Say Maong a Balita na Panarian​—Anto Itan?

Katantaon diad 235 a bansa ed intiron mundo, 6,035,564 a totoo, kalangweran tan matakken, so angusar na 1,171,270,425 ya oras pian itongtong ed arum so nipaakar ed satan. Nilikud ed pitotongtong, akapangipalima ira ed publiko na masulok a 700 milyon a kopya na niimprinta a materyal pian nipakabat tan nipaliwawa itan. Angibunog met ira na nilibo iran audiocassette tan videocassette pian niyabawag itan. Anto “itan”?

MAONG a balita na Panarian na Dios “itan”. On, agnin balot agawa ed awaran na totoo a “saya ya ebanghelyo na panarian” so nipulong ed onian kalaknab a singa nanenengneng tayo natan.​—Mateo 24:14.

Saramay manggagawa na sankamundoan a panagpulong tan panagbangat a kimey so boluntaryon amin. Diad sekular a punto de bista, nayarin ompatnag ya ag-ira onkualipika parad satan a kimey. Sirin, anto so tinmulong parad inkakpel tan intalona ra? Say pakayari na maong a balita na Panarian so manunan akatulong, lapud satan so balita nipaakar ed saray bendision ya onsabi ed katooan. Saraya so bendision a pampilpilalekan na amin a totoo parad​—liket, kaandi la na kairapan ed bilay, maabig a gobierno, kareenan tan kaligenan, tan sakey a bengatlan agnapanisiaan na karaklan​—say andi-anggaan a bilay! Talagan saya so maong a balita parad totoon manaanap na kabaliksan tan gagala na bilay. On, amin irayan bendision tan dakel nira so nagamoran mo no awaten mo tan onkiwas ka a paborabli ed panangiyabawag ed maong a balita na Panarian.

Anto so Panarian?

Balet, anto so Panarian a niyaabawag bilang maong a balita? Satan so Panarian a nibabangat la ed minilyon ya ipikasi ed sarayan kabisadon salita: “Ama min wala ka ed tawen, Nagalang komon so ngaran mo. Onsabi komon so panarian mo. Nagawa komon so linawam, unong ed tawen, ontan met ed dalin.” ​—Mateo 6:9, 10.

Sinalita itan a Panarian na Hebreon propeta a si Daniel masulok a 25 a siglo lay apalabas sanen insulat to: “Say Dios na tawen mamaalagey naani na sakey a panarian ya angan kapigan agnaani naderal tan say panaguley to agnaani niiter ed sananey a baley: balet buybuyaken to naani tan upoten to naani so saraya ya amin a panarian, et sikato so mansiansia lawas.”​—Daniel 2:44.

Kanian, say maong a balita so nipaakar ed Panarian, odino gobierno na Dios a mangekal ed amin a kaugsan insan manguley ed intiron dalin diad kareenan. Sumpalen na satan so orihinal a gagala na Manamalsa parad katooan tan parad dalin.​—Genesis 1:28.

 “Say Panarian na Tawen Asingger la”

Ngalngali 2,000 a taon lay apalabas, say maong a balita na Panarian so pilimeron inyabawag ed publiko na maseseg a laki a say itsura tan indengan to et sankaimanon tuloy. Satan a too et si Juan a Bautista, ya anak na Judion saserdote a si Zacarias tan say akulaw to, si Elizabeth. Si Juan so akakawes na bagoy kamelyo, ya akabalkes na katat, a singa ed si propetan Elias, ya angiyanino ed sikato. Balet say mensahe to so akasagyatan na karaklan. Inyabawag to: “Manpataoli kayo; ta say panarian na tawen asingger la.”​—Mateo 3:1-6.

Saray dumerengel nen Juan et saray Judio, a mangibabagan mandadayew ira ed tuan Dios, si Jehova. Bilang sakey a nasyon, inawat da so Ganggan a sipanan panamegley nen Moises manga 1,500 a taon ed asasakbay. Siansia nin akaalagey ed Jerusalem so marakdakep a templo, a ditan so angiyapayan na saray bagat a mitunosan ed Ganggan. Segsegurado iray Judio a say panagdayew da et duga ed imaton na Dios.

Balet, diad itatalineng ed si Juan, namomoria na pigaran totoo a say relihyon da so aliwa ed samay abaloan da. Akaloob so kultura tan pilosopiya na Griego ed relihyoso iran bangat na Judio. Say ganggan a naawat manlapud Dios panamegley nen Moises so alaokan la, andian la ingen na kakanaan, lapud ginawa na too iran sisisiaen tan tradisyon. (Mateo 15:6) Lapud sikaray nisuawi na saray anawet-puso tan agmapangasi iran relihyoson lider, maslak so agla manlilingkor unong ed paraan ya abobonan na Dios. (Santiago 1:27) Kaukolan a pagbabawian daray kasalanan da ed Dios tan ed Ganggan a sipanan.

Diad saman a panaon, tatalaranan na dakel a Judio so ipatnag na insipan a Mesias, odino Kristo, tan arum so manuumameng ed si Juan: “No sikato kasi ingen so Kristo.” Balet ag-inako nen Juan a sikato iman tan imbes intonton to ira ed sananey, ya inkuan to ed satan: “Agak onnepeg a mangukbar na lubir na sapin to.” (Lucas 3:15, 16) Diad impangipakabat nen Juan ed si Jesus ed saray patumbok to, inkuanto: “Nia, so Korderoy Dios, a mangekal na kasalanay mundo!”​—Juan 1:29.

Peteg a satan so maong a balita, lapud si Juan so mangitotonton ed amin a totoo ed dalan na bilay tan liket​—si Jesus, say “mangekal na kasalanay mundo.” Bilang kapolian nen Adan tan Eva, nianak so amin a totoo diad silong na inkaruksa na kasalanan tan patey. Ipapaliwawa na Roma 5:19: “Lapud katageyan na linawa na sakey a too [Adan] saray dakel nagmaliw ira a makasalanan, ontan met a lapud katutulok na sakey [Jesus] saray dakel, magmaliw ira a matunong.” Si Jesus, singa say imbagat a karnero, so ‘mangekal na kasalanan’ tan salatan to so maermen a kipapasen na kabibilay na totoo. Ipapaliwawa na Biblia a “say bayar na kasalanan say patey; bangbalet say langkap ya andi bayar na Dios say bilay ya andi angga ed Kristo Jesus a Katawan tayo.”​—Roma 6:23.

 Bilang ayadyarin too​—diad tua, say sankatalonggaringan a too a nambilay ed kapiganman​—si Jesus so angipulong ed maong a balita. Say salaysay na Biblia diad Marcos 1:14, 15 so mangibabaga ed sikatayo: “Natan sanen nipangaw la si Juan, linma si Jesus ed Galilea, ya angipulpulong na ebanghelyo na Dios, tan inkukuan to, Say panaon asumpa’la, tan say panarian na Dios asingger la: mansibkel kayo, tan manisia kayo ed ebanghelyo.”

Apaboran a tuloy iramay kinmiwas ed mensahe nen Jesus tan angagamil na pananisia ed maong a balita. Oniay inkuan na Juan 1:12: “Amiamin ya angawat ed [si Jesus], inter to’d sikara so pankatunongan a magmaliw ya anak na Dios, salanti saray manisia ed ngaran to.” Bilang ananak, odino, ilalak na Dios, manatalaran ira a mangawat na tumang ya andi-anggaan a bilay.​—1 Juan 2:25.

Balet aliwan saray inmunan siglon totoo labat so makaawat na saray bendision na Panarian. A singa abitla la, niyaabawag tan nibabangat la so maong a balita na Panarian ed amin a panaayaman a dalin natan. Kanian saray bendision na Panarian so siansia nin wala. Antoy nepeg mon gawaen pian mangawat na saratan a bendision? Say ontumbok ya artikulo so mangisalaysay ed satan.