Uusayen so Inkioli nen Jesus

“Nidiretsak ed sikayo ya anggaman sigpot a makaseguro itayo a nambilay si Jesus . . . , agtayo segurado a nibaga ya amta tayon Sikatoy pinaoli na Dios manlapud saray inaatey.” Ontan so inkuan na manunaan ya obispo na Church of England, say Arsobispo na Canterbury.

ANDIAN na panduaruwa so Kristianon apostol Pablo nipaakar ed inkioli. Diad kapitulo 15 na inmunan apuyanan a sulat to ed saray kaparan Kristiano ed Corinto nensaman, insulat nen Pablo: “Imbangat ko ed sikayo ya inmuna so inawat ko met, si Kristo inatey lapu ed saray kasalanan tayo unong ed saray sulat; tan inkotkot; tan inmolin binmilay nen komatlon agew unong na saray sulat.”​—1 Corinto 15:3, 4.

Lapud pananisia ed inkioli nen Jesu-Kristo et apakiwas iray babangatan to a mangipulong ed ebanghelyo diad intiron Griego-Romano a mundo​—“ed amin a pinalsa ed leksab na tawen.” (Colosas 1:23) Diad tua, say inkioli nen Jesus so mismon letnegan na Kristianon pananisia.

Balet, nanlapu la’d gapo et dakel so manduaruwa tan agmanisia ed inkioli nen Jesus. Parad saray Judio ed inkalapagan, agpanagrespeto ed biang na saray patumbok nen Jesus no ikuan dan sayan impasak a too et sikato so Mesias. Tan parad maslak ya edukado iran Griego, kagula ra so mismon ideya nipaakar ed kioli lapud pananisia ra ed imortalidad na kamarerwa.​—Gawa 17:32-34.

Saray Manduaruwa Natan

Diad agano niran taon, pigaran iskolar a mankuan a Kristianos so angipalapag na saray libro tan artikulo a mangipapasen ed inkioli nen Jesus bilang gawagawa labat tan angigapo ra na pirmin debati ed sayan tema. Diad panaanap da ed “maawaran a Jesus,” isusuppiat na nanduruman iskolar a saray salaysay na Ebanghelyo nipaakar ed anggapoy karga a lubok tan saray impayawar nen Jesus kayari inkioli to et gawagawa labat, ya inimbento lan abayag kayari impatey to ta pian suportaan so ibabagan mangatatawen a pakapanyari to.

Alimbawa, konsideraen pa so panmoria na Aleman ya iskolar a si Gerd Lüdemann, propesor na New Testament tan autor na libron What Really Happened to Jesus​—A Historical Approach to the Resurrection. Isusuppiat to a say inkioli nen Jesus et “anggapoy basiyan a diparan” a nepeg ya ag-awaten na siopaman a walaan na “sientipikon panmoria ed mundo.”

Ipipilit nen propesor Lüdemann a say apaolin  Kristo a pinmayawar ed si apostol Pedro et sakey a pasingawey a resulta na pirmin paneermen tan kasalanan nen Pedro lapud impangiburi to’d si Jesus. Tan unong ed si Lüdemann, say impayawar nen Jesus ed masulok a 500 a mananisia ed sakey ya inkagawa et sakey kaso na “pirmin panliket na dakerakel.” (1 Corinto 15:5, 6) Diad antikey, ipapasen na dakel ya iskolar iray salaysay na Biblia nipaakar ed apaolin Jesus bilang nantutumbokan a ninonot labat iran agawa ya amawala ed saray babangatan na apasimbalon dilin-kompiyansa ed espiritual tan seseg ed panagmisionaryo.

Siempre, dakel so agtanto interesado ed akademiko iran isyu. Balet, nepeg ya interesado tayon amin ed paningbat ed inkioli nen Jesus. Akin? Lapud ta no sikatoy ag-inmoli, say Inkakristiano so nibase ed palson letnegan. Diad biek a dapag, no peteg a katuaan ed awaran so inkioli nen Jesus, say Inkakristiano so nibase ed katuaan. Lapud saratan a sirkumstansia, aliwa lambengat a saray ibabaga nen Kristo so niyalangon noagta ontan met ed saray sipan to. Sakey ni, no walay kioli, say ipapatey so aliwan baleg a mananalo noagta sakey a kabusol a nayarin taloen.​—1 Corinto 15:55.

[Picture Credit Line ed pahina 3]

Nanlapud Self-Pronouncing Edition of the Holy Bible, a lugan toy King James tan say Revised iran bersion