Nayarian Mon Gamoran Iray Bendision na Panarian

SAY Kristianon apostol a si Pablo so marlas a mansalita na pigaran manunan lenguahe nen panaon to. Sikato so akapanaral a mipara ed edukasyon ed unibersidad natan. Nanggayagaan to so amin iran bentaha tan kanepegan na sakey a Romanon mibabaley. (Gawa 21:37-40; 22:3, 28) Sarayan kualipikasyon so nanggawa komon ed sikaton magmaliw a mayaman tan balitado. Ingen, inkuanto: “No anto so saray bengatla a tobo wari ed siak, imbilang ko ran kaleregan nipaakar ed Kristo . . . tan ibilang ko ra ya andi kakanaan a dutak, pian nagamoran ko si Kristo.” (Filipos 3:7, 8) Akin ya imbaga nen Pablo itan?

Datin kabkabat bilang Saulo a taga-Tarso tan manamasegsegang ed saramay “wala ed sayan Dalan,” si Pablo so nagmaliw a mananisia kayarin naikdan na pasingawey na say apaoli tan nigloria a si Jesus. (Gawa 9:1-19) Parad si Pablo, sayan naeksperiensia to ed dalan a mamaarap ed Damasco so andi-duaruwan amaneknek a si Jesus so insipan a Mesias, odino Kristo, say man-ari ed insipan a Panarian. Satan met so baleg ya impangumanan ed kurang na bilay nen Pablo, a singa napatnagan ed mapuersan balikas to ya asalambit ed tagey. Diad arum a panangibaga, lapud masimoon tan matua ed puso, nagbabawi si Pablo.​—Galacia 1:13-16.

 Diad Biblia, say verb a “magbabawi” so naynay ya ipapatalos ed Griegon salita a literal a mankabaliksan a “kasumpal a naamtaan,” a kasunian na “dati lan amta.” Kanian say pagbabawi et lalanoren toy pamasimbalo ed kanonotan, awawey, odino gagala, say pangipulisay ed dati iran kagagawa ya aliwan maabig. (Gawa 3:19; Apocalipsis 2:5) Diad kaso nen Pablo, agto inabuloyan itan a makatantandan inkagawa diad dalan a mamaarap ed Damasco a mansiansian basta labat emosyonal odino espiritual ya eksperiensia. Parad sikato, satan so impakaamta ed katuaan a say datin kabibilay to, say agpikabat ed si Kristo, so kaapaan. Amoria to met, a pian minabang manlapud balo nin nalmoan to a pikakabat nipaakar ed si Kristo, sikatoy nepeg ya onkiwas pian pasimbaloen toy kurang na bilay to.​—Roma 2:4; Efeso 4:24.

Pamasimbalo ya Angitarok na Saray Bendision

Dati, karaklan ed amta nen Pablo nipaakar ed Dios so nanlapu ed sekta na saray Fariseo, a sikato so membro na satan. Kabiangan ed saray sisiaen da iray dakel a pilosopiya tan tradisyon na too. Lapud relihyoso iran panangidumaduma, aliwa so inkipaarapan na seseg tan saray sagpot nen Pablo. Anggaman inisip ton sikatoy manseserbi ed Dios, sikato so diad tua et onsusumpa ed sikato.​—Filipos 3:5, 6.

Kayari ton naawat so suston pikakabat nipaakar ed Kristo tan say betang to ed gagala na Dios, atebek nen Pablo a sikatoy kaukolan a manpili: Kasin sikatoy mansiansia a Fariseo tan panggayagaan so posisyon tan kagalangan, odino pasimbaloen to so kabibilay to tan onggapon manggawa na nakakaukolan pian nagamoran toy abobon na Dios? Makapalikliket ta susto so pinili nen Pablo, lapud inkuanto: “Agko ibaing so ebanghelyo: ta sikato so pakayari Dios ed kilalaban na balang sakey a manisia; unona ed Judio, insan met ed Griego.” (Roma 1:16) Nagmaliw a maseseg a managpulong na maong a balita si Pablo nipaakar ed Kristo tan say Panarian.

Apalabas so dakel a taon, inkuan nen Pablo ed saray kapara ton Kristiano: “Agko ibilang so inkasiak a dili a sikato so akapet ko la: noag sakey so gawaen ko, lingwanan so saray bengatlan abenegan, tan dampoten ko so saray bengatla a wala ed unaan, Ontundas ak a mamaarap ed kalat a nipaakar ed pakalak na tumang na atagey a panatawag na Dios dia ed Kristo Jesus.” (Filipos 3:13, 14) Agunggunaan si Pablo manlapud maong a balita lapud mabulos ton tinaynan so mangikakasipa ed sikato manlapud Dios tan sigpot-puso ton dinampot iray kalat a mitunosan ed gagala na Dios.

Anto so Gawaen Mo?

Nayarin agano nin nadngel mo so maong a balita na Panarian. Kasin makapasagyat ed sika so ilalon pambilay ya andi-anggaan diad ayadyarin paraiso? Nepeg labat ya ontan, lapud amin tayo so walaan na nisipor a pilalek a manbilay tan panggayagaan so bilay ed kareenan tan kaligenan. Ibabaga na Biblia ya impasen na Dios so “kaandoan” ed puso tayo. (Eclesiastes 3:11) Kanian natural labat ed sikatayo a manilalo ed panaon sano say totoo so makapambilay ya ando lan ando ed kareenan tan liket. Tan satan so iyoopresi na maong a balita na Panarian.

Balet, pian magmaliw a tua itan ya ilalo, kaukolan mon sukimaten tan amtaen no anto so maong a balita. Onia so bilin nen apostol Pablo: ‘Salim [ed inkasika] no anto so maong, tan makapaliket, tan nasnaspot a linawa na Dios.’ (Roma 12:2) Kanian, singa si Pablo, kayarin agamoran so pikakabat tan pakatalos, nepeg moy mandesisyon.

Diad biek a dapag, nayarin wala la ray pigaran sisiaen mo nipaakar ed arapen mo. Nodnonoten a si Saulo so walaan la na saray opinyon nipaakar ed linawa na Dios sakbay a sikatoy nagmaliw ya apostol Pablo. Ingen, imbes ya ilaloan so mamilagron panangiparungtal manlapud Dios, akin ya agnengnengen so pamaakaran ed balansin paraan? Tepetay inkasika: ‘Kasin peteg ya amtak no anto so linawa na Dios nipaakar ed katooan tan say dalin? Anto so niiter kon prueba a mamekder ed saray sisisiaen ko? Kasin makatalindeg so pruebak sano usisaen unong ed liwawa na Salita na Dios, say Biblia?’ Anggapoy nabalang ed sika no usisaen mo iray relihyoson sisiaen ed ontan a paraan. Diad tua et nepeg a labay mon gawaen itan lapud ipapaseseg na Biblia ed sikatayo a: “Salsalien yo ya ami ganagana; et mansiansia  kayo ed maong.” (1 Tesalonica 5:21) Tutal, agta say abobon na Dios so nagkalalon importanti?​—Juan 17:3; 1 Timoteo 2:3, 4.

Nayarin isipan na saray relihyoson lider ed sikatayo so magnayon ya arapen. Balet no agnibase itan a sipan ed saray bangat na Biblia, ag-itan ontulong ed sikatayon nagamoran iray bendision na Panarian na Dios. Diad bantog a Sermon to ed Palandey, mabiskeg ya impasakbay nen Jesus: “Aliwan balang sakey a mankuan ed siak na, Katawan, Katawan, et onloob naani ed panaria’y tawen; noag ingen say mangunor na linawa nen Amak a wala ed tawen.”​—Mateo 7:21.

Imanoen ya indanet nen Jesus so pangunor na linawa nen Ama to bilang say estandarte parad pangawat na saray bendision ed Panarian na Dios. Diad arum a panangibaga, aliwan naynay a basiyan ed pangabobon na Dios so ompatnag a maridios. Diad tua, intuloy nen Jesus: “Dakel naani ray mankuan ed siak no saman ya agew, Katawan, Katawan, agkami ta angipropeta lapu ed ngaran mo, tan diad ngaran mo pinapaway mi ray demonyo, tan lapud ngaran mo nanggawa kami makapakelaw iran gawa? Et saman ko la ipaliwawa naani ed sikara, Agta kayo apikabkabatan a balot: arawi kayo’d siak, sikayo a managgawa na kaugsan.” (Mateo 7:22, 23) Malinew a say importanti et say paneguro tayo a susto so pakatalos tayo ed no anton talaga so maong a balita na Panarian insan onkiwas a mitunosan ed satan.​—Mateo 7:24, 25.

Wala so Tulong

Diad masulok lan 100 a taon, ipupulong la na saray Tastasi nen Jehova so maong a balita na Panarian na Dios. Panamegley na saray niimprintan palapagan tan say panagpulong, tutulongan daray totoo ed intiron mundo a makagamor na suston pikakabat ed no anto so Panarian, antoran bendision so itarok to, tan no anto so nepeg a gawaen na sakey pian nagamoran iratan a bendision.

Pasesegen mi ka ya onkiwas unong ed mensahen ipupulong na saray Tastasi nen Jehova. Diad pangawat tan ikiwas unong ed maong a balita, naawat moy engrande iran bendision aliwan natan labat noag dia met ed arapen sano say Panarian na Dios so manuley diad intiron dalin.​—1 Timoteo 4:8.

Onkiwas la natan, lapud asingsingger la iray bendision na Panarian na Dios!

[Saray litrato ed pahina 7]

Panamegley na niimprintan palapagan tan say panagpulong, saray Tastasi nen Jehova so mangipupulong ed maong a balita na Panarian na Dios