kayamanan. Misumlangan a tuloy, dakel ya inmunan Kristiano so ‘magayagan angawat ed inkasamsam na saray kayarian da’ nisengeg ed pananisia ra. (Hebreos 10:34, NW) Kakaukolanen na Inkakristiano so bilay a walaay panagsakripisyo tan kapasegsegang a diad dakel a kaso et nansumpal ed inkamartir.

Sakbay a nagmaliw iran patumbok nen Kristo, arum so walaan na maabig iran iilaloan no nipaakar ed inkabantog tan kayamanan. Si Saulo na Tarso so binangatan na bantog a managbangat na Ganggan a si Gamaliel tan sikatoy onggagapo lan derlengen na saray Judio. (Gawa 9:1, 2; 22:3; Galacia 1:14) Ingen, nagmaliw ya apostol Pablo si Saulo. Sikato tan dakel nira so angipulisay ed inkabantog tan pakayari ya iyoopresi na sayan mundo. Akin? Pian iwakawak so mensahe na tuan ilalo a nibase ed saray sipan na Dios tan ed katuaan a si Jesu-Kristo so inmoli la manlapud saray inaatey. (Colosas 1:28) Sikaray mabulos a managmak na irap nisengeg ed kabat dan nibase ed katuaan.

Tua met itan ed minilyon natan. Naromog mo ra ed saray kongregasyon na Tastasi nen Jehova ed sankamundoan. Masimoon ya iimbitaan ka na Tastasi ed tinaon a panagselebra ra ed impatey nen Kristo, a nagawa kaselek na agew no Simba, Abril 8, 2001. Maliket iran mangabrasa ed sika ed satan ya okasyon tan diad amin iran miting da ed panagaral na Biblia a gagawaen diad saray Kingdom Hall da.

Akin ya agmanaral a nagkalalo ni, aliwa lambengat ed impatey tan inkioli nen Jesus noagta nipaakar met ed impanbilay tan saray bangat to? Iimbitaan to itayon ondago ed sikato. (Mateo 11:28-30) Onkiwas la natan a mangala na suston pikakabat nipaakar ed si Jehova a Dios tan si Jesu-Kristo. Say panggawa ed satan et mankabaliksan na magnayon a bilay ed silong na Panarian na Dios diad lima na pinabli ton Anak.

[Paimano ed leksab]

[Saray litrato ed pahina 7]

Minilyon natan so makakaromog na tuan liket bilang papatumbok nen Jesu-Kristo

[Picture Credit Line ed pahina 6]

Nanlapud Self-Pronouncing Edition of the Holy Bible, a lugan toy King James tan say Revised iran bersion